Bibiriya irasubiza - Recent questions and answers

Answered: Inyigisho: Bimwe mu byaha 70 bivugwa cyane mu isezerano rishya no mu buzima bwa Gikristo

Tue, 27 Oct 2026 18:22:14 +0000

Tubanze dusobanure ko bibiliya idatanga urutonde rw'ibyaha, ndetse n'ibyaha bivugwa muri Bibiliya si byo byaha byonyine. Yesu ajya kugenda, yasize adusezeranije ko hari byinshi Mwuka Wera azatubwira, ndetse n'ibyo We atatubwiye. Rero hari ikintu gishobora kuba kitanditse nk'icyaha muri Bibiliya, ariko Mwuka Wera akaguhamiriza ko ari icyaha.

Yohana 16:12-13 “Ndacyafite ibyo kubabwira byinshi, ariko ubu ntimubasha kubyihanganira. [13]Uwo Mwuka w’ukuri naza azabayobora mu kuri kose kuko atazavuga ku bwe, ahubwo ibyo azumva ni byo azavuga, kandi azababwira ibyenda kubaho. [14]Uwo azanyubahiriza, kuko azenda ku byanjye akabibabwira.

Uru rutonde rw'ibyaha 70 ntirugamije guca umurongo ku byaha byose bibaho, nugira icyo utabonamo ntuzavuge ngo uhawe rugari rwo kugikora, ahubwo rugamije kungura ubwenge no kongerera ubumenyi abafite umuhate wo guhunga icyaha, hato hatazagira ugwa mu cyaha akitwaza ko atari azi ko ari icyaha. Ikindi kandi, hano turivugira gusa ibyaha bikunze kuvugwa cyane muri isezerano rishya, bikongera bikanaboneka kenshi mu buzima bwa Gikristo

Zaburi 119:11 "Nabikiye ijambo ryawe mu mutima wanjye, Kugira ngo ntagucumuraho."

Uru rutonde rushobora kwifashishwa mu nyigisho zivuga ku kwihana, kwezwa no kubaha Imana.

TUBIREBERE HAMWE MU BYICIRO BYABYO, N'IMIRONGO YA BIBILIYA: (Kubera ikibazo cy'imisemurire y'ururimi rw'ikinyarwanda, buri jambo twarishyiriyeho uko rivugwa mu gifaranza no mu cyongereza kugirango birusheho gusobanuka. Ikindi ni uko ijambo rimwe rishobora kuvugwa mu buryo butandukanye bitewe na version ya Bibiliya ukoresha)

1. Ibyaha byo mu mutima no mu bitekerezo

Ubwibone / orgueil / pride / — Mariko 7:21-22
Urwango / La haine / Hatred / — 1 Yohana 3:15
Kwifuza nabi / L'envie / Envy / — Abagalatiya 5:26
Ishyari / La jalousie / Jealousy / — Abagalatiya 5:20
Ubugome / La méchanceté / Wickedness / — Abaroma 1:29
Umururumba wo kwifuza ubutunzi / La cupidité / Greed /— Luka 12:15
Irari / La convoitise / Lust / — Abakolosayi 3:5
Ibitekerezo bibi / Les mauvaises pensées / Evil thoughts / — Matayo 15:19
Inzika / La rancune / Resentment / — Abefeso 4:31
Umujinya wo mu mutima / L'amertume / Bitterness /— Abaheburayo 12:15

2. Ibyaha byo mu mvugo

Kubeshya / Le mensonge / Lying / — Abakolosayi 3:9
Gusebanya / La calomnie / Slander / — Abakolosayi 3:8
Kuvuga abandi nabi / La médisance / Gossip and backbiting — Abaroma 1:30
Amagambo ateye isoni / Les paroles obscènes / Obscene language / — Abefeso 5:4
Amagambo atukana (Gutuka uwo mutari kumwe) / Les paroles injurieuses / Abusive speech / — Abakolosayi 3:8
Gushinja ibinyoma / Faux témoignages / False testimony / — Matayo 15:19
Gutukana (Uwo muri kumwe) / Les insultes / Insults / — Matayo 5:22
Amagambo y'impfabusa / Les paroles vaines / Vain words / — Matayo 12:36
Gusingiza abandi ngo ubakureho indamu / Les flatteries trompeuses / Deceptive flattery — Yuda 1:16
Intonganya / Les querelles / Verbal quarrels / — Efeso 4:31

3. Ibyaha by’ubusambanyi no kwiyanduza

Kuryamana n’uwo mutashakanye, akaba yarashatse cyangwa wowe warashatse / L'adultère / Adultery / — Matayo 5:27-28
Ubusambanyi muri rusange / La fornication / Fornication / — 1 Abakorinto 6:18
Ibikorwa by’umwanda mu mibonano mpuzabitsina / L'impureté sexuelle / Sexual impurity / — Abaheburayo 13:4
Iby’isoni nke bisa n'imyifatire y’ubusambanyi / La débauche / Debauchery — Abagalatiya 5:19
Kwiyonona / L'impudicité / Indecency / — Abefeso 5:3
Gukoresha imibiri uburyo bunyuranye n'ubwo yaremewe / Les passions déshonorantes (infames) / Dishonorable passions — Abaroma 1:26
Ubuhehesi no kureba umuntu ukamwifuza mu mutima / Les désirs mauvais / Evil desires / — Abakolosayi 3:5
Ubutinganyi / homosexualité / Homosexuality / -- 1 Abakorinto 6:9, Abaroma 1:27 — Abaroma 1:26-27
Kuryamana n’umuntu mufitanye isano ya hafi / L'inceste / Incest / — 1 Abakorinto 5:1
Kwigisha cyangwa gushora undi mu busambanyi / L'exploitation sexuelle / Sexual exploitation / Ibyahishuwe 2:20

4. Ibyaha by'iraha no kunezeza umubiri n'isi

Ubusinzi / L'ivrognerie / Drunkenness / — Abagalatiya 5:21
Ivutu (kurya birenze urugero) / Les excès de table / Overindulgence in food / — Luka 21:34
Kunywa ibisindisha / Les beuveries / Drinking acohol / — 1 Abatesaloniki 5:6,8
Gukunda ibinezeza aho gukunda Imana / L'amour du plaisir / Love of pleasure — 2 Timoteyo 3:4
Gukunda amafaranga n'iby'isi / L'amour de l'argent / Love of money / — 1 Timoteyo 6:10; 1 Yohana 2:15
Kwikunda no kutazirikana abandi: / L'amour de soi et ne pas considerer les interets des autres / Not considering the interests of others / Abafilipi 2:3-4
Kutanyurwa / L'insatisfaction / Not being content with what you have. / — Abaheburayo 13:5
Kwica gahunda, kudashaka gukora no kuba kazitereyemo / L'oisiveté désordonnée / Live and walk disordely, busybodies / — 2 Abatesalonike 3:11
Kwirata iby'ubu bugingo (ibyo ufite) / L'orgueil lié à ses possessions. / Pride in one's possessions — 1 Yyohana 2:16
Kuba igisonga kibi, gucunga nabi ibyo waragijwe / gaspillage irresponsable des biens confiés / Irresponsible waste of entrusted possessions /— Luka 16:1-2

5. Ibyaha mu mibanire n’abandi bantu

Amakimbirane / Les querelle / Quarreling / Yakobo 3:14
Amacakubiri / Les divisions / Divisions / — Abaroma 16:17
Impaka z’ubupfu zidafite umumaro / Les discussion folle inutilles / Arguments and foolish disputes — 2 Timoteyo 2:23
Uburakari / La colère / Anger / — Abefeso 4:31
Urugomo / La violence / Violence / — Abaroma 1:29-30
Kwanga kubabarira / L'absence de pardon / Unforgiveness / — Matayo 6:14-15
Kwihorera / La vengeance personnelle / Personal vengeance — Abaroma 12:19
Gukandamiza abakene n’abanyantege nke / L'oppression des faibles / Oppression of the weak — Yakobo 5:4-6
Kurobanura ku butoni / Le favoritisme / Favoritism / — Yakobo 2:1-9
Kwiba / Le vol / Thef / — Abefeso 4:28

6. Ibyaha by'imyizerere

Gusenga ibigirwamana / L'idolâtrie / Idolatry / — 1 Abakorinto 10:14
Ubupfumu / La sorcellerie / Sorcery / — Abagalatiya 5:20
Gutuka Imana no kuyivuga nabi / Le blasphème / Blasphemy / — Mariko 3:28-29
Kutizera / L'incrédulité / Unbelief / — Abaheburayo 3:12
Uburyarya mu byo kwizera / L'hypocrisie religieuse / Religious hypocrisy / — Matayo 23:27-28
Kwimura Imana / L'apostasie / Apostasy / — Abaheburayo 3:12
Kutumvira Imana / La désobéissance à Dieu / Disobedience to God / — Abefeso 5:6
Gukunda iby’isi kuruta Imana / L'amour du monde au détriment de Dieu / Love of the world at the expense of love for God / — 1 Yohana 2:15-16
Kugerageza Imana / La tentation de Dieu / Putting God to the test / — 1 Abakorinto 10:9
Kwanga kwihana / Le refus de se repentir / Refusal to repent / — Ibyahishuwe 2:21

7. Ibyaha by’ubutabera n’imyitwarire ikwiriye Umukristo

Kurenganya / L'injustice / Unrighteousness (Injustice) — 1 Abakorinto 6:9
Kunyaga iby'abandi / Les ravisseurs / / Extortioning— 1 Abakorinto 6:10
Ubwambuzi bushukana / L'escroquerie / Fraud and swindling / — 1 Abakorinto 6:10
Kwica umuntu / Le meurtre / Murder / — Matayo 15:19
Kutumvira ababyeyi / La désobéissance aux parents / Disobedience to parent — Abaroma 1:30
Kuba indashima / L'ingratitude / Ingratitude / — 2 Timoteyo 3:2
Kugambanira abandi / La trahison / — 2 Timoteyo 3:4
Kwirarira, kwirata, kwiyemera / La présomption / Recklessness and arrogance / — 2 Timoteyo 3:2
Kuba uzi gukora neza ntubikore / Le refus de pratiquer le bien que l'on sait devoir faire / Refusing to do good if you know to do it. — Yakobo 4:17
Kwima abakozi ibihembo byabo / Priver les travailleurs de leur salaire / Denying workers their rightful pay. / — Yakobo 5:4

Icyo dukwiriye kuzirikana:

Bibiliya ntitwereka ibigize ibyaha kugira ngo tujye duciraho abandi imanza, ahubwo ibitwereka kugirango ubwacu twisuzume, kuko Bibiliya ni indorerwamo ntabwo ari retroviseur, kandi akamaro k'indorerwamo twese turakazi.

“Ngaho nimwisuzume ubwanyu, mumenye yuko mukiri mu byo twizera kandi mwigerageze. Mbese ntimwimenya kandi ntimuzi yuko Yesu Kristo ari muri mwe? Keretse ahari mubaye abagawa.” — 2 Abakorinto 13:5

Icyo ugomba gukora igihe wibonyeho icyaha runaka:

1. Kwihana: Imana ihamagarira umunyabyaha kureka inzira ze mbi akayigarukira. Ibyakozwe n’Intumwa 3:19

2. Kubabarirwa: Iyo twatuye ibyaha byacu, Imana ni iyo kwizerwa kandi irakiranuka, ikatubabarira ibyaha byacu ikatwezaho gukiranirwa kose. 1 Yohana 1:9

Icyitonderwa cya nyuma

Uru rutonde ni incamacye y'ibyaha n’imyitwarire mibi bikunze kugaragara mu bizera, ntabwo ari urutonde rw'ibyaha byose bibaho. Ukuri guhari ni uko ibyaha byose bibaho biramutse bishyizwe ku rutonde, sinzi uko urwo rutonde rwaba rureshya.

N.B: Twabiteguye twifashishije inyigisho ya Pastor Moise K.

By. Ev. Innocent Munayneza

Answered: Ibimenyetso 30 byuko ukuze mu mwuka

Fri, 23 Oct 2026 20:52:42 +0000

Mu nyigisho mperuka gutanga ytwa "Inzego 7 z'umunyamasengesho" hari aho nageze ku rwego rwa 6 mvuga yuko muri uru rwego umuntu ashyira hasi ibyo kuba umwana mu Mwuka, akareka kunywa amata y'abana agatangira kuguguna amagufwa nk'abantu bakuru. Aho ni ho bamwe bambajije uko wamenye umukristo w'umwana mu Mwuka n'ukuze mu Mwuka, bintera gutegura iyi article.

Umukristo wese aho ava akagera, arangwa no gukura akava ku rwego rumwe akajye ku rundi, si ugukura mu mubiri gusa, ahubwo ni mu Mwuka. Ibi rwose ni ihame rishingiye kuri Bibiliya, ndetse Pawulo hari ahantu yigeze gutangazwa no kubona Abaheburayo basa n'abagwingiye, bakaguma bameze nk'abana bo kuramizwa amata kandi bakagombye kuba bageze nko ku rwego rwo kuba abigisha.

Abaheburayo 5:12-14

« [12] Kandi nubwo mwari mukwiriye kuba abigisha ubu kuko mumaze igihe kirekire mwiga, dore musigaye mukwiriye kongera kwigishwa namwe iby’ishingiro rya mbere ry’ibyavuzwe n’Imana, kandi mwahindutse abakwiriye kuramizwa amata aho kugaburirwa ibyokurya bikomeye,» [13] kuko unywa amata aba ataraca akenge mu by’ijambo ryo gukiranuka kuko akiri uruhinja, [13] ariko ibyokurya bikomeye ni iby’abakuru bafite ubwenge, kandi bamenyereye gutandukanya ikibi n’icyiza.

Noneho umuntu yakwibaza ati "N iki kigaragaza umuntu ukuze mu Mwuka? cyangwa nabwirwa n'iki niba nanjye nkuze mu Mwuka cyangwa naragwingiye?

Hari ibimenyetso 30 by'ingenzi bigaragaza Umukristo ukuze mu Mwuka, ariko mbere yo kubivuga reka tuvuge ko gukura mu Mwuka:

- Ntaho bihuriye n'imyaka umaze mu rusengero

- Ntaho bihuriye n'imirimo cyangwa inshingano ufite mu rusengero

- Ntaho bihuriye n'imyaka y'ubukure, amashuri cyangwa ubundi bumenyi

- Ntaho bihuriye n'ubwinshi bw'ibyanditswe waba uzi

Ahubwo bigaragarira cyane cyane mu mibereho yawe, uko witwara mu bibazo, uko ubabarira abandi n’uko wumvira Imana. Twakusanyije ibimenyetso bigera kuri 30 bigaragaza umukristo ukuze mu Mwuka. Iyo ntabwo ari liste twaciyeho umurongo nkaho nta kindi cyakwiyongeraho, ariko muri rusange iyo ubifite uba uri umukristo ukuze mu Mwuka.

1. Gukunda Bibiliya, kumva no kumvira Imana n’iyo nta muntu ukureba.

Gukura mu mwuka bituma ushyira imbere Ijambo ryayo, ugakunda gusoma Bibiliya nta gahato, ugakunda kumvira Imana no kuyubaha, ahantu hose no mu bihe byose, utitaye ku kuntu abandi bakubona nuramuka uyumviye. --- Zaburi 119:105; 1 Samuel 15:22 ; Gutegeka kwa kabiri 28:1-2 ; Yohana 14:21

2. Ntukubitisha abandi impano wahawe cyangwa ngo ubakange.

Iyo ukuze mu Mwuka, ntukangisha impano wahawe ngo uyikoreshe mu kwemeza abandi ko uri umunyamwuka kubarusha. Usobanukirwa ko iyo mpano ari inzira Imana igucishamo gusa, ngo igirire neza abantu bayo, iyo wayihawe ntuyikoresha ngo wemeze abandi ko ubarenze. Ntuvuga mu ndimi igihe kitari icyo kuvuga mu ndimi, ntuhanura igihe kitari icyo guhanura, mbese umenya neza ko "umwuka w'abahanuzi ugengwa na bo" -- 1 Abakorinto 14:32; 1 Abakorinto 12:7; 1 Abakorinto 4:7

3. Ntuhora ushaka gushimwa n’abantu kurusha gushaka gushimwa n'Imana.

Umukristo ukuze mu Mwuka aba azi ko agaciro ke gashingiye ku gushimwa n'Imana, aho gushimishwa no gukomerwa amashyi no gushimwa n’abantu. Byumvikane ko gushimwa n'abantu atari bibi, ariko kwifuza gukomerwa amashyi utanarebye icyo Imana ikuvugaho na byo si byo— Abagalatiya 1:10.

4. Ntutera Imana umugongo kubera ko unyuze mu bigeragezo.

Ukwizera kwawe ntigushingira gusa ku bihe byiza urimo. N’iyo wahura n'ikome ry'ibikugerageza, ukomeza kwizera Imana. — 2 Abakorinto 6:9-10; 1 Petero 4:12-13

5. Ushaka kubana n’Imana kuruta gushaka imigisha yayo gusa.

Iyo ukuze mu Mwuka, ushaka Imana ubwayo kuruta imigisha iguha, kuruta ubutunzi n’indi migisha ishobora guturuka kuri Yo. Ushyira imbere Utanga kuruta ibyo atanga. -- Yohana 6:26-27; Matayo 6:33; Habakuki 3:17-18; Kuva 33:15; Abafilipi 3:8;

6. Kwicisha bugufi

Iyo ugeze ku ntsinzi, ntiwibagirwa Imana yaguhaye imbaraga n’ubushobozi bwo kugera aho ugeze. Ntanubwo utekereza ko abandi hari icyo bazira kuba bataragera aho ugeze. Ntunatekereza ko abataragera aho uri badakwiye kubahwa — Gutegeka kwa Kabiri 8:17-18; Yakobo 4:6; Abafilipi 2:3

7. Gukunda amahoro, kwanga guteza amakimbirane n'abandi.

Uharanira kubaho mu mahoro no kubana amahoro n'abantu bose uko bishoboka kose, aho gushaka guhora mu ntonganya no mu mpaka. — Abaroma 12:18.

8. Uzi gutandukanya amahirwe n’ibikurangaza, no kwirinda ibidafite icyo bikumariye

Usobanukirwa ko muri iyi si hari ibintu byinshi bidafite icyo bikumariye, bidafite icyo bikongerera kabone n'iyo nta cyo bikugabanyiriza. Nta nyongeragaciro bikuzanira, kabone n'iyo byaba atari icyaha, mwene ibi bintu witoza kubyirinda. Umenya ko atari buri kintu cyose ushobora gukora kiba ari ingirakamaro cyangwa kigufitiye akamaro mu buryo bw’umwuka. — 1 Abakorinto 10:23.

9. Uharanira kurinda ubuzima bwawe bw’umwuka.

Witondera ibyo ureba, ibyo wumva, abo usabana na bo n’ibyo wemera kwinjiza mu mutima wawe, urinda umutima wawe kuruta ibindi byose. — Imigani 4:23.

10. Ubuzima bwa wenyine bwubahisha Imana n'iyo ntawe ukureba.

Ukwizera kwawe ntigushingira ku kuba uhora uri kumwe n’abandi. N’iyo nta muntu waba uri hafi yawe, ukomeza kugirana na we ubusabane. Ntusenga kuko uri kumwe n'abandi, ntusoma Bibiliya kuko uri kumwe n'abandi.... ubuzima bwa wenyine bugaragaza urwego witaye ku by'Imana. Zaburi 63:7; Matayo 6:6; Mariko 1:35

11. Uzi gutegeka ururimi rwawe.

Iyo ukuze mu Mwuka ntuba ugikeneye gusubiza buri wese ugusembuye. Wiga gutega amatwi no gutuza mbere yo kugira icyo uvuga, ubasha kugenga ururimi rwawe. Ntuganzwa no kugira icyo uhita uvuga utabanje kugitekerezaho. Ubanza gutega amatwi no gusuzuma ibyo wumvise. — Yakobo 1:19. ; Imigani 13:3.

12. Uzi kwemera amakosa yawe.

Umukristo ukuze mu mwuka ntahora ashaka kwisobanura cyangwa kwerekana ko atajya akora amakosa. — Imigani 28:13.

13. Urababarira aho gushaka kwihorera.

Umukriso ukuze mu Mwuka ntatekereza kwirwanirira no kwihorera. Areka Imana ikaba ari yo ica imanza mu butabera bwayo, kandi agahitamo kubabarira no kutagumana inzika mu mutima we. — Abefeso 4:32.

14. Ubasha gutandukanya ibiva ku Mana n’ibidaturuka kuri Yo.

Umukristo ukuze mu Mwuka ntiyasama ngo amire bunguri buri kintu cyose yumvise. Amenya kugenzura ibyo yigishwa kugira ngo amenye niba bihuje n’ukuri kw’Imana. — 1 Yohana 4:1 ; Ibyakozwe n'intumwa 17:10-11

15. Uzi kuvuga OYA aho biri ngombwa.

Habaho abantu benshi bagorwa no kuvuga OYA. Ntabwo buri busabe bwose ariko bukwiriye Yego. Aho biri ngombwa, umukristo ukuze mu Mwuka ntatinya kuvuga "Oya". Umukristo ukuze mu Mwuka abigaragariza mu kwifata no kurwanya ibyifuzo n'ibintu byose byamushyira mu kaga ko gukora icyaha. Ntava mu byaha gusa, ahubwo ava no mu bidatunganye. — 2 Timoteyo 2:19.

16. Wemera gukosorwa no kugirwa inama.

Iyo ukuze mu Mwuka wemera ko guhugurwa no gukosorwa bishobora kugufasha guhinduka no gukura mu bwenge no mu kwizera. — Imigani 12:1.

17. Ushobora kwishimira ibyiza abandi bagezeho.

Iyo ukuze mu mwuka, witandukanya n’ishyari cyangwa kwigereranya n’abandi, ahubwo ukishimana n’abishimye. — Abaroma 12:15.

18. Wiga gutegereza igihe cy’Imana.

Iyo ukuze mu Mwuka ntuhatiriza ibintu byose ngo bibe ako kanya uko ubyifuza no mu gihe ubyifuzamo. Wiga kwihangana no kwizera ko Imana ifite igihe cyayo cyagenwe. — Zaburi 27:14; Yesaya 60:22

19. Usenga n’iyo utabishaka kubera uko wiyumva.

Iyo ukuze mu Mwuka, usabana n’Imana bidatewe n’amarangamutima yawe gusa. Ukomeza gusenga no mu gihe udashaka gusenga. — 1 Abatesalonike 5:17.

20. Uzi kubika ibanga umuntu yakubikije.

Umenya ko atari amakuru yose ugomba gusakaza. Wubaha icyizere abandi bakugirira. — Imigani 11:13.

21. Uzi gutandukanya igihe cyo kuvuga n’igihe cyo guceceka.

Umenya ko hari igihe cyo kuvuga n’igihe cyo guceceka, kandi ko ubwenge ari ukumenya igihe gikwiye kuri buri kimwe mu mwanya wacyo. — Umubwiriza 3:7.

22. Ntucira abandi imanza uhubutse.

Wiga kureba abandi ubigiranye imbabazi, ubutabera n’ukuri, aho guhita ubacira urubanza utabanje gusobanukirwa neza. — Matayo 7:1-5.

23. Gukorera abandi utarwanira imyanya y’icyubahiro.

Witoza gukorera abandi, no kubagirira neza, kuko Yesu yerekanye ko gukomera nyakuri bitagaragarira mu gutegeka abandi, ahubwo bigaragarira mu kubakorera. — Mariko 10:43-45.

24. Urukundo.

Urukundo ni ingangagaciro ya mbere ku mukristo ukuze mu Mwuka. Urakunda kugeza aho ubasha no gukunda abatagukunda. Urukundo rwa gikristo ntirugarukira ku bantu mwemeranya muri byose. Ushobora gukomeza gukunda umuntu n’iyo mwaba mutabona ibintu kimwe. — Yohana 13:34-35; 1 Abakorinto 13:1

25. Ntuhora ushaka kwemeza abantu no kugaragaza ko ari wowe ufite ukuri.

Hari igihe uhitamo amahoro aho gutsinda impaka. Usobanukirwa ko gutsinda impaka atari ko buri gihe bisobanura gutsinda mu buryo bw’umwuka. -- Imigani 17:14; 2 Timoteyo 2:23; Imigani 20:3

26. Uzi gutahura hakiri kare abantu cyangwa ibintu bishobora kuguca intege.

Umenya guhitamo abo muba inshuti, ukamenya ko imibanire imwe n’imwe ishobora kwangiza ingeso nziza no kugabanya imbaraga zawe mu by’umwuka. — 1 Abakorinto 15:33.

27. Ukomeza kuba umwizerwa n’iyo nta muntu ugushimira.

Ubwizerwa bwawe ntibushingira ku kuba abantu bakubona, bagushima cyangwa baguha icyubahiro. Ukora ibikwiriye n’iyo nta muntu ubimenya ngo agushime. Yohana 5:44

28. Wemera ibihe Imana ikoresha kugira ngo ikugire umuntu ukuze mu Mwuka.

Umenya kandi ugasobanukirwa ko hari igihe Imana igukoreramo umurimo mu bihe, mu buryo no mu bintu abandi badasobanukirwa, cyangwa nawe ubwawe ntubisobanukirwe, byose ku bw'icyubahiro cy'Imana n'impamvu zayo. Kutumva igisubizo cy’Imana ako kanya ntibisobanura ko itari kumwe nawe. Ntigishwa impaka. Yobu 33:13

29. Imbuto z’Umwuka Wera.

Urukundo, umunezero, amahoro, kwihangana, kugira neza, ingeso nziza, gukiranuka, kugwa neza no kwirinda bigenda birushaho kugaragara mu mibereho yawe. — Abagalatiya 5:22-23.

30. Uva mu bwiza ujya mu bundi, ugenda urushaho gusa na Kristo

Iyi ni yo ntego ikomeye yo gukura mu mwuka: Si ukumenya Yesu gusa, ahubwo ni uguhindurwa kugira ngo urusheho gusa na We mu mico, mu myifatire no mu mibereho yawe. — 2 Abakorinto 3:18; Abaroma 8:29.

UMWANZURO

Gukura mu mwuka si ukuba umuntu utagikora amakosa cyangwa utagihura n’ibigeragezo. Ahubwo ni ugukomeza guhinduka, ukiga kumvira Imana, gukunda abandi, kwicisha bugufi no kwera imbuto zigaragaza imico ya Kristo.

Ibaze uti: Ese uko iminsi ishira, ndushaho gusa na Kristo, cyangwa ndushaho kumumenya mu magambo gusa no kumumenyera?

Kumenya Imana ni byiza, ariko ukwizera gukura ni ukwizera kugaragarira mu mibereho ya buri munsi. Ikindi kandi, ibyo byose uko ari 30 ntibizira rimwe. Uyu munsi ushobora gusanga wujuje 10 ukaba ugifite ibindi ukirwana na byo, ariko nyine ni cyo bita gukura, ibindi ugenda ubishobora hamwe n'igihe.

Uwiteka akomeze atugirire neza.

Ev. Innocent Munyaneza

Answered: Kuki Yesu yavumye igiti cy'umutini kuko atakibonyeho imbuto kandi bitari igihe cyawo cyo kwera imbuto?

Mon, 19 Oct 2026 18:47:26 +0000

Iki ni ikibazo cyiza pe! Umuntu wesee yacyibaza *Kuki Yesu yavumye umutini kuko awubuzeho imbuto, kandi kitari igihe cyawo cyo kwera imbuto?*

Mu rwanda nta biti by'umutini bihaba, ariko ababizi aho biba hari icyo babiziho:

Umutini, ni igiti kigira igihe cyo kwera nk'ibindi biti by'imbuto byose. Gusa umutini hari umwihariko ufite: Iyo atari igihe cyo kwera, igiti cy'umutini gitakaza amababi yacyo, gusa bijya bibaho ko igiti cy'umutini kigarura amababi mbere ya saison, kandi icyo gihe amababi azira kimwe n'imbuto za mbere y'igihe. Icyo gihe iyo ubonye amababi ku mutini, automatically uhita umenya ko hariho imbuto, n'iyo byaba atari muri saison yo kwera.

IKIBAZO RERO: Dore uko icyanditswe kibivuga:

Umurongo wa Bibiliya: Mariko 11:13

« Areba kure abona umutini uriho ibibabi, arawegera ngo ahari yawubonaho imbuto. Nyamara awugezeho ntiyagira icyo abona keretse ibibabi, kuko kitāri igihe cyo kwera kw'imitini."»

IKIBAZO: Uyu mutini wari ufite amababi. Uwurebeye kure warayabonaga. Ibi byatangaga ikizere ko nuwegera uwubonaho imbuto! Ariko nta mbuto❌. Ibi birutwa n'iyo utirirwa uzana amababi!

Iki kibazo gifite ubusobanuro bubiri bw'ukuri:

1) Umutini urebera kure ukawubonaho amababi, wawegera ukawuburaho imbuto, ni nk'umukristo urebera kure ukamubonaho ubukristo, ariko wamwegera ukamuburaho imbuto. N'ubwo kitari igihe cyo kwera, uyu mutindi wari ufite ibibabi, bisobanuye ko wanagomba kuba ufite imbuto‍♀️. Umukristo nta gihe cy'imbuto agira! Ahora atoshye, kandi iyo atoshye aba afite imbuto, igihe cyose.

Umukristo agomba kurangwaho imbuti, byaba mu gihe gikwiriye no mu kidakwiriye.

Izi mbuto Bibiliya izigaragara mu Bagalatiya 5:22

2) Igisobanuro cya kabiri, mu gihe cya Yesu umutini wasobanuraga igihugu cya Isirayeli:

Hoseya 9:10 “Mu gihe nabonaga Isirayeli yari ameze nk'inzabibu zo mu kidaturwa, ba sogokuruza nababonye bameze nk'imbuto z'umutini muto z'umwimambere, ariko bagiye i Bāli y'i Pewori biyegurira ibiteye isoni, baba babi bikabije nk'ikigirwamana bakunze."

Yesu yasanze Isirayeli, cyane cyane abatware n'abayobozi, ari abantu bagaragara inyuma nk'abamenetse imitima, ariko imbere barashize. Ibi yarabibabwiraga ku mugaragaro adaciye inyuma.

Mt 15:8 ‘Ubu bwoko bunshimisha iminwa, ariko imitima yabo imba kure'.

Ibyo bisobanuro byombi ni byo, kandi Yesu yashakaga kubisobanura akoresheje umutini.

Imana idufashe twere imbuto, "in season and out of season." Ni ukwera imbuto igihe ari agihe cyo kwera imbuto, kandi tukera imbuto n'igihe bigoye kwera imbuto.

Umurongo wa Bibiliya: 2 Tim 4:2

«Ubwirize abantu ijambo ry'Imana ugire umwete mu gihe kigukwiriye no mu kitagukwiriye, uhane, uteshe, uhugure ufite kwihangana kose no kwigisha»

Uwo murongo ndawukunda mu cyongereza: "(Preach the word; be instant in season and out of season; reprove, rebuke, exhort with all longsuffering and doctrine.")

Imana irahari kugirango ibidufashemo.

By Ev. Innocent Munyaneza

Answered: Amakosa 10 mu rubanza rwa Yesu

Fri, 16 Oct 2026 19:03:32 +0000

Ese mu rubanza rwa Yesu, Yesu yaba yarahawe ubutabera nk'ubwahabwaga abandi benegihugu?

Ubutumwa bwiza uko ari bune, bugaragaza mu buryo bugaragara ibibazo byinshi n'akarengane Yesu yakorewe, ku buryo buri wese yabyibonera bitamusabye kubogamira ku idini cyangwa imyizerere runaka. Ni byo ko Yesu yaje agomba kudupfira, kandi urupfu rwe twarwungukiyemo cyane, ariko ntabwo byari bikwiye ko urupfu rwe rurinda guca mu karengane nk'ako yakorewe, ibyo bintu by'akarengane ni ibikorwa bigaragaza ububi bwa muntu, ntabwo twabigereka ku Mana.

Tugendeye ku buryo imanza zo mu kinyejana cya mbere zagendaga, cyane cyane uko imanza zo mu Bayuda zagendaga (cyangwa zagomabaga kugenda), twashyize hamwe ibintu 10 bigaragaza ko urubanza rwa Yesu rwabayemo amakosa akomeye, kandi yose yakozwe ku bushake:

Incamacye: Ubusanzwe Yesu avuka, Abayuda bari mu bubata bw'Abaroma. Bisobanuye ko nta bwisanzure bwa politike bari bafite, ariko Abaroma babarekeye ubwisanzure mu by'iyobokamana. Kubera iyo mpamvu, Abayuda bari bifitiye urukiko rwitwaga sanhedrin, uru rwari rugizwe n'abantu 71, kandi rwacaga imanza z'Abayuda rukanatanga ibihano, ariko igihano cy'urupfu rwatangaga ntirwashoboraga gushyirwa mu bikorwa urubanza rutabanje gushyikirizwa Abaroma.

DORE IBINTU 10 bigaragaza ko urubanza rwa Yesu rwabayemo amakosa nibura 10 agaragaza akarengane gakomeye yagiriwe

---------------------------------------------------

1. Umwanzuro wo kwica Yesu na mbere y'uko agezwa mu rukiko

Ikibazo: Na mbere yuko Yesu agezwa mu butabera, abazamuburanisha bari barangije gufata umwanzuro wo kuzamukatira urwo gupfa, n'urubanza rutaraba.

Ibyanditswe: Matayo 26:3-4 "Maze abatambyi bakuru n’abakuru b’ubwo bwoko, bateranira mu rugo rw’Umutambyi mukuru witwaga Kayafa [4]bagira inama hamwe yo koshyoshya Yesu ngo babone uko bamufata, bamwice."

Akarengane: Ni gute abacamanza bashobora kwiherera mbere y'urubanza bagafata umwanzuro w'urubanza rutaranaba?

2. Gufata Yesu rwihishwa mu ijoro

Ikibazo: Yesu yatawe muri yombi nijoro, afatwa n'agatsiko k'abasirikare kari koherejwe n'abatambyi bakuru bifuzaga ko ibya Yesu bikorwa rwihishwa. Na Yesu ubwe, yahise abibutsa ko ubusanzwe bagombaga kuba baramufase ku mugaragaro mu maso ya rubanda.

Ibyanditswe: Luka 22-53 "Yesu abwira abatambyi bakuru n’abatware b’abasirikare barinda urusengero, n’abakuru bamuteye ati “Munteye nk’abateye umwambuzi, mufite inkota n’inshyimbo. [53]Nahoranaga namwe mu rusengero iminsi yose, ko mutarambuye amaboko ngo mumfate? Ariko noneho iki ni igihe cyanyu n’icy’ubutware bw’umwijima.”

Akarengane: Gufata umuntu muri ubu buryo byari bibujijwe mu mategeko yagenganga urukiko rw'Abayuda (Sanhedrin), cyane ko hatari habanje gukorwa ibijyanye no kumurega mbere y'uko afatwa.

3. Urubanza rwa Yesu mu rugo rw'umuntu!

Ubusanzwe urukiko rw'Abayuda (Sanhedrin) rwari rufite ahantu rwateraniraga mu nzu yitwaga Gazith, ariko Yesu akimara gufatwa, yahise ajyanwa ikubagahu mu rugo rw'umutambyi mukuru Kayafa, ni ho urubanza rwabereye.

Ibyanditswe: Matayo 26:57 "Abafashe Yesu bamujyana kwa Kayafa Umutambyi mukuru, ari ho abanditsi n’abakuru bari bateraniye."

Akarengane: Ko urukiko rwari rufite icyicaro cyarwo, kuki rwateraniye mu rugo rw'umutambyi mukuru? Impamvu nta yindi, byakozwe ikubagahu kugirango bujye gucya ibintu babisoje.

4. Urubanza rwa nijoro!

Urubanza rw'ijoro? Urubanza rwa Yesu rwabaye ijoro ryose, mu gicuku rurakomeza, byagiye no kugera mu rukerera inkoko zitangira kubika Yesu akiri mu rubanza mu rugo rw'umutambyi mukuru.

Ibyanditswe: Luka 22:66 "Nuko iryo joro rikeye abakuru b’ubwo bwoko baraterana, ari bo batambyi bakuru n’abanditsi, bamujyana mu rukiko rwabo"

Akarengane: Mu mategeko yagengaga sanhedrin, cyaraziraga guca imanza nijoro. Ni iki kihutirwaga? Kuki urukiko rutashoboraga gutegereza ngo bucye hanyuma urubanza rube mu mucyo?

5. Abatangabuhamya b'ibinyoma

Muri uru rubanza rw'ijoro, urukiko rwazanye abagabo bo gushinja Yesu, ariko aba batangabuhamya bose bakavuguruzanya.

Ibyanditswe: Mariko 14:55-56 "Nuko abatambyi bakuru n’abanyarukiko bose bashaka Yesu ho ibirego ngo babone uko bamwica, barabibura. [56]Nubwo abamubeshyeraga bari benshi, amagambo yabo ntiyari ahuye.

Akarengane: Ubundi ukurikije amategeko ya Mose uru rukiko rwagenderagaho, iyo abagabo badahuje amagambo, ubuhamya bwabo ntibwemera: Kuki abatangabuhambya bavuguruzanyaga, kandi ubuhamya bwabo bukemerwa?

6. Yesu akubitirwa mu rukiko

Ntibisanzwe kubonna umuburanyi ukubitirwa mu rukiko mu gihe cy'urubanza! Aya ni amateka atazibagirana mu bitabo byose.

Ibyanditswe: Yohana 18:22-23 "Amaze kuvuga atyo, umwe mu basirikare wari uhagaze aho akubita Yesu urushyi ati “Uku ni ko usubiza umutambyi mukuru?”

Akarengane: Ni gute umuburanyi akubitirwa mu rukiko, urubanza rugakomeza nkaho nta cyanaye? Aka ni akarengane k'amateka!

7. Gushinjwa icyaha kiruta ibindi nta mpamvu

Mu rukiko rwa sanhedrin, icyaha cyarutaga ibindi ni ikitwa "blaspheme", ari cyo "gutuka Imana, cyangwa kwiyita Imana." Yesu yabajijwe niba ari we Kristo. Yesu yasubije ukuri, ati YEGO. Abacamanza bahise bamurega ko yigereranije, bamusabira igihano kiruta ibindi cyo gupfa.

Ibyanditswe: Mariko 14:60-64 "Umutambyi mukuru arahaguruka ahagarara hagati, abaza Yesu ati “Mbese ntiwiregura na hato? Ntiwumvise ibyo aba bakureze?” [61]Aricecekera ntiyagira icyo amusubiza. Umutambyi mukuru yongera kumubaza ati “Mbese ni wowe Kristo koko, Umwana w’Imana idahinyuka?” [62]Yesu aramusubiza ati “Ndi we, kandi muzabona Umwana w’umuntu yicaye iburyo bw’ubushobozi bw’Imana aje ku bicu byo mu ijuru.” [63]Umutambyi mukuru abyumvise atyo ashishimura imyenda ye ati “Turacyashakira iki abagabo?

Akarengane: Yesu ni we Kristo birazwi, kandi na we ntiyigeze abihisha. Kuki kubyemeza byamuviramo gukatitwa igihano cy'urupfu? Ibi bigaragaza urwango yari afitiwe n'Abayuda, kandi bari biteguye gukora ibishoboka byosee ngo apfe.

8. Koherezwa kwa Pilato ku kirego gishya

Nkuko twabisobanuye dutangira, urukiko rw'Abayuda (Sanhedrin) ntirwari rufite uburenganziro bwo gushyira mu bikorwa igihano cy'urupfu, ibi byari mu bubasha bw'Abaroma gusa. Kuko Yesu yari yakatiwe urwo gupfa byatumye yoherezwa kwa Pilato kugirango yemeze iki gihano anagishyire mu bikorwa. Gusa kuko bitari kugira icyo bibamarira kuzana kwa Pilato ibirego by'idini, byatumye Abayuda bahimba ibirego bitatu bishya, ibi Yesu ntabwo yari yabirezwe mu rukiko rwa sanhedrin, ntanubwo yari yabyireguyeho. Ibyo birego-bihimbano bishya ni: Kugandisha abantu, kubuza abantu gutanga umusoro wa Kayisari no kwiyita umwami. Ibi birego byose byari ibibazo bya politiki kandi biremereye: Abaroma ntibashoboraga kwihanganira umuntu ubangisha abaturage, agakururura kwigomeka muri rubanda, akanongeraho kwiyita umwami! Ibi Abayuda bari babizi, ni yo mpamvu babihimbye kugirango bemeze Pilato.

Ibyanditswe: Luka 23:1-2 Bose barahaguruka bamujyana kwa Pilato. [2]Batangira kumurega bati “Uyu twamubonye agandisha ubwoko bwacu, ababuza guha Kayisari umusoro, avuga kandi ko ari Kristo Umwami.”

Akarengane: Ibi birego byose bya Politiki ni ibinyoma, Yesu ntiyigeze agandisha abantu, ntiyigeze ashishikariza abantu kudatanga umusoro wa Kayisari, nta nubwo yigeze yiyita umwami mu kimbo cya Kayisari. (Yavuze ko ari Umwami, ariko ubwami bwe si ubw'iyi si). Ikiyongeraho, ibi birego ntiyari yigeze abiregwa mu rukiko rwa sanhedrin

9. Pilato ati "Yesu nta cyaha mubonyeho", ariko n'ubwo ari umwere akwiriye gupfa!

Aya na yo ni ayandi mateka! Umucamanza ati "Uyu muburanyi ni umwere, ariko n'ubwo ari umwere mukatiye urwo gupfa". Ni akumiro k'ubutabera, ni nk'ikinamico.

Ibyanditswe: Luka 23:4 "Pilato abwira abatambyi bakuru na rubanda ati “Nta cyaha mbonye kuri uyu muntu.” Yohana 19:16 Aherako aramubaha ngo abambwe.

Akarengane: Ni gute umucamanza avuga ko umuburanyi ari umwere, ariko agakatira uwo muburanyi igihano cyo gupfa? Ni akumiro!

10. Urubanza rushingiye ku kunezeza rubanda kuruta kugendera ku kuri.

Umwanzuro Pilato yafashe, ntiyawufashe kubera kubahiriza amategeko, ahubwo yari ashyize imbere kunezeza rubanda! Ibi si ubutabera na gato.

Ibyanditswe: Luka 23:4 "Nuko Pilato ashatse gushimisha abantu ababohorera Baraba, amaze gukubita Yesu imikoba aramutanga ngo abambwe."

Akarengane: Ni gute umucamanza akatira umuburanyi igihano cy'urupfu agamije gusa gushimisha rubanda? Aka ni akarengane k'amateka.

=====================

UMWANZURO:

Yesu nta butabera yigeze abona mu rubanza rwe. Ibyabaye byose byari byararangije gufatwaho umwanzuro na mbere yuko igisa n'urubanza kiba. Gusa byose byari mu nyungu ya twese abariho uyu munsi: Yesu yararenganye ngo utazarengana ukundi mu rukiko rw'abera, yambitswe ikamba ry'amahwa ngo twe tuzambikwe iry'ubugingo, yarapfuye ngo twebwe tutazapfa kuko abamwizeye ntibazapfa kabone n'iyo baba barapfuye. Amaraso ye yatuvanyeho urubanza, igihano kiduhesha amahoro cyari kuri we, kandi urwandiko rwaturegaga yarubamye ku musaraba, icyo yifuza ni ukuduha ubugingo buhoraho, ubu ni muzima, icyo dusabwa ni ukumwizera gusa, nta kiguzi kindi.

Ese waramwizeye?

Murakoze.

By Ev. Innocent Munyaneza.

Inyigisho: Uburyo 7 Imana ivugamo

Wed, 07 Oct 2026 19:06:25 +0000

Answered: Inyigisho: Inzego 7 z'umunyamasengesho

Sun, 04 Oct 2026 18:23:46 +0000

Iyo umuntu amaze gukizwa, atangira ubuzima bushya aho asabwa gusabana n'Imana mu buryo buhoraho biciye mu masengesho. Umuntu ukijijwe uyu munsi ntiwakwitega ko ahita atangira gusenga nk'ubimazemo imyaka yo kurwana intambara zo mu buryo bw'Umwuka.

Bibililiya ivuga neza ko igihe cyo kuba umwana mu by'Imana kibaho, ariko nta wakwishimira gukomeza kunywa amata y'impinja, umukristo wese agomba gukura akagera aho arya ibiryo bikomeye by'abantu bakuru.

Umurongo wa Bibiliya: Abaheburayo 5:12-14

« [12]Kandi nubwo mwari mukwiriye kuba abigisha ubu kuko mumaze igihe kirekire mwiga, dore musigaye mukwiriye kongera kwigishwa namwe iby’ishingiro rya mbere ry’ibyavuzwe n’Imana, kandi mwahindutse abakwiriye kuramizwa amata aho kugaburirwa ibyokurya bikomeye, [13] kuko unywa amata aba ataraca akenge mu by’ijambo ryo gukiranuka kuko akiri uruhinja, [14] ariko ibyokurya bikomeye ni iby’abakuru bafite ubwenge, kandi bamenyereye gutandukanya ikibi n’icyiza.»

Nusoma, uraza gutangazwa no kubona ko igice kinini cy'abizera baguma ku rwego rwa 3, mu nzego zirindwi ! Wowe uherereye he? Tudatinze, reka turebe inzego 7: (Bimwe turabirekera mu ndimi z'amahanga kubera kubura ikinyarwanda cyiza gihamyamo, ariko turabisobanura neza)

1. Urwego rwa mbere: THE PANIC. (Ntabara)

HELP! Mana ntabara! Iki ni ikiciro twese twisangamo, cyangwa twigeze kwisangamo! ni hahandi Umukristo asenga kuko yugarijwe gusa! Iyo amakuba aje, ibyago bikaba byugarije, ibibazo bikomanga.... ukaba ari bwo wibuka gusenga! Muri iki cyiciro, Umukristo asenga kubera ibihe no kubera impamvu! (For a season and for a reason). Umukristo uri hano, iyo urusengero rwe rutatangaje amasengesho biragoye kubona yapanze amasengesho ye bwite. Hari abibuka kujya mu macyesha ku munsi wo gusoza umwaka gusa (31/12), ubundi ntumubaze ikitwa amakesha! Hari abibuka ko kwiyiriza bibaho iyo bugarijwe n'ibibazo, abandi bakabyibuka kubera ubwoba bw'ibyo babona bibategereje imbere! Aba baba banafite ibyanditswe bibarengera bitwaza, ko nibatabaza Imana ibatabara, kandi koko nta n'uwatinyuka ngo avuge ko Imana itabumva, ariko ibikwiriye buri mukristo ni ugutera intambwe akarenga iki cyiciro! Imana si umuntu, abari muri iki cyiciro rwose ntimugire ngo twabaciye intege, irabumva rwose, gusa icyo tubasaba ni ugutera intambwe mukisanga mu cyiciro gikurikiyeho.

2. Urwego rwa kabiri: THE CHECK LIST. ( Urutonde)

Iyo urenze urwego rwa mbere ugatera intambwe, ukagera aho utangira gusenga udatabaza gusa, akenshi wisanga ahantu utangira gusenga witwaje urutonde rw'ibyo uri busengere! Ushobora kuba utabyanditse ku rupapuro, ariko ku mutima uba uvuga uti "uyu munsi ndajya imbere y'Imana, kandi ndasengera ibi bintu: a, b, c ...". Ndetse akenshi iyo usoje gusenga, wibaza niba ntacyo wibagiwe! Si icyaha rwose si n'ikose kujya imbere yImana ufite ibyo uri busengere, ariko gutinda muri iki cyiciro bigaragaza urwego rw'ubusabane na Mwuka Wera uba uriho. Nusoma inzego zikurikiraho, uraza gusanga bidatangaje ko wakora urutonde rw'ibyo uri busengere, bikarangira unasengeye ibihabanye na byo!

3. Urwego rwa gatatu: INTERCESSION. (Kwingingira abandi)

Aha ni ahantu umukristo atangira kutirebaho gusa, akababazwa n'ibiri ku bandi kandi bikamubera umutwaro, ku buryo abigira icyifuza akakizana mu masengesho ye bwite. Abo asengera akenshi ntibanamenya ko hari umuntu urimo kubingingira. Aha ni ho hatangira gukoreshwa ijambo "Umwinginzi". Kuri uru rwego rwose Umukristo aba ageze ahantu heza, kandi aba arimo gushyira mu bikorwa ibyo Bibiliya idusaba:

Umurongo wa Bibiliya: Abafilipi 2:4

« Umuntu wese muri mwe areke kwizirikana ubwe gusa, ahubwo azirikane n’abandi.»

1 Abakorinto 10:24

« Ntihakagire umuntu wizirikana ubwe, ahubwo azirikane na mugenzi we.»

Uko twicuma mu nzego, bigenda birushaho gukomera: Ni umwanya wo kwisuzuma: Ni kangahe ufata amasengesho yo kwingingira abandi? Ni kangahe wibuka gusengera abo uzi n'abo utazi batanaguhaye icyifuzo cyo kubasengera? Imana idufashe, kuko uru rwego usanga abizera benshi bigumira aha, kandi bakumva birabanyuze, gusa Imana iba ibategereje no gutera indi ntambwe.

4. Urwego rwa kane: THE DIALOGUE. ( Ikiganiro )

Kuri uru rwego ibiryo biba byatangiye gukomera! Uwahoze anywa amata y'abana noneho aba atangiye kurya imyumbati! Gusa nanone aba ataratangira kuguguna amagufa no kuyahekenya! Gusa igitangaje ni uko Abizera benshi uzasanga badashishikajwe no kugera hano kandi ari ingenzi cyane kuri buri wese.

Uru ni urwego rw'ikiganiro n'Imana. Umwinginzi wageze hano, aba abasha gusenga abwira Imana, ariko akaba anashobora kumva icyo Imana imusubiza. Amasengesho arenga kuba "Monologue" (Kwivugisha) agahinduka "Dialogue" (kuba ufite uwo muvugana). Ni kenshi uzasanga Umukristo yibaza uko Imana ivuga, nyamara mwaganira akaguhamiriza ko ivuga! Biravuguruzanya, kandi Imana ntinezezwa no kuba tutabasha kuyumva ivuga. Bibabaza Imana kuba yavuga ntiwumve, cyangwa ukayibeshyera ngo yavuze kandi itavuze. Inyigisho izakurikira iyi iravuga iti "Uburyo 7 Imana ivugamo", ntizagucike. Umunyamasengesho wese ahamagarirwa kugera kuri uru rwego, ibi bizafasha benshi kutiruka mu bahanuzi babaza icyo Imana ibavugaho, aho ninaho havuka ubuhanuzi bupfuye n'inyigisho z'ibinyoma. Gusenga no gusaba ni byiza, ariko se wamenya ute niba Imana yagusubije ukanamenya icyo yagusubije?

Umurongo wa Bibiliya: Yohana 10:27

« Intama zanjye zumva ijwi ryanjye, nanjye ndazizi kandi zirankurikira.»

Kwisuzuma: Ese ujya ubasha kuganira n'Imana? Ujya uyumva ivuga? Urayibaza ikagusubiza? Mugirana ikiganiro?

5. Urwego rwa gatanu: THE AUTHORITY. ( Ubutware )

Kuri uru rwego, noneho umwinginzi aba yatangiye kuguguna amagufa! Gusa aba atarayahekenya ngo ayaturitse! Uru ni urwego aho umuseenzi amenya neza adashidikanya imbaraga n'ubutware afite hejuru y'imbaraga z'umwijima. Hano, umunyamasengesho atangira kumenya ko kwirukana abadayimoni bitahawe abashumba bamwe, arekera aho gutinya abarozi n'abapfumu, atangira kwizera ko uri muri we akomeye kurusha uri mu banzi be, atangira kugendana ubutware bw'umwana, ntiyongera gutinya umurimbuzi wa nijoro, abagaragu ntibongera kurya ibye abareba. POWER.

Kuri uru rwego, umunyamasengesho yizera adashidikanya iki cyanditswe:

Umurongo wa Bibiliya: Mariko 16:17-18

« [16] Kandi ibimenyetso bizagumana n’abizera ngibi: bazirukana abadayimoni mu izina ryanjye, bazavuga indimi nshya, [17] bazafata inzoka, kandi nibanywa ikintu cyica nta cyo kizabatwara na hato, bazarambika ibiganza ku barwayi bakire.»

Kwisuzuma: Ese kuva wakizwa wari wirukanaho idayimoni nibura rimwe? Ese basi wiyumvamo ubutware n'ububasha bwo kuba wayirukana ikagenda? Imana idufashe

6. Urwego rwa gatandatu: THE DISAPPERANCE (Kubura)

Ahahaha.... Noneho ibyo ngiye kuvuga kuri uru rwego Uwiteka ambe hafi hatagira untera amabuye! Kuri uru rwego birenga kuba ibikomeye bigahinduka ibisharira. Munyihanganire biransaba gukoresha amagambo akomeye. Uru ni urwego aho umunyamasengesho yitegura ko byose bishoboka! Iyo umuntu akiri umwana, aba yibwira ngo "Imana ntiyakwemera ko ibi cyangwa biriya bimbaho!" (Abo byabayeho se nuko Imana ibanga? Nuko yabaretse se? Nuko bitwaye nabi se? ....) Umuntu ukiri umwana yibwira ko ibikomeye bigera ku muntu runaka kubera ibyaha bye cyangwa imyitwarire runaka.... Umunyanyamasengesho wageze ku rwego rwa 6, aba azi neza ko igisubizo cy'Imana gishobora kuba OYA itsindagiye, cyangwa na OYA ntiyiguhe, ikagucecekana bikakuyobera, kandi agakomeza urugendo atarakaye cyangwa ngo acike intege. Kuri uru rwego, umunyamasengesho ahishurirwa ko muri uru rugendo, ikintu cyonyine Imana itashyigikira ni icyaha gusa, ibindi byose yakwemera ko bitugeraho kubera impamvu zayo nziza n'urukundo idufitiye, kuko inzira zayo zitandukanye n'izacu nk'isi n'ijuru! Kuri uru rwego, umunyamasengesho amenya neza ko Imana yakwemera ko ibyago n'amakuba bimugeraho, yanemera ko imyambi n'amacumu bimuhinguranya, kandi agakomeza urugendo avirirana inzira yose ariko agakomeza urugendo atarakaye cyangwa ngo yinube.

Muri uru rwego, umunyamasengesho arenga ibyo dukunze kwita "Ubutesi bwo mu Mwuka", ibyanditswe byera bimwe na bimwe ababisoma nabi bakabona bitarimo kumukorera, na we akabibona nkaho bidakora, agacuruza agahomba kandi Bibiliya ubusanzwe ivuga ko Imana izaha umugisha ibyo dukora, agakora ikizamini akaba uwa nyuma kandi ubusanzwe Bibiliya itwizeza ko tuzahora turi imitwe ntitube imirizo, akarwaza abana kandi ubusanzwe Bibiliya ivuga ko Imana izakura indwara z'Abanyegiputa muri twe, agapfusha, akarekwa, agahemukirwa, isi n'ijuru bikamuheza hagati akayoberwa aho aherereye, ariko igitangaje, ibyo byose bikamera nk'ibikubita ku rutare, aho guhunga Imana akarushaho kuyegera, agakomeza urugendo arira cyangwa acumbagira ariko agakomeza! Ababibonera hanze babona iryo kome ry'umuriro bakabona yaragushije ishyano, ariko we yibuka uko Petero yabivuze:

1 Pet 4:12-13 "Bakundwa, mwe gutangazwa n'ikome ryo kubagerageza riri hagati yanyu ngo mumere nk'abagushije ishyano. [13]Ahubwo munezezwe n'uko mufatanije imibabaro ya Kristo, kugira ngo muzanezerwe mwishima bihebuje, ubwo ubwiza bwe buzahishurwa."

Kuri uru rwego, umunyamasengesho abasha kuvuga yemye ati "Imana ibasha kunkiza, ariko n'aho itankiza.....". Kuri uru rwego, abasha kuvuga nka Yesu ati:

Luka 2:42

« Data, nubishaka undenze iki gikombe, ariko bye kuba uko nshaka, ahubwo bibe uko ushaka.»

Icyo ni cyo bamwe bita "umubatizo w'umuriro". Yego ni byo, habaho umubatizo w'umuriro wo kubatizwa mu Mwuka, ariko hanabaho umubatizo w'umuriro utwika ibidatunganye, tukawusohokamo tumeze nk'izahabu itunganijwe, twiteguye gukorera Imana mu yindi level. Abakozi b'Imana benshi, benshi pe, hafi ya bose, mu buryo bumwe cyangwa ubundi bacishijwe muri uru rwego rwa 6. Hari uwo nzi hano mu Rwanda uzwi na bose, namwumvise we ubwe yitangira ubuhamya, yigezege gupfusha umwana, mu gahinda kenshi abaza Imana ati "Mana wari uri he ubwo umwana wanjye yapfaga?" Imana yahise imubaza iti "ko utigeze umbaza aho nari ndi igihe uwanjye yapfaga? Aho nari ndi igihe uwanjye yapfiraga ku musaraba ku manywa y'ihangu, ninaho nari ndi igihe uwawe yapfaga!"

Ni byo rwose, ijya ibyemera! Muri uru rwego rwa 6, umunyamasengesho amenya neza ko Imana itigeze idusezeranya ko tutazigera duca mu muriro, gusa yadusezeranije ko niduca mu muriro izaba iri kumwe natwe! Ntiyigeze idusezeranya ko tutazaca mu mazi, icyakoze yadusezeranije ko niduca mu mazi atazadutembana! Ntiyigeze itubwira ko amakuba n'ibyago bitazaza, ndetse ahubwo yatubwiye ko bizaza ari byinshi, ariko yadusezeranije ko izadukiza muri byose! Pawulo yazuraga n'abapfuye, nyamara yari afite igishakwe cyo mu mubiri yananiwe kwikiza! Yaninginze Imana gatatu kose ngo ikimukize, ariko Imana yaramusubije iti "Ubuntu bwanjye buraguhagije". Ni ko bimeze: Muri uyu muriro wo kugotwa, uyu munyamasengesho asengera iby'abandi bigasubizwa, ariko ibye ukagirango ntawe ubyitayeho!

Icyo rero ni cyo twita KUBURA! Urimo guca muri ibi, abamurebera hanze ntibabasha kwiyumvisha uko abyikuramo! ariko we aba azi ibanga: Si we uriho, ni Kristo muri we! Aba abizi ko nta kibaho cyamutandukanya n'urukundo rwa Kristo. Arabura neza, ku buryo iby'isi iyo bimurebye bimubona nk'ubambwe!

Gusa hari ihumure: Nta Mukristo n'umwe ushobora kugwira muri uru rwego. Mbere yo kwinjira muri uru rwego rwa 6, Imana iba yabanje kuba sure 100% ko uzahasohoka amahoro.

Umurongo wa Bibiliya: Abagalatiya 2:20

« Nabambanywe na Kristo ariko ndiho, nyamara si jye uriho, ahubwo ni Kristo uriho muri jye. [...] »

Abagalatiya 6:14

« Ariko jyeweho sinkiratana ikindi, keretse umusaraba w’Umwami wacu Yesu Kristo wateye ko iby’isi bimbera nk’ibibambwe, nanjye nkabera iby’isi nk’ubambwe.»

Abaroma 8:35 ; 37

« Ni nde wadutandukanya n’urukundo rwa Kristo? Mbese ni amakuba, cyangwa ni ibyago, cyangwa ni ukurenganywa, cyangwa ni inzara, cyangwa ni ukwambara ubusa, cyangwa ni ukuba mu kaga, cyangwa ni inkota? [37] Oya, ahubwo muri ibyo byose turushishwaho kunesha n’uwadukunze»

Ng'ibyo iby'urwego rwa 6. Kurubamo ntibihoraho, ni igice cy'ubuzima bwa Gikristo mu rugendo rugana ijuru, igihe kurubamo bimara n'igihe bizira si twe tubigena, gusa ururimo, uwarunyuzemo n'Uwitegura kurucamo, turabizi ko byose biba biri mu mugambi mwiza w'urukundo rw'Imana, no kudutunganya ngo turusheho kumukorera uko abishaka, cyangwa tubere imfashanyigisho abandi bazahaca mu gihe runaka.

7. Urwego rwa karindwi: THE CONSTANT UNION (Kuba mu Mwuka w'amasengesho)

Munyemerere mvuge aka kantu mu cyongereza, ni quote y'umuhanga umwe: "Living in unbroken, constant fellowship and walking as one with God, where prayer feels like breathing."

Mu myaka yashize, nari umu member w'umuryango umwe utanga za Bibiliya ku buntu mu bigo by'amashuri n'ahandi. Twagiranga isaha imwe ku munsi yo gusengera abo twabaga twahaye za Bibiliya, kugirango Ijambo ry'Imana rikore umurimo waryo mu bo twabaga twazihaye. Ndibuka umwe mu bashya bari batwiyunzeho, yarabajije ati "byashoboka gute gusenga iyo saha kandi tuba turi ku kazi? Igisubizo yahawe cyaranshimishije: "Ni ugutandukanya gusenga no kuba mu Mwuka w'amasengesho.

Muri uru rwego rwa 7 ari na rwo rwa nyuma, umukristo arenga ibyo gufata umwanya wo gusenga, ahubwo akaba mu Mwuka w'amasengesho mu buryo buhoraho, kugeza aho gusenga bihinduka nko guhumeka. Ku kazi, mu rugo, mu kiruhuko, Umwuka Wera agufasha kubaho mu busabane buhoraho n'Imana. Hari umukristo wigeze kumbwira ikintu nanubu ndacyacyibazaho: Yarambwiye ngo icyamuha Yesu naza gutwara itorero akazaza ku cyumweru mbere ya sasasi. Naramubajije nti kuberiki? Yaransubije ngo ayo masaha abarokora baba bari mu rusengero bari tayari kuzamukana na Yesu! Byanteye kwibaza ukuntu tuba tayari kuzamukana na Yesu iyo turi mu rusengero gusa? Ntibikwiriye rwose, tugomba kuba mu busabane na Mwuka Wera mu buryo buhoraho. Muri Bibiliya hari umuntu wagendanye atyo n'Imana imyaka 300, kugeza ubwo Imana yamwimuye ajyanwa mu ijuru adapfuye.

Umurongo wa Bibiliya: Itangiriro 5:22; 24

« Amaze kubyara Metusela, Henoki agendana n’Imana imyaka magana atatu, ayibyaramo abahungu n’abakobwa. [24] Kandi Henoki yagendanaga n’Imana, ntiyaboneka, kuko Imana yamwimuye.»

Abaheburayo 11:5

« Kwizera ni ko kwatumye Henoki yimurirwa mu ijuru ngo adapfa, kandi ntiyaboneka kuko Imana yamwimuye, kuko yahamijwe atarimurwa yuko yanejeje Imana»

Mbere yo gusoza, tuvuge ko uko izi nzego zikurikirana, buri wese bimufitiye akamaro kwifuza kuzibamo mu buryo bukurikiyanye uko zikurikiranye n'ubundi. Ntiwavuka uyu munsi ngo utangire urye imyumbati. Ntiwakizwa uyu munsi ngo uwo munsi ukore dry y'iminsi 7 utaranamenya dry icyo ari cyo. Ariko nanone, birababaza kubona umukristo umaze imyaka 5 mu rusengero ariko adashobora gusenga wenyine isaha 1. Ibyo ni byo byatangaje uwandikiye Abaheburayo, ubwo yabonaga bameze nk'abana bo kuramizwa amata kandi bakagombye kuba ari abigisha.

byose si ku bw'imbaraga zacu, dushobozwa byose na Kristo uduha imbaraga.

Imana ibahe umugisha

Ev. Innocent Munyaneza

Answered: Ibinyoma 15 bakubwiye ku cyacumi

Fri, 02 Oct 2026 21:59:06 +0000

IBINYOMA 15 BIKUNZE KUVUGWA KU BYEREKEYE ICYACUMI

----------------------------------

1. IKINYOMA: «Icyacumi cyahimbwe n’abapasiteri ngo bibonere amafaranga. »

UKURI: Ntabwo icyacumi ari igihimbano cy'abapasiteri. Imana ubwayo ni yo yategetse Abisirayeli kujya bazana icyacumi cy'ibyo bejeje bakagishyira mu rusengero kugirango Abatambyi bakoraga imirimo y'urusengero babone ikibatunga. Ibyo byose byabayeho na mbere y'uko Itorero ribaho, na mbere y'uko abapasiteri babaho. ABALEWI 27:30 ; MALAKI 3:10

2. IKINYOMA: «Icyacumi nticyabagaho mbere y’Amategeko ya Mose. »

UKURI: Mbere y'amategeko ya Mose, icyacumi cyaratanzwe. Umuntu wa mbere watanze icyacumi muri Bibiliya ni Aburahamu wagihaye Melikisedeki kandi byabayeho mbere y'amategeko ya Mose. (Itangiriro 14:20) Na Yakobo yahize umuhigo wo gutanga icyacumi cyera cyane mbere y'amategeko ya Mose (Itangiriro 28:20-22)

3. IKINYOMA: «Yesu yakuyeho burundu ibijyanye n’icyacumi. »

UKURI: Yesu ntiyigeze akuraho icyacumi, ahubwo yakivuzeho avuga ko tutagomba kwirengagiza kugitanga (Matayo 23:23.) Gusa yongeyeho ko gutanga icyacumi bitagomba gutuma umuntu yirengagiza ibindi bintu by’ingenzi, nk'ubutabera, gukiranuka, imbabazi, kwizera....

4. IKINYOMA: « Nudatanga icyacumi, Imana ntizongera kugukunda. »

UKURI: Urukundo rw’Imana ntirugurwa amafaranga kandi ntirushingiye ku bwinshi cyangwa ubuke bw’ibyo umuntu atanga. Imana yadukunze tukiri babi, tutaranamenya iby'icyacumi, urukundo rwayo rurihariye kuko ntirunashingira ku gukiranuka kwa muntu cyangwa ibikorwa bye byiza. Gutanga icyacumi bigomba kuva ku mutima ushaka gushimisha Imana, atari ugushaka kugura urukundo rwayo.(Abaroma 5:8; Yohana 3:16; Abefeso 2:8–9.

5. IKINYOMA: «Gutanga icyacumi bituma umuntu ahita aba umukire. »

UKURI: Nta na hamwe Bibiliya ivuga ko nutanga icyacumi uzahita uba umukire, icyakoze ivuga ko nugitanga izaguha umugisha, kandi umugisha w'Imana ntugomba kureberwa mu butunzi n'amafaranga gusa. Bibiliya ivuga ku migisha y’Imana myinshi, ariko nta hantu yigisha ko gutanga icyacumi bituma buri muntu ahita agira ubutunzi bw’ibintu cyangwa ngo ajye kure y'ibibazo byose by’ubukungu. Imana ishobora guha umugisha umuntu mu buryo butandukanye, mu nzira zitandukanye, mu bihe bitansukanye ... kandi imigisha yayo ntigomba gutekerezwa na rimwe ko wabasha kuyigura. ICYACUMI NI KIMWE MU BYATUMA UBONA UMUGISHA, ARIKO UBWACYO CYONYINE SI AGAKONI KA MAJI GATUMA UBONA IMIGISHA. (Imigani 10:22; 1 Timoteyo 6:6–10.

6. IKINYOMA: «Abakene ntibagomba gutanga icyacumi na mba.»

UKURI: Kuba umuntu ari umukene ntibivuze ko adashobora kugira icyo atanga. Imana ntinezezwa n'ubwinshi bw'ibyo utanga, inezezwa n'umutima ubitanganye. Kuva mu isezerano rya cyera, Abisirayeli bakiri mu butayu, Imana yashyiriyeho buri wese uburyo bwo gutanga icyacumi bitewe n'uko yifite. NaYesu yashimye ituro ry’umupfakazi wari umukene, kuko yatanze nubwo yari afite bike cyane. (Mariko 12:41–44; Luka 21:1–4.

Icy’ingenzi si ubwinshi bw’ituro gusa, ahubwo ni n’umutima umuntu atangiramo.

7. IKINYOMA: « Icyacumi ni cyo cyonyine gifite agaciro; ubundi buryo bwo gutanga nta gaciro bufite. »

UKURI: Uretse icyacumi, Bibiliya yigisha n’ubundi buryo bwinshi bwo gutanga no kugira ubuntu: Gufasha abakene, gutanga amaturo ku bushake, kwita ku bafite ibyo bakeneye, gufatanya n'abandi bizera mu mirimo y'Itorero.... Gutanga kwa Gikristo ntikugomba kurebwa gusa nk’ijanisha runaka ry’umutungo, ahubwo ni igice cy’ubuzima burangwa n’urukundo, ubugwaneza n’ubugiraneza. (2 Abakorinto 9:6–8; Ibyakozwe n’Intumwa 2:44–45; Abagalatiya 6:9–10; Abaheburayo 13:16.)

8. IKINYOMA: «Umupasiteri ashobora gukoresha icyacumi uko yishakiye nk’amafaranga ye bwite. »

UKURI: Abayobozi b’Itorero bahamagarirwa kuba abizerwa mu byo bashinzwe, kandi ibyo Imana yashyize mu maboko yabo bigomba gucungwa mu bunyangamugayo no mu mucyo. Ntabwo ubuyobozi bw’Itorero bugomba guhinduka uburyo bwo kwikungahaza cyangwa gukoresha nabi ibyo abantu batanze. Pawulo yabwiye Abakorinto ko yirinda kugirango hatagira umugaya uburyo acunga impano nyinshi yabaga yahawe. Ibyo ni byo bibiliya yita "KUBA IBISONGA BYIZA" (1 Abakorinto 4:1–2; 2 Abakorinto 8:20–21; 1 Petero 5:2–3.)

9. IKINYOMA: «Utanga icyacumi ntazigera agira ibibazo by’amafaranga. »

UKURI: Kuba umuntu ari umwizera ku cyacumi akaba inyangamugayo n’indahemuka ntibimubuza guhura n’ibigeragezo cyangwa ibihe bikomeye by’ubukungu. Bibiliya igaragaza ko n’abizera bashobora kunyura mu bihe by’ubukene no mu makuba. Ahubwo Bibiliya irabateguza ko bazahura na byo ndetse byinshi, gusa ikabahumuriza ko izabana na bo muri byose. (Zaburi 34:20) (Abafilipi 4:12–13; 2 Abakorinto 8:1–2; 2 Abakorinto 11:27.)

10. IKINYOMA: «Umuntu ashobora kwikundisha ku Mana, cyangwa kugura ubutoni ku Mana akoresheje icyacumi. »

UKURI: Icyo ni ikinyoma cyambaye ubusa. Ubuntu bw’Imana no kuba umutoni kuri yo ntibigurwa amafaranga. Agakiza n’ubuntu bw’Imana tubihabwa ku buntu binyuze mu kwizera Yesu Kristo n'umurimo yarangirije ku musaraba, ntushobora kubibona ukoresheje ubutunzi n'iyo bwaba bungana gute, si ibintu umuntu ashobora kugura. Ndetse n’iyo umuntu atanga byinshi, ibyo ntibimuhesha uburenganzira bwo kwitwa umutoni w'Imana. (Abefeso 2:8–9; Ibyakozwe n’Intumwa 8:18–23.)

11. IKINYOMA: «Gutanga icyacumi bisimbura ubuzima bwo kwera, gukiranuka no kumvira Imana. »

UKURI: Icyo ni ikinyoma cyambaye ubusa, Imana ntishaka ko umuntu akora igikorwa cyo gutanga gusa, ariko ubuzima bwe bwose bukaba butumvira Imana. Icy’ingenzi ni umutima wumvira Imana kandi ugendera mu nzira zayo no gukiranuka.Yesu na we yagaragaje ko bidakwiriye ko umuntu yakora ibikorwa by’idini ariko akirengagiza ibintu by’ingenzi kurushaho nko gukiranuka no kumvira Imana. (1 Samweli 15:22; Mika 6:6–8; Matayo 23:23.

12. IKINYOMA: «Gutanga icyacumi bituma umuntu atagomba gufasha abakene»

UKURI: Gutanga icyacumi ntibisimbura inshingano yo gufasha abakene, gukunda mugenzi wawe no gukora ibyo gukiranuka. (Mika 6:8; Matayo 23:23; Matayo 22:37–40; Yakobo 2:14–17.)

13. IKINYOMA: «Umuntu agomba gutanga icyacumi kubera gutinya umuvumo.»

UKURI: Bamwe bavuga ko kudatanga icyacumi bizana umuvumo witwa "inyatsi", bigatuma batanga icyacumi batabitewe n'umutima ukunze ahubwo babitewe n'ubwoba! Gutanga icyacumi kwa Gikristo ntibikwiriye gukorwa gusa kubera ubwoba bw'umuvumo. Gutanga icyacumi ni igikorwa cyo kuramya Imana no kuyigaragariza umutima ushima kuruta gutekereza ko kugitanga hari icyo byongerera Imana cyangwa uwo ugishyikirije. Pawulo yigisha ko umuntu agomba gutanga nk’uko yabigambiriye mu mutima we, atabitewe n’agahato, kuko Imana ikunda utanga anezerewe.

Umurongo wa Bibiliya: 2 Abakorinto 9:7.

« Umuntu wese atange nk’uko yabigambiriye mu mutima we, atababaye cyangwa atahatwa, kuko Imana ikunda utanga anezerewe. »

14. IKINYOMA: «Abakristo bose bumva kimwe ibijyanye n'icyacumi»

UKURI: Abakristo ntibumva kimwe ibirebana n’icyacumi muri iki gihe. Hari ababona ko icyacumi ari itegeko, mu gihe abandi bashimangira ko gitangwa ku bushake. Ni yo mpamvu iyi ngingo ikwiye kwigishwa neza, umuntu akareba imirongo ya Bibiliya yose ireba gutanga aho gufata umurongo umwe gusa akawugira ihame rya buri wese. Kwigisha Abizera ibijyanye n'icyacumi ni ingenzi cyane, kuko bagomba kubikora bazi neza impamvu yabyo.

Imirongo ya Bibiliya: Matayo 23:23; 2 Abakorinto 9:6–7.

15. IKINYOMA: «Icyacumi ni cyo gipimo cyo hejuru cy’umukristo ukuze mu Mwuka»

UKURI: Umukristo ukuze mu buryo bw'Umwuka ntareberwa mu gutanga icyacumi gusa. Umukristo ukuze mu Mwuka areberwa muri byinshi bijyanye n'ubuzima bwe bwite n'imibereho itanga urugero, gukunda Imana n'abantu, kwihangana... n'ibindi byinshi bijyanye n'inyigisho za Bibiliya. Ni byo ko Bibiliya ihamagarira abizera kugira ubuzima burangwa no gutanga, gukorera abandi, gufasha abakene no kugira impuhwe, ariko ntabwo Umukristo ukuze mu buryo bw'Umwuka yareberwa mu gutanga icyacumi gusa. Yesu yashimangiye ko gukurikira Imana bidashingiye gusa ku ijanisha ry’amafaranga umuntu atanga, ahubwo bikubiyemo ubuzima bwe bwose. (Luka 6:38; 2 Abakorinto 9:6–8; 1 Timoteyo 6:17–19; Matayo 22:37–39.)

Gutanga icyacumi rero ubwabyo byonyine ntibigomba gufatwa nk’igipimo cy'urugero umukristo agezeho; umwizera ahamagarirwa kugira umutima w’ubugiraneza no gukunda Imana na mugenzi we mu buzima bwe bwose.

Murakoze cyane.

Ev. Innocent Munyaneza

imitsima isembuye n'imitsima idasembuye

Sat, 26 Sep 2026 21:27:09 +0000

Answered: Ese ni gute wasenga mu mwuka no mu ukuri

Mon, 03 Aug 2026 17:47:17 +0000

Ibijyanye no gusenga mu kuri no mu Mwuka, bikomoka ku kiganiro Yesu yagiranye n'umugore w'Umusamaliyakazi nk'uko kivugwa mu butumwa bwiza bwa Yohana igice cya 4. Muri Bibiliya yose, iki ni cyo kiganiro kirekire Yesu yigeze yagirana n'umuntu umwe, bikaba bigaragaza uburemere bw'ibyo baganiriye.

Imvo n'imvano

Biradusaba gusubira inyuma gato mu isezerano rya cyera. Nyuma y'ingoma ya Salomon, igihugu cya Israel cyacitsemo ibice bibiri, buri gice kigajya kiyimikira umwami, ibi bice byabayeho bihangana ndetse byageze n'aho byarwanaga mu ntambara.

- Mumajyepfo, hagiye igice kimwe, mu miryango 12 ya Israel iki gice cyafashe izina ry' UBUYUDA, kijyana imiryango 2 (Yuda + Benjamin + Abatambyi b'Abalewi). iki gice cyari gifite umurwa witwaga YERUSALEMU, kandi abaturage b'iki gice bitwaga ABAYUDA.

- Mu majyaruguru, hagiye ikindi gice, gifata imiryango 10 isigaye, kikagira umurwa mukuru witwaga SAMALIYA. Abari batuye muri gice bakomeje kwitwa ABISIRAYELI, ndetse abari batuye i Samaliya bakomeza kwitwa ABASAMALIYA.

Aya makimbirane hagati y'ibice byombi yaje yafata indi ntera, kugeza aho Abayuda baje kujya banena bikomeye Abasamaliya bakabafata nk'abahumanye. Ubusanzwe inzira yavaga i Buyuda ijya i Galilaya yacaga i Samaliya, ariko kubera kwanga guca i Samaliya Abayuda baremeraga bakazenguruka ariko ntibace i Samaliya. No mu gihe cya Yesu ni uko byari bikimeze, ndetse Abayuda bo bibwiraga ko ahantu hakwiriye ho gusengera ari i Yerusalemu, Abasamaliya na bo bakavuga ko ahakwiriye gusengerwa ari i Samaliya ku musozi witwaga Korazini.

Ibi na Yesu nuko yabisanze. Gusa we kuko atajya anena umuntu uwo ariwe wese, yavuye i Buyuda ashaka kuzamuka ngo ajye i Galilaya, we yiyumvamo ko agomba kunyura i Samaliya n'ubwo abandi babifataga nk'ibizira. Yohana 4:3-4 "ni cyo cyatumye ava i Yudaya agasubira i Galilaya, [4]yiyumvamo ko akwiriye kunyura i Samariya."

Kuki Yesu yiyumvisemo ko akwiriye kunyura i Samaliya kandi benewabo b'Abayuda barabifataga nk'ikizira? Igisubizo ni uko yari yaboneye kure umugore wari unaniwe wari ukeneye kubwirwa ubutumwa bwiza buruhura. Yesu ageze i Samaliya, yahitiye ku iriba yahuriyeyo n'Umusamaliyakazi, uyu mugore we yahise amenya ko Yesu ari Umuyuda, ndete bidatinze ahita agaragaza icyo yatekerezaga ku Bayuda: Yohana 4:9 "Umusamariyakazi aramusubiza ati “Ko uri Umuyuda nkaba Umusamariyakazi, uransaba amazi ute?” Icyatumye abaza atyo ni uko Abayuda banenaga Abasamariya."

Mu kiganiro kirekira bagiranye, Umusamaliyakazi yabwiye Yesu ko ahantu hakwiriye gusengerwa ari ku musozi barebaga hakurya yabo witwaga korazini! Uko ni ko uyu mugore yabyumvaga. Igisubizo Yesu yamuhaye, ni cyo kirimo ikibazo tugiye gusuzimuma:

Yohana 4:20-24 "Ba sogokuruza bacu basengeraga kuri uyu musozi, namwe mukagira ngo i Yerusalemu ni ho hakwiriye gusengerwa.” [21]Yesu aramusubiza ati“Mugore, nyizera. Igihe kizaza, ubwo bazaba batagisengera Data kuri uyu musozi cyangwa i Yerusalemu. [22]Dore mwebweho musenga icyo mutazi, ariko twebwe dusenga ibyo tuzi kuko agakiza kava mu Bayuda. [23]Ariko igihe kiraje ndetse kirasohoye, ubwo abasenga by’ukuri basengera Data mu Mwuka no mu kuri, kuko Data ashaka ko bene abo ari bo bamusenga. [24]Imana ni Umwuka, n’abayisenga bakwiriye kuyisengera mu Mwuka no mu kuri.”

Yesu ati "Igihe kiraje, kandi kirasohoye, ubwo abasenga Data by'ukuri batajya kumushakira i Yerusalemu cyangwa kuri uyu musozi..... Imana ni Umwuka, n'abayisenga bagomba kuyisenga mu Mwuka no mu kuri."

Iri jambo Yesu yabwiye Umusamaliyakazi rikubiyemo igisubizo cy'iki kibazo! Ntibikiri ngombwa kujya i Yerusalemu cyangwa i Korazini cyangwa ahandi aho ariho hose gushakayo Imana.

Ibyerekeranye no gusenga mu Mwuka, muri Bibiliya Yera tubisanga ahantu hatatu:

- 1 Abakorinto 14:15 "Nuko noneho ngire nte? Nzajya nsengesha umwuka wanjye ariko kandi nzajya nsengesha n’ubwenge, nzaririmbisha umwuka wanjye ariko kandi nzaririmbisha n’ubwenge."

- Efeso 6:18 "musengeshe Umwuka iteka mu buryo bwose bwo gusenga no kwinginga, kandi ku bw’ibyo mugumye rwose kuba maso, musabire abera bose."

-Yuda 1:20 "Ariko mwebweho bakundwa, mwiyubake ku byo kwizera byera cyane, musengere mu Mwuka Wera,"

==> Gusengera mu Mwuka ntaho bihuriye n'amagambo tuvuga mu gihe dusenga. Ntanubwo gusengera mu Mwuka ari ugusengera mu ndimi gusa, ushobora no gusengera mu rurimi rwawe kandi ugasengera mu Mwuka. Gusengera mu mwuka ni:

- Gusenga uyobowe na Mwuka Wera,

- Gusenga ufashishwe na Mwuka Wera,

- Gusengera mu busabane na Mwuak Wera,

- Kwemera gusenga uko Umwuka Wera atuyoboye gusenga, mu buryo atuyoboyemo, no mu gihe atuyoboyemo.

==> Mu byukuri, Umwuka Wera ni we udusengera na mbere yuko twe dusengera mu Mwuka: Abaroma 8:26 "Uko ni ko n’Umwuka adufasha mu ntege nke zacu kuko tutazi uko dukwiriye gusenga, ariko Umwuka ubwe ni we udusabira aniha iminiho itavugwa,"

- Yesu ni we kuri: Gusenga mu kuri ni ugusenga mu izina rya Yesu.

- Yesu ni we Jambo: Gusenga mu kuri ni ugusengera mu Ijambo ry'Imana, ugahamanya n'Ijambo ry'Imana kandi ugasenga uko Ijambo ry'Imana ribivuga:

Uko ni ko gusenga mu kuri no mu Mwuka, kandi ni byo Imana yifuza ko tuyisenga mu kuri no Mwuka.

Murakoze, Uwuka Wera akomeze atwyoborere.

Ev. Innocent M

Ese ni gute dukwiye gusenga ku bizera umuzuko wa Kristo?

Mon, 04 May 2026 21:04:57 +0000

Ese koko tugomba gusenga dukurikije 1. Ihema ry'ibonaniro kandi umurimo wa Kristo waratwinjije ahera cyane? Bisobanura gusenga ukurikije uko buri gice cyashushanya, urugero;

Kwinjira mu rugo rw'ihema: Kwezwa kw'abizera

Igicaniro cy'umuringa (aho batambaga igitambo): Gushimira Imana igitambo cya Kristo

Igikarabiro cy'umuringa (aho bakarabiraga): Kwihana no kwiyeza

Kwinjira Ahera

Igitekereko cy'amatabaza cyazanaga umucyo: Kwifuza kuyoborwa na Mwuka Wera ari we Mucyo wacu

Ameza y'imitsima: Gusoma no gutekereza ku Ijambo ry'Imana dukurikije icyifuzo cy'umutima

Kwinjira ahera cyane

Icyotero cy'Imibavu: kuramya no guhimbaza Imana ku bw'imbaraga zayo mu bibazo byacu. Amavuta Ijambo ry'Imana atwinjiza mu kuramya Imana kubera icyo Imana yagaragarijwe mu kibazo dusengera; tumuhimbaza kubera imbaraga ze mu gukemura ibibazo.

Isanduku y'isezerano irimo bya bisate by'amabuye: Gushima Imana ku bwo gusohoza kw'amasezerano yayo ku buzima bwacu.

2. Dukwiriye kumenyesha Imana ibyo dukeneye dusaba, twinginga ndetse no dushima nkuko byanditswe muri Abanyafilipi 4:6

Ibi bikanyibutsa kandi Yesu Kristo akiri ku Isi uburyo yakizaga abarwayi cyangwa yerekezaga ku Mana ku byo yabaga akeneye, icyo yakoraga ni ugushima cyangwa ugasanga arategetse. Ibi bikanyibutsa kandi nanone Petero uburyo ki yatangiye gusenga nyuma yo guhinduka icyaremwe gishya muri Kristo Yesu yarategekaga! ibi tubibona mu byakozwe n'intumwa 3:16

3. Gusenga mu ukuri cyangwa mu mwuka (Yohana 4: 21-24)

Bibiliya muri iki gice ntekereza ko ari ho yashyizeho igishushanyo mbonera cy'uko abari muri Kristo Yesu bagomba gusenga. Ariko nanone nkumva ncaka kumenya Ukuri aha bavuga ari ukumeze ute cyangwa dusengera mu Mwuka dute?

Ese Ukuri aha baba bavuga si Kristo kitegererezo cy'umuntu wese ufite Kristo cyangwa ufite Ubumana muri we(Mwuka Wera) cyangwa mu yandi magambo Jambo ry'Imana wabaye umuntu? Ubwo ntibyaba bisobanura ko tugomba kurebera kuri Kristo uburyo ki yasengaga. Ariko kubera Ijambo ry'Imana rigaragaraza uburyo bwinshi bwo gusenga (Isezerano rya Kera n'irishya) ibyo bikantera rero kumva ko gukurikiza kureberera uyu Jambo wahoranye n'Imana kandi wambaye umubiri akaza no mu isi kugira ngo asubize umuntu cya kindi yatakaje (Ubusabane bw'Imana n'umuntu) ndetse n'ibindi byinshi twatakaje nyuma yuko umuntu akoze icyaha. Ikirenze kuri ibyo akatwereka nuko umuntu agomba kubaho ku isi.

Gusenga mu mwuka ho nkumva ko ari kwakundi tuyoborwa n'umwuka w'Imana mu gusenga. Urugero niba uri gusenga Imana(Mwuka Wera) ikakuyobora kwihana cyangwa kureka icyo kintu ukabikora utyo cyangwa niba ugiye gusenga Imana ikagushyira nk'icyifuzo mu mutima ukagisengera gutyo gutyo. Cyangwa se ikindi gihe ukisengera ushima Imana iyo ari yo.

Ariko bitameze nk'amahema agenga isengesho uko rigomba kuba riteye tuvuge Gushima Imana, kwihana(kwiyeza), Gusaba ugasoza nanone ushima gutyo gutyo.

Nkumva ko ari bwo hazaba n'ubusabane nyakuri bw'umwana n'umubyeyi kuko nkuko umwana iyo ashaka ikintu atabanza kuza kuri Se amuryoshya amuryoshya abanza kumushimira kandi mu by'ukuri mu mutima we ababaye.

Murakoze.

Answered: Ingoma y'imyaka 1000 ni iki?

Sat, 11 Apr 2026 15:09:57 +0000

Iki kibazo cyarasubijwe n'ubundi, mwakanda kuri iyi link mukabona igisubizo kirambuye:

Kanda hano

Answered: Itorero nasengamo ryiciyemo ibice 2 none ese naja muruhe ruhande?

Wed, 04 Feb 2026 21:14:23 +0000

Iki ni ikibazo cyiza buri Mukristo wese akwiriye kumenya no gusobanukirwa igihe byaba ngombwa gufata umwanzuro wo kumenya Itorero asengeramo. Ku muntu utari usanzwe afite Itorero asengeramo, hari uburyo afaswamo guhitamo Itorero, turabaha link hano hasi irimo ibisobanuro birambuye.

Ku muntu wari ufite Itorero rikicamo ibice bibiri nk'uko uwabajije iki kibazo abivuga, ubwabyo kwicamo ibice bibiri si ikimenyetso ryiza ku Itorero rya Kristo. N'iyo Itorero ryaba ryakuze Abakristo bakaba benshi ku buryo batabasha gukwirwa aho basengeraga, ntabwo byitwa kwicamo ibice bibiri, ahubwo hashobora gufungurwa ahandi hantu horohereza Abakristo, icyo gihe ntabwo byakwitwa ko Itorero ryiciyemo ibice bibiri, ahubwo byakwitwa ko ryagabye amashami cyangwa se ryagutse. Keretse uwabajije iki kibazo abaye yakibajije nabi, naho ubundi niba yakibajije neza, kwicamo ibice ubwacyo Bibiliya irabirwanya cyane, gusa turabibona kenshi, kandi akenshi biba biturutse ku makimbirane hagani y'abayobozi b'Itorero, ibintu bitari byiza na gato, ndetse Bibliya ibara ibintu byo kwirema ibice nk'umurimo wa kamere:

Tubanze turebere hamwe icyo Bibiliya ivuga ku kwirema ibice cyangwa kwicamo ibice:

Abagalatiya 5:19Dore imirimo ya kamere iragaragara ni iyi: gusambana no gukora ibiteye isoni n'iby'isoni nke, 20no gusenga ibishushanyo, no kuroga no kwangana no gutongana, n'ishyari n'umujinya n'amahane, no kwitandukanya no kwirema ibice, 21no kugomanwa no gusinda, n'ibiganiro bibi n'ibindi bisa bityo. Ndababwira hakiri kare nk'uko nababwiye kera, yuko abakora ibisa bityo batazaragwa ubwami bw'Imana.

Abaroma 2:8 "Ariko abafite imitima ikunda kwirema ibice ntibumvire iby'ukuri ahubwo bakumvira gukiranirwa, izabītura umujinya n'uburakari"

Abafilipi 1:17 "naho ba bandi bamamaza ibya Kristo babitewe no kwirema ibice, babikorana umutima ubarega bibwira ko bashobora kunyongerera umubabaro mu ngoyi zanjye."

Yuda 1:19 "Abo ni bo bazana kwirema ibice, ni abantu buntu ntibafite Umwuka."

Biragaragara mu buryo busobanutse ko kwirema ibice atari imbuto y'Umwuka, ahubwo ni imbuto ya kamere. Kandi iyo itorero ryiciyemo ibice kandi biturutse ku bayobozi, abakristo ni bo babigwamo. Iyo byabayeho rero, inama twagira abakristo bireba bazibona kuri link ikurikira: wakanda hano

Murakoze

Kubera iki Imana hari ibyifuzo yemera ko tugira kandi Ibizi ko bitazasubizwa

Sat, 31 Jan 2026 16:19:16 +0000

Mose yanditse itangiriro ryari?

Thu, 01 Jan 2026 18:03:14 +0000

Answered: Kuki byabaye ngombwa ko Yesu acira hasi agatoba akondo, akagakirisha impumyi imwe?

Thu, 20 Nov 2025 17:01:23 +0000

Yohana 9:6-7 "Amaze kuvuga atyo acira amacandwe hasi, ayatobesha akondo akamusīga ku maso, 7aramubwira ati “Genda wiyuhagire mu kidendezi cy'i Silowamu”, (hasobanurwa ngo “Yaratumwe”). Nuko aragenda ariyuhagira, agaruka ahumutse.

-------

Gusobanukirwa iki kibazo neza, bisaba kumenya uko mu gihe cya Yesu abafite ubumuga bafatwaga muri Israel.

Uretse no mu gihe cya Yesu, abafite ubumuga muri Israel bahabwaga akato gakomeye guhera mu isezerano rya cyera. Muri Bibiliya ubwaho, abafite ubumuga ubwo aribwo bwose ntibari bemerewe gukora imirimo y'ubutambyi mu ihema ry'ibonaniro. Ubumuga n'iyo bwaba buto gute, bwafatwaga nk'inenge yabuzaga ubufite gukora umurimo w'ubutambyi. Ibi ntabwo Imana yapfuye kubikora gutyo nk'aho yaba yari igamije kubashyira mu kato, cyane cyane ko nta ruhare babaga barabigizemo, ahubwo cyari igishushanyo cy'uburyo Imana Yera yifuza ko natwe tuyegera nk'abera. Hari ibyanditswe byinshi bigaragaza uko abafite ubumuga bafatwaga:

Umurimo w'ubutambyi wagombaga gukorwa gusa n'Abalewi. (Abakomoka kuri Lewi). Ariko no mu muryango wa Lewi, uwabaga wemerewe gukora uyu murimo ni umuntu urengeje imyaka 20 kugeza kuri 50, kandi akaba adafite inenge n'imwe cyangwa ubumuga ubwo aribwo bwose ku mubiri. Iri ryari itegeko rikomeye ku buryo undi muntu wihangiraga kubyishyiramo yagombaga kwicwa. Kubara 1:51 "Kandi uko ubwo buturo buhagurutse, Abalewi abe ari bo bajya babushingura, kandi uko bugiye kubambwa, Abalewi abe ari bo babushinga. Utari uwo muri bo wigizwa hafi no kubyishyiramo yicwe."

Itegeko ryari risobanutse neza ko Umulewi wese ufite inenge atagombaga gukora umurimo w'umutambyi: Abalewi 21:21 "Ntihakagire umuntu wo mu rubyaro rwa Aroni umutambyi ufite inenge, wigira hafi ngo atambe ibitambo bitambirwa Uwiteka bigakongorwa n'umuriro. Kuko afite inenge, ntakigire hafi ngo atambe ibyokurya by'Imana ye."

Ibyafatwaga nk'inenge zabuzaga umuntu gukora umurimo w'ubutambyi na byo Imana yarabisobanuye: Abalewi 21:16-20 "Uwiteka abwira Mose ati 17“Bwira Aroni uti ‘Umuntu wese wo mu rubyaro rwawe mu bihe byabo byose uzagira inenge, ntakigire hafi ngo atambe ibyokurya by'Imana ye. 18Umuntu wese ufite inenge ntakigire hafi: impumyi cyangwa uremaye ukuguru, cyangwa ubutaraye izuru, cyangwa ufite urugingo ruruta urundi nka rwo, 19cyangwa uvunitse ikirenge cyangwa ikiganza, 20cyangwa ufite inyonjo cyangwa igikuri, cyangwa ufite inenge ku jisho, cyangwa urwaye ubuheri cyangwa ibikoko, cyangwa umenetse ibinyita bito."

Imana ntiyapfuye gutanga aya mabwiriza gutyo gusa; byari bifite impamvu: Kugirango hatagira icyo mu byera cyangirika. Birumvikana, kuko hari ibyago byinshi ko impumyi yagira icyo yangiza mu murimo w'ubutambyi kurusha umuntu ureba neza. Gusa, abafite ubumuga bo mu batambyi babaga bemerewe kurya ku byera kimwe n'abandi batambyi: Abalewi 21:22-23 "Ajye arya ku byokurya by'Imana ye, ku byera cyane no ku byera. 23Ariko ntakigire hafi ya wa mwenda ukingiriza Ahera cyane, ntakegere igicaniro kuko afite inenge, kugira ngo atagira Ahera hanjye yonona, kuko ndi Uwiteka uheza.’ ”

N'ubwo bimeze bityo,Imana ntiyigeze itanga itegeko ryo guhohotera abafite ubumuga, ahubwo yashyizeho amabwiriza yo kubarengera. Nk'urugero: Abalewi 19:14 "Ntukavume igipfamatwi, ntugashyire impumyi imbere ikiyitega, ahubwo ujye utinya Imana yawe. Ndi Uwiteka."

Ikibazo rero, ari na cyo kituganisha ku gisubizo, ni uko uko imyaka yagiye ishira igaha iyindi, Abisirayeli batangiye gutandukira, bakitwaza ibyanditswe bakabisobanura nabi, kugeza aho abafite ubumuga batangiye guhabwa akato bakanasuzugurwa bikomeye. Kugeza ubwo Yesu yazaga mu isi, yasanze muri Isirayeli abafite ubumuga bafatwaga nk'abantu bavumwe, bagasuzugurwa kandi bagahabwa akato bikomeye.

Icyo gihe, iyo wahuraga n'umuntu ufite ubumuga mu nzira, waciraga hasi kugirango umwereke ko yavumwe. Byari nko kumujomba iyindi nkota. YESU ahuye n'impumyi, na we yaciriye hasi nk'abandi, ariko ntabwo yaciriye hasi kugirango amuvume, ahubwo yagirango amukize! Yesu yakoresheje imivumo yari ituriho, ayishyiraho kugirango adukize, kugeza ubwo we ubwe ahinduka nk'ikivume mu maso y'abantu kugirango twe duhabwe umugisha. Abagalatiya 3:13 "Kristo yaducunguriye kugira ngo dukizwe umuvumo w'amategeko, ahindutse ikivume ku bwacu (kuko byanditswe ngo “Havumwe umuntu wese umanitswe ku giti”),"

Uko ni nako Imana yacu yabigenje ubwo yafataga imivumo ya Balamu ikayinduramo imigisha ku Bisirayeli. (Kubara 23-24). Nehemiya 13:2 "kuko batasanganije Abisirayeli imitsima n'amazi, ahubwo bakabaguririra kuri Balāmu ngo abavume, ariko Imana yacu ihindura umuvumo kuba umugisha."

Icyo ni cyo gisubizo cy'ukuri: Yesu yaciriye hasi kugirango ahindure ubusa umuvumo abantu bavumaga abari bafite ubumuga, akoresha icyo gikorwa bari basanzwe bakoresha mu kuvuma kugirango atange umugisha, kimwe n'uko yagiye ku musaraba agahinduka ikivume kugirango adukureho umuvumo w'amategeko.

Yesu wacu nashimwe cyane, ntacyo twabona twamwitura.

Ev. Innocent Munyaneza

Answered: Ese koshywa ni icyaha?

Thu, 13 Nov 2025 18:53:00 +0000

Tubanze dusobanure iri jambo: Koshywa ni uguhamagarirwa gukora icyaha mu buryo bumwe cyangwa ubundi. Satani ashobora kuguhamagarira gukora icyaha, abantu na bo baguhamagarira gukora icyaha, n'umutima wawe ubwawo ushobora kuguhamagarira gukora icyaha. Muri ubu buryo koshywa byafatwa kimwe no gushukwa.

Koshywa cyangwa gushukwa ubwabyo si icyaha. Bibaye ari icyaha, na Yesu yaba yarakoze icyaha kandi turabizi neza ko atigeze akora, kuko na Yesu ubwe satani yagerageje kumushuka. Abaheburayo 4:15 "Kuko tudafite umutambyi mukuru utabasha kubabarana natwe mu ntege nke zacu, ahubwo yageragejwe uburyo bwose nkatwe, keretse yuko atigeze akora icyaha."

Igihe cyose umuntu akiri muri uyu mubiri kuri iyi si, nta hantu na hamwe ushobora kugera ku buryo satani yagutinya. satani ahora agerageza amahirwe ye, uko wasenga kose, uko wakiranuka kose, uko waba umeze kose satani azagerageza kugushuka. Kandi numunesha uyu munsi, ntabwo azakuzibukira, ahubwo azagutega ikindi gihe. Niba ibyo byarabaye kuri Yesu, watekereza ute ko twe yadutinya?

Reka turebe uko byagendekeye Yesu: Mariko 1:12-13 "Uwo mwanya Umwuka amujyana mu butayu, 13amarayo iminsi mirongo ine ageragezwa na Satani, aba hamwe n'inyamaswa, abamarayika bakamukorera." Yesu yari afite impamvu nyinshi zagombaga gutuma satani atirirwa ahangara kumugerageza: Icya mbere, satani yari azi neza uwo Yesu ari we, ariko ntibyamubujije kugerageza amahirwe ye ngo arebebe ko Yesu yava ku izima agacumura. Icya kabiri, Yesu yari mu masengesho y'iminsi 40, satani yamusanze muri ayo masengesho. Na byo bigaragaza ko kuba waba uri mu masengesho, satani ntazagutinya. Yesu amaze kunesha satani, satani ntiyavuye ku izima, ahubwo ngo "yamuteze ikindi gihe". Dore uko Bibiliya ibivuga: Luka 4:13 "Umwanzi arangije ibyo amugerageresha byose aramureka, amutega ikindi gihe." Kandi koko ni ko byagenze: Mbere Yesu yaneshereje satani mu butayu mu masengesho, satani yongeye kugerageza amahirwe ye ubwo Yesu yari muri Getsemane ababaye cyane, umunsi umwe mbere yuko adutangirwa ku musaraba. Satani yaribwiraga ati ubwo Yesu yanshoboye ari mu masengesho, noneho reka mutere ari mu gahinda kenshi buriya ndamushobora.... na byo byafashe ubusa.

Ibi bigaragaza ko koshywa ubwabyo atari icyaha, ndetse nta mukristo numwe wagera ahantu adashobora koshywa: Ikibazo si ukoshywa, ahubwo ikibazo ni ukugwa mu moshya. Ntabwo gusenga ubyabyo byatuma satani agutinya, ahubwo byatuma utagwa mu moshya. Dore uko Yesu ubwe yabyivugiye abwira intumwa ze: Luka 22:39-40 39Arasohoka ajya ku musozi wa Elayono nk'uko yamenyerey, abigishwa be baramukurikira. 40Agezeyo arababwira ati “Nimusenge kugira ngo mutajya mu moshya.” Yesu yari yabagiriye inama: Ntiyigeze abwira intumwa ze ko amoshya atari buze, ahubwo yabasabye gusenga kugirango batayagwamo. Ikibabaje ni uko uyu muburo batawukurikije, aho gusenga barasinziriye, birangira bamwe batangiye kurwanisha umubiri nka ba Petero, abandi bariruka baramusiga ....

Gusenga ntibibuza satani kutwoshya, ahubwo biduha imbaraga zo kutagwa mu moshya. Isi ikiriho, Yesu yivugiye ko ibisitaza n'ibigusha bitazabura kuza. Ntaho twabihungira, satani azabizana uko byamera kose n'uwo waba uri we wese. Yesu yabivuze muri aya magambo: Luka 17:1 "Nuko abwira abigishwa be ati “Nta cyabuza ibisitaza kuza, ariko ubizana azabona ishyano."

Matayo 18:7 "Isi izaboneshwa ishyano n'ibigusha abantu, kuko ibyo bigusha bitazabura kuza, ariko uwo muntu uzana ibigusha azabona ishyano."

Muri macye, koshywa ubwacyo si icyaha. Bihinduka icyaha iyo wemeye gushyira amoshya mu bikorwa cyangwa mu bitekerezo, cyangwa ukabuzwa gukora ikiza washoboraga gukora. Yakobo atubwira neza uko urugendo rwo gukora icyaha rutangira nuko ruhinduka icyaha: Yakobo 1:13-15 13Umuntu niyoshywa gukora ibyaha ye kuvuga ati “Imana ni yo inyoheje”, kuko bidashoboka ko Imana yoshywa n'ibibi, cyangwa ngo na yo igire uwo ibyohesha. 14Ahubwo umuntu wese yoshywa iyo akuruwe n'ibyo ararikiye bimushukashuka. 15Nuko iryo rari riratwita rikabyara ibyaha, ibyaha na byo bimaze gukura bikabyara urupfu.

Uburyo bwiza bwo kunesha amoshya ni ukubika Ijambo ry'Imana mu mutima rikakurwanaho igihe cyose. na Yesu ni bwo buryo yaneshesheje satani, yaramubwiraga ati "handitse ngo...". Dawidi yabivuze atya: Zaburi 119:11 "Nabikiye ijambo ryawe mu mutima wanjye, kugira ngo ntagucumuraho." Ntitugomba kwemerera amoshya gutinda mu bitekerezo byacu. Yosefu akimara kubona ko amoshya y'ubusambanyi yamusatiriye, ntiyayahaye umwanya ngo abanze kubitekerezaho ahubwo yarirutse. byaramukijije.

Murakoze, Uwiteka atugirire neza

Answered: Iyo umuntu apfuye ajya he?

Sun, 09 Nov 2025 07:58:23 +0000

Iki kibazo kirasa n'ikindi bifitanye isano, kigira kiti: "Ese nyuma y'ubu buzima hari ubundi buzima?" Wakanda hano ukabona igisubizo

ni gute nanoza umubano wange ni Imana

Wed, 29 Oct 2025 16:34:04 +0000

Answered: Kugirango ube Umushumba, hari Amashuri ya Bibiriya ugomba kuba warize?

Tue, 28 Oct 2025 19:20:33 +0000

Gusubiza neza iki kibazo bisaba kubanza gusobanukirwa neza amateka y'icyo twita "ishuri".

Niba dufata ishuri nk'uko turizi ubu, ni ukuvuga ahantu abantu bicara bakigishwa n'umuntu cyangwa abantu, bagahabwa amasomo yabanje gutegurwa, hakabamo n'ibyiciro bigendeye ku myaka cyangwa ubumenyi, amateka yaryo si aya cyera cyane nk'uko abantu bamwe baba babyibwira:

Hanze ya Bibiliya, amateka agaragaza ko amashuri nk'uko tuyazi ubu atabagaho mbere ya Yesu. Icyo gihe habagaho nk'icyo umuntu yakwita "Gutozwa" kw'abantu, aho mu bihugu byari byarateye imbere habagaho gushyira hamwe abantu bacye bafatwagwa nk'abahanga, bakigishwa cyane cyane ibijyanye na "philosohie". Nyuma ya Yesu, amashuri nk'uko tuyazi ubu yatangiye kubaho ahagana mu kinyejana cya 15.

Muri Bibiliya mbere ya Yesu, nko mu gihe cy'umuhanuzi Samuel, habagaho ibyo bamwe bita ubu "ishuri ry'abahanuzi", hari ahantu hahurizwaga hamwe abasore bakigishwa amategeko kandi bagatozwa gukorera Imana. Mwene aya mashuri (niba ariko twayita) yabaga i Beteli, n'i Yeriko, ahabaga abana b'abahanuzi babarirwaga muri 50. (2 Abami 2:1-7)

Mu isezerano rishya nyuma ya Yesu, mu gitabo cy'ibyakozwe n'intumwa havugwa ahantu muri Efeso hari hari ishuri ryari iry'umugabo witwaga Turano, ndetse iri shuri Pawulo yaryigishijemo kenshi. Ibyakozwe 19:9 "Ariko bamwe binangiye imitima banga kwizera, batukira Inzira ya Yesu imbere y'abantu. Ava muri bo arobanura abigishwa, iminsi yose agīra impaka mu nzu yo kwigishirizamo ya Turano." mu ndimi z'amahanga bavuga neza "School, Ecole) ( Actes 19:9 "Mais, comme quelques-uns restaient endurcis et incrédules, décriant devant la multitude la voie du Seigneur, il se retira d'eux, sépara les disciples, et enseigna chaque jour dans l'école d'un nommé Tyrannus. Act 19:9 "But when divers were hardened, and believed not, but spake evil of that way before the multitude, he departed from them, and separated the disciples, disputing daily in the school of one Tyrannus.)

Uretse ibyerekeranye n'amashuri, ihame ryo kwigishwa no gutozwa gukorera Imana rigaragara henshi muri Bibiliya. Abakozi b'Imana benshi muri Bibiliya bagaragara batozwa n'ababakuriye: Nka Pawulo, uretse kuba yari yarize cyane amategeko mu by'Abafarisayo, yanatorejwe ku birenge bya Gamaliyeli. Elisa yatojwe na Eliya, Yosuwa yatojwe na Mose....

Muri Bibiliya hagaragara kenshi abantu bigisha abandi mu buryo bumwe cyangwa ubundi. 2 Ngoma 17:9 "Abo bigisha mu Buyuda bafite igitabo cy'amategeko y'Uwiteka, bagenda imidugudu y'i Buyuda yose bigisha abantu."

Ubwo Daniel na bagenzi be batatu bagezwaga i Babuloni, bashyizwe mu ishuri ry'Abakaludaya ryo kubigisha ururimi n'umuco by'i Babuloni imyaka itatu yose. (Daniel 1:1-5)

Bibiriliya iratuburira ku ngaruka zo kutigishwa: Yesaya 29:11-12 "Kwerekwa kose kwabahindukiye nk'amagambo yo mu gitabo gifatanishijwe ikimenyetso, iyo bagihaye umuntu wigishijwe bati “Soma iki gitabo”, akabasubiza ati “Simbasha kugisoma kuko gifatanishijwe ikimenyetso”, 12maze bakagiha utigishijwe bati “Soma iki gitabo”, akabasubiza ati “Reka da! Sinigishijwe.”

==> Biragaragara mu buryo butajijinganywaho ko ku mukozi w'Imana, ihame ryo kwemera guca bugufi ukigishwa cyangwa ugatozwa gukorera Imana si inyigisho z'ubuyobobe. Ubu se iyo uza kuba utarize gusoma, wari kuba urimo gusoma ibi?

==> Ku rundi ruhande, Bibiliya ntivuga ngo kugirango ube umukozi w'Imana ugomba kuba warize kugeza ku rwego runaka. Abayobozi b'amadini n'amatorero ni bo bakagombye gushyiraho umurongo-ngenderwaho, birumvikana ko ku ruhande rumwe biragoye cyane ko wayobora abantu utanazi gusoma no kwandika, ku rundi ruhande, abayobozi bakagombye kumenya urwego runaka n'ubumenyi urwo rwego rukeneye.

==> Ni byo rwose ko gukorera Imana bisaba mbere na mbere ko uba warahamagawe, ariko umuhamagaro ntukuraho kwemera gutozwa no kwigishwa. Muri uyu murimo w'Imana nta kintu nabonye gisenya nko kugira ishyaka ritarimo ubumenyi. Mwene iri shyaka akenshi rirasenya aho kubaka.

==> Birumvikana ko buri muntu wese ufite umutwaro wo gukorera Imana atariko yagira amahirwe yo kwiga ishuri rya Bibibiliya kubera impamvu zitandukanye. Yewe, n'intumwa za Yesu ubwazo ntabwo ariko zose zari zarize amashuri asanzwe, ndetse bamwe muri bo batekerezwaga nk'abaswa kuko batari barize amashuri y'icyo gihe. Iyo Yesu yatoranyaga ntiyarebaka ku mashuri mbere na mbere. Ibyakozwe 4:13 "Babonye ubushizi bw'amanga bwa Petero na Yohana, kandi bamenye ko ari abaswa batigishijwe baratangara, maze bibuka ko babanaga na Yesu."

==>Habaho ibyo twita "kwigira mu murimo" (Guhamagarwa, ugakora ariko ugakora uniga icyarimwe). Na byo bibaho kandi si ikosa.

==> Muri context y'u Rwanda, aho ubuyobozi bwa Leta busaba ko kugirango umuntu abe umukozi w'Imana ku rwego runaka agomba kuba yarize amashuri ya Bibiliya runaka, ni ngombwa cyane kugendera ku ihame ryo kubaha ubuyobozi. Ahantu honyine Umukristo ashobora kutubaha ubuyobozi, ni igihe itegeko ry'ubuyobozi rihabanye n'itegeko ry'Imana (Ibyakozwe 5:29). Rero kuri iki kibazo turiho, ntabwo amabwiriza y'ubuyobozi atandukanye n'aya Bibiliya, kuko ihame ryo kwigishwa no gutozwa na ryo ni ihame rya Bibiliya.

Murakoze, Mwuka Wera akomeze atuyobore.

Ev. Innocent M.

Answered: Bibiriya ivuga iki ku kuba Satani n'abadayimoni bashobora gukora ibitangaza?

Sun, 14 Sep 2025 19:10:34 +0000

Iki ni ikibazo Bibiliya isubiza idaciye ku ruhande.

Muri Bibiliya ubwaho, mu buryo butajijinganywaho hagaragaramo incuro nyinshi ibitangaza bikorwa hakoreshejwe imbaraga z'umwijima. (satani n'abadayimoni). Ingero ni nyinshi:

1) Igihe Mose yari atumwe kwa Farawo muri Egiputa, yakoze igitangaza mu mbaraga z'Imana, ajugunya inkoni hasi ihinduka inzoka. Bibiliya ivuga ko Farawo yahise abwira abarozi be n'abakonikoni, na no bo bahita bakora igitangaza gisa n'icyo. Gusa kugirango imbaraga z'Imana bigaragare ko ziruta iza satani, igitangaza cy'Imana cyahise kimira igitangaza cya satani. Bibiliya ibivuga muri aya magambo:

Kuva 7:10 "Mose na Aroni binjira kwa Farawo, bakora icyo Uwiteka yategetse. Aroni ajugunya inkoni ye hasi imbere ya Farawo n'abagaragu be, ihinduka inzoka. 11Farawo na we ahamagaza abahanga n'abarozi, ari bo bakonikoni ba Egiputa, na bo babigenza batyo babikoresheje uburozi bwabo. 12Umuntu wese muri bo ajugunya inkoni ye hasi ziba inzoka, maze inkoni ya Aroni imira izabo."

==> By'ukuri, mu byago 10 Mose yateje muri Egiputa, wongeyeho n'igitangaza cya mbere yakoreye imbere ya Farawo, abarozi babashije kwiganamo bitatu bya mbere birabakundira: Mose yahinduye inkoni inzoka n'abarozi barabikora (Kuva 7:10-12). Mose yahinduye amazi amaraso abarozi na bo barabikora (Kuva 7:20-22). Mose yazamuye ibikeri byuzura muri Egiputa, abakonikoni ba Egiputa na bo barabikora.

==> Ku cyango cya 3, Mose yakoze igitangaza, ahindura umukungugu inda, abarozi bagerageje biranga. (Kuva 8:12-14); ahubwo ku gitangaza cya 3, abakonikoni bemeye ko ibitangaza birimo gukorwa "n'urutoki rw'Imana"! (Kuva 8:15)

==> Guhera ku gitangaza cya 4, ho ntibongeye no kugerageza, bisa n'aho amaboko bari bayamanitse!

==> Ku gitangaza cya 6 ho, uretse no kuba abakonikozi bataranagerageje, ahubwo na bo ubwabo bari bafashwe n'ibisebe kimwe n'abandi bose! (Kuva 9:8-12)

==> Mwagirango aba barozi bo kwa Farawo babashije kwigana ibitangaza bitatu bakuye he imbaraga? Mose yabikoze ku bw'imbaraga z'Imana, abarozi babikoze ku bw'imbaraga za satani.

==> Aha harimo isomo rikomeye: Ibitangaza bitatu bya mbere, Imana yemereye satani gukora. Guhera ku cyango cya 4, ntibongeye no kugerageza! Ku cyago cya gatandatu, na bo ubwabo bafashwe n'imbaraga z'Imana nk'abandi.

2) Ku gihe cya Yobu, Imana yemereye satani kugerageza Yobu mu buryo ashaka, gusa imwima ubugingo bwe. Dore ibyo Biiliya ivuga:

Yobu 1:18-19 "Akibivuga haza undi ati “Abahungu bawe n'abakobwa bawe basangiraga banywera vino mu nzu ya mukuru wabo, 19nuko haza inkubi y'umuyaga iturutse mu butayu, ihitana impfuruka enye z'inzu, maze inzu igwira abo basore barapfa. Ni jye warokotse jyenyine wo kubikubikira.”

==> Mwagizengo iyi nkubi y'umuiyaga yazanywe na nde? Ni satani.

Ni byo rwose nta gushidikanya, satani n'abadayimoni bashobora gukora ibitangaza. Gusa ibitangaza byabo ni ibitangaza by'ibinyoma. 2 Abatesalonike 2:9-10 "Kuza k'uwo mugome kuri mu buryo bwo gukora kwa Satani, gufite imbaraga zose n'ibimenyetso n'ibitangaza by'ibinyoma, 10n'ubuhenzi bwose bwo gukiranirwa ku barimbuka, kuko batemeye gukunda ukuri ngo bakizwe."

Ninayo mpamvu Bibiliya inatuburira kutizera imyuka yose: 1 Yohana 4:1 "Bakundwa, ntimwizere imyuka yose ahubwo mugerageze imyuka ko yavuye ku Mana, kuko abahanuzi b'ibinyoma benshi badutse bakaza mu isi."

Na Yesu ubwe, yivugiye ko abahanuzi b'ibinyoma bazaza bakora ibitangaza by'ibinyoma.... ibi bitangaza nta handi bituruka: ni kwa satani. Matayo 24:24-25 "Kuko abiyita Kristo n'abahanuzi b'ibinyoma bazaduka bakora ibimenyetso bikomeye n'ibitangaza, kugira ngo babone uko bayobya n'intore niba bishoboka. 25Dore mbibabwiye bitaraba."

Birasobanutse rwose: Ni byo, satani n'abadayimoni bashobora gukora ibitangaza, gusa bakorera mu mipaka ntarengwa bashyiriweho.

Murakoze, Uwiteka akomeze atugirire neza.

Ev. Innocent Munyaneza

Answered: Ko Imana ishobora byose, kuki idakuraho Satani?

Tue, 09 Sep 2025 17:59:29 +0000

Nk'uko dukunze kubivuga, gusubiza ikibazo gitangira kiti "Kubera iki Imana........." akenshi biragora. Bibiriya ntabwo buri gihe isobanura impamvu zose Imana yakoze ikintu gutya cyangwa kuriya, kuko Imana idategetswe gusobanura ibyayo. Yobu 33:13 "Ni iki gituma uyigisha impaka, Kuko itagomba gusobanura ibyayo?"

Gusa iki ni ikibazo abantu benshi bibaza kandi si mu bihe bya none gusa banacyibazaga guhera cyera. Akenshi turibaza tuti "Kuki Imana itahise yica satani akimara gucumura, ko ubu none isi iba ifite amahoro?" Tuzi neza ko igihe kimwe, ahazaza, Imana izatsinda satani burundu, satani ajugunywe mu nyanja yaka umuriro aho atazabasha kongera gukora nk'uko yidegembwa ubu. (Ibyahishuwe 20:10 "kandi Satani wabayobyaga ajugunywe muri ya nyanja yaka umuriro n'amazuku, irimo ya nyamaswa na wa muhanuzi w'ibinyoma. Bazababazwa ku manywa na nijoro iteka ryose.") None umuntu yakwibaza ati "None se niba Imana izabikora igihe kimwe, kuki n'ubundi itabikoze na mbere hose? Cyangwa basi yabikoze ubungu ko ibishoboye, igatabara ubwoko bwayo?

Ntitwakwihandagaza ngo tuvuge ko tuzi imitekerereze y'Imana mu buryo budasubirwaho, ariko hari ibyo tuzi mu mikorere y'Imana dusenga:

1) Icya mbere, tuzi ko Imana yigenga, ifite ubutware bwose hejuru y'ibyo yaremye byose na satani arimo. Yego ni byo ko satani n'abadayimoni bakora, ariko bakora gusa kugeza ku murongo ntarengwa bashyiriweho. Ntabwo Imana yaturetse mu biganza bya satani n'abadayimoni ngo badukoreshe ibyo bashaka, hari aho badashobora kurenga naho ubundi baba baradukozeho ibirenga kure ibyo dutekereza.

2) Icya kabiri, Tuzi ko ibiriho ubu, ibyashize n'ibizaza, byose biri muri gahunda y'Imana nk'uko yayitekereje guhera mu ntangiriro. Ibintu byose birimo kugenda uko Imana yabitekereje guhera mu ntangiriro kugeza ku iherezo ry'ibihe, nta kintu na kimwe cyayitunguye kandi nta kintu na kimwe cyahindura gahunda zayo. Yesaya 14:24 "Uwiteka Nyiringabo ararahiye ati “Ni ukuri uko nabitekereje ni ko bizasohora, kandi uko nagambiriye ni ko bizaba." Hari umuntu umwe muri Bibiliya wagerageje kuba yavuguruza Imana, dore uko Imana yamusubije: Yobu 40:6-8 Maze Uwiteka asubiriza Yobu muri serwakira ati 7“Noneho kenyera kigabo, Ngiye kukubaza nawe unsubize. 8Mbese ugiye kumvuguruza icyo nategetse? Ugiye kumpererezaho ibyaha kugira ngo ubone urubanza?

Yobu 46:10 "Mpera mu itangiriro nkavuga iherezo, mpera no mu bihe bya kera nkavuga ibitarakorwa nkavuga nti ‘Imigambi yanjye izakomera kandi ibyo nzashaka byose nzabikora."

3) Icya gatatu, tuzi ko Imana ari urukundo, ibibaho byose n'ibyo Imana ikora byose biba biri mu mugambi wayo mwiza w'urukundo, kandi byose bigafatanyiriza hamwe kutuzanira ibyiza. Abaroma 8:28 "Kandi tuzi yuko ku bakunda Imana byose bifataniriza hamwe kubazanira ibyiza, ari bo bahamagawe nk'uko yabigambiriye"

Gahunda Imana yapangiye umuntu, ni yo gahunda nziza yashobokaga. Kwibwira ngo "Iyo Imana iza kubigenza gutya ni bwo byari kuba byiza kurushaho ......" , kwibwira ngo iyo nza kuvuka imyaka 10 mbere cyangwa imyaka 10 nyuma ni bwo byari kuba byiza kurushaho....." ibyo byose ni ukwibeshya cyane. Ni nde warusha Imana ubwenge ngo ayigire inama? Ninde wayirusha urukundo ngo ayibwire uko urukundo rwayo rwarushaho kuba rwiza? Inzira z'Imana, ubwiza bwayo, ubutabera bwayo, gukiranuka kwayo, bizabonwa n'abazabasha kwihangana bagategereza, ubwo bizasohora bazasobanukirwa neza ko Imana yabakunze ku rwego rudashobora kugira icyo rwongerwaho cyangwa guhindurwaho.

4) Icya kane ari na cyo cya nyuma, twongere rwose tubitsindagire ko dukwiriye kwizera Imana mu buryo bwuzuye. Byaba bitangaje cyane kuba umwana w'imyaka 3, ukiga kuvuga no kugenda, yabaza se ati "kuki warongoye Mama? Ese kuki utangishije inama?" Cyangwa akabaza nyina ati "Kuki wemeye Papa? kuki se ubundi utangishije inama?" Murumva se bitaba ari agahomamunwa? Birangana neza neza no kuba twabaza Imana ngo "Kuki udakuraho satani nonaha kandi ubifitiye ububasha n'uburenganzira?"

Inzira z'Imana ziratunganye ku kigero cy'aho ntacyo wakuraho, ntacyo wakongeraho ntan'icyo wahinduraho. mu ijambo rimwe ry'icyongereza, inzira zayo ziri "Perfect". Zaburi 18:31 "Inzira y'Imana itungana rwose, Ijambo ry'Uwiteka ryaravugutiwe, Ni ingabo ikingira abamuhungiraho bose." Buri gahunda yose Imana ifite, iyo ifitiye satani, igihe izamukuriraho, uburyo izamukuraho .... ni yo gahunda nziza ishoboka ku muntu. Ntacyo umuntu yakwifuza kugira icyo ahinduraho, kuko Imana iramutse yemereye muntu kugira icyo ahinduraho, byaba bibi ku muntu.

Ukuri guhari ni uko tudashobora gusobanukirwa neza inzira z'Imana n'imigambi yayo. Yesaya 55:8-9 “Erega ibyo nibwira si ibyo mwibwira, kandi inzira zanyu si zimwe n'izanjye!” Ni ko Uwiteka avuga. 9“Nk'uko ijuru risumba isi, ni ko inzira zanjye zisumba izanyu, n'ibyo nibwira bisumba ibyo mwibwira." Icyo twebwe dusabwa nk'abana b'Imana, ni ukuyizera no kuyubaha. Ibyo iteganyirije satani n'igihe izabishyirira mu bikorwa, ni yo gahunda nziza ibaho yashoboraga gukorwa mu nyungu za muntu.

Murakoze, Uwiteka atugirire neza.

Ev. Innocent Munyaneza

Answered: Tuzi ko satani atabera hose icyarimwe: aba he?

Sun, 07 Sep 2025 10:44:51 +0000

Iki ni ikibazo cyiza. Ariko mbere yuko dusobanura aho satani aba, reka dusobanure aho ataba:

1) Satani ntabwo aba mu ijuru: Yaryirukanywemo cyera cyane, ubwo ubwibone bwe bwamuteraga kwifuza kuba nk'Imana, Imana ikarimwirukanamo, cyokora akabasha kugwana n'abamarayika benshi bemeye kumukurikira, abo na bo baje guhinduka abadayimoni.

==> Yesu yarabyivugiye: Luka 10:18 "Arababwira ati “Nabonye Satani avuye mu ijuru, agwa asa n'umurabyo."

==> Abahanuzi barabivuze: Yesaya 14:12 “Wa nyenyeri yo mu ruturuturu we, mwana w'umuseke ko uvuye mu ijuru, ukagwa! Uwaneshaga amahanga ko baguciye bakakugeza ku butaka! 13 Waribwiraga uti ‘Nzazamuka njye mu ijuru nkuze intebe yanjye y'ubwami isumbe inyenyeri z'Imana’, kandi uti ‘Nzicara ku musozi w'iteraniro mu ruhande rw'impera y'ikasikazi, 14nzazamuka ndenge aho ibicu bigarukira, nzaba nk'Isumbabyose.’ 15Ariko uzamanuka ikuzimu ugere ku ndiba ya rwa rwobo."

Ibyahishuwe 12:7 "Mu ijuru habaho intambara. Mikayeli n'abamarayika be batabarira kurwanya cya kiyoka, ikiyoka kirwanana n'abamarayika bacyo. 8Ntibanesha kandi mu ijuru ahabo ntihaba hakiboneka. 9 Cya kiyoka kinini kiracibwa, ari cyo ya nzoka ya kera yitwa Umwanzi na Satani, ari cyo kiyobya abari mu isi bose. Nuko kijugunywa mu isi, abamarayika bacyo bajugunyanwa na cyo."

2) Satani ntabwo aba mu muriro: Oya, n'ubwo ari yo maherezo ye, ariko satani ntabwo arajugunywa mu muriro. Wabyita mu muriro, ikuzimu, mu kidaturwa, mu mwijima... aho hose si ho satani aba. Ku iherezo ry'ibiriho, hazabaho ingoma Kristo y'imyaka 1,000 izwi ku izina rya "Millenium". Iyo myaka yose, satazi azaba abohewe ahantu, atabasha gushukana no kuyobya. (Ushobora gukanda hano ugasoma byinshi ku byerekeranye na Millenium). Nyuma y'iyi myaka, satani azarekurwa akanya gato, ariko bidatinze ahite acirwaho iteka ajugunywe mu muriro utazima mu buryo bwa burundu. Icyo ni cyo gihe satani azajugunywa mu muriro, ariko ubu si ho ari.

NONE SE NIBA ATARI MU IJURU, NTABE NO MU MURIRO, UBU ABA HE?

Mbere na mbere, tubanze dusobanure ko satani ari ikiremwa cy'umwuka. Ibiremwa by'umwuka nta mupaka bigira kubera ahantu cyangwa igiye. (Space and time). Bisobanuye ko ikiremwa cy'umwuka, byaba satani, abadayimoni cyangwa Abamarayika), iyo bakeneye kwinjira ahantu ntibisaba ko aho hantu haba hakinguye. Iyo bakenye kujya ahantu ntibibasaba uburyo bwo kugerayo. (Nta ndege nta modoka, nta bwato....). Ikindi kandi, ibiremwa by'umwuka ntibikeneye igihe runaka ngo bive ahantu bigere ahandi, ahubwo bigenda ku muvuduko w'igitekerezo. Iyo ikiremwa cy'umwuka kiri muri Amerika kigakenera kuza mu Rwanda, ntigikenera amasaha, iminota, amasegonda nk'ibiremwa byambaye umubiri .... oya.... kirabitekereza kikaba cyagezeyo. Ibiremwa by'umwuka ntibitangirwa n'ibibikikije, nta mvura byumva, nta bushyuhe, nta bukonje, nta muyaga, ntibinanirwa, ntibisonza, ntibigira inyota.... ibyo twebwe bitubera imbogamizi kubera umubiri gusa kandi byo nta mubiri byambaye. Ikirenze kuri ibyo, ibiremwa by'umwuka ntibipfa! Kuva satani yaremwa, ariho kandi azahoraho, kimwe n'abadayimoni ndetse n'Abamarayika, bose ntibazigera bapfa bazahoraho iteka ryose. Ikibazo gusa ni iki: Bazabaho iteka ryose hehe? Erega burya natwe ni uko! Umuntu wese afite igice cy'umwuka n'igice cy'umubiri. Umubiri uzapfa usubire mu gitaka, ariko igice cy'umwuka kizahoraho iteka ryose! Ikibazo gusa ni ukwibaza ngo "Nzabaho iteka ryose hehe?"

Kubera ibyo byose tuvuze hejuru, ibiremwa by'umwuka ntibikeneye ahantu ho gutura nkaho byaba byambaye umubiri. Twe dukenera inzu kugirango iturinde byinshi, ariko ikiremwa cy'umwuka ntigikeneye kwirinda ibyo twe dutinya. Ntigikeneye ubutaka ngo gikandagireho, ntigikeneye kurya ngo kidapfa.... Oya.

Aho satani aba ubu, twakwifashisha imirongo 3 muri Bibiliya tukahamenya:

- Yobu 1:7 "Uwiteka abaza Satani ati “Uturutse he?”Nuko Satani asubiza Uwiteka ati “Mvuye gutambagira isi no kuyizereramo.”

- 1 PETERO 5:8 "Mwirinde ibisindisha mube maso, kuko umurezi wanyu Satani azerera nk'intare yivuga ashaka uwo aconshomera."

- Yohana 12:31 "Ubu urubanza rw'ab'isi rurasohoye, ubu umutware w'ab'iyi si abaye igicibwa."

======> Ibyo tumaze gusobanura hejuru, bitanga igisubizo kimwe kandi gisobanutse: Satani, nk'umwami w'ab'iyi si, nta hantu hadahinduka afite atuye, ahubwo azerera mu isi yose ashaka uwo yagirira nabi.

-------------------

P.S. Gusa n'ubwo bimeze gutyo, Bibiliya hari ahantu ivuga ko hari ahantu yita "Ahantu ho mu ijuru" hafatwa nk'ubuturo bw'imyuka mibi. Bibiliya ibivuga muri aya magambo: Abefeso 6:2 "Kuko tudakirana n’abafite amaraso n’umubiri, ahubwo dukirana n’abatware n’abafite ubushobozi n’abategeka iyi si y’umwijima, n’imyuka mibi y’ahantu ho mu ijuru." Aha hafatwa nk' ijuru rya kabiri, ariko ntihakwiriye gufatwa nk'ahantu satani atuye, aba. Aho aba twahabonye. (Niba wifuza gusobanukirwa n'ibyerekeranye n'amajuru atandukanye (Ijuru rya mbere, irya kabiri n'irya gatatu, wakanda hano)

Uwiteka atugirire neza

Ev. Innocent Munyaneza

Answered: Satani asa ate? Abadayimoni basa bate?

Thu, 04 Sep 2025 18:25:28 +0000

Mu mateka y'isi guhera cyera cyane, abantu bakunze kwishyiriraho no kwishushanyiriza satani n'abadayimoni mu ishusho batekereza. Akenshi bashushanya satani nk'ikiremwa giteye ubwoba, gifite amahembe, gifite isura mbi iteye ubwoba. Reba nk'urugero rumwe uko bamushushanya:

Ariko se mu byukuri satani asa nk'uko bakunze kumugaragaza mu bishushanyo?

Nk'uko dukunze kubivuga, Bibiliya ntiyandikiwe kutumara amatsiko, yandikiwe kutugaragariza umugambi mwiza w'urukundo Imana ifitiye umuntu. Ibintu bitari muri uyu murongo, Bibiliya ibivugaho gacye cyane yihitira. Ukuri guhari nuko nta na hamwe Bibiliya itanga description nyayo y'isura ya satani. Ahubwo umurongo umwe rukumbi usa n'uganisha ahongaho, uvuga ibihabanye n'ibyo abantu batekereza. 2 Abakorinto 11:14 "Kandi ibyo si igitangaza, kuko na Satani ubwe yihindura nka marayika w’umucyo."

Ukuri guhari gutangwa na Bibiliya, ni uko satani n'abadayimoni ari ibiremwa by'umwuka. kandi ibiremwa by'umwuka nta shusho ifatika bigira, amaso y'umubiri ntabasha kubona ibiremwa by'umwuka, ndetse igihe bibaye ngomba ko ibi ibiremwa by'umwuka byigaragariza abantu, bifite ububasha byo kwambara umubiri ufatika mu ishusho runaka. Ibi ni ukuri ku biremwa by'umwuka byose, byaba ibyiza cyangwa ibibi, byaba satani, abadayimoni ndetse n'Abamarayika. Muri Bibiliya, abantu bagiye babona Abamarayika incuro nyinshi zitandukanye, bamwe babonaga ari nk'abagabo basa n'abantu basanzwe, abandi bababonye bafite amababa, ... ibi byose bigaragaza ko ibiremwa by'umwuka bishobora kugaragara mu ishusho zitandukanye kugirango bibashe kubonwa n'amaso y'umubiri. Ndetse n'icyanditwe twabonye haruguru, ntikigambiriye kugaragaza ko satani asa neza cyane, ahubwo kigambiriye kwerekana kamere ya satani yo kwihinduranya ku buryo ashobora gutuma abantu bamwibeshyaho.

Ibi rwose ni ihame: Biramutse bibaye ngombwa ko satani yiyereka umuntu, yamwiyereka uko atari. Ni yo kamere ye, nta kuri kumubamo. Icyo tuzi neza tukibwiwe na Bibiliya, ni uko mbere yo kugwa kwe yahoze ari umumarayika mwiza cyane. Ezekiyeli 28:12-17 12“Mwana w'umuntu, curira umwami w'i Tiro umuborogo umubwire uti ‘Umva uko Umwami Uwiteka avuga ngo wari intungane rwose, wuzuye ubwenge n'ubwiza buhebuje. 13Wahoze muri Edeni ya ngobyi y'Imana, umwambaro wawe wari ibuye ryose ry'igiciro cyinshi, odemu na pitida na yahalomu, na tarushishi na shohamu na yasipi, na safiro na nofekina na bareketi n'izahabu, ubuhanga bwo kubaza amashako n'imyironge bwari iwawe, mu munsi waremwemo byose byari biringaniye. 14Wari warasīgiwe kugira ngo ube umukerubi utwikīra, kandi nagushyizeho kugira ngo ube ku musozi wera w'Imana, wagendagenderaga hagati y'amabuye yaka umuriro. 15Wari utunganye bihebuje mu nzira zawe zose uhereye umunsi waremweho, kugeza igihe wabonetsweho gukiranirwa. 16Wuzuyemo urugomo ruzanywe n'ubugenza bwawe bwinshi bugutera gucumura, ni cyo cyatumye nkwirukana nk'uwanduye nkagukura ku musozi w'Imana. Narakurimbuye wa mukerubi utwikīra we, ngukura hagati ya ya mabuye yaka umuriro. 17Ubwiza bwawe ni bwo bwateye umutima wawe kwishyira hejuru, kubengerana kwawe ni ko kononnye ubwenge bwawe, nakujugunye hasi ngutangariza imbere y'abami kugira ngo bakwitegereze.

Uko satani yasaga mbere yo kugwa Bibiliya irabivuga: Yari mwiza cyane. Bibiliya ibivuga muri aya magambo: "intungane rwose, wuzuye ubwenge n'ubwiza buhebuje, Wari utunganye bihebuje". Uko satani asa uyu munsi nyuma yo kugwa, Bibiliya ntacyo ibivugaho: Ikizwi gusa, ni uko "yihindura nka marayika w’umucyo." Niba yihindura nka marayika w'umucyo, bisobanuye ko atari marayika w'umucyo, ariko agerageza kwihindura nka we!

Ese muri Bibiliya hari uwigeze abona dayimoni?

Muri Bibiliya hari abantu nibura 2 babonye "imyuka y'abadayimoni",

- Yohana we abivuga mu buryo bwa gihanuzi muri aya magambo: Ibyahishuwe 16:13 "Nuko mbona mu kanwa ka cya kiyoka no mu kanwa ka ya nyamaswa, no mu kanwa ka wa muhanuzi w'ibinyoma, havamwo imyuka itatu mibi isa n'ibikeri, 14kuko ari yo myuka y'abadayimoni, ikora ibitangaza igasanga abami bo mu isi yose, ngo ibahururize kujya mu ntambara yo ku munsi ukomeye w'Imana Ishoborabyose."

- Mu isezerano rya cyera, Mika na we yabonye imyuka ishukana ihagaze imbere y'Uwiteka... gusa ibi bigibwaho impaka ntituri bubitindeho (1 Abami 22:21-22)

Ibyo aba banti bombi babonye, ntibitanga ishusho nyayo y'abadayimoni. Kuba Yohana yarabonye "Imyuka y'abadayimoni" isa n'ibikeri, ntibisobanuye ko abadayimoni basa n'ibikeri".

Icyo dukwiriye gukura muri ibi byose ni iki: Nta wamenya adashidikanya isura nyayo ya satani n'abadayimoni kuri ubu. Gusa biramutse bibaye ngombwa ko biyereka umuntu, bamwiyereka mu ishusho itari yo kuko kamere yabo ni ukubeshya.

Uko byamera kose, uko satani n'abadayimoni baba basa kose, hari ibyo tuzi kuri bo tudashidikanya:

1) Satani azerera hose ashaka uwo aconshomera: 1 Petero 5:8 "Mwirinde ibisindisha mube maso, kuko umurezi wanyu Satani azerera nk'intare yivuga ashaka uwo aconshomera."

2) Satani arakorana umwete kurubu, kuko azi ko igihe asigaranye ari gito: Ibyahishuwe 12:12 "Nuko rero wa juru we, namwe abaribamo nimwishime. Naho wowe wa si we, nawe wa nyanja we, mugushije ishyano kuko Satani yabamanukiye afite umujinya mwinshi, azi yuko afite igihe gito.”

3) Satani n'abadayimoni bazi neza iherezo ryabo: Matayo 8:28 "Amaze gufata hakurya mu gihugu cy'Abagadareni, ahura n'abantu babiri batewe n'abadayimoni bava mu mva, bari abasazi cyane bituma ari nta watinyuka kunyura muri iyo nzira. 29Barataka cyane bati “Duhuriye he, Mwana w'Imana? Mbese uje hano kutwica urupfu n'agashinyaguro, igihe cyacu kitaragera?”

4) Satani yaraneshejwe. Ntimugire ubwoba. Abakolosayi 2:15 "Kandi imaze kunyaga abatware n'abafite ubushobozi, ibahemura ku mugaragaro, ibīvuga hejuru ku bw'umusaraba."

=======

==> Uko ni ko kuri gutangwa na Bibiliya. Ariko rero, hari ibitabo byo hanze ya Bibiliya byinshi bitanga ubuhamya bw'abantu bagiriwe ubuntu bwo kubona satani n'abadayimoni n'amaso yabo b'umubiri. Gusa tukibutsa abantu ko twebwe ibi bitabo twemera ko bidufasha, ariko ababisoma bakwiriye gusobanukirwa ko twabishyize hano ku rubuga tutitaye ku byo ababyanditse bizera. Niba wifuza kumenye ibyo twe twizera, kanda hano . Turasaba abasomyi kumenya byose, ariko bakagundira ibyiza. (1 Abatesaloniki 5:21).

==> Niba wumva igifaransa, Ushobora kubona ku buntu igitabo cyanditswe na REBECCA BROWN cyitwa "Il est venu liberer les captifs. Wakanda hano ukakibona ako kanya ku buntu, cyangwa ukagisoma ONLINE

Murakoze cyane, Umwuka Wera akomeze adufashe kandi adusobanurire.

Ev. Innocent Munyaneza

Answered: Menya n'ibi N0 1: Uko YESU yiyeretse Aburahamu mu isezerano rya cyera, Aburahamu ntamumenye

Sun, 13 Jul 2025 18:26:55 +0000

Imwe mu nkingi za mwamba mu byo twizera mu Matorero y'abavutse ubwa kabiri bayoborwa n'Umwuka Wera, ni uko Yesu ari Imana kandi yahozeho, nta tangiriro yagize kandi nta n'iherezo azagira. (Niba wifuza kumenya ibyo twizera-shingiro [DOCTRIN] wakanda hano.

Kuba yarahozeho, bituma Yesu yari ahari no mu isezerano rya cyera, gusa icyo gihe ntiyiyerekanaga mu buryo nk'ubwo yiyerekanyemo mu isezerano rishya, ahubwo mu isezerano rya cyera yiyerekanaga mu buryo buhishe, ku buryo abo biyerekaga icyo gihe ntibamenyaga uwo barimo kureba, akenshi bakamwitiranya na Marayika kuko nta kundi bari kubisobanura.

Mu bo yiyeretse bakamubona n'amaso ariko ntibasobanukirwe, harimo Yosuwa, Aburahamu, Nebukadinezari n'abandi tuzagenda turebera hamwe.

Uyu munsi turareba uko yiyeretse Aburahamu, birasaba kubaga inyuguti tugakora ubusesenguzi bwimbitse ariko bushingiye ku Ijambo ry'Imana gusa, nta marangamutima nta n'ibindi bitabo twifashisha uretse Bibiliya.

Mbere na mbere, Yesu ubwe ahamya mu buryo butajijinganywaho ko Aburahamu atarabaho, yari ariho. Yohana 8:56 "Yesu arababwira ati “Ni ukuri, ni ukuri, ndababwira yuko Aburahamu ataravuka, ndiho.”

Iyi mvugo Yesu yakoresheje ati "NDIHO", na yo ubwayo ikeneye kutarenzwa ingohe, kuko ihura neza neza n'imvugo Imana yakoresheje ubwo yibwiraga Mose, aho yabivuze muri aya magambo: Kuva 3:14 "Imana isubiza Mose iti “NDI UWO NDI WE.” Kandi iti “Abe ari ko uzabwira Abisirayeli uti ‘NDIHO yabantumyeho.’ ”

==> Mu buryo butajijinganjywaho, izi mvugo zisobanuye ibintu 2 by'ingenzi:

1) Ubwo Imana yavuganaga na Mose, yiyise NDIHO, na Yesu ubwo yavugana n'Abisirayeli, yiyise NDIHO: Bisobanuye ko Imana na Yesu ari umwe, ko kandi Yesu yahozeho.

2) Bisobanuye ko Aburahamu atarabaho, Yesu yari ariho

NONE SE YESU YIYERETSE ABURAHAMU RYARI? HEHE?

Nyuma yo kwemeranywa ko Aburahamu atabaho Yesu yari ariho, hari ibyanditswe tugiye gusuzumira hamwe biri budufashe:

Mbere na mbere, Yesu ubwe yivugiye ko Aburahamu yifuje kureba umunsi we, (Umunsi wa Yesu), ko kandi yawubonye akanezerwa. Ntabwo Aburahamu yabonye Yesu mu kwizera, nta nubwo yari afite ibyiringiro byo kuzamubona, ahubwo yaramubonye, amaze kumubona aranezerwa. Ibi Yesu abivuga atya: Yohana 8:56 "Aburahamu sekuruza wanyu yifujije cyane kureba umunsi wanjye, kandi awubonye aranezerwa.”

None se bahuye ryari? Hehe? Turebe ibi byanditswe:

Itangiriro 18:1-3 "Uwiteka abonekera Aburahamu kuri bya biti byitwa imyeloni bya Mamure. Yari yicaye mu muryango w’ihema rye ku manywa y’ihangu, [2]yubura amaso abona abagabo batatu bahagaze imbere ye, ababonye ava mu muryango w’ihema arirukanka arabasanganira, yikubita hasi [3]aravuga ati “Databuja, niba nkugiriyeho umugisha, ndakwinginze we kunyura ku mugaragu wawe."

Ibi byanditswe bigaragaramo Yesu mu buryo butajijinganywaho:

1) Icya mbere, Bibiliya iravuga iti "Uwiteka abonekera Aburahamu", ariko Aburahamu abona abagabo batatu. Mbere na mbere, ntidutunguwe no kuba Yesu yakwitwa Uwiteka cyangwa Uhoraho, kuko ahandi muri Bibiliya yagiye yitwa atyo: Yesaya 9:5 "Nuko umwana yatuvukiye duhawe umwana w’umuhungu, ubutware buzaba ku bitugu bye. Azitwa Igitangaza, umujyanama, Imana ikomeye, Data wa twese Uhoraho, Umwami w’amahoro."

2) Icya kabiri, n'ubwo Aburahamu yabonaga abagabo batatu imbere ye, mu kuvugisha ntiyavugishije bose uko ari batatu, yabonyemo umwe aba ari we abwira: Itangiriro 18:3 "aravuga ati “Databuja, niba nkugiriyeho umugisha, ndakwinginze we kunyura ku mugaragu wawe. I==> None se ko Aburahamu yari yagenderewe n'abagabo batatu, kuki yakuyemo umwe muri bo akaba ari we abwira, byongeye kandi, akamubwira amagambo ubusanzwe agenewe Yesu nka "Databuja, umugaragu wawe..." ? Mu cyongereza uwo murongo ugira uti: "He said, “If I have found favor in your eyes, my Lord, do not pass your servant by."

Aya magambo yo kuramya Imana nka "My Lord, you servant..." nta na rimwe yahabwaga Marayika, ndetse iyo hagiraga ushaka kuyubahisha Marayika, Marayika yarabihakanaga. Ibyahishuwe 22:8-9 "Jyewe Yohana numvise ibyo kandi ndabireba. Maze kubyumva no kubireba nikubitira hasi imbere y’ibirenge bya marayika wabinyeretse, kugira ngo muramye. [9]Ariko arambwira ati “Reka! Ndi imbata mugenzi wawe kandi ndi mugenzi wa bene So b’abahanuzi, n’uw’abitondera amagambo y’iki gitabo. Imana abe ari yo uramya.”

==> Nta yindi mpamvu yatumaga Abamarayika banga ko babaramya: Ni uko imvugo ya Aburahamu nk'iriya twabonye yo kuramya no guha icyubahiro, nta wundi uyikwiriye uretse Yesu: Ibyahishuwe 5:12 "Bavuga ijwi rirenga bati “Umwana w’Intama watambwe ni we ukwiriye guhabwa ubutware, n’ubutunzi n’ubwenge n’imbaraga, no guhimbazwa n’icyubahiro n’ishimwe!”

==> Uretse mu isezerano rishya aho Yesu yigaragarije abantu yambaye umubiri nk'uwabantu, no mu isezerano rya cyera Yesu yagiye agaragaramo kenshi, gusa abamubonaga icyo gihe ntibasobanukirwaga uwo barimo kubona.

==> Kuba Yesu yivugira ko Aburahamu yahoze yifuza kubona umunsi wa Yesu, akongeraho ko yawubonye akishima, nta mpamvu nimwe ihari yatuma tujijinganya ko Aburahamu atawubonye.

UMWANZURO

Ni byo rwose, iyo ushyize hamwe ibyo Yesu yivugiye muri Yohana igice cya 8; ukabihuza n'ibyabaye mu Itangiriro igice cya 18, ukabihuza n'ibindi byanditswe, duhamya ko Aburahamu yabonye Yesu, gusa icyo gihe Yesu yari atarambara umubiri nk'uwo yari afite mu isezerano rishya, byatumaga bamwe batamenya neza uwo bavugana uwo ari we, gusa icyo babonaga ni uko yabaga atandukanye na Bamarayika bandi.

Murakoze, Uwiteka atugirire neza.

Ni ryari wamenya ko ufite Umwuka Wera?

Sun, 13 Jul 2025 15:51:26 +0000

Answered: Yesu yari atunze iki? Ese yari umukene cyangwa umukire?

Tue, 13 May 2025 18:25:18 +0000

Mbere yo gusubiza iki kibazo tubanze tuvuge ko mu nkingi za mwamba z'ibyo twizera (doctrine) twizera ko Yesu ari Imana. Nk'Imana, Yesu atunze byose: Byose ni ibye: Ubutware bwose, Ubushobozi bwose, Ubwami bwose, icyubahiro cyose, ubutunzi bwose.... Ibyo tubona byose ni we wabiremye kandi ni we byaremewe, byose ni ibye kandi Bibiliya ibihamya idaca ku ruhande: (Yesaya 9:6 ; )

Reka tutarajya kure tuvuge ibi byanditswe: Abakolosayi 1:14-19 "Ni we waducunguje amaraso ye ngo tubone kubabarirwa ibyaha byacu. 15 Ni na we shusho y'Imana itaboneka, ni we mfura mu byaremwe byose, 16 kuko muri we ari mo byose byaremewe, ari ibyo mu ijuru cyangwa ibyo mu isi, ibiboneka n'ibitaboneka, intebe z'ubwami n'ubwami bwose, n'ubutware bwose n'ubushobozi bwose. Ni we wabiremye byose kandi rero ni na we byaremewe. 17 Yabanjirije byose kandi byose bibeshwaho na we. 18 Ni we Mutwe w'umubiri, ni we Torero kandi ni we Tangiriro, ni imfura yo kuzuka mu bapfuye kugira ngo abe uwa mbere uhebuje byose, 19 kuko Imana yashimye ko kūzura kwayo kose kuba muri we."

Abakolosayi 2:9-10 "Nyamara muri we ni ho hari kūzura k'Ubumana kose mu buryo bw'umubiri. 10 Kandi mwuzuriye muri we, ari we Mutwe w'ubutware bwose n'ubushobozi bwose."

N'ubwo bimeze bityo ariko, kugirango Yesu aze kudukiza, byamusabye kwiyambura ibyo byose, aza mu isi yigira umuntu, abana n'abantu, yicisha bugufi cyane avukira mu muvure w'inka, akura ari umubaji, agendana n'abantu, yigira nk'umugaragu ku buryo umurebye mu maso asanzwe y'umubiri nta kidasanzwe cyari kumutandukanya n'abantu basanzwe. Ibyo rwose Bibiliya irabivuga neza idaciye ku ruhande:

- 2 Abakorinto 8:9 "kuko muzi ubuntu bw'Umwami wacu Yesu Kristo uko yari umutunzi, maze agahinduka umukene ku bwanyu kugira ngo ubukene bwe bubatungishe."

- Abafilipi 2:5-11 "Mugire wa mutima wari muri Kristo Yesu. 6Uwo nubwo yabanje kugira akamero k'Imana, ntiyatekereje yuko guhwana n'Imana ari ikintu cyo kugundirwa, 7ahubwo yisiga ubusa ajyana akamero k'umugaragu w'imbata, agira ishusho y'umuntu, kandi amaze kuboneka afite ishusho y'umuntu 8yicisha bugufi, araganduka ntiyanga no gupfa ndetse urupfu rwo ku musaraba. 9Ni cyo cyatumye Imana imushyira hejuru cyane ikamuha izina risumba ayandi mazina yose, 10 kugira ngo amavi yose apfukame mu izina rya Yesu, ari ay'ibyo mu ijuru, cyangwa ay'ibyo mu isi, cyangwa ay'ibyo munsi y'isi, 11kandi indimi zose zihamye ko Yesu Kristo ari Uwiteka, ngo Imana Data wa twese ihimbazwe."

ESE YESU YARI UMUKENE? CYANGWA UMUKIRE?

Kuva Bibiliya ivuga ko yari umukene, nta mpamvu n'imwe twabona yo kuvuga ko atari umukene. Dusubiremo uyu murongo: 2 Abakorinto 8:9 "kuko muzi ubuntu bw'Umwami wacu Yesu Kristo uko yari umutunzi, maze agahinduka umukene ku bwanyu kugira ngo ubukene bwe bubatungishe."

Ubusanzwe dukunze kubivuga ko Bibiliya itandikiwe kutumara amatsiko kuri buri kabazo kabaho, ahubwo yandikiwe kutugaragariza umugambi w'urukundo n'agakiza Imana ifitiye muntu. Kubera izo mpamvu, hari ibintu byinshi Bibiliya itagiye iduhamo amakuru kuko bitaba bihuye n'impamvu Bibibiliya yanditswe. Yohana we avuga ko byose bigiye kwandikwa, isi yose yakuzura ibitabo. (Yohana 21:25).

Hari ibimenyetso bigera kuri 7 bigaragaza ubuzima bwa gikene Yesu yabagamo:

1) Yavukiye mu muvure w'inka. Luka 2:7 "abyara umuhungu w'imfura amworosa imyenda y'impinja, amuryamisha mu muvure w'inka kuko bari babuze umwanya mu icumbi."

2) Amaze kuva iwabo kwa Yosefu no gutangira umurimo, Ntiyagiraga aho aba: Matayo 8:20 "Yesu aramubwira ati “Ingunzu zifite imyobo n'ibiguruka mu kirere bifite ibyari, ariko Umwana w'umuntu ntafite aho kurambika umusaya.”

3) Ubwo yaturwaga Imana mu rusengero, ababyeyi be batanze ituro ryari ryarategekewe guturwa n'abakene: Intungura ebyiri cyangwa ibyana by'inuma bibiri. Luka 2:24 24 "batamba n'igitambo nk'uko byavuzwe mu mategeko y'Umwami ngo “Intungura ebyiri cyangwa ibyana by'inuma bibiri.”

Abalewi 2:8 “Kandi niba ari umukene ntabashe kubona umwana w'intama, azazane intungura ebyiri cyangwa ibyana by'inuma bibiri, kimwe cy'igitambo cyo koswa, ikindi cyo gutambirwa ibyaha, umutambyi amuhongerere abe ahumanutse.”

4) Amaze kuva iwabo kwa Yosefu no gutangira umurimo, nta nzu, nta mutungo utimukanwa, ntiyagiraga n'aho aba: Matayo 8:20 "Yesu aramubwira ati “Ingunzu zifite imyobo n'ibiguruka mu kirere bifite ibyari, ariko Umwana w'umuntu ntafite aho kurambika umusaya.”

5) Muri rusange, Yesu yararaga ku musozi wa Elayono asenga. Luka 21:37 "Iminsi yose yirirwaga mu rusengero yigisha, ariko bwakwira agasohoka akarara ku musozi witwa Elayono."

6) Kugirango babeho, Yesu n'abigishwa be barafashwaga: Luka 8:1 "Hanyuma ajya mu midugudu n'ibirorero yigisha, avuga ubutumwa bwiza bw'ubwami bw'Imana ari kumwe n'abigishwa be cumi na babiri, 2 n'abagore bamwe bakijijwe abadayimoni n'indwara, barimo Mariya witwaga Magadalena wirukanywemo abadayimoni barindwi, 3 na Yowana muka Kuza igisonga cya Herode, na Suzana n'abandi bagore benshi babafashishaga ibyabo."

7) Mu gihe cya Yesu, umuntu wese mukuru wishoboye, yitunganyirizaga imva azashyingurwamo we n'umuryango we. Ubu bushobozi Yesu ntabwo yari afite ku buryo yashyinguwe mu mva yatanzwe n'umukire witwaga Yosefu. Matayo 27:57-60 "Nuko nimugoroba haza umuntu w'umutunzi wo muri Arimataya witwaga Yosefu, kandi na we yari umwigishwa wa Yesu. 58 Uwo ajya kwa Pilato asaba intumbi ya Yesu, maze Pilato ategeka ko bayimuha. 59 Yosefu ajyana intumbi, ayizingira mu mwenda w'igitare wera, 60 ayishyira mu mva ye nshya, iyo yakorogoshoye mu rutare, abirindurira igitare ku munwa w'imva, aragenda."

N'ubwo bimeze bityo, ntabwo Yesu yari umukene kubera kubura uko agira, yari umukene kuko yabihisemo.

Mu gusoza, tuvuge ko Yesu atadusaba kuba abakene ku mubiri nk'uko bamwe bakunze kubyibeshyaho, gusa anadusaba kwitondera ibyo gushaka no kurarikira ubutunzi bw'iyi si, cyane cyane akatubuza gukunda amafaranga, Bibiliya ibivuga muri aya magambo: 1 Timoteyo 6:8-10 "Ariko ubwo dufite ibyo kurya n'imyambaro biduhagije tunyurwe na byo, [9] kuko abifuza kuba abatunzi bagwa mu moshya no mu mutego, no mu irari ryinshi ry'ubupfu ryangiza, rikaroha abantu mu bibahenebereza bikabarimbuza. [10] Kuko gukunda impiya ari umuzi w'ibibi byose, hariho abantu bamwe bazirarikiye barayoba, bava mu byo kwizera bihandisha imibabaro myinshi."

Abanyabwenge bifuza guhuza ibi bintu bibiri, ntibicwe n'ubukene ariko kandi ntibanatwarwe n'urukundo rw'amafaranga, bakwigana Dawidi bagasenga batya: Imigani 30:7-9 “Nagusabye ibintu bibiri, ntubinyime umwanya nkiriho. [8] Nkuraho ibitagira umumaro n'ibinyoma bimbe kure, Ntumpe ubukene cyangwa ubukire, Ahubwo ungaburire ibyokurya binkwiriye, [9] Kugira ngo ndahaga nkaguhakana nti ‘Uwiteka ni iki?’ Cyangwa nkaba umukene nkiba, nkagayisha izina ry'Imana yanjye."

Murakoze cyane, duhore tuzirikana iki: "IMANA NTIDUHA IBYO DUSHAKA, IDUHA IBYO DUKENEYE."

Answered: Ese Yesu yigeze anywa ku gisindisha?

Tue, 13 May 2025 17:46:44 +0000

Iki kibazo kirasa n'ikindi kigira kiti "Ese Yesu yahinduya amazi inzoga i Kana?" Wakanda hano ukareba igisubizo.

Answered: Ese kunywa inzoga ni icyaha?

Thu, 08 May 2025 18:45:05 +0000

Iki kibazo kirasa n'ikindi kigira kiti : "i Kana Yesu yahinduye amazi inzoga, cyangwa umutobe?"

Wakanda hano ukabona igisubizo

Answered: i Kana, Yesu yahinduye amazi inzoga, cyangwa umutobe?

Sun, 04 May 2025 09:33:55 +0000

Iki kibazo cyagiye gikurura impaka guhera cyera kugeza n'ubu ntikirumvikanwaho. Ntituri bwihandagaze ngo tuvuge ko tugiye guca impaka, ariko turahamya ko tugiye gutanga igisubizo gishingiye ku Ijambo ry'Imana no ku mahame Yayo.

Izi mpaka zishingiye ku gitangaza cya mbere Yesu yakoze: Yatashye ubukwe i Kana, agezeyo asanga vino yabashiranye, afata amazi ayahindura vino bayiha abatashye ubukwe baranywa. Ibyo bivugwa muri Yohana 2:1-11

Hari ibibibazo 2 byo kwibazwa:

1) Ese koko Yesu yahinduye amazi vino?: IGISUBIZO KITAJIJINGANYWAHO NI YEGO

2) Ese iyi vino yari isembuye? Yari irimo Alcohol ku buryo yasindisha? IGISUBIZO NTIKIVUGWAHO RUMWE, ariko tugiye kugisuzuma dukoresheje ibyanditswe byera. Turagisubiza mu ngingo esheshatu:

1) Guhamya ko Yesu yakoze inzoga ayikuye mu mazi i Kana, byaba bisobanuye ko nta cyaha kirimo kwenga ibisindisha no kubinywa, kandi ibi byaba bihabanye n'ibindi byanditswe dusanga mu Ijambo ry'Imana.

2) Iyo ufashe ingano y'amazi Yesu yahinduyemo vino, usanga iyi vino iramutse yari inzoga, Yesu ntiyaba yarakemuye ikibazo cy'icyo kunywa gusa, ahubwo yaba yarashishikarije abantu ubusinzi bwo ku rwego rwo hejuru! Ibi byaba bihabanye cyane n'abavuga ngo "kunywa gacye nta kibazo", ngo ikibi ni ugusinda: Mu by'ukuri, Yohana 2:6-7 hagira hati: "Hariho intango esheshatu zaremwe mu mabuye, zashyiriweho kwiyeza nk’uko umugenzo w’Abayuda wari uri, intango yose irimo incuro ebyiri cyangwa eshatu z’amazi. [7]Yesu arababwira ati “Mwuzuze intango amazi.” Barazuzuza bageza ku ngara."

Abasesenguzi benshi bahamya ko izi ntango esheshatu zashoboraga kujyamo amacupa y'amazi arenga 1,200. Reka tubishyire mu makaziye tumenyereye tuzi kugirango byumvikane neza: Amacupa 1,200 = Amakaziye 100! Ibaze rero Yesu ahaye abantu amakaziye 100 y'ibisindisha! Ntabwo byaba bikiri mu rwego rwo kunezererwa ubukwe, byaba byinjiye mu businzi!

3) Bibiliya itubwira ko Yesu yagiye guhindura amazi divayi, n'ubundi abo yari yasanze muri ubu bukwe bari bamaze guhaga, (Yohana 2:10) ku buryo banyweye vino yari ihari irabashirana. Kubera ko Bibiliya ivuga ko Yesu yabahaye vino iryoshye kurusha iyo yasanze barimo kunywa, Yesu aramutse yarabahaye vino isembuye, byaba bisobanuye ko n'iyo yasanze banywa yari isembuye. Kuba baranyweye vino yari ihari bagahaga, ntibyumvikana ukuntu Yesu yabongeza andi makaziye 100 kugirango bahage (basinde?) kurushaho! Ibi rwose Yesu ntiyabikora, kuko byaba bihabanye n'ibyo Bibiliya ivuga iti: Habakuki 2:15 “Azagusha ishyano uha umuturanyi we ibyokunywa, nawe umwongeraho ubumara bwawe bukamusindisha, kugira ngo urebe ubwambure bwe!"

4) Mu byanditswe byera, Iyo Bibiliya ivuze "vino" ishobora kuvuga vino isembuye cyangwa vino idasembuye. Yesaya 65:8 "Uwiteka aravuga ati “Nk’uko iseri ry’inzabibu rivamo umutobe bakavuga bati ‘Ntuwurimbure kuko ugifite umumaro’, ni ko nzagirira abagaragu banjye ne kubarimbura bose."

None se ko vino ituruka mu mizabibu, ubu ntimubona ko hano Bibiliya yita vino "umutobe"? Dore noneho ibyo Yesu yivugiye: Matayo 9:17 "Kandi nta wusuka vino y’umutobe mu mifuka y’impu ishaje, uwagira atyo iyo mifuka yaturika, vino igasandara hasi imifuka ikononekara. Ahubwo vino y’umutobe isukwa mu mifuka mishya, byombi bikarama.” Uko bigaragara mu Ijambo ry'Imana, Vino ishobora kuba "umutobe" cyangwa igisindisha, ibi rwose nta mpaka bikwiriye gutera kuko birasobanutse.

5) Icya 5, ukurikije Bibiliya, iki gitangaza Yesu yagikoze mbere gato ya Pasika y'Abayuda (Yohana 2:13). Pasika yari umunsi wubahwa cyane, aho Abayuda bakuru bagombaga kumanuka bakajya i Yerusalemu kwizihiza uyu munsi mukuru wabaga rimwe mu mwaka. Na Yesu ubwe, uyu munsi mukuru yawujyagamo buri mwaka, mu myaka 3 yamaze mu murimo yagiyeyo inshuro 3 kuwizihiza.

Uyu munsi mukuru warubahwaga cyane, ukaba wararebaga abantu bose cyane cyane Abalewi bakoraga imirimo y'ubutambyi mu rusengero. Abalewi ubwabo (Abatambyi) bari barabujijwe mu buryo butajijinganywaho kunywa ibisindisha igihe bagikora uyu murimo.

Abatambyi babuzwa kunywa ibisindisha, bagikora umurimo: Abalewi 10:8-11 "Uwiteka abwira Aroni ati: " [9]“Ntukanywe vino cyangwa igisindisha kindi wowe n’abana bawe muri kumwe, uko muzajya kwinjira mu ihema ry’ibonaniro mudapfa. Iryo ribabere itegeko ridakuka mu bihe byanyu byose, [10]mubone uko mutandukanya ibyera n’ibitari ibyera, n’ibihumanya n’ibidahumanya, [11]mukigisha Abisirayeli amategeko yose Uwiteka yabwiriye Abisirayeli mu kanwa ka Mose.”

None se ubu muri ubu bukwe umuntu yahamya ko nta mutambyi wari urimo? None se Yesu yababuza kunywa ibisindisha, yarangiza akabibaha? Byongeye kandi, akabibaha mu minsi yegereje Pasika aho basabwaga kwiyeza no kwitandukanya n'icyabahumanya cyose? Ntabwo byaba byumvikana Yesu aramutse abikoze.

6) Icya 6 ari na cyo cya nyuma:

==> Ntabwo byakumvikana ukuntu Yesu yagaburira cyangwa yanywesha abantu ikintu Bibiliya ivuga ko ari umukobanyi, ikavuga ko gikubaganisha, ikanavuga ko ushukwa na cyo atagira ubwenge! Imigani 20:21 "Vino ni umukobanyi, Inzoga zirakubaganisha, Kandi ushukwa na byo ntagira ubwenge.

==> Nta bwo byumvikana ukuntu Yesu yahindura amazi inzoga isembuye, mu gihe Ijambo rye rivuga ko azabona ishyano umuntu wese ugira imbaraga zo guturira ibisindisha. Yesaya 5:22 "Bazabona ishyano abigira intwari zo kunywa inzoga, bakagira imbaraga zo guturira ibisindisha"

==> Nta n'ubwo byumvikana ukuntu Yesu yahindura amazi inzoga, mu gihe Ijambo rye rivuga ko bazabona ishyano abazindurwa no kuvumba ibisindisha! Yesaya 5:11 "Bazabona ishyano abazindurwa no kuvumba ibisindisha, bakaba ari cyo biririrwa bakabirara inkera, kugeza aho bibahindura nk’abasazi."

==> Byaba bitangaje cyane, Yesu avuze ati "mwirinde ibisindisha" yarangiza agatanga amakaziye arenga 100 y'ibisindisha! 1 Abatesalonike 5:6 "Nuko rero twe gusinzira nk’abandi ahubwo tube maso, twirinde ibisindisha"

==> Yewe, Bibiliya ivuga idaca ku ruhande ko "umuntu ugendana ururimi rubeshya ni we uhanura ibya vino.... Mika 2:11 “Umuntu ugendana umwuka w’umuyaga n’ururimi rubeshya akavuga ati ‘Ngiye kubahanurira ibya vino n’ibisindisha’, ni we muhanuzi ukwiriye ubu bwoko."

UMWANZURO:

Dushingiye ku byanditswe byera twerekanye ndetse no ku bundi bushakashatsi twavuze, turahamya tudashidikanya ko, Yego Yesu yahinduye amazi vino i Kana, ariko iyi vino ntabwo yari igisindisha kuko na za vino zidasembuye zibaho nk'uko twabibonye muri Bibiliya. Gutekereza ko Yesu yahaye abantu ibisindisha byaba bitandukanye cyane n'inyigisho ze, ndetse byaba ari ubwa mbere naba mbonye Yesu avuga ikintu agahindukira agakora igihabanye n'Ijambo rye!

Murakoze, Mwuka Wera akomeze atube hafi, atwigishe kandi adusobanurire

Answered: Iminsi 3 hagati yo gupfa no kuzuka, Yesu yari ari he?

Thu, 01 May 2025 23:12:04 +0000

Ku isaha ya cyenda, Yesu yavuze ijambo rye rya nyuma ku musaraba ati "Birarangiye", acurika umutwe, aratanga (Yohana 19:30). Nyuma yaho gato, umubiri we wamanuwe ku musaraba, ujyanwa mu mva, ariko Umwuka we ntiwagiye mu mva, wari ahandi hantu: Nyuma y'iminsi 3, Umwuka we warongeye wihuza n'umubiri we, azuka mu bapfuye.

Abantu benshi bagiye basobanura ukwinshi aho Yesu yari ari muri iyi minsi itatu hagati yo gupfa kwe no kuzuka kwe, ariko ibyiza ni ugushyira ku ruhande amarangamutima, tukareba mu byanditswe byera kuko harimo igisubizo kiruta ibindi.

Icya mbere kitagibwaho impaka, ni uko Yesu ubwe yivugiye aho aza kuba ari nyuma y'urupfu rwe: Muri Paradizo. Ibi yabivuze atya abwira igisambo bari babambanywe: Luka 23:42-43 "Nuko abwira Yesu ati “Mwami, uzanyibuke ubwo uzazira mu bwami bwawe.” [43]Aramusubiza ati “Ndakubwira ukuri, yuko uyu munsi turi bubane muri Paradiso.”

Uko ni ko byagenze nta gushidikanya: Yesu amaze gutanga, yagiye muri paradizo, aho kandi ni naho cya gisambo cyamwizereye ku musaraba cyahise kijya na cyo kimaze gupfira ku musaraba.

Hari ikindi cyanditswe cyaba kigaragaza icyo Yesu yakoze hagati yo gupfa kwe no kuzuka: Abefeso 4:8 "Ni cyo gituma ivuga iti “Amaze kuzamuka mu ijuru, Ajyana iminyago myinshi, Aha abantu impano.” Iki cyanditswe kirushaho gusobanuka iyo turebye mu zindi ndimi no mu zindi version kuko na byo bijya bifasha mu kurushaho gusobanuka:

- "When he ascended on high, he took many captives".

- Version ya ESV yo ivuga utya uyu murongo: "When he ascended on high he led a host of captives, and he gave gifts to men."

- Vesion ya "New Living translation yo ivuga itya: "When he ascended to the heights, he led a crowd of captives and gave gifts to his people.”

- Indi version yitwa "Holman Christian Standard Bible igira iti: "When He ascended on high, He took prisoners into captivity; He gave gifts to people.

- Mu gifaransa, Louis Second agira ati: "Étant monté en haut, il a emmené des captifs, Et il a fait des dons aux hommes."

==> Ubusanzwe, hari ahantu abapfaga mbere ya Yesu babaga bari hitwaga mu giheburayo "Sheol", cyangwa mu Kigereki "Hades", (the abode of the dead / Sejour des morts). (Sheol na Hades ni kimwe ni uko rimwe ari ijambo ry'igiheburayo irindi rikaba iry'ikigereki). Kuhasobanura biragoye, ariko si ahantu hafatika, ahubwo uwapfaga yarekeragaho kubaho gusa. Aha ni ho abera bo mu isezerano rya cyera babaga bari ( Nka ba Aburahamu, ba Daniel, ba Dawidi, ba Yosuwa n'abandi benshi....). Aba bafatwaga nk'imbohe kuko ntibari bari aho bakagombye kuba bari. Ikigaragara cyo, ni uko igihe kimwe hagati yo gupfa no kuzuka, Yesu yimuye aba bera bo mu isezerano rya cyera, abavana aho imyuka y'abapfuye yabaga iri abajyana muri Paradizo. Aha ni hahandi twabonye hejuru, Yesu na we yahise ahajya akimara kuva mu mubiri. Iyi myuka y'Abera bo mu isezerano rya cyera, Bibiliya ivuga ko Yesu amaze kuzuka, yagaragaye muri Yerusalemu abantu benshi barayibona! Matayo 27:51-53 "Umwenda ukingiriza Ahera cyane h’urusengero utabukamo kabiri, utangirira hejuru ugeza hasi, isi iratigita, ibitare birameneka, [52]ibituro birakinguka, intumbi nyinshi z’abera bari barasinziriye zirazurwa, [53]bava mu bituro, maze amaze kuzuka binjira mu murwa wera, babonekera benshi.

==> Iki kibazo kijya kibyutsa ikindi kibazo: "Ese hagati yo gupfa no kuzuka, Yesu yaba yaragiye ikuzimu kurwana na satani no kumwambura imfunguzo?"

Abahamya ibyo, babihera ku cyanditswe kiri muri 1 Petero 3:18-20 Kuko na Kristo yababarijwe ibyaha by’abantu rimwe, umukiranutsi ababarizwa abakiranirwa kugira ngo atuyobore ku Mana amaze kwicwa mu buryo bw’umubiri, ariko ahinduwe muzima mu buryo bw’umwuka. [19]Ni wo yabwiririshije imyuka yo mu nzu y’imbohe, [20]ya yindi itumviraga Imana kera, ubwo kwihangana kwayo kwategerezaga mu minsi ya Nowa inkuge ikibāzwa. Muri yo bake bararokotse ndetse ni umunani, bakijijwe n’amazi. Bakanongeraho icyi cyanditswe: Ibyahishuwe 1:18 "Kandi ndi Uhoraho. Icyakora nari narapfuye ariko none dore mporaho iteka ryose, kandi mfite imfunguzo z’urupfu n’iz’ikuzimu."

===> Iki cyanditswe cyo muri Petero, ubwacyo umuntu ntiyagishingiraho ngo ahamye ko Yesu amaze gupfa yaba yaragiye ikuzimu kubwiriza imyuka yari ifungiyeyo. Byaba bihabanye n'ibindi byanditswe bihamya ko iyo umuntu yapfuye, nta kundi kubwirizwa cyangwa kwizera aba asigaranye. Hari n'abavuga ko ngo Yesu abo yabwirizaga ikuzimu ari Abamarayika bakoze ibyaha ku gihe cya Nowa, ariko na byo byaba bihabanye n'ibindi byanditswe bihamya ko Abamarayika badakeneye kubwirizwa no gukizwa: Agakiza si ak'Abamarayika, ni ak'abantu.

===> Ukuri guhari, ni uko kuba Yesu avuga ko afite "imfunguzo z'urupfu n'iz'ikuzimu", bidakwiriye gufatwa nk'aho ikuzimu ari ahantu hari urugi rufungwa n'imfunguzo nk'uko tuzi inzugi dukoresha hano mu isi. Iri jambo hari n'ahandi yesu yarikoresheje abwira Petero: Matayo 16:18-19 "Nanjye ndakubwira nti ‘Uri Petero, kandi nzubaka Itorero ryanjye kuri urwo rutare, kandi amarembo y’ikuzimu ntazarishobora.’ [19]Nzaguha imfunguzo z’ubwami bwo mu ijuru, kandi icyo uzahambira mu isi kizaba gihambiriwe mu ijuru, n’icyo uzahambura mu isi kizaba gihambuwe mu ijuru.” None se mwagizengo Petero ahagaze ku rugi rw'Ijuru n'imfunguzo nk'izifungura urugi dusanzwe tuzi? OYA rwose, Ijuru si ahantu hazitiye, hakingwa nk'ukinga inzu! urufunguzo ni ikimenyetso bw'ubutware. Kuba Yesu yaravuze ko afite imfunguzo z'urupfu n'iz'ikuzimu", ntibisobanuye ko yagiye ikuzimu kurwana na satani, ahubwo arahamya ko afite ubutware ku rupfu ku buryo abasha kuvanayo uwapfuye akamuha ubuzima, n'ubwo satani we yajyaga yibwira ko ari we ufite ubwo butware.

Ibifitiwe gihamya ni byo twahamya gusa: Hagati yo gupfa no kuzuka Yesu yagiye muri Paradizo, ndetse yanimuye imyuka y'Abera bari barasinziriye ayijyana muri Paradizo. Aho hitwa muri Paradizo, ni ho abera bose ubu badutegerereje, (Baba abo mu isezerano rya cyera n'irishya) kugeza ubwo umugeni wa Yesu na we azazamurirwa akabasangayo, bose bakagororererwa rimwe, Ibyo Bibiliya ibivuga muri aya magambo: Abaheburayo 11:39-40 "Abo bose nubwo bamaze guhamywa neza ku bwo kwizera kwabo, nyamara ntibahabwa ibyasezeranijwe [40]kuko Imana yatugambiriye ikirushaho kuba cyiza, kugira ngo abo badatunganywa rwose tutari kumwe."

Uko ni ko bimeze, nk'uko dukunze kubivuga ntabwo Bibiliya yandikiwe kutumara amatsiko, yandikiwe kutugaragariza umugambi w'urukundo Imana ifitiye umuntu. Ibyabaye mu buzima bwa Yesu byose bigiye kwandikwa, hakwandikwa ibitabo bitagira uko bingana, ni yo mpamvu Bibiliya ivuga bicye bifite icyo byadufasha mu mugambi w'urukundo rw'Imana. Yohana abivuga muri aya magambo: Yohana 21:25 "Ariko hariho n’ibindi byinshi Yesu yakoze, byakwandikwa byose ngira ngo ibitabo byakwandikwa ntibyakwirwa mu isi."

Ngayo nguko: Ibyo Yesu yakoze byose hagati yo gupfa kwe no kuzuka, byari bishingiye ku kwamamaza intsinzi ya burundu no gufungura amarembo ya nyuma y'urupfu ku bizera: Yimuye abizera abavana ahasinzirirwa (Sheol / hades ) abajyana muri Paradizo, na we ubwe yagiye muri Paradizo, ndetse yamamaje intsinzi mu bwami bw'umwijima atangaza ko ari we wenyine ufite ubutware bwose.

Imana itugirire neza kandi Mwuka Wera akomeze adufashe gusobanukirwa.

Answered: Kuki umurimo wa Yesu ku isi wabaye mugufi cyane?

Tue, 22 Apr 2025 19:04:18 +0000

Mu gusubiza iki kibazo, n'ubwo umuntu ashobora kwibaza ati "Umurimo wa Yesu se wabaye mugufi ugereranije n'iki?" ariko kandi umuntu arebye nk'uko abantu tureba, ukagereranya umurimo wa yesu n'umurimo w'abavugabutumwa bamenyekanye cyane nka ba Billy Graham cyangwa Reinhard Bonke, koko wasanga umurimo wa Yesu warabaye mugufi cyane.

Umurimo wa Yesu wamaze imyaka itatu n'igice gusa, mu gihe nk'umurimo w'ivugabutumwa wa Billy Graham wo wamaze imyaka irenga 75, Reinard Bonke we yakoze umurimo w'ivugabutumwa imyaka igera kuri 52, uwa John Wesley wamaze imyaka 53, T.D. Jakes amaze imyaka irenga 40 akorera Imana n'ubu aracyakomeje (2025) ...... ibi byose ugereranije n'umurimo wa Yesu wamaze imyaka 3.5, koko ushobora kuvuga ko umurimo wa Yesu wabaye mugufi cyane.

Ariko rero, byaba ari ukwibeshya cyane turamutse dutekereje ko umurimo wa Yesu wabaye mugufi kubera ko yishwe imburagihe; OYA rwose ntabwo yishwe imburagihe: Kuvuka kwa Yesu, kuba kw'isi nk'umuntu imyaka 30, ivugabutumwa rye ry'imyaka 3.5 , urupfu rwe ku myaka 33.5, kuzuka kwe, agakiza yaduhaye, gusubira mu Ijuru kwe .... byose byari mu murongo ukwiriye w'igikorwa cy'agakiza nk'uko cyateguwe n'Imana ubwayo kuva isi itaranaremwa.

Hari ingingo zigera kuri 5 zatuma tumenya impamvu umurimo wa Yesu wamaza imyaka 3.5 gusa:

1: Kuki Yesu yatangiye kwigisha afite imyaka 30?

Mu buryo butajijinganywaho, bibiliya ivuga ko yesu yatangiye kwigisha afite imyaka 30. Luka 3:23 "Ubwo Yesu yatangiraga kwigisha yari amaze imyaka nka mirongo itatu avutse, [...] . Kuva avutse kugeza ku myaka 30, Bibiliya ivuga ibintu bicye cyane mu bwana bwa Yesu. Gutegereza kuzuza imyaka 30 na byo si impanuka, kuko mu gihe cye imyaka 30 ni yo yafatwaga nk'imyaka ikwiriye umutambyi ngo abashe gukora umurimo w'Imana mu ihema ry'ibonaniro. Kubara 4:3 "abasāgije imyaka y’ubukuru mirongo itatu batarasāza mirongo itanu, abakwiriye gukora umurimo wo mu ihema ry’ibonaniro bose." 1 Ingoma 23:3 "Maze babara Abalewi bashyikije imyaka mirongo itatu y’ubukuru n’abayishagije, kandi umubare wabo uko babazwe umwe umwe, bari inzovu eshatu n’ibihumbi munani."

2: Umurimo wa yesu wamaze igihe cyingana iki?

Mu buryo butajijinganywaho, umurimo wa Yesu wamaze imyaka 3 irengaho gato. Ibyo kubibona biroroshye, iyo urebye ko Yesu ubwe yizihije za Pasika 3 kuva atangiye umurimo; ibyo Yohana arabisobanura neza. Muri iyi myaka 3.5 , Yesu yakoze umurimo utangaje: Yagenze Israel yose kuva i Galilaya yari mu majyaruguru, Samariya yari hagati, kugeza mu Buyuda bwari mu majyepfo, aho yacaga hose yagendaga agira neza, akora ibitangaza, asubizamo abantu ibyiringiro, akiza abarwayi..... None se buri wese yakwibaza: Ko uyu murimo wari mwiza, ko wari ufitiye rubanda akamaro, kuki nibura atakomeje ngo ageze nko ku myaka 20, 30 40 .... nk'abandi bakozi b'Imana twabonye hejuru?

3: Gahunda ya Yesu yari iriho na mbere y'uko aza. Nta muntu wari kugira icyo ayihinduraho

Ni byo. Mbere yuko Yesu aza mu isi, yaje abizi neza ko azangwa, ko azagambanirwa, ko azadupfira ku musaraba, ko azazuka nyuma y'iminsi 3, ko azaha agakiza umuntu wese uzamwizera: Mu byamubayeho nta na kimwe cyamutunguye. Kenshi yagiye avuga ati: "Igihe cyanjye ntikiragera", nyuma yaho akongera ati "Igihe kirasohoye...". INGERO ZIRAHARI: Yohana 7:8 Mwebweho nimujye muri iyo minsi mikuru, ariko jyeweho sinjyayo ubu kuko igihe cyanjye kitarasohora.” Matayo 26:18 "Arabasubiza ati “Mujye mu murwa kwa ntuza, mumubwire muti ‘Umwigisha aravuze ngo igihe cye kirenda kugera, ngo iwawe ni ho ari busangirire ibya Pasika n’abigishwa be.’ ”

Cyera cyane, isi igituwe n'abantu 2 gusa (Adamu na Eva), Imana ubwayo yatanze ubuhanuzi ko Yesu azaza agakandagira satani akamumena umutwe. Aho Yesu aziye, yahanuye kenshi ko azapfa akazuka nyuma y'iminsi 3. Ibi byose bigaragaza ko nta cyatunguye Imana mu mugambi w'agakiza. Yesu ntiyatunguwe n'urwango bamwanze, ntiyatunguwe n'imibabaro yababajwe ku bwacu, ntiyatunguwe n'urupfu rw'agashinyaguro yapfuye... byose yagiye kuza abizi neza ko bizamubaho, ndetse n'igihe bizamuberaho yari akizi. Ibyabaye byose, byabereye igihe gikwiriye: Nta cyatebutse nta cyatinze, nta cyatunguranye, nta cyabaye kigufi nta n'icyabaye kirekire; Abaroma 5:6 "Tukiri abanyantegenke, mu gihe gikwiriye Kristo yapfiriye abanyabyaha." Nta wakwibeshya ngo atekereze ko yatoranijwe ubu.... oya, byaba bihabanye n'ubutumwa bwiza, kuko Bibiliya ivuga ko ko twatoranijwe muri Yesu cyera cyane n'isi itararemwa! Efeso 1:3-4 "Imana y’Umwami wacu Yesu Kristo, ari yo na Se ishimwe, kuko yaduhereye muri Kristo imigisha yose y’umwuka yo mu ijuru, [4]nk’uko yadutoranirije muri we isi itararemwa, kugira ngo tube abera tutariho umugayo imbere yayo.

4: Iby'ingenzi mu mugambi w'agakiza, Yesu yarabikoze mu myaka 3.5

Tumaze kubona ko ibyabaye byose byari mu murongo w'umugambi w'Imana, ariko ni na ngombwa gutsindagira ko mu myaka 3.5 Yesu yakoze ibyari bikenewe byose ngo tubone agakiza kandi ni byo byari byamuzanye. Ubundu dukeneye iki ngo dukizwe? KWIZERA YESU NK'UMWAMI N'UMUKIZA W'UBUGINGO BWAWE. Ubutumwa bwiza dukeneye mu nteruro imwe: Kwizera ko Yesu yaje mu isi afite umubiri, agasamwa ku bwa Mwuka Wera akabyarwa n'umugore, akabaho ubuzima buzira icyaha, akatwunga na Data anesheje icyaha, agapfa, akabambwa ku musaraba, akazuka ku munsi wa 3, akazamurwa kwa Data, muri we ni mwo ubugingo buri, ni we nzira yonyine ijya kwa Data kandi ni we agakiza kabonerwamo gusa, ingoma ye ntizagira iherezo, kandi azagaruka guciraho iteka abari mu isi bose no guha ubuzima buhoraho abamwizeye bose."

Ngubwo butumwa bwiza dukeneye, kandi Yesu mission ye yarayikoze 100%

5: Mu myaka 3.5, Yesu yakoze byinshi kurenza ibizwi

Ni byo nta gushidikanya: Mu myaka 3.5 Yesu yakozemo umurimo, ibyo tuzi yakoze ni bicye cyane ugereranije n'ingano y'ibyo yakoze! Ibi rwose Yohana abihamya atya adaca ku ruhande: Yohana 21:25 "Ariko hariho n’ibindi byinshi Yesu yakoze, byakwandikwa byose ngira ngo ibitabo byakwandikwa ntibyakwirwa mu isi." Nguko ukuri kw'ibyanditswe byera: Nubwo twabonye abakozi b'Imana bamaze imyaka muri za 70 - 80 bakorera Imana, ibyo bakoze muri iyo myaka ntiwabigereranya na gato n'ibyakozwe na Yesu mu myaka 3.5! Mu byakozwe na Yesu, buriya Bibiliya ivuga bicye cyane bifite aho bihuriye n'umugambi w'agakiza gusa. Uramutse ubyanditse byose, za Bibliotheque zakuzura, amazu yose akuzura, isi yose ikuzura ibitabo! Ubwo se twahera he tuvuga ko umurimo wa yesu wabaye mugufi? Ngirango icy'ingezi si umubare w'imyaka yamaze akora, ahubwo icy'ingenzi ni icyavuye mu myaka yamaze akora, bituma benshi bwamwita "Le plus grand Homme de tous les temps". (The greatest Man of all the time)"

Uwiteka atugirire neza

Answered: Ese Yesu yarizuye, cyangwa Imana yaramuzuye?

Sun, 20 Apr 2025 09:32:11 +0000

Bibiliya isobanura neza ibyerekeranye n'izuka rya Yesu, ku buryo iki kibazo gishobora gusubizwa nta guca ku ruhande.

Imwe mu nyigisho igize inkingi ya mwamba mu byo twizera (Doctrin), ni uko twizera icyo twita ubutatu. Ni ukuvuga: Twizera ko Imana Data ari Imana, Tukizera ko Yesu ari Imana, kandi tukizera ko Mwuka Wera ari Imana. Hejuru y'ibyo kandi tukizera Imana imwe rukumbi. (Ushobora gukanda hano ukareba byinshi ku byerekeranye n'ubutatu), cyangwa ugakanda hano ukareba imbumbe y'ibyo twizera (Doctrin)

Bibiriya igaragaza idaca ku ruhande ko abagize ubutatu bwera bose bagize uruhare mu izuka rya Yesu: Yesu yarizuye, Imana yazuye Yesu, na Mwuka Wera yazuye Yesu. Tubisuzume dukoresheje Bibiliya:

1) Yesu yarizuye

Yohana 10:17-18 “Igituma Data ankunda ni uko ntanga ubugingo bwanjye ngo mbusubirane. [18]Nta wubunyaka, ahubwo mbutanga ku bushake bwanjye. Nshobora kubutanga kandi nshobora kubusubirana, kuko iryo ari ryo tegeko nategetswe na Data.”

Yohana 2:19 "Yesu arabasubiza ati “Nimusenye uru rusengero, nanjye nzarwubaka mu minsi itatu.”

==> Nta gushidikanya, Yesu ubwe yivugiye ko afite ububasha bwo gutanga ubugingo bwe ku bushake bwe, kandi afite n'ububasha bwo kubwisuziba. Yivugiye ko nibasenga urusengero (umubiri we), azarwiyubakire ubwe nyuma y'iminsi itatu (Azizura). Aha rero, uwavuga ko Yesu yizuye nta kosa waba ukoze. Igihe Yesu yari mu isi, yari umuntu 100%, akaba n'Imana 100%. Yaradupfiriye ku musaraba kimuntu, ariko nk'Imana ntajya apfa.

2) Imana yazuye Yesu

Ibyakozwe n'Intumwa 2:23-24 "uwo muntu amaze gutangwa nk’uko Imana yabigambiriye, ibimenye bitari byaba, mwamubambishije amaboko y’abagome muramwica. [24]Ariko Imana yaramuzuye ibohoye umubabaro uterwa n’urupfu, kuko bitashobotse ko akomezwa na rwo.

Abagalatiya 1:1 "Pawulo (intumwa itari iy’abantu, kandi itatumwe n’umuntu, ahubwo yatumwe na Yesu Kristo n’Imana Data wa twese yamuzuye)

Abaroma 8:11 "Ariko niba Umwuka w’Iyazuye Yesu aba muri mwe, Iyazuye Kristo Yesu izazura n’imibiri yanyu ipfa ku bw’Umwuka wayo uba muri mwe."

==> Aha na ho, uwavuga ko Imana yazuye Yesu nta kosa yaba akoze.

3) Mwuka Wera yazuye Yesu

1 Petero 3:18 Kuko na Kristo yababarijwe ibyaha by’abantu rimwe, umukiranutsi ababarizwa abakiranirwa kugira ngo atuyobore ku Mana amaze kwicwa mu buryo bw’umubiri, ariko ahinduwe muzima mu buryo bw’umwuka.

==> N'uwavuga ko mwuka Wera yazuye Yesu na we nta kosa yaba akoze.

======

Bigaragara mu buryo butajijinganywaho ko abagize ubutatu bagize ururahare mu iremwa ry'ibiriho, (Creation) bagira uruhare mu mugambi w'agakiza, (Salvation) ndetse banagize uruhare mu izuka rya Yesu (Resurrection)

Uramutse uvuze ko Imana yazuye Yesu, abizera ubutatu bwera bagomba guhita bumva vuba ko Imana Data, yesu ubwe, na Mwuka Wera, bari bahari kandi buri wese muri bo afite ububasha mu mushinga w'iremwa, umushinga w'agakiza, n'umushinga w'izuka.

Murakoze, Uwiteka akomeze atugirire neza.

Answered: Ese iyi bibiliya umuntu yayidownloadinga?

Wed, 16 Apr 2025 20:42:33 +0000

Yego rwose. Muri iki kinyejana cy'ikoranabuhanga, ushobora kudownloadinga Bibiliya versions hafi ya zose, no mu ndimi hafi ya zose. Waba ukoresha mudasobwa, telefoni ikoresha Android cyangwa ikoresha ios, wabasha kudownloadinga ku buntu Bibiliya.

Answered: Mose yakoze ikihe cyaha? Ese koko icyaha yakoze ni ugukubita igitare kabiri nk'uko bikunze kuvugwa?

Mon, 31 Mar 2025 15:28:37 +0000

Icyaha cya Mose

===============

Mose yakoze iki cyatumye Imana imufatira umwanzuro w'uko atazagera mu gihugu cy'isezerano?

Bikunze gusobanurwa nabi uko bitari. Hari abavuga ko icyaha cya Mose ari uko yakubise igitare kabiri, ibi sibyo kuko ntaho bigaragara ko Imana yamusabye kugikubita rimwe, uretse no kugikubita rimwe Imana ntiyigeze imusaba kugikubita!

-----

Ubundi iyi yari inshuro ya kabiri Abisirayeli bahabwa amazi avuye mu gitare.

Inshuro ya mbere, Imana yahaye Mose amabwiriza muri aya magambo:

Kuva 17:5-6 [5]Uwiteka abwira Mose ati “Nyura imbere y'abantu ujyane bamwe mu bakuru b'Abisirayeli, witwaze inkoni wakubitishije rwa ruzi, ugende. [6] Nanjye ndahagarara imbere yawe hariya ku gitare cy'i Horebu, ukubite icyo gitare amazi aravamo abantu bayanywe.” Mose abigenzereza atyo imbere y'abakuru b'Abisirayeli.

Ku ncuro ya mbere, Mose yahawe amabwiriza yo gukubita igitare, akubita igitare. Aho ni sawa

Incuro ya kabiri, Imana yahaye Mose amabwiriza muri aya magambo:

Kubara 20:7-8 [7] "Uwiteka abwira Mose ati [8] “Enda ya nkoni, wowe na Aroni mwene so muteranye iteraniro, mubwirire igitare mu maso yabo kivushe amazi yacyo. Ubakurire amazi muri icyo gitare, abe ari ko uha iteraniro n'amatungo yaryo amazi yo kunywa.”

Ubundi ibi bivugwa mu ncuro ya kabiri, ari na ho havuye icyaha cya Mose, byabaye barimo kugana ku musozo w'imyaka 40 mu butayu. Nk'uko bizwi, ubu bwoko bwagoye Mose n'Imana mu buryo bwose bushoboka. Ku nshuro ya mbere mu myaka 40, aha ni ho honyine Mose yise ubwoko bw'Imana abagome!. Uburakari, umujinya, umubabaro, urupfu rwa mushiki we watumye arokoka mu rufunzo rwo muri Egiputa, byose biramuzibiranya. Agendeye kuri experience, ati ubwa mbere nakubise inkoni inyanja itukura iritandukanya, ubwa kabiri nakubise igitare kivamo amazi, n'ubu bwa gatatu ngiye kukibakubitira kivemo amazi! Yibagirwa ko Ijambo ry'Imana ritamenyerwa, kuri iyi nshuro ntiyari yasabwe kukubita igitare, yari yasabwe kukibwira!

Ikiyongera kuri ibyo, akubita igitare nk'uwerekana nk'aho igitangaza ari icye kuko yarababwiye ati "Muri iki gitare twabakuriramo amazi?". None se ubundi, Bitabaye Imana, Mose yakura amazi mu gitare koko? Kubara 20:10 "Mose na Aroni bateraniriza iteraniro imbere y’icyo gitare, Mose arababwira ati “Nimwumve mwa bagome mwe: muri iki gitare twabakuriramo amazi?”

===>> Muri macye, icyaha cya Mose si ugukubita igitare kabiri, si no kugikubita rimwe, si no kugikubitana umujinya, ahubwo ni ukugikubita kandi yasabwe kukibwira. Imana ntiyigeze isaba Mose gukubita igitare, ahubwo yamusabye kukibwira.

-----

None se, yego yari yasabwe kubwira igitare arangije aragikubita: None se ko icyari kigambiriwe cyagezweho, amazi akaba yavuye mu gitare: Kuki byahindutse icyaha?

Ubundi ibyakorwaga cyera byose byari igicucu cy'ibyagombaga kuzaza mu isezerano rishya. Mu byabereye hano, Imana yari yiboneye igishushanyo gikomeye:

Kubwira igitare = Ijambo

Igitare=Yesu

Amazi=Ubugingo

Mose ntiyasuzuguye Imana gusa, ahubwo yanangije igishushanyo gikomeye cy'uko Jambo yagombaga kuzaza akaduha ku mazi y'ubugingo

ISOMO

Mu gitabo cya 5 cya Mose, (Gutegeka kwa kabiri), Mose agaragara yinginga Imana ngo imukurireho igihano basi akandagize ikirenge mu gihugu yari amaze imyaka 40 aharanira kujyamo, Imana imwereka aho Ibera Imana n'ubwo yari yarayiteseho baganira nk'inshuti. Muzi uko yamusubije? Yaramubwiye ngo “Uherukire aho ntukongere kumbwira iryo jambo"

Gutegeka kwa kabiri 3:25-26 [25] Ndakwinginze, emera ko nambuka nkareba igihugu cyiza kiri hakurya ya Yorodani, iriya misozi myiza na Lebanoni.”[26] Maze Uwiteka andakarira ku bwanyu, ntiyanyumvira. Arambwira ati “Uherukire aho ntukongere kumbwira iryo jambo.

Bikwiriye kutubera isomo bavandimwe. Uko wabanye n'Imana n'ibyo wayikoreye mbere, si urwitwazo rwo gushayisha mu byaha.

Uwiteka komeze atugirire neza

Answered: Ese koko Yefuta yaba yaratambye umukobwa we?

Mon, 24 Mar 2025 21:02:50 +0000

Ese koko Yefuta yatanze umwana we ho igitambo cyoswa

(NOTE: Igitambo cyoswa = Igitambo cyicwa, kigakinjwa kikamena amaraso, kigashyirwa ku gicaniro kigatwikwa kigakongorwa n'umuriro)

===

Hari ibibazo bigera ku 10 abasesenguzi ba Bibiriya, abavugabutumwa n'abasomyi batarumvikanaho kuva kera kugeza ubu:

Bitatu biza ku isonga ni ibi bikurikira:

1) Umwami Sawuli yigeze kwiyoberanya ajya kuraguza. Umuhanuzi Samuel yari yarapfuye. umushitsikazi amuzamurira Samuel avugana na Sawuli: Ese birashoboka? Ese Umupfumu yabasha kuzamura umukozi w'Imana nka Samuel akamuvana mu bapfuye akamugarura mu isi y'abazima?

2) Yesu yavuze ko azamara mu mva iminsi 3 n'amajoro 3. Bikunze kuvugwa bikanigishwa ko yapfuye ari kuwa 5 ku mugoroba, akazuka ku cyumweru mu rukerera. Bibaye ariko biri, yaba yaramaze mu mva umunsi 1 n'amajoro 2: Ibi bihuzwa bite?

3) Yefuta yahize umuhigo wo gutamba ikizasohoka mbere nk'igitambo cyoswa (holocaust). Hasohoka umukobwa we. Iyo usomye ubutumwa Yefuta yoherereje umwami w'Abamoni, (Abac. 11), Yefuta agaragara nk'uzi amategeko, kandi mu mategeko cyaraziraga kikaziririzwa gutamba abantu nk'ibitambo byoswa. Ese koko Yefuta yatambye umukobwa we nk'igitambo cyoswa?

....

Iki kibazo cya Yefuta cyakuruye impaka kuva kera kugeza ubu. Gusa abenshi bavuga ko Yefuta atigeze atamba umukobwa we, kandi iyo urebye ubusobanuro batanga usanga bifite ishingiro. Tubisuzume

1) Bagendeye ku muhigo yahize ubwawo

Dore uko uwo muhigo uvuga muri Bibiriya Yera dukoresha:

Abac 11:30-31 [30]Nuko Yefuta ahiga Uwiteka umuhigo ati “Nungabiza Abamoni [31]ngatabaruka amahoro mvuye kubatsinda, ikizabanza gusohoka imbere y'umuryango w'inzu yanjye kunsanganira, kizaba icy'Uwiteka. Nanjye nzagitangaho igitambo cyoswa.”

Reka dushyire umurongo wa 31 mu zindi ndimi, hanyuma witegereze akajambo nashyize natsindagiye ( bold)

(LOUIS SECOND) "quiconque sortira des portes de ma maison au-devant de moi, à mon heureux retour de chez les fils d'Ammon, sera consacré à l'Eternel, et je l'offrirai en holocauste."

/KING JAMES 2000/

"Then it shall be, that whatsoever comes forth of the doors of my house to meet me, when I return in peace from the children of Ammon, shall surely be the LORD'S, and I will offer it up for a burnt offering.

-------

Isezerano rya kera ryanditswe mu giheburayo. Ngewe nta giheburayo nzi, ariko abasesenguzi bakizi bahamya ako kajambo natsindagiye "et" mu gifaransa na "and" mu cyongereza, ngo muri Bibiriya y'igiheburayo uko kanditse gashobora gusobanura et cyangwa ou (Ubwo mu cyongereza ni and cyangwa or.)

Ni ibisanzwe ko abasesenguzi bitabaza Bibiriya y'igiheburayo mu isezerano rya kera, cyangwa iy'ikigereki mu isezerano rishya. Ibyo bibaye ari ukuri, mu mwanya wa et hakajyamo ou, mu mwanya wa and hakajyamo or, uyu muhigo wa Yefuta waba waravugaga utya:

LOUIS SECOND) "quiconque sortira des portes de ma maison au-devant de moi, à mon heureux retour de chez les fils d'Ammon, sera consacré à l'Eternel, ou je l'offrirai en holocauste."

/KING JAMES 2000/ "Then it shall be, that whatsoever comes forth of the doors of my house to meet me, when I return in peace from the children of Ammon, shall surely be the LORD'S, or I will offer it up for a burnt offering."

Bibaye ariko biri, Yefuta yaba yarahize umuhigo umuha amahitamo: Igisohoka mbere nikiba umuntu, nzagiha Uwiteka. Nikiba itungo, nzaritangaho igitambo cyoswa.

-----

Ikiyongeraho, dore ijambo umukobwa wa Yefuta yavuze amaze kumenya ko se yamutaze:

Abac 11:37 "Nyuma uwo mukobwa abwira se ati “Unyemerere icyo ngusaba: ube undetse amezi abiri ngende manukane mu misozi na bagenzi banjye, ndirire ubukumi bwanjye.”

Uyu mukobwa ntiyasabye kuririra urupfu rwe, yasabye kuririra ubukumi bwe! (Yaba Yari abizi ko guhabwa Uwiteka bisobanuye ko atagombaga gushaka,!

2) Kureba byimbitse niba koko Yefuta yaba yaratambye umwana we ho igitambo cyoswa

Mu ngingo 7, turebere hamwe niba koko Yefuta yaba yaratambye umukobwa we

1) Imico ya Yefuta na kamere ye

Ku ikubitiro, Bibiliya igaragaza Yefuta nk'umugabo w'intwari kandi w'umunyambaraga, ijambo rikoreshwa ku bandi bacamanza bakoze ibihambaye nka ba Gideyoni. Abacamanza 11:1 "Nuko Yefuta w’Umugileyadi yari umunyambaraga w’intwari, kandi yari umwana wa maraya, kandi Gileyadi ni we bamubyaranye." Iki gice cya 11 cyose kigaragaza Yefuta nk'umugabo ugira amakenga n'ubwenge bwinshi; Akimara guhamagarwa, ntiyashyuhijwe no kwitwa umutware, ahubwo yarabanje aritonda afata umwanya we, yihutira gufata umwanya we no gusobanukirwa impamvu z'Abayuda bene wabo. Igihe byari bibaye ngombwa ko ingabo ze zirwana n'Abamoni, Yefuta yabanje imbere imishyikirano, yagiye mu ntambara aruko iby'imishyikirano binaniranye. (Abazamanza 11:12-28)

2) Yefuta yari azi amategeko ya Mose

Abantu bamwe bakunze kuvuga ko Yefuta atari azi amategeko ya Mose bitaga "Torah". Ibi ni ukwibeshya, kuko iyo usomye amateka Yefuta yarondoreye Abamoni mu gice cya 11 cy'Abacamanza, usanga Yefuta yari azi neza amategeko bagenderagaho bitaga "Torah". (Ibitabo bitanu bya mbere muri Bibiliya)

3) Muri Isirayeli, cyaraziraga kikaziririzwa gutamba umuntu ho igitambo cyoswa

Nk'uko tubibonye mu ngingo ya 2, Yefuta yagaragaje ko yari azi Ijambo ry'Imana bagenderagaho. Ibi ni ukuri, kandi mu gihugu cya israel cyose, n'iyo Yefuta abyirengagiza, mu gihugu hose ntihari kubura umuntu nibura umwe waba uzi icyo amategeko avuga, cyane ko mu myaka 6 Yefuta yabayoboyemo, bari bari mu bubyutse bugaragara. Abalewi 18:21 “Ntugatange uwo mu rubyaro rwawe ngo umutambire Moleki, kandi ntugasuzuguze izina ry’Imana yawe. Ndi Uwiteka."

Gutegeka kwa kabiri 12:31 "Ntuzagirire Uwiteka Imana yawe nka bo, kuko ikintu cyose Uwiteka yita ikizira akacyanga urunuka bagikorera imana zabo, ndetse n’abahungu babo n’abakobwa babo babosereze imana zabo."

4) Umwuka w'Uwiteka wari kuri Yefuta

Neza neza umurongo umwe mbere y'uko Yefuta ahiga umuhigo, Bibiliya ivuga ko "Umwuka w'Uwiteka waje kuri Yefuta". Ntabwo byumvikana ukuntu "Umwuka w'Uwiteka" waza kuri Yefuta, ako kanya agahita ahiga umuhigo utandukanye n'Ijambo ry'Imana. Nta na rimwe Umwuka w'Uwiteka (cyangwa "Umwuka Wera) ntashobora kutubwira ikintu gitandukanye n'Ijambo ry'Imana. Abacamanza 11:29-30 [29]Umwuka w’Uwiteka aza kuri Yefuta, anyura i Galeyadi n’i Manase ajya i Misipa y’i Galeyadi, avayo afata mu Bamoni. [30]Nuko Yefuta ahiga Uwiteka umuhigo ati “Nungabiza Abamoni, [...]

5) Igisobanuro cy'ijambo "IGITAMBO"

Ni byo ko Yefuta yakoresheje ijambo "Igitambo cyoswa mu muhigo we". Ubusanzwe "Igitambo cyoswa" (Holocauste) cyagombaga gupfa, kigatwikwa ku gicaniro. Ariko ntabwo igihe cyose "Kuba igitambo cyoswa" bisobanura gupfa ku mu biri, bishobora no gusobanura "Kwitanga wese, ukiha Uwiteka burundu". Ibi na Pawulo abivuga atya: Abaroma 12:1 "Nuko bene Data, ndabinginga ku bw’imbabazi z’Imana ngo mutange imibiri yanyu, ibe ibitambo bizima byera bishimwa n’Imana, ari ko kuyikorera kwanyu gukwiriye." Muri ubu busobanuro, biragaragara ko binashoboka kuba "igitambo kizima", muri ubwo buryo, kuba igitambo kizima bisobanuye "Kwiha Imana ukayiyegurira burundu". Na Yefuta rero, birashoboka cyane ko yaba yarakoze umuhigo wo "gutanga umukobwa we akamwegurira Uwiteka burundu", kimwe n'uko Hana yakoze umuhigo wo kwegurira Samweli Uwiteka. 1 Samuel 1:10-11 "Ariko Hana yasenganaga Uwiteka agahinda, arira cyane. [11]Ahiga umuhigo aravuga ati “Nyagasani Nyiringabo, nureba umubabaro w’umuja wawe ukanyibuka, ntunyibagirwe ukampa umwana w’umuhungu, nzamutura Uwiteka abe uwe iminsi yose yo kubaho kwe, kandi icyuma cyogosha ntikizamugera ku mutwe.”

6) Ishyirwa mu bikorwa ry'umuhigo wa Yefuta

Hagati yo guhiga umuhigo no kuwuhigura haciyemo amezi abiri. Muri ibi bihe, Abisirayeli bari mu bubyutse, ahubwo iyo umucamanza yamaraga gupfa, ni bwo basubiraga mu buhenebere. Muri aya mezi abiri, kabone n'iyo Yefuta yaba atari azi ijambo ry'Imana rimubuza gutamba abantu ho igitambo cyoswa, ntihari kubura nibura umuntu umwe umuburira. Ikiyongeye kuri ibi, umukobwa wa Yefuta akimara kumenya umuhigo wa se, yavuze aya magambo y'ingenzi: Abacamanza 11:37 "Nyuma uwo mukobwa abwira se ati “Unyemerere icyo ngusaba: ube undetse amezi abiri ngende manukane mu misozi na bagenzi banjye, ndirire ubukumi bwanjye.”

Itegereze neza: Umukobwa wa Yefuta ntiyigeze asaba "Kujya kuririra urupfu rwe!" OYA. Yasabye kujya kuririra "UBUKUMI BWE". Yari abizi neza ko navayo atazapfa atanzweho igitambo cyoswa, ahubwo yari abizi ko nagaruka "azegurirwa Uwiteka". (Iyo wegurirwaga Uwiteka uri umukobwa, wagumaga uri isugi ugakorera umurimo w'Imana ku muryango w'urusengero).

7) Uko Yefuta afatwa ahandi muri Bibiliya

Ahandi muri Bibiliya, Nta na hamwe Ijambo ry'Imana ryaba rigaya Yefuta ku bw'iki gikorwa, ahubwo aho Yefuta avugwa aba avugwa ibigwi, ndetse Bibiliya inamushyira mu ntwari zo kwizera, ikamushyira ku rutonde rw' Abakoze ibyo gukiranuka! Byaba bitangaje Bibiliya iramutse ishyize Yefuta mu rutonde rw'abakoze ibyo gukiranuka mu gihe yaba ahubwo yarakoze amahano Imana yanga urunuka! Abaheburayo 11:32-33 "Mbese mvuge kindi ki? Igihe cyandenga mvuze ibya Gideyoni n’ibya Baraki, n’ibya Samusoni n’ibya Yefuta, n’ibya Dawidi n’ibya Samweli, n’iby’abahanuzi" [34]baheshejwe no kwizera gutsinda abami, no gukora ibyo gukiranuka no guhabwa ibyasezeranijwe, no kuziba iminwa y’intare.

UMWANZURO:

Impamvu nyamukuru itumye tuvuga izo ngingo zose, si ukugaragaza Yefuta nk'umuntu w'igitangaza utagira ikibi cyamurangwaho kuko uwo muntu ntabaho. Bibiliya itwereka idaca ku ruhande ko n'intwari z'ukwizera na zo zageraga aho zigera mu bihe by'intege nke, umuntu rukumbi utarigeze agira ikibi cyamurangwaho ni Yesu wenyine. Icyo tugendereye ni ukwerekana ko, ukurikije Ijambo ry'Imana, Yefuta ntiyigeze yica umukobwa we ngo amutambe ku gicaniro n'igitambo cyoswa, ahubw yatanze umukobwa we amwegurira Uwiteka ngo abe uwe ubuzima bwe bwose.

Ariko rero, hari abazakomeza kubona Yefuta nk'umuntu wahize umuhigo ahubutse. N'iyo byaba bimeze bityo, ntibyabuza inkuru ye kuba yuzuyemo ubuntu, urukundo n'ineza y'Imana, n'amasomo menshi yaduherekeza muri uru rugendo.

Murakoze cyane, Uwiteka akomeze atugirire neza

Answered: SPECIAL: Sobanukirwa na buri wese mu ntumwa za Yesu: YUDA MWENE YAKOBO

Sun, 23 Mar 2025 10:34:37 +0000

Mu ntumwa za Yesu habagamo ba Yuda babiri: Yuda Isikariyota wagambaniye Yesu, na Yuda mwene Yakobo. Uyu tugiye kuvugaho ni YUDA MWENE YAKOBO.

Uyu Yudada mwene Yakobo avugwa mu rutonde rw'intumwa za Yesu, akavugagwa kenshi nka "Yuda mwene Yakobo", ariko ahandi akavugwa nka "Tadayo". (Luka 6:13, 16 "Ijoro rikeye ahamagara abigishwa be, atoranyamo cumi na babiri abita intumwa: [...] [16] na Yuda mwene Yakobo, na Yuda Isikariyota wahindutse umugambanyi. ), ariko abanditsi b'amavanjiri Mariko na Matayo bakamuvuga nka "Tadayo" (Mariko 3:18 "na Andereya na Filipo, na Barutolomayo na Matayo, na Toma na Yakobo mwene Alufayo, na Tadayo na Simoni Zeloti,".

(Matayo 10:2-3 "Amazina y’intumwa cumi n’ebyiri ni aya: uwa mbere ni Simoni witwaga Petero na Andereya mwene se, na Yakobo mwene Zebedayo na Yohana mwene se, [3]na Filipo na Barutolomayo, na Toma na Matayo umukoresha w’ikoro, na Yakobo mwene Alufayo, na Tadayo"

Ibi tubivuze kugirango aho muzajya mubona "Yuda mwene Yakobo" cyangwa "Tadayo" mujye mumenya ko ari umuntu umwe.

Muri Bibiliya, Uyu "Yuda" yumvikana avuga incuro imwe rukumbi: Ahangaha yabazaga Yesu ikibazo: Yohana 14:22 "Yuda utari Isikariyota aramubaza ati “Databuja, bibaye bite ko ugiye kutwiyereka ntiwiyereke ab’isi?” Iki kibazo ubwacyo cyonyine, kigaragaza ko iyi ntumwa yari itegereje Mesiya w'umurwanyi uzabohora Abayuda ingoyi y'Abaroma! Yifuzaga ko Yesu atakwiyereka intumwa ze gusa, ahubwo yari akwiye kumanuka akajya no kwiyereka abanzi babo nk'umuntu w'igihangange!

Nta yandi makuru Bibiliya itanga kuri uyu Yuda mwene Yakobo. Amateka yo hanze ya bibiliya avuga ko uyu Yuda mwene Yakobo yaba yarishwe abambwe ku musaraba ahitwaga Persia icyo gihe, ubu ni muri Irani.

Imana idufashe kugira icyo twagira ku batubanjirije

Answered: SPECIAL: Sobanukirwa na buri wese mu ntumwa za Yesu: SIMONI ZELOTE

Sun, 23 Mar 2025 09:26:22 +0000

Mu ntumwa za Yesu habagamo ba Simoni babiri: Hari Simoni Petero (Twaramubonye), hakaba na Simoni Zelote.

Nta byinshi Bibiliya ivuga kuri Simozi Zelote, imuvuga gusa iyo ivuga urutonde rw'intumwa za Yesu. Nta kindi kizwi muri Bibiliya yigeze avuga cyangwa akora.

Mu ndimi z'amahanga, (Muri version zimwe na zimwe), iyo abanditsi b'ubutumwa bwiza bavuga uyu Simoni Zelote, Matayo na Mariko bakoresha iyi mvugo: "Simon the Cananaean" ( Mu gifaransa: "Simon le Cananite", cyangwa "Simon le Cananéen"). Luka niwe ukoresha igihe cyose "Simon the Zealot".

Aya magambo yose asobanura kimwe nuko ari mu ndimi zitandukanye: Matayo na Mariko bakoresha iri zina mu Giheburayo (Cananaean), naho Luka akarikoresha mu Kigereki (Zealot). Byaba mu Giheburayo cyangwa mu Kigereki, iri zina rikaba risobanura "umuntu ufite ishyaka ry'ikintu runaka", mu ndimi z'amahanga ni "Zele"

Nta kindi Bibiliya ivuga kuri uyu Simoni Zelote, gusa hanze ya Bibiliya amateka avuga ko ubwo Yakobo yari amaze kwicishwa inkota na Herode (Ibyakozwe n'inkomwa 12), ngo Simoni Zelote yaba yaramusimbuye ku buyobozi bw'Itorero ry'i Yerusalemu. Nyuma yaho, ngo yaba yarakomereje ivugabutumwa muri Egiputa, ngo ashobora no kuba yarageze mu Bwongereza.

Amateka yo hanze ya Bibiliya avuga ko Simoni Zelote yaba yarishwe azira ubutumwa bwiza, ngo yaba yarabambwe ku musaraba, muri Persia y'icyo gihe (Ubu ni muri Irani y'ubu).

Imana idufashe kugira icyo twigira kuri aba batubanjirije.

Answered: Ni uruhe rurimi Imana yumva neza? Natunganya nte "communication" hagati yanjye n'Imana?

Thu, 13 Mar 2025 20:04:53 +0000

Communication hagati y'umuntu n'Imana; Kumenya niba Imana inyumva: Iki ni ikibazo abantu benshi bibaza, gusenga turasenga, ariko se umuntu yamenya neza ate niba communication hagati ye n'Imana imeze neza?

N'ubwo gusenga ari byiza, ndetse Bibiliya ntivuga ko ari byiza gusa, ahubwo ni n'itegeko rya Mwuka wera, ntabwo umurokore agomba kwitwaza ko asenga cyane ngo yirengagize andi mahame y'Imana. Gusenga ni byo, kandi tugomba no gusenga ubudasiba, ni byo bitwegereza ubusabane hagati yacu n'Imana, ariko si byo byonyine. 1 Abatesalonike 5:17 "Musenge ubudasiba".

Mbere na mbere, tubanze tuvuge ibintu bitanu bikurikira:

1) Imana ntikeneye ururimi runaka ngo ibashe kumva umuntu mu rurimi rumwe kurusha urundi! Igishinwa, Ikinyarwanda, Icyongereza n'izindi, Imana si byo ikeneye ngo habeho communication hagati yayo n'umuntu.

2) Umuntu ataravuga, Imana iba yarangije kumenya ikimurimo: Yohana 2:24-25 "ariko Yesu ntiyabiringira kuko yari azi abantu bose. [25]Ntiyagombaga kubwirwa iby’abantu, kuko ubwe yari azi ibibarimo."

3) Umuntu atarasenga ngo agire icyo asaba, Imana iba izi icyo akeneye na mbere y'uko agisaba. Matayo 6:8 "Nuko ntimugase na bo, kuko So azi ibyo mukennye mutaramusaba."

4) Imana ntinezezwa na gato n'abantu bayivuga ku munwa gusa, cyangwa bakayubaha kuko babitegetswe cyangwa babyigishijwe gusa, ariko imitima yabo ikaba kure yayo. Yesaya 29:13 "Umwami aravuga ati “Kuko aba bantu banyegera bakanyubahisha akanwa kabo n’iminwa yabo, ariko imitima yabo bakayinshyira kure, no kubaha banyubaha akaba ari itegeko ry’abantu bigishijwe,"

5) Ibyo Imana ikeneye ngo itwumve vuba, biri mu byo dukora kurusha ibyo tuvuga. URURIMI IMANA YUMVA CYANE KANDI IKENEYE NGO YUMVE VUBA, NI IBIKORWA BYACU KURUSHA AMAGAMBO YACU. Ibyo bigaraga mu byanditswe byinshi bidakeneye ubusobanuro burebure:

- Yesaya 58:5-9 "Ugira ngo kwiyiriza ubuza nshima kumeze gutyo? Mbese ni umunsi umuntu yibabarizamo akubika umutwe nk’umuberanya akisasira ibigunira, akaryama mu ivu? Ibyo ni byo wita kwiyiriza ubusa, n’umunsi Uwiteka yishimira? [6]“Ahubwo kwiyiriza ubusa nshima ni uko mwajya mubohora abantu ingoyi z’urugomo, mugahambura imigozi y’uburetwa mukarenganura abarengana, kandi mugaca iby’agahato byose. [7]Kandi ukarekura ugatanga ibyokurya byawe ukagaburira abashonji, ukazana abakene bāmeneshejwe ukabashyira mu nzu yawe, wabona uwambaye ubusa ukamwambika, ntiwirengagize bene wanyu. [8]“Maze rero umucyo wawe uzaherako utambike nk’umuseke, ubukire bwawe buzatoha vuba, gukiranuka kwawe kuzakujya imbere, kandi icyubahiro cy’Uwiteka kizaba kigushoreye. [9]Maze nutabaza Uwiteka azagutabara, nutaka azavuga ati ‘Ndi hano.’ “Niwikuramo agahato no gutunga urutoki no kuvuga nabi, [10]ukihotorera umushonji ugahaza umunyamubabaro, umucyo wawe uzaherako uvire mu mwijima, kandi urwijiji rwawe ruzatamuruka habe amanywa y’ihangu. [11]Uwiteka azajya akuyobora, azahaza ubugingo bwawe mu bihe by’amapfa, azakomeza amagufwa yawe. Uzamera nk’urutoki rwuhirwa, kandi uzaba nk’isōko y’amazi idakama. (Ibi byanditswe biratugira inama y'icyo twakora kugirango Imana itwumve, ntabwo bitugira inama y'ibyo twavuga).

- Imana ubwayo yivugira igituma yanga kumva: Yesaya 59:1-2 "Dore ukuboko k’Uwiteka ntikwaheze ngo ananirwe gukiza, n’ugutwi kwe ntikwapfuye ngo ananirwe kumva. [2]Ahubwo gukiranirwa kwanyu ni ko kwabatandukanije n’Imana yanyu, n’ibyaha byanyu ni byo biyitera kubima amaso ikanga no kumva."

===

- Imana ubwayo ivuga ko hari igihe dushobora kuyitakambira ikatwihorera, nk'igihe twakwanga guhindurwa n'imuburo yayo: Imig 1:24-2 [24]Narabahamagaye muraninira, abaramburiye ukuboko ntihagira ubyitaho. [25]Ahubwo mwahinyuye inama zanjye zose, no kubacyaha kwanjye ntimubyitaho. [26]Nuko nanjye rero nzabakina ku mubyimba mwagize ibyago, nzabaseka icyo mwatinyaga kibagezeho. [27]Igihe muzatungurwa n'ubwoba nk'umugaru,Ibyago byanyu bikaza nka serwakira,Igihe umubabaro n'uburibwe bizabageraho. [28]“Ni bwo bazantakambira nkabihorera, bazanshakana umwete ntibazambona.

===========/

Guhera mu isezerano rya cyera, abantu b'Imana bajyaga bishuka, bakifuza gukorera Imana uburyarya nk'uko babukorera abantu, bakaza imbere yayo bigize abantu bakurikiza amategeko yo kugaragara nk'abakiranuka imbere y'abantu, ariko bene aba, Imana yababuriye idaca ku ruhande ko itazabumva:

Yesaya 1:13-15 [13]Ntimukongere kuntura amaturo atagira umumaro, imibavu ni ikizira kuri jye, imboneko z'amezi n'amasabato no guteranya amateraniro ndabirambiwe, ibyaha bivanze no guterana kwera bikurweho. [14]Imboneko z'amezi n'iminsi mikuru byanyu mwategetswe umutima wanjye urabyanga, birananiye ndushye kubyihanganira. [15]Nimutega ibiganza nzabima amaso, ndetse nimusenga amashengesho menshi sinzayumva, ibiganza byanyu byuzuye amaraso.

==> Muri macye, abasenga bagomba kumenya ko Imana yacu ari Imana igendera ku mahame, ntigendera ku marangamutima nk'abantu. Rimwe muri ayo mahame, ni uko Imana ikeneye ubugingo bwacu mbere na mbere. Ntabwo Yesu yagiye ku musaraba kugirango dutware amamodoka meza dutunge n'amafaranga menshi, yawugiyeho kugirango tubone ubugingo mbere na mbere, ibisigaye byose ni inyongera.

==> Ni byo rwose nta wahakana ko gukora mu buryo tumaze kuvuga haruguru, bisaba ubushobozi. Nta wahakana ko bivuna kujya ku ruhimbi kuvuga ubutumwa bwiza kandi wasize abana bashonje, cyangwa babirukanye mu ishuri, cyangwa ukaba wasize bakwirukanye mu nzu kubera kutayishyura.... Nta n'uwakwirengagiza ko biryoha gukorera Imana ibintu byose bimeze neza, mu mufuka, mu rugo n'ahandi. Ariko rero nanone, buri wese akwiye kuzirikana ko "Nta mwizera utarahawe ikintu cyafasha abandi", kandi icyo gukora ngo ugirire umuntu umumaro, si ko gisaba amafaranga buri gihe cyose. Buri wese akwiriye kuzirikana ko nk'uko Yesu yabyivugiye, "Uwahawe ducye ntadukoreshe uko Imana ibimusaba, biragoye ko Imana yamuha byinshi" (Matayo 25:14-30)

==> Imana ubwayo iratugira inama:

Yesaya1:16-17 [16]“Nimwiyuhagire mwiboneze, mukureho ibyaha byo mu mirimo yanyu bive imbere yanjye, mureke gukora nabi. [17]Mwige gukora neza, mushake imanza zitabera, murenganure abarengana, mucire impfubyi urubanza, muburanire abapfakazi.

Murakoze, Uwiteka akomeze atugirire neza.

Answered: Ese iyo Imana ihaye umuntu isezerano, uyu muntu agasubira inyuma; Imana yisubiraho ku buryo rishobora kudasohora?

Wed, 12 Mar 2025 18:09:38 +0000

Iki ni ikibazo cyiza kandi cyagiye gitera abantu benshi kuyobera mu binyoma, ahanini babitewe no kudasoma Ijambo ry'Imana no kudasobanukirwa ibyerekeranye n'amasezerano, rimwe na rimwe ugasanga abantu basigaranye indimbo ngo "Isezerano ntirihinduka" gusa.... bagasigara bicariye ibitakiriho!

Mbere yo gusubiza iki kibazo, tubanze dusobanure ko iyo urebeye ISEZERANO mu nguni y'abarihabwa, usanga habaho amasezerano y'ubwoko bubiri: Habaho ISEZERANO RUSANGE n'ISEZERANO RY'UMWIHARIKO

ISEZERANO RUSANGE

Iri ni isezerano ritagira condition n'imwe. Imana iriha abana bayo muri rusange, ititaye ku ho bari, uko babayeho, uko basenga, uko bizera.... n'ibindi. Iri sezerano rirasohora byanze bikunze, nta conditions zihariye rigira, uko byamera kose iri sezerano rirasohora.

Urugero: Yesu yadusezeranije ko azagaruka: IRI NI ISEZERANO-RUSANGE, nta kintu na kimwe twakora ngo tumubuze kugaruka, nta n'icyo twakora ngo aze vuba cyangwa atinde kuza. Nidukiranuka azagaruka, nitudakiranuka azagaruka, nidukizwa azagaruko, nitudakizwa azagaruka, nidukora ibyaha azagaruka, nitutabikora azagaruka.... muri macye, nta kintu na kimwe abari mu isi bakora ngo Yesu aze cyangwa ntaze. Azaza uko byamera kose.

ISEZERANO RY'UMWIHARIKO

Iri ni isezerano rihabwa umuntu ku giti cye cyangwa itsinda ry'abantu bafite icyo bahuriyeho. Iri rishobora guhabwa umuntu umwe ku gite cye, umuryango umwe, Itorero rimwe, igihugu kimwe.... kandi mwene iri sezerano, igihe cyose riba riherekejwe na conditions runaka, nk'urugero, rikaba rivuga riti "Nukora utya, najye nzakora ntya...". Ikibazo ni uko usanga akenshi twifatira kariya ka nyuma kavuga ngo "Imaza izakora itya.... tukirengagiza akandi kavuga ngo "Nugira utya...."

Ubusanzwe, Isezerano riba hagati y'abantu nibura babiri. Buri ruhande ruba rufite inshingano zo kubaha amabwiriza arikubiyemo. Iyo uruhande rumwe rwishe isezerano, isezerano rirapfa, ariko uruhande rundi ntiruryozwa ibyo kudakomezwa kw'isezerano.

Imana yo ntishobora kwica isezerano, ntibibaho : Ariko ku rundi ruhande, twebwe dufite inshingano zo kurigumamo: Iyo turisohotsemo birakunda, ariko ntibigomba kwitirirwa Imana ngo tuyibeshyere ko yaba yivuguruje, kuko yo iba igikomeje isezerano ryayo.

Ese Birashoboka kuva mu isezerano? Cyane rwose. Birashoboka, na Bibiliya irabihamya: Zaburi 25:3 "Si ko bizaba, Mu bagutegereza nta wuzakorwa n’isoni. Abava mu isezerano ari nta mpamvu, Ni bo bazakorwa n’isoni.

Murabibona rwose ko kuva mu isezerano bishoboka.

Ese muri Bibiriya hari ingero z'abisohoye mu isezerano batuma ridasohora?

Cyane rwowe, dushobora gufata urugero rwihuse kuri Eli. Eli yari Umutambyi, kandi yari yarahawe izerano ko urubyaro rwe ruzahora rugendera imbere y'Uwiteka iteka ryose, ariko abana ba Eli bahindutse ibigoryi ndetse na se arabarebera ntiyabacyaha, iyo myitwarire yatumye bo ubwabo bisohora mu isezerano bari barahawe, bituma ibyo yari yarasezeranijwe bidasohora. Ibyongibyo Imana ubwayo irabyivugira muri aya magambo:

1 Samuel 2:30 "Ni cyo gitumye Uwiteka Imana ya Isirayeli ivuga iti ‘Ni ukuri nari navuze yuko ab’inzu yawe n’ab’inzu ya so bazajya bagendera imbere yanjye iteka ryose’, ariko none Uwiteka aravuze ngo: Ntibikabeho kuko abanyubaha ari bo nzubaha, ariko abansuzugura bazasuzugurwa."

Imana ubwayo iti "Nari naravuze nti..., ariko noneho ndavuze nti...." Ese wagizengo Imana yarivuguruje? Oya rwose, ntabwo ijya yivugiruza. Eli yavuye mu isezerano bituma isezerano ridasohora, ariko nta wabigereka ku Mama nk'aho hari uruhare yabigizemo. Imana yacu ntitwaza igitugu, satani ni we utwaza igitugu. Umuntu kuva yaremwa yaremanywe ubushake, kandi Imana yubaha Ubushake bw'umuntu.

Njyewe mfite amasezerano menshi Imana yampaye, amwe muri iyo avuga atya: Numbera umwizerwa, nza......... (Birumvikana, mfite inshingano zo "kuguma ndi umwizerwa", nintazubahiriza nkaguma mu kuririmba ngo isezerano ry'Imana ntirihinduka..... Yesu azarinda agaruka nkiririmba‍ gusaaaaa.... ndabizi.

Ese Imana ishobora kwivuguruza?

Ntibibaho! Imana ntiyivuguruza na gato. Yo iguma ari iyo kwizerwa, kandi irinda Ijambo ryayo ngo irisohoze. Yeremiya 4:28 "Ni cyo kizatera isi kuboroga, n’ijuru hejuru rikabamo umwijima kuko nabivuze nkabigambirira, kandi sinzabyibuza, ntabwo nzivuguruza.”

Yeremiya 1:12 "Maze Uwiteka arambwira ati “Waroye neza, kuko ndinda ijambo ryanjye kugira ngo ndisohoze.”

UKURI GUHARI NI UKU:

1)Isezerano ryose rirarwanywa

2) Isezerano rirarindwa

Iyo Umukristo yahawe isezerano, ntabwo agomba kuririmba ngo isezerano rizasohora gusa, ngo ashyire akaguru ku kandi, ahubwo aba afite inshingano zo kuririnda ashishikaye kuko agomba kumenya ko isezerano rye rirwanywa. Iyo wahawe isezerano, witegura no kurwana kurusha uko warwanaga mbere yo kurihabwa. Bitabaye ibyo, uramutse uhawe isezerano warangiza ukajya gushayisha mu byaha, ntiwatangara wisanze warisohotsemo, maze ukisanga Imana ikubwira nk'uko yabwiye Eli, iti "Nari naravuze ngo ..... ariko ntibikabeho!"

MURI MACYE: Yego rwose, birashoboka ko isezerano rishobora kudasohora, bidatewe n'uko Imana yivuguruje kuko ntijya yivuguruza, ahubwo bitewe n'uko uwarihawe yarisohotsemo mu buryo bumwe cyangwa ubundi.

ICYITONDERWA:

1)Igihe cyo guhabwa isezerano, n'iyo mu isezerano haba hatarimo ijambo rivuga ngo "Nugira utya...", uwahawe isezerano agomba kumenya ko iryo jambo "nugira utya..." risanzwe rihari si ngombwa ko barigusubiriramo, ryihishe muri Bibiliya. Ni inshingano z'uwahawe isezerano gukunda Ijambo ry'Imana no kurisoma kugirango amenye icyo Imana imubwira. Ntabwo Imana igomba kuryozwa kudasoma Ijambo ryayo kwacu, no kubabazwa tuzira kutamenya. Hoseya 4:6 “Ubwoko bwanjye burimbuwe buzize kutagira ubwenge. Ubwo uretse ubwenge, nanjye nzakureka we kumbera umutambyi. Ubwo wibagiwe amategeko y'Imana yawe, nanjye nzibagirwa abana bawe." (Note: Iki cyanditswe abantu bamwe bakunze kugikoresha nabi, bakakitwaza ngo biyaranje mu manyanga yo mu isi, bakibagirwa kugisoma ngo bakirangize, bakibagirwa kwibonera ko Imana ituburira ibi: Nitwibagirwa Ijambo ryayo, tuzabe twiteguye guhangana n'ingaruka zabyo"

2)Tugomba kwemera ko Gusohora kw'isezerano no kudasohora kwaryo ari kimwe mu bintu biturenze. Ibintu by'Imana ntibigendera kuri formule mathematique, ngo ducyeke ko 1+1 igihe cyose bigomba kubayara 2 nk'uko bimeze muri mathematique, OYA. Abantu babiri bashobora guhabwa isezerano rimwe, bakariherwa igihe kimwe, bagasenga kimwe, bagakiranuka kimwe, bakizera kimwe... ariko kubera impamvu ziturenze umwe agasubizwa mbere y'undi. Igikomeye ni ukubahiriza ibyo dusabwa ku ruhande rwacu, tukaguma mu isezerano, ubundi tukareka nyiri kuriduha akikorera umurimo mu buryo bwe.

Bantu mufite amasezerano, nimuyarinde

Murakoze.

Answered: SPECIAL: Sobanukirwa na buri wese mu ntumwa za Yesu: Yakobo mwene Alufayo

Sun, 09 Mar 2025 09:40:07 +0000

Mu ntumwa za Yesu habagamo ba Yakobo babiri: Yakobo Mwene Zebedayo (Uyu Yakobo yavaga indime na Yohana), hakaba n'undi Yakobo yari mwene Alufayo.

Kugirango Bibiliya ibatandukanye neza mu buryo budateje urujijo, akenshi iyo ivuze Yakobo yongeraho "Yakobo mwene Runaka".... Cyangwa "Yakobo umuvandimwe wa.....". Muri Bibiliya hamwe na hamwe, Uyu Yakobo tuvuga hano mwene Alufayo akunze no kwitwa "Yakobo muto". Mariko 15:40 "Hari n’abagore bari bahagaze kure bareba, muri bo harimo Mariya Magadalena, na Mariya nyina wa Yakobo muto na Yosefu, na Salome." Ntibizwi neza impamvu yo kumwita "Muto", niba ari ibikorwa bye bitangana n'ibya Yakobo mwene Zebedayo, niba ari igihagararo.... ntibizwi neza. Gusa uyu murongo tuvuze haruguru ugaragaza ko nyina w'uyu Yakobo yitwaka Mariya.

Uyu yakobo mwene Alufayo nta byinshi avugwaho muri Bibiliya. Nta yandi makuru Bibiliya itanga kuri we, nta kintu Bibiliya ivuga yigeze avuga, nta n'icyo ivuga yigeze akora.

Yapfuye ate?

Hanze ya Bibiliya, amateka avuga ko Yakobo mwene Alufayo yajyanywe ku gasongero k'inzu ndende, baramuboha, baramusunika aramanuka yikubita hasi, mu gihe agihorogoma bamusanga hasi bamwicisha amabuye.

Imana idufashe kwigira kuri aba batubanjirije.

Answered: SPECIAL: Sobanukirwa na buri wese mu ntumwa za Yesu: Barutolomayo

Mon, 03 Mar 2025 11:32:14 +0000

Barutolomayo avugwa incuro 4 gusa muri Bibiliya, ndetse muri izi ncuro zose aba avugwa mu rutonde rw'intumwa za Yesu gusa.

Nta yandi makuru Bibiliya itanga kuri Barutolomayo, nta kintu Bibiliya ivuga yigeze avuga, nta n'icyo ivuga yigeze akora.

Hanze ya Bibiliya, amateka avuga ko nyuma ya Yesu Barutolomayo yaba yarakomeje umurimo wo kuvuga ubutumwa bwiza mu Buhinde, abukomereza ahitwa Arubanopolisi muri Armenie y'ubu ari na ho yaba yariciwe azira ubutumwa bwiza.

Amateka avuga ko Barutolelomayo ari umwe mu bantu bishwe urw'agashinyaguro bazira ubutumwa bwiza, kuko ngo yaba yarakuweho uruhu rw'umubiri we, ngo amara iminsi 3 asamba. Yewe, wa mugani wa Bibiliya "n'isi ntiyari ikwiye ko bayibamo!". Ariko igitangaza kurushaho, ni uko abo bose batarahabwa ibyasezeranijwe, ahubwo baracyadutegereje ngo tuzabiherwe rimwe! Imana yacu ishimwe.

Abaheburayo 11:38-40 [38]Yemwe, n'isi ntiyari ikwiriye ko bayibamo! Bazereraga mu mashyamba no mu bihanamanga, no mu mavumo no mu masenga. [39]Abo bose nubwo bamaze guhamywa neza ku bwo kwizera kwabo, nyamara ntibahabwa ibyasezeranijwe [40]kuko Imana yatugambiriye ikirushaho kuba cyiza, kugira ngo abo badatunganywa rwose tutari kumwe.

Imana idufashe kwigira kuri aba batubanjirije.

Murakoze, Uwiteka akomeze atugirire neza

Answered: SPECIAL: Sobanukirwa na buri wese mu ntumwa za Yesu: FILIPO

Sat, 01 Mar 2025 10:01:32 +0000

Filipo yari umwe mu ntumwa 12 za Yesu, Bibiliya ikaba itamuvugaho byinshi kuko na we ubwe nta byinshi avuga. Mu butumwa bwiza bwa Matayo na Luka, Bibiliya ivuga iby'umuntu umwe Yesu yabwiye ati "Nkurikira", uwo muntu aramusubiza ati "Reka mbanze njye guhamba Data". (Luka 9:59 & Matayo 8:21). N'ubwo Bibiliya itavuga uwo muntu uwo ari we, abasesenguzi bamwe bagiye bavuga ko uwo muntu yaba yari Filipo, cyane cyane bagendeye ku mico ya Filipo nk'uko tugiye kubibona hasi, bakanabihuza n'umurongo umwe utangwa na Yohana 1:43). (Byumvikane neza ko ibyo bintu bitavugwa muri Bibiliya, abasoma ibi bajye babikoresha bigengesereye).

Mu banditsi b'amavanjili uko ari 4, Yohana ni we ugerageza kugira bicye avuga kuri Filipo, abandi banditsi bavuga Filipo iyo bamuvuga mu rutonde rw'intumwa za Yesu gusa.) Filipo yakomokaga i Betsayida mu ntara ya Galilaya, aha ninaho hakomokaga Petero na Mwene se Andereya. (Yohana 1:43-44)

Ahantu hose Filipo avugwa muri Bibiliya, agaragara nk'umuntu wahoraga ahangayikishijwe no kubona ibyiza byashyika no ku bandi: Urugero rwihuse: Akimara guhamagarwa, umurongo ukurikiye umugaragaza ajya kureba Natanayeli akamugezaho inkuru nziza, ibi bihindura Filipo undi Muvugabutumwa wazanye umuntu kuri Yesu, nyuma ya Andereya wazanye Petero kuri Yesu. Yohana 1:43-49 "Bukeye bwaho Yesu ashaka kujya i Galilaya. Abona Filipo aramubwira ati “Nkurikira.” [44]Filipo uwo yari uw’i Betsayida, umudugudu w’iwabo wa Andereya na Petero. [45]Filipo abona Natanayeli aramubwira ati “Uwo Mose yanditse mu mategeko, n’abahanuzi bakamwandika twamubonye. Ni Yesu mwene Yosefu w’i Nazareti.” [46]Natanayeli aramubaza ati “Mbese i Nazareti hari icyiza cyahaturuka?” Filipo aramusubiza ati “Ngwino urebe.” [47]Yesu abona Natanayeli aza aho ari amuvugaho ati “Dore Umwisirayeli nyakuri, udafite uburiganya.” [48]Natanayeli aramubaza ati “Wamenyeye he?” Yesu aramusubiza ati “Filipo ataraguhamagara, ubwo wari munsi y’umutini nakubonye.” [49]Natanayeli aramusubiza ati “Rabi, uri Umwana w’Imana koko. Ni wowe Mwami w’Abisirayeli.”

Filipo yongera kugaragara aza kuvuganira Abagiriki kuri Yesu: Yohana 12:20-22 "Hariho Abagiriki mu baje gusenga mu minsi mikuru, [21]basanga Filipo w’i Betsayida y’i Galilaya, baramwinginga bati “Mutware, turashaka kureba Yesu.” [22]Filipo araza abibwira Andereya, Andereya na Filipo na bo baraza babibwira Yesu."

Filipo yari intumwa yahoraga yibaza uko ibyiza byagera ku bandi, kandi akabigaragaza mu magambo asobanutse adaciye ku ruhande, ndetse na Yesu ubwe yari abizi neza ku buryo iyo yabaga akeneye amakuru adaciye ku ruhande yayabazaga Filipo. Ubwo Yesu yifuzaga kugaburira abantu barenga 5,000; yabajije Filipo aho bakura imigati yo kubagaburira. Yohana 5:5-7 "Yesu yubura amaso, abonye abantu benshi baza aho ari abaza Filipo ati “Turagura hehe ibyokurya ngo aba babone ibyo barya?” [6]Icyatumye amubaza atyo yagira ngo amugerageze, ubwe yari azi icyo ari bukore. [7]Filipo aramusubiza ati “Imitsima yagurwa idenariyo magana abiri ntiyabakwira, nubwo umuntu yaryaho gato.”

Uyu muco wo kubaza ibibazo bitomoye, wongera kugaragara muri Yohana 14:7-9 "Iyaba mwaramenye, muba mwaramenye na Data. Uhereye none muramuzi kandi mwamurebye.” [8]Filipo aramubwira ati “Databuja, twereke Data wa twese biraba bihagije.” [9]Yesu aramubaza ati “Nabanye namwe iminsi ingana ityo, kandi ntiwari wamenya, Filipo? Umbonye aba abonye Data. Ni iki gitumye uvuga uti ‘Twereke Data wa twese’?"

Aho Filipo avugwa bwa nyuma muri Bibiliya, ni aho avugwa mu rutonde rw'intumwa 11 zari zigihari nyumwa y'uko Yesu asubiye mu Ijuru (Ibyakozwe n'Intumwa 1:13) . Nyuma yaho, Filipo ntiyongera kuvugwa, ibindi bizwi kuri we biva mu bitabo bisanzwe byo hanze ya Bibiliya.

Amateka yo hanze ya Bibiliya avuga ko nyuma ya Yesu, Filipo yaba yarakomeje umurimo w'ivugabutumwa ahitwa Phrygia (Ni muri Turukiya y'ubu). Aha muri Turukiya ni naho yaba yariciwe ahowe ubutumwa bwiza ahitwa Hierapolis

Imana idufashe kugirango twigire kuri aba batubanjirije

Answered: SPECIAL: Sobanukirwa na buri wese mu ntumwa za Yesu: YUDA ISCARIOT

Sun, 16 Feb 2025 10:38:12 +0000

Mu ntumwa 12 za Yesu, habagamo ba Yuda babiri. Kugirango babatandukanye, Umwe bibiliya ivuga ko yari Mwene Yakobo, undi (Ari nawe tugiye kuvugaho hano) Bibiliya ikavuga irindi zina rye: Iscariota.

Yuda Iscariota yari muntu ki?

Yuda Iscariota Bibiliya igaragaza ko yari mwene Simoni. (Yohana 6:71, 13:26), Akaba yarakomokaga ahitwa "Keriyoti" mu ntara ya Yudaya mu majyepfo ya Israel. Uyu Yuda ni we wenyine mu ntumwa za Yesu wakomokaga mu ntara ya Yudaya, abandi bose bakomokaga i Galilaya.

Yuda Iscariota yamenyekanye cyane kubera ubugambanyi bwe, ku isi yose yabaye ikimenyabose ku buryo n'uyu munsi mu ndimi zose iyo bavuze "ngo umuntu yabereye undi Yuda", baba bashaka kuvuga ko yamuhemukiye, yamugambaniye....

Ikindi gikunze gukurura impaka kuri Yuda Iscariota, ni ibikunze kuvugwa ko ngo nubwo yagambaniye Yesu, ngo nta mahitamo yari afite kuko yari yararemewe kuzaba igikoresho cyo gutanga yesu kugirango umugambi wo kuducungura ugerweho. Ngo bityo rero, ngo yaba yari igikoresho kitari gifite amahitamo nk'abandi. Ngo yari yararemewe kuzarimbuka byanze bikunze, Ibyo na byo turabigarukaho. Mbere yo kugaruka kuri iki kibazo, tubanze turebe ibyo Bibiliya ivuga kuri Yuda, biraza kudufasha gusuzuma icyo kibazo cy'ingorabahizi.

Ubutumwa bwiza bwa Yohana, bugaragaza Yuda nk'Umujura: Yohana 12:4-6 [4]Nuko Yuda Isikariyota, umwe mu bigishwa be wendaga kumugambanira aravuga ati [5]“Ni iki gitumye aya mavuta atagurwa idenariyo magana atatu ngo bazifashishe abakene?” [6]Icyatumye avuga atyo si ukubabarira abakene, ahubwo ni uko yari umujura kandi ari we wari ufite umufuka w’impiya, akiba ibyo babikagamo." Bidashidikanywaho, Yuda agaragazwa nk'uwari asanzwe n'ubundi ari umujura, kuko yibaga amafaranga yashyirwaga mu gafuka k'intumwa kuko ni we wakabikaga.

Uretse na Yohana ugaragaza ko Yuda yari asanzwe ari umujura, na Matayo agaragaza ko Yuda ubwe ari we wagiye kubwira abanzi ba yesu ko nibamuha ibiguzi azabayobora akabereka aho Yesu ari kugirango babashe kumufata. Matayo 26:14-16 "Hanyuma umwe muri abo cumi na babiri witwaga Yuda Isikariyota, asanga abatambyi bakuru 15 arababaza ati “Mwampa iki nkamubagenzereza?” Bamugerera ibice by'ifeza mirongo itatu, 16aherako ashaka uburyo yamubagenzereza."

Ubwo Yesu yatangiraga umurimo, Yuda yiboneye n'amaso ye ubuzima n'ibikorwa bya Yesu igihe cy'imyaka irenga gato kuri itatu: Yiboneye Yesu azura abapfuye, yamwiboneye ahumura impumyi, akiza indwara.... ibitangaza byose Yesu yakoze Yuda yarabyiboneraga, kandi yaniyumviye Yesu ahamya ko ari we Messiya. Yuda yiboneye Abayuda bashaka kwica Yesu kenshi ariko Yesu akabaca mu myanya y'intoki mu buryo butumvikana uburyo yabacika. Ibi byose Yuda yabishyize hamwe, nk'umuntu wakundaga amafaranga cyane, aravuga ati "aya mafaranga ndayarya kandi ntibari bumushobore, nk'ibisanzwe". Yuda yatunguwe cyane no kubona Yesu, kuri iyi ncuro, atabacika nk'ibisanzwe, ndetse ntanirwaneho, ahubwo bakamuta muri yombi nk'abandi bantu bose. Ibi byatunguye Yuda ananirwa kubyakira, ndetse Bibiriya ivuga ko ya mafaranga bari bamuhaye yayasubije ba nyirayo, gusa banga kuyakira ayajugunya mu rusengero.

Ese Yuda yari afite amahitamo? Cyangwa yari yararemewe kuzagambanira Yesu ku buryo nta mahitamo yari afite? Ese koko yari yararemewe kurimbuka?

Iki ni ikibazo gikomeye kandi kitigeze kivugwaho rumwe. Abahamya ko Yuda yari yararemewe kurimbuka ku buryo nta mahitamo yari afite, babishingira ahanini kuri iri jambo ryavuzwe na Yesu ubwe: Yohana 17:12 ' Nkiri kumwe na bo, nabarindiraga mu izina ryawe wampaye. Narabarinze, muri bo nta muntu wabuze ngo arimbuke, keretse umwana wo kurimbuka ngo ibyanditswe bisohore. Yohana 17:12 "Nkiri kumwe na bo, nabarindiraga mu izina ryawe wampaye. Narabarinze, muri bo nta muntu wabuze ngo arimbuke, keretse umwana wo kurimbuka ngo ibyanditswe bisohore.". Abatemera ko Yuda yaremewe kurimbuka, na bo babishingira ku byanditswe byinshi bigaragaza ko nta muntu n'umwe waremewe kurimbuka, ahubwo buri wese akoresha amahitamo ye yo kumvira cuangwa gusuzugura Imana, ndetse bakagaragaza ko Yuda atavukanye satani muri we, ahubwo Bibiliya igaragaza neza igihe satani yamwinjiriyemo: Igihe Yuda yafataga umwanzuro wo kujya gusaba amafaranga kugirango abashe kugambanira Yesu, icyo ni cyo gihe satani yamwinjiriyemo, naho ubundi mbere yaho, yari umuntu nk'abandi. Luka 22:1-6 "Nuko iminsi mikuru y'imitsima idasembuwe yitwa Pasika, yendaga gusohora. 2Abatambyi bakuru n'abanditsi bashaka uko bamwica, kuko batinyaga rubanda.3Satani yinjira muri Yuda witwaga Isikariyota, yari mu mubare w'abo cumi na babiri. 4Aragenda avugana n'abatambyi bakuru n'abatware b'abasirikare, uko azamubagenzereza. 5Baranezerwa basezerana kumuha ifeza. 6Aremera maze ashaka uburyo yamubagenzereza, rubanda rudahari."

Ubusanzwe, imikorere ya satani n'abadayimoni irazwi: Ni byo ko umuntu wese avukana kamere ibogamira ku cyaha, ariko nanone satani (cyangwa dayimoni) ntashobora kwinjira mu muntu ku ngufu, ahubwo igihe cyose ategereza ko umuntu afungura umuryango runaka bakabona ubwinjira bakamwarikomo. (Ibyitwa mu ndimi z'amahanga "Possession").

Iyo witegereje neza imibereho ya Yuda, usanga atararemwe nka robot cyangwa telecommande, ahubwo usanga mbere y'uko yinjirwamo na satani, yari umuntu nk'abandi wari ufite amahitamo. Ingero zirahari:

- Kimwe n;abandi Bayuda, Yuda yari ategereje Messiya w'igihangange mw'isi nk'uko twabivuze haruguru. Ubwo Yesu yagaragarizaga abantu ko ubwami bwe atari ubw'iyi si, benshi mu bigishwa be bahisemo kumureka bisubirira mu byabo kuko bumva ga Yesu ntacyo azabagezaho. Yohana 6:66-67 "Benshi mu bigishwa be bahera ubwo basubira inyuma, barorera kugendana na we. 67Yesu abaza abigishwa be cumi na babiri ati “Kandi namwe murashaka kugenda?”. Abahisemo kwigendera, babikoze kubw'amahitamo yabo, n'abahisemo gusigara babihisemo kubw'amahitamo yabo. Yuda yari mu bahisemo kugumana na Yesu, bigaragaza ko kugeza hano yari agifite amahitamo nk'abandi. Yuda yakomeje kwibwira ko ko hari ubutunzi bukomeye azakura Yesu amaherezo, ahitamo kwihangana akaguma mu ntumwa 12 atekereza ko Yesu ashobora kuzahindura imyumvire agakora ibyo abenshi bari bamutegerejeho byo kwemera akaba Umwami w'Abayuda akoresheje imbaraga, bityo abigishwe be bakaboneraho na bo kuba abantu bakomeye.

Bidatinze, ubuzima bwa Yuda bwaje guhindukira i Betaniya: Ahangaha Yesu yasutsweho amavuta na Mariya, Yuda ababazwa cyane no kubona amavuta nk'ayo y'agaciro amenwa hasi. Aha ni ho irari rye ryamurushije imbaraga, bavuye ahongaho ahitira ku batambyi bakuru, abasaba ko bamuha ibiguzi akabarangira aho Yesu ari kugirango bamufate. Ahongaho rwose yari yarangije gufungura imiryango tayari, ahinduka ibiryo byoroshye bya satani. satani amwinjiramo nk'uko twabibonye hejuru. (Luka 22:3).

Yuda yari yarangije kwiyemeza, kugeza ubwo bitumvikana ukuntu kuri uwo mugoroba, yicaranye na Yesu ku meza basangira ifunguro rya nyuma, kandi abizi neza ko yibitseho ibiguzi by'ubugambayi! Umutima we wari warangije kuba akahebwe tayali!

Ibi byanditswe byose, bituma tubasha guhamya ko Yuda ataremewe kurimbuka, ahubwo Yahisemo kwishyira mu ruhande rwa satani yohejwe no gukunda amafaranga, bituma arimbuka. Gusa ibi bizamura ikindi kibazo:

Ese Yesu ajya gutoranya Yuda yari abizi neza ko azamugambanira? Niba yari abizi, kuki yamutoranije mu ntumwa ze?

Mu byo twizera mu matorero y'abavutse ubwa kabiri bayoborwa na Mwuka Wera. (Doctrine), harimo ihame ry'uko Yesu ari Imana. Ntabwo ari Imana ubu gusa, ahubwo n'igihe yari mu isi mu mubiri yari Imana 100%, akaba n'umuntu 100%. (Ushobora gukanda hano ukareba ibyo twizera _ Doctrine). Yesu akiri mu isi, Bibiliya ihamya ko yari azi ibiri mu bantu atarinze kubibwirwa. Yohana 2:24-25 , 24ariko Yesu ntiyabiringira kuko yari azi abantu bose. 25Ntiyagombaga kubwirwa iby'abantu, kuko ubwe yari azi ibibarimo. YEGO rwose nta gushidikanya, ubwo Yesu yatoranyaga Yuda yari azi neza ko azamugambanira. None se niba yari abizi kuki yamutoranije? Iki kibazo kwibazwaho cyane, ariko igisubizo cyacyo kiri bugufi kandi kiroroshye: Kuba Imana izi ko ikintu kibi kiri bube, ntibisobanuye ko ari yo yateye ko ikintu kibi kiba. Ingero ni nyinshi.

Ingero: Imana yari izi neza ko Dawidi azakora icyaha cy'ubusambanyi, ariko ntabwo bisobanuye ko ari yo yamuteye gukora icyo cyaha. Ntibibaho ko Imana yakoshya umuntu gukora icyaha, ibi rwose ni ibyanditwe byera: Yakobo 1:13 "Umuntu niyoshywa gukora ibyaha ye kuvuga ati “Imana ni yo inyoheje”, kuko bidashoboka ko Imana yoshywa n'ibibi, cyangwa ngo na yo igire uwo ibyohesha.".

N'uyu munsi ni ko bikimeze: Iyo umuntu ari mu nzira zo gukora icyaha, Imana iba yabimenye mbere ko uwo muntu afite irari ryo gukora icyaha. iyo uwo muntu akijijwe, Umwuka wera agerageza kumwongorera no kumugira inama ngo areke gukora icyo cyaha; iyo adakijijwe, umutima-nama we uramubwira. Gusa kuko Imana yacu idatwaza igitugu, iyo uwo muntu yamaramaje gukora icyaha aragikora bigakunda, gusa kuba Imana yari ibizi ko ari bugikore ntibisobanuye ko ari yo yamuteye kugikora; oya rwose. Na Yuda ni ko byamugendekeye: Imana yari ibizi ko azagambana, ariko ntibisobanuye ko ari yo yamuteye kugambana. Ibi rwose bikwiriye gusobanuka kandi bigatandukanywa n'ibintu abantu bamwe bakunze kwita "Predestination", ni ukuvuga ngo ibintu biba ku bantu, bakitwaza ngo "ubwo nyine ni ko Imana yabishatse, ngo ibyo byaranditswe kuva kera ntaho nari kubicikira...." OYA si byo. Imana yari ibizi ko bizabaho, ariko ntibisobanuye ko ari yo yabishyizeho, ntabwo Imana ishobora gutambika icyaha imbere y'umuntu, OYA rwose, Bibiliya itubwira neza uko umuntu akora icyaha: Yakobo 1:13-16 "muntu niyoshywa gukora ibyaha ye kuvuga ati “Imana ni yo inyoheje”, kuko bidashoboka ko Imana yoshywa n’ibibi, cyangwa ngo na yo igire uwo ibyohesha. [14]Ahubwo umuntu wese yoshywa iyo akuruwe n’ibyo ararikiye bimushukashuka. [15]Nuko iryo rari riratwita rikabyara ibyaha, ibyaha na byo bimaze gukura bikabyara urupfu. [16]Ntimukayobe bene Data bakundwa."

Ngirango birasobanutse rwose, Bibiliya ntica ku ruhande: Ntibishoboka ko Imana ubwayo yaba yaroheje Yuda gukora icyaha ngo ibyahanuwe bikunde bisohore: NTIBISHOBOKA. Niba Yuda yari umuntu nk'abandi, ntibishoboka ko yaba yararemewe kuribuka. Ibyamubayeho Imana yari ibizi mbere, ni yo mpamvu Yesu yamwise "UMWANA WO KURIMBUKA", ariko kuba Imana yari ibizi ntisobanuye ko ari yo yabiteye. Uretse na Yuda Iscariot, hari n'abandi bana BO KURIMBUKA BENSHI: Abo ni babandi amazina yabo atanditse mu gitabo cy'ubugingo, kandi kuba batanditsemo si uko Imana yanze kubandikamo kandi bo babishaka, ahubwo ni uko bo ubwabo banze kwandikisha amazina yabo kandi ari ubuntu. Yuda yari afite amahitamo kimwe n'abandi bose. Aho guhitamo kwiyahura iyo ahitamo kwihana no gusaba imbabazi, aba yarababariwe. Abahanga benshi bahamya ko icyaha Petero yakoze (Kwihakana Yesu) cyari kibi kurusha icya Yuda, gusa Petero we yarihannye arababarirwa, Yuda ahitamo kwiyahura aho kwihana. Muri macye, kurimbuka kwa Yuda byashyirwa kuri satani na Yuda ubwe, ntibyabazwa Imana.

Murakoze, Imana ibahe umugisha

Answered: Umunsi w'abakundana uzwi nka "Saint Valentin": Ese Abakristo bemerewe kuwizihiza?

Fri, 14 Feb 2025 21:07:55 +0000

Iki ni ikibazo Abakristo benshi bakunze kwibaza, kandi cyane cyane bakakibaza bucece kuko batabona uko bakibaza bisanzuye.

Mbere na mbere, reka tubanze turebe inkomoko y'uyu munsi wa "Saint Valentin" uko bivugwa mu bitabo by'amateka bitandukanye.

Uyu munsi wagiye uvugwaho byinshi, ndetse wagiye usobanurwa bitandukanye guhera cyera. Gusa ibyemeranywaho na benshi ni ibi bikurikira:

Ahagana mu kinyejana cya gatatu nyuma ya Yesu, ubwami bw'Abaroma bwari buyobowe numwami w'abami (Emperor) witwaga Claudius. Muri iyo myaka, hahoragaho intambara z'urudaca hagati y'ubwami n'ubundi. Uyu Claudius ngo yaje kwitegereza asanga abasore b'ingaragu bakora neza umurimo wa gisirikare kurusha abagabo bafite ingo. Ngo ibyo ni cyo cyaba cyaratumye ategeka ko abasirikare batongera gushaka abagore.

Muri iyo myaka, Valentin wari ufite ububasha bwo gushyingira abashaka kurushinga, we yirengagije itegeko ry'umwami w'abami, ahubwo akomeza gushyingira abasore bifuzaga kurushinga, yirengagije itegeko ry'umwami, ndetse anirengagije ingaruka byashoboraga kumukururira. Iyo nkuru yaje kugera ku mwami w'abami Claudius, afata umwanzuro wo gufunga Valentin. Igihe Valentin yari muri gereza, bivugwa ko yakundanye n'umukobwa w'umwe mu bacungagereza. Valentin ngo yaje no kwandikira uyu mukobwa, arangiza asinya ,muri aya magambo "Love, Your Valentine".

Bivugwa ko Valentin yaba yaritabye Imana ahagana mu mwaka wa 270 w'igihe cyacu. Mu kwizihiza igikorwa cy'ubutwari yakoze, umunsi wa Saint Valentin watangiye kwizihizwa ahagana mu mwaka wa 1806, aho abakundana batangiye kujya bohererezanya indabo no kwizihiza umunsi bise uwa Saint Valentin. Hari n'ibindi byagiye bivugwa ku nkomoko z'uyu munsi, ndetse hari na benshi bavuga ko uyu munsi ufite inkomoko ku mihango ya gipagani, bagaherako bahamya ko kubera iyi mpamvu, ngo Abakristo ntibakwiriye kuwizihiza.

Uko byaba bimeze kose, n'inkomoko yawo uko yaba imeze kose, reka twigarukire kuri iki kibazo: Ese Abakristo bemerewe kuwizihiza?

Icya mbere dukwiriye kumenya, ni uko uyu munsi wa Saint Valentin ntaho uhuriye n'Ubukristo uko buvugwa muri Bibiliya. Umukristo uyoborwa n'Ijambo ry'Imana ntakwiriye gutegereza umunsi umwe mu mwaka ngo agire uwo yereka urukundo. Iki kibazo gisa n'ikindi abantu bamwe bibaza niba umukristo agomba kwizihiza Noheli. Ntabwo Umukristo yizihiza Noheli nk'umunsi 1 mu mwaka, ahubwo Umukristo yizihiza Noheli azirikana igikorwa Imana yadukoreye cyo kuza ubwayo ikavukira mu bantu yambaye umubiri, ibingibi tubizirikana buri munsi wo kubaho kwacu.

Urukundo ni indangagaciro iri ku mwanya wa 1 mu ndangagaciro zigomba kuranga Umukristo, ndetse Bibiliya ihamya idaca ku ruhande ko ibyo wakora byose udafite urukundo ntacyo byaba bimaze. 1 Abakorinto 13:1-3 "Nubwo navuga indimi z’abantu n’iz’abamarayika, ariko singire urukundo, mba mpindutse nk’umuringa uvuga cyangwa icyuma kirenga. [2]Kandi nubwo nagira impano yo guhanura, nkamenya ibihishwe byose n’ubwenge bwose, kandi nubwo nagira kwizera kose nkabasha gukuraho imisozi, ariko singire urukundo nta cyo mba ndi cyo. [3]Kandi nubwo natanga ibyanjye byose ngo ngaburire abakene, ndetse nkitanga ubwanjye ngo ntwikwe ariko singire urukundo, nta cyo byamarira.

Mu isezerano rya cyera, Abisirayeli bahawe amategeko menshi, abasesenguzi basanga muri Bibiliya Yera amategeko arenga 600, ariko Yesu amaze kuza, amategeko yose yarayafashe ayabumbira mu itegeko rimwe: Itegeko ry'urukundo. (Abagalatiya 5:14)

Bibiliya ubwayo yose aho iva ikagera, ntabwo yandikiwe kutumara amatsiko, ahubwo yandikiwe kutwereka umugambi mwiza w'urukundo Imana ifitiye umuntu. Ntabwo ushobora gufata indangagaciro nk'iyi ngo uburemere bwayo uburangirize mu munsi umwe. Umukristo uyoborwa n'Umwuka Wera, arangwa n'urukundo buri kanya kose k'ubuzima bwe. Yerekana urukundo aho ari hose, ntabwo agomba gutegereza umunsi wa Saint Valentin ngo yerekane urukundo.

Ku byerekeranye n'abizihiza uyu munsi kandi ari Abakristo, ntitwemerewe guca imanza izo ari zo zose kuko Bibiliya irabitubuza, gusa Bibiliya itwemerera kuburira abantu: Nk'uko twabivuze, inkomoko z'uyu munsi ntizizwi neza, bityo rero, ibintu bitazwi neza dusaba Abakristo kubigiraho amakenga, bakareka kumira bunguri buri cyose kije. Turi mu bihe bigoye aho satani akoresha uburiganya n'uburyarya buhishe mu bintu bisa n'aho ntacyo bitwaye: Ibyo ari byo byose, kuwizihiza nta cyo binyungura no kutawizihiza ntacyo bimpombya. Byose turabyemererwa, nyamara ibitugira umumaro si byose. 1 Abakorinto 6:12 "Byose ndabyemererwa, nyamara ibingirira akamaro si byose. Byose ndabyemererwa ariko sinzategekwa n’ikintu cyose.".

Ibintu nk'ibyo bidafite icyo bitwunguye, ntitugafate risk z'uko byadushyira mu kaga ako ariko kose. Nta mpamvu.

Icyemezo cyo kwizihiza cyangwa kutizihiza saint Valentin ni icyemezo buri wese yakagombye gushingira kuri uyu murongo no ku bibazo bitatu: 1 Abakorinto 10:31 "Namwe iyo murya cyangwa munywa cyangwa mukora ikindi kintu cyose, mujye mukorera byose guhimbaza Imana. [32]Ntimukabere Abayuda ikigusha, cyangwa Abagiriki cyangwa Itorero ry’Imana, [33]nk’uko nanjye nezeza bose muri byose, sinishakira ikinyungura ubwanjye, keretse icyungura benshi kugira ngo bakizwe.

Ibibazo bitatu buri wese akwiriye kwibaza mbere yo gufata umwanzuro wo kwizihiza Saint Valentin:

1: Ese birahimbaza Imana?

2: Ese nta muntu bibera ikigusha?

3: Ese urishakira ibikunezeza gusa? Cyangwa ugamije gukora ibyungura benshi?

Ibisigaye, tuyoborwe n'Umwuka Wera, ni bwo tuzanezeza Imana

Murakoze, Uwiteka akomeze atwiyoborere

Ev. Innocent M.

Answered: SPECIAL: Sobanukirwa na buri wese mu ntumwa za Yesu: TOMASI

Thu, 06 Feb 2025 17:43:52 +0000

Tomasi yari umwe mu ntumwa 12 za Yesu, Ubutumwa bwiza bwa Yohana bukaba bunagaragaza ko uyu Tomasi yanitwaga Didumo. (Yohana 11:16; 20:24; 21:2). Kimwe n'izindi ntumwa, Tomasi yari Umunyagalelaya.

Tomasi ntavugwaho byinshi muri Bibiliya, gusa bikeya avugwaho agaragara nk'umugabo utarapfaga kwemera atabonye, akaba yari mwene ba bantu bitega ibibi gusa (Pessimistic), ariko ku rundi ruhande agaragara nk'umuntu wari uzi gufata imyanzuro ihamye no kwiyemeza.

Nk'urugero, ubwo Yesu yari abwiye abigishwa be ko Lazaro atapfuye, ndetse akabamenyesha ko agiye mu rugo kwa Lazaro, Tomasi yahise abwira abandi bigishwa ati: "Natwe tugende dupfane na we". (Yohana 11:14-16 "Yesu ni ko kuberurira ati “Lazaro yarapfuye. [15]Nanjye nezerewe ku bwanyu kuko ntari mpari, kugira ngo noneho mwizere. Nimuze tujye aho ari.” [16]Toma witwaga Didumo abwira abigishwa bagenzi be ati “Natwe tugende dupfane na we.”

==> Kuba Tomasi yaravugaga ati "Tugende dupfane na we", bamwe bavuga ko Tomasi yavugaga ngo bagende bapfane na Lazaro, ariko hari n'abavuga ko Tomasi yabwiraga izindi ntumwa ati "Tugende dupfane na Yesu". Muri macye, Tomasi yaba yari yarangije kwakira ko Yesu najya kwa Lazaro, abanzi be bari bumwicireyo! Ariko basi akavuga ati "Kumwica ko bari bumwice, so dupfe kujyana na we na twe dupfane na we!"

==> Ahandi, Tomasi agaragara nk'umuntu utarapfaga gusobanukirwa n'inyigisho zijimije za Yesu, ariko kandi ntiyemere kugendana ipfunwe ahubwo akabaza: Yohana14:3-5 "Kandi ubwo ngiye kubategurira ahanyu, nzagaruka mbajyane iwanjye, ngo aho ndi namwe muzabeyo. [4]Kandi aho njya, inzira murayizi.” [5]Toma aramubwira ati “Databuja, ntituzi aho ujya, inzira twayibwirwa n’iki?”

==>Ariko cyane cyane, Tomasi azwi nk'Umwemeragato", kuko ntiyajyaga apfa kwemera ibyo atiboneye n'amaso ye. Ibi ahanini yabigaragaje ubwo bamubwiraga ko Yesu yazutse, na we ati "Nintamwibonera sindi bubyemere!" Yohana 20:24-25 "Ariko Toma umwe muri abo cumi na babiri witwaga Didumo, ntiyari kumwe na bo ubwo Yesu yazaga. [25]Ni cyo cyatumye abandi bigishwa bamubwira bati “Tubonye Umwami!” Na we arabasubiza ati “Nintabona inkovu z’imbereri mu biganza bye ngo nzishyiremo urutoki rwanjye, sinshyire n’ikiganza cyanjye mu rubavu rwe sinzemera.”

Gusa Yesu mu bugwaneza bwe, ntiyigeze aciraho iteka Tomasi kubera kutizera kwe, ahubwo byabaye ngombwa ko agaruka kwiyereka intumwa ze na Tomasi noneho ahari, aha rwose Tomasi yahise yizera, ndetse yatura ijambo rikomeye rinagize inkingi y'ukwizera kwacu: Yesu ni Umwami kandi ni Imana. Yego yabaye uwa nyumwa mu kwizera ko Yesu yazutse, ariko yabaye uwa mbere mu kwatura ibyo tugomba kwatura uyu munsi kugirango dukizwe! Yohana 20:27-29 "Maze abwira Toma ati “Zana hano urutoki rwawe urebe ibiganza byanjye, kandi uzane n’ikiganza cyawe ugishyire mu rubavu rwanjye, kandi we kuba utizera ahubwo ube uwizeye.” [28]Toma aramusubiza ati “Mwami wanjye! Kandi Mana yanjye!” [29]Yesu aramubwira ati “Wijejwe n’uko umbonye, hahirwa abizeye batambonye.”

==> Abahanga mu gusesengura amazina, bavuga ko izina rya kabiri rya Tomasi ari ryo "Didumo" ngo risobanura mu cyongereza "Twin" cyangwa "Jumeau" mu gifaransa. Si uko Tomasi yagiraga impanga ye bavaga indimwe, ahubwo ngo muri we hari harimo abantu babibiri batandukanye: Umwizera utizera! Ibi ni ibintu bibiri ubusanzwe bihabanye bitakagombye kuba mu muntu umwe, ariko biratangaje kuko n'uyu munsi mu Itorero rya Kristo harimo Abizera benshi batizera. Imana itubabarire kandi idufashe, kuko ntibishoboka ko twayinezeza tudafite kwizera. Abaheburayo 11:6 "Ariko utizera ntibishoboka ko ayinezeza, kuko uwegera Imana akwiriye kwizera yuko iriho, ikagororera abayishaka.

Bibiliya ntitinda ku mateka ya Tomasi nyuma ya Yesu, gusa amateka yo hanze ya Bibiliya avuga ko nyuma ya Yesu, Tomasi yaba yarakomeje umurimo w'ivugabutumwa cyane cyane mu bice byiganjemo Ubuhinde bw'ubu, ari naho yiciwe ahowe ubutumwa bwiza.

Imana yacu idufashe kwigira kuri aba batubanjirije. AMEN

Answered: SPECIAL: Sobanukirwa na buri wese mu ntumwa za Yesu: MATAYO

Sun, 02 Feb 2025 10:02:28 +0000

NOTE: Iri zina "Matayo" rijya rinandikwa mu buryo butandukanye muri za versions za Bibiliya zitandukanye. Ubusanzwe rikomoka ku izina ry'ikigereki "Matthaios" rikaba risobanura "Impano ya JHVH". Muri za versions zitandukanye iri zina ryagiye ryandikwa bitandukanye, hari aho usanga bandika "Matthias, cyangwa Mattathias".

Matayo yari intumwa ya Yesu, akaba n'umwe muri babiri banditse amavanjili kandi bari n'intumwa za Yesu, we na Yohana mwene Zebedayo kuko Luka na Mariko bo ntibari mu ntumwa za Yesu. Matayo yakomokaga i Galilaya, akaba yarahamagawe akorera akazi i Kaperinawumu. Matayo we ubwe, mu ivanjili yanditse, avuga ko mbere yo gukamagarwa na Yesu yari asanzwe ari umwakirizi w'imisoro (Umukoresha w'ikoro). Matayo 9:9 "Yesu avayo, akigenda abona umuntu witwaga Matayo yicaye aho yakoresherezaga ikoro, aramubwira ati “Nkurikira.” Arahaguruka, aramukurikira.. Abandi banditsi b'amavanjili Mariko na Luka, bo banagaragaza ko uyu Matayo yanitwaga "LEVI" (Mariko 2:14, Luka 5:29). Mariko we anongeraho ko uyu Levi yari mwene Alufayo. Mariko 2:14 "Nuko akigenda abona Lewi mwene Alufayo yicaye aho yakoresherezaga ikoro, aramubwira ati “Nkurikira.”

Nk'uko Bibiliya ibigaragaza, Matayo yari yibereye ku kazi ke ko kwakira imisoro ubwo Yesu yamuhamagaraga. Matayo yahise asiga byose nta kindi yitayeho, ahita akurikira Yesu, n'ubwo aka kazi ubusanzwe kari akazi kubashywe, byongeyeho ko Matayo yagakoreraga i Kaperinawumu, umujyi wari wubashywe icyo gihe kuko wari ku nkombe z'ikiyaga cy'i Galilaya, ahahuriraga ubucuruzi bwaturukaga mu mijyi ikomeye n'ibihugu bikomeye.

Muri icyo gihe, abasoresha ntibakundwaga na benewabo b'Abayuda, kuko abakoraga aka kazi byabasabaga kenshi guhura n'Abaroma basuzugurwaga kandi bakanenwa n'Abayuda. Imbere y'Abayuda, Abaroma bagaragara n'abanduye, ku buryo n'ababakoreraga akazi na bo bafatwa nk'abanduye kabone n'ubwo baba Abayuda, gusa icyo ntikijya gihagarika Yesu, n'iyo abandi bakubona nk'uwanduye We si ko akubona, ntarobanura ku butoni. mu mahanga yose ukora ibyo gukiranuka iramwemera. (Ibyakozwe n'Intumwa 10:34-35 Petero aterura amagambo ati “Ni ukuri menye yuko Imana itarobanura ku butoni, [35]ahubwo mu mahanga yose uyubaha agakora ibyo gukiranuka iramwemera.

Matayo amaze guhamagarwa, yatumiye Yesu amujyana iwe, amutekeshereza ibyokurya barasangira, yari yanatumiye abandi basoresha bagenze be benshi, icyo gikorwa cyatumye Abafarisayo bitotomba, bibaza impamvu Yesu asangira n'abanyabyaha. Aha ni ho Yesu yabasubirije ati "Abazima si bo bakwiriye umuvuzi, keretse abarwayi". (Luka 5:27-32)

Nyuma y'uyu munsi mukuru yateguriye Yesu agihamagarwa, Matayo ntiyongera kuvugwa, avugwa gusa mu yandi mavanjili mu mazina y'intumwa, ariko mu mavanjili yose uko ari ane nta handi hagaragara Matayo agira icyo avuga cyangwa agira icyo akora.

Mu ntumwa zose 12, Matayo ni we wenyine ugaragazwa n'ibyanditswe byera nk'umukozi wa Leta y'icyo gihe. (Leta y'Abaroma).

UMWIHARIKO: Igitabo cya Matayo, kigaragaza mu buryo budasubirwaho ukuntu Umwuka yahumekaga ibyanditswe byera dusoma uyu munsi: Ntabwo yaguhagararaga hejuru ngo akwereke aho ushyira akadomo n'akitso, ahubwo yaguhaga igitekerezo-rusange by'ibyo wandika, ubundi ukandika muri style yawe. Gihamya: Mu banditsi b'amavanili uko ari 4, Matayo ni we wenyine uvuga ko Yuda yishyuwe ibice by'ifeza 30 kugirango agambanire Yesu. Abandi banditsi vavuga ko Yuda yahawe ibiguzi, ariko ntibavuge umubare wabyo. Ariko Matayo, (nk'umuntu wari usanzwe ukora mu mafaraga), ntiyari kureka kuvuga umubare w'ibi biguzi! Ni kimwe n'uko Luka (N'ubwo atari mu ntumwa za Yesu) ni we wenyine uvuga ko igihe Yesu yari muri Getsemane abasirikare bakaza kumufata, Petero yaciye umuntu ugutwi, Yesu ahita agusubizaho. Luka ni we wenyine uvuga ko Yesu yahise agusubizaho. Abandi banditsi b'Amavanjili bavuga ko Petero yaciye umuntu ugutwi bakarekera aho, ibindi ntibabyitayeho, ariko kuko Luka yari umuganga, ntiyari kureka kwandika aka kantu kajyanye n'ubuvuzi!

Bibiliya ntivuga iby'amaherezo ya Matayo, gusa ibitabo by'amateka hanze ya Bibiliya bivuga ko nyuma ya Yesu, Matayo yaba yarakomeje umurimo w'ivugabutumwa mu bice bitandukanye, ngo yaba yarageze i Burayi muri za Espagne no muri Africa muri za Ethiopia, aha binavugwa ko ari ho yaba yariciwe azira ubutumwa bwiza.

Imana ikomeze idufashe kwigira kuri aba batubanjirije

Answered: SPECIAL: Sobanukirwa na buri wese mu ntumwa za Yesu: YAKOBO mwene Zebedayo

Thu, 30 Jan 2025 18:30:54 +0000

Muri Bibiliya Yera, Isezerano rishya, dusangamo abantu nibura bane bitwaga izina YAKOBO. Iri ni izina ryitwagwa n'abantu benshi mu gihe cya Yesu, gusa Yakobo tugiye kuvuga hano ni mwene Zebedayo, akaba yaravaga inda imwe na Yohana Intumwa.

Mu ntumwa za Yesu dusangamo ba Yakobo babiri. Hari uyu Yakobo mwene Zebedayo, hakaba n'undi Yakobo mwene Alufayo. Kugirango babashe kubatandukanya, abasesenguzi benshi bita Yakobo mwene Zebedayo "Yakobo Mukuru", naho Yakobo mwene Alufayo bakamwita "Yakobo Muto"

Bibiliya ntitinda ku mateka asanzwe y'Intumwa Yakobo, bikeya imuvugaho yerekana ko yari Mwene Zebedayo na nyina witwaga Salome. Bakomokaga i Galilaya, ubwo yahamagarwa bakaba bari batuye i Kaperinawumu. Bibiliya igaragaza ko Zebedayo yakoraga umwuga w'uburobyi afatanije n'abahungu be Yakobo na Yohana, ndetse bakaba bari bafite n'abandi bakozi. (Mariko 1:20 "Uwo mwanya arabahamagara, basiga se Zebedayo mu bwato hamwe n’abakozi be, baramukurikira." Ibi bigaragaza ko umuryango wa Yakobo utari ukennye. Ntabwo bizwi neza uwari mukuru ari inde hagati ya Yohana na Yakobo, ariko kubera ko akenshi Yakobo ari we uvugwa mbere, birashoboka ko yaba ari we wari mukuru

Salome (Nyina wa Yakobo na Yohana), avugwa mu bagore bakurikiraga Yesu bakamukorera (Matayo 27:66 ; Luka 8:8). Uyu mugore Salome yari umugore w'ishyaka, dore ko ari muri bacyeya bajyanye na yesu kugera i Gologota ku musaraba, ndetse nta n'uwakwirengagiza uburyo yigeze kwisabira Yesu ko nagera mu bwami bwe, ngo azashyire abahungu be (Yohana na Yakobo) umwe iburyo bwe undi i bumoso (Matayo 20:20-28). Icyo gihe Yesu yaramusubije ati "Ntimuzi icyo musaba". Abasesenguzi benshi bahamya ko Yesu yavuze atyo, kuko Salome yari asabiye umwana umwe kuzicara ibumoso, mu gihe mu mvugo y'Ijuru ibumoso hazajya abarimbuka, iburyo hakajya ab'ubugingo buhoraho. Gusa Imana ijya idufasha kugorora amasengesho yacu. kuko burya mu by'ukuri ntituzi uko dukwiriye gusenga bya nyabyo wa mugani w'Intumwa za Yesu.

BOWANERIGE: ABANA B'INKUBA:

Aba bene Zebedayo, Yohana na Yakobo, na bo ubwabo bigaragara nk'abari bafite ishyaka ritwika kimwe n'irya nyina: Igihe kimwe Yesu yari avuye i Galilaya yerekeje i Yerusalemu, asaba icumbi i Samariya ariko ab'i Samariya bararimwima. Yakobo na Yohana kubyakira byArabagoye, basaba Yesu ko yabemerera bagategeka umuriro ngo uve mu Ijuru urimbure ab'i Samariya. Birumvikana ko Yesu atabibemereye, kuko impuwe ze n'imbabazi ze birenze kure imyumvire ya bene Zebedayo! Dore uko Bibiliya ibivuga: Luka 9:51-55 "Nuko iminsi ye yo kuzamurwa mu ijuru yenda gusohora, agambirira kujya i Yerusalemu abikomeje cyane. [52]Atuma integuza imbere ye, ziragenda zijya mu kirorero cy’Abasamariya kumuteguriza. [53]Ariko ntibamwakira kuko yari yerekeye i Yerusalemu. [54]Abigishwa be, Yakobo na Yohana, babibonye baramubaza bati “Databuja, urashaka ko dutegeka umuriro ngo uve mu ijuru, ubarimbure nk’uko Eliya yabikoze?” [55]Ariko arahindukira arabacyaha ati “Ntimuzi umwuka ubarimo uwo ari wo, kuko Umwana w’umuntu ataje kurimbura abantu, ahubwo yaje kubakiza.”

Ni ngombwa cyane gutandukanya uyu Yakobo mwene Zebedayo na Yakobo wavaga inda imwe na Yesu, uyu muvandimwe wa yesu akaba ari na we wanditse urwandiko rwa Yakobo tubona muri Bibiliya, ariko uyu Yakobo mwene Zebedayo we nta gitabo kizwi yaba yaranditse muri Bibiliya. Ndetse uretse no kwandika igitabo icyo aricyo cyose, uyu Yakobo ntakunze kugaragarara agira icyo avuga muri Bibiliya wenyine, mu ncuro zose yagiye agaragara agira icyo avuga, avugirwa icyarimwe na mwene se Yohana.

URUPFU RWA YAKOBO

Mu ntumwa 12 za Yesu, Bibiliya ivuga impfu z'intumwa ebyiri gusa: Yuda na Yakobo mwene Zebedayo. Mu gitabo cy'ibyakozwe n'intumwa, Bibiliya ivuga itya ibyerekeye urupfu rwa Yakobo mwene Zebedayo: Ibyakozwe 12:1-2 "Nuko muri icyo gihe Umwami Herode afatira abo mu Itorero bamwe kubagirira nabi. [2]Yicisha Yakobo inkota, mwene se wa Yohana."

Nta rujijo ruhari, Yakobo mwene se wa Yohana yapfuye yicishijwe inkota ku itegeko rya Herode. Bivugwa ko hari ahagana mu myaka ya 42-44 nyuma ya Yesu, ndetse uyu Yohana ni uwa mbere mu bishwe bahowe ubutumwa bwiza.

Imana idufashe kwigira ku mibereho y'aba batubanjirije.

Imana ibahe umugisha

Answered: SPECIAL: Sobanukirwa na buri wese mu ntumwa za Yesu: YOHANA

Tue, 28 Jan 2025 17:53:41 +0000

Muri Bibiliya Yera hagaragaramo ba Yohana batandukanye bagera kuri batanu, uyu Yohana tugiye kuvuga hano ni intumwa ya Yesu, akaba yaravukanaga n'indi ntumwa ya Yesu yitwaga Yakobo.

Bibiliya ntitinda ku mateka asanzwe y'Intumwa Yohana, bikeya imuvugaho yerekana ko yari Mwene Zebedayo na nyina witwaga Salome. Bakomokaga i Galilaya, ubwo yahamagarwa bakaba bari batuye i Kaperinawumu. Bibiliya igaragaza ko Zebedayo yakoraga umwuga w'uburobyi afatanije n'abahungu be Yohana na yakobo, ndetse bakaba bari bafite n'abandi bakozi. (Mariko 1:20 "Uwo mwanya arabahamagara, basiga se Zebedayo mu bwato hamwe n’abakozi be, baramukurikira." Ibi bigaragaza ko umuryango wa Yohana utari ukennye. Ntabwo bizwi neza uwari mukuru ari inde hagati ya Yohana na Yakobo, ariko kubera ko akenshi Yakobo ari we uvugwa mbere, birashoboka ko yaba ari we wari mukuru

Salome (Nyina wa Yohana), avugwa mu bagore bakurikiraga Yesu bakamukorera (Matayo 27:66 ; Luka 8:8). Salome nyina wa Yohana yari umugore w'ishyaka, dore ko ari muri bacyeya bajyanye na yesu kugera i Gologota ku musaraba, ndetse nta n'uwakwirengagiza uburyo yigeze kwisabira Yesu ko nagera mu bwami bwe, ngo azashyire abahungu be (Yohana na yakobo) umwe iburyo bwe undi i bumoso (Matayo 20:20-28). Icyo gihe Yesu yaramusubije ati "Ntimuzi icyo musaba". Abasesenguzi benshi bahamya ko Yesu yavuze atyo, kuko Salome yari asabiye umwana umwe kuzicara ibumoso, mu gihe mu mvugo y'Ijuru ibumoso hazajya abarimbuka, iburyo hakajya ab'ubugingo buhoraho. Gusa Imana ijya idufasha kugorora amasengesho yacu. kuko burya mu by'ukuri ntituzi uko dukwiriye gusenga bya nyabyo wa mugani w'Intumwa za Yesu.

BOWANERIGE: ABANA B'INKUBA:

UMWIGISHWA YESU YAKUNDAGA

Ubusanzwe, Yesu yagiraga abandi bigishwa 70 (Luka 10:1). Muri aba, yatoranyijemo n'abandi 12 yise "Intumwa" (Luka 6:13). Muri aba 12, yagiragamo abandi batatu yakundaga kujyana mu bihe by'umwihariko. Abo ni Yohana na Yakobo na Petero. Ndetse no muri aba batatu, yagiragamo umwe yakundaga cyane, uwo nta wundi ni Yohana. Ni byo: Ubutumwa bwiza bwa Yohana buvuga nibura incuro 5 iby'uyu mwigishwa Yesu yakundaga. (Yohana 13:23; 19:26; 20:2; 21:7; 21:20-25). Ubusanzwe, Yohana ntakunze kugaragara agira icyo avuga mu mavanjili. kuri iki atandukanye cyane na Petero ugaragara avuga cyane, mu gihe Yohana we muri bibiliya yose agaragara avuga incuro nkeya cyane (Aho avuga wenyine), nk'urugero, aho yavugaga ati: Luka 9:49-50 "Yohana aramusubiza ati “Databuja, twabonye umuntu wirukana abadayimoni mu izina ryawe turamubuza kuko atadukurikira.” [50]Yesu aramubwira ati “Ntimumubuze kuko utari umwanzi wanyu aba ari mu ruhande rwanyu.” Ahandi aho Yohana avuga, avugirwa icyarimwe na mwene se Yakobo cyangwa na nyina Salome. Nubwo Yohana atavuga cyane muri Bibiliya, yari afite icyamurangaga gitandukanye n'iby'izindi ntumwa: Iyo Yesu yabaga yicaranye n'intumwa ze, Yohana yabaga aryamye mu gituza cya Yesu! Uyu ni umutima w'urukundo no kuramya, ibintu Imana yishimira cyane. (Yohana 13:23, 25)

YOHANA, MU GIHE ABANDI BIGISHWA BATATANYE

Mu bihe bikomeye, ubwo Yesu yafatwaga, agacirwa urubanza, akabambwa ku musaraba, izindi ntumwa zose zakijije amagara yazo, ziratatana buri wese aca ukwe nk'uko byari byarahanuwe. Matayo 26:31 Maze Yesu arababwira ati “Mwebwe mwese iri joro ibyanjye birabahemuza, kuko byanditswe ngo ‘Nzakubita umwungeri, umukumbi w’intama usandare.’ Mu ntumwa zose za Yesu, Yohana ni we wenyine wabashije kugendana na Yesu kugera i Gologota ku musaraba. Abandi bose ntawe uzi aho bari baherereye. Aha ku musaraba, ni ho Yesu yahereye Yohana inshingano zo kwita kuri nyina Mariya, ubwo yamubwiragati "Nguyu nyoko". (Yohana 19:27). Bibiliya ivuga ko uhereye uwo mwanya, "Yohana yahise ajyana Mariya iwe" [ajya kumwitaho]. [Twivugire gusa dutambuka ko n'ubwo Yohana yajyanye Mariya iwe, nta na hamwe Bibiliya ivuga ko abigishwa bigeze bambaza Mariya cyangwa ngo bamusabe kubavuganira kuri Yesu]

YOHANA NYUMA YA YESU

Yesu amaze gusubira mu Ijuru, igitabo cy'ibyakozwe n'intumwa kigaragaza cyane cyane Petero na Pawulo ku murimo. Gusa, Yohana na we agenda agaragara ari kumwe na Petero:

- Yohana yari kumwe na Petero ubwo bakirizaga ikirema ku muryango w'urusengero (Ibyakozwe 3)

- Yohana yari kumwe na Petero ubwo bafatwaga bagafungwa (Ibyakozwe 4)

- Izindi ncuro nyinshi, Yohana agenda agaragarana na petero mu gitabo cy'ibyakozwe n'intumwa.

AMAHEREZO YA YOHANA

Kimwe n'izindi ntumwa, Bibiliya ntitinda ku buryo intumwa zapfuye. Gusa bicye ivuga, ivuga ko Yakobo mwene se wa Yohana yicishijwe inkota na Herode. (Ibyakozwe 12). Ubusanzwe, Yesu yari yarahanuriye Yohana ko "azagumaho kugeza ubwo azazira (Yohana 21:22). Ubu buhanuzi, ababwumvise babusobanuye nabi ko Yohana ngo atazapfa, (Yohana 21:23) ariko si cyo Yesu yashakaga kuvuga. Nyuma y'urupfu rwa Yakobo, (Ubwo hari ahagana mu mwaka wa 44 nyuma ya Yesu), na nyuma y'itotezwa rikomeye ry'abizera ryabaye mu kinyejana cya mbere, amateka yo hanze ya Bibiliya avuga ko Yohana yaba yarerekeje muri Efeso aho yakomeje gukora umuriko w'ivugabutumwa kugeza mu busaza bwe, ku myaka ikabakaba 100. Itotezwa ntiryarangiriye aho: Bibiliya ivuga ko Yohana yajugunywe ku kirwa cya Patmos azira ubutumwa bwiza. Abamujugunyeho bibwiraga ko ari bupfireyo, ariko yagezeyo Ijuru rirakinguka, abona Yesu mu cyubahiro cye cyose, ndetse ni yo yandikiye igitabo cy'IBYAHISHUWE. Iri ni isomo rikomeye: Abantu bashobora kukujugunya bazi ko ibyawe birangiye, ariko bikaba aribwo bitangiye! AMEN.

Twarangiza tuvuga ko uyu Yohana ari we wanditse ibitabo bikurikira muri Bibiliya:

- Ubutumwa bwiza uko bwanditswe na Yohana

- Urwandio rwa 1 rwa Yohana

- Urwandiko rwa 2 rwa Yohana

- Urwandiko rwa 3 rwa Yohana

- Ibyahishuwe

NGUWO YOHANA, UMWIGISHWA YESU YAKUNDAGA CYANE. Imana idufashe, kugirango ubuzima bw'aba batubanjirije bubere inyigisho zo gutunganya imibereho yacu. AMEN.

Answered: SPECIAL: Sobanukirwa na buri wese mu ntumwa za Yesu: ANDEREYA

Thu, 23 Jan 2025 18:18:30 +0000

Andereya ni umwe mu ntumwa 12 za Yesu. Yavaga inda imwe na Petero, bombi bakaba bari bene Yona, bakaba barakomokaga i Betsayida hafi y'ikiyaga cya Genezareti, ariko ubwo Yesu yabahamagaraga bari batuye i Kaperinawumu aho bari batunzwe n'umwuga w'uburobyi mu kiyaga cya Genezareti.

Iyo witegereje neza uko Luka avuga mu gice cya 5 umurongo wa 9, usanga bishoboka cyane ko Andereye na Petero bafatanyaga uyu mwuga n'abandi bavandimwe babiri na bo baje kuba intumwa za Yesu. Abo ni Yakobo na Yohana bene Zebedayo. Luka abivuga atya: Luka 5:8-10 Simoni Petero ngo abibone atyo yikubita imbere ya Yesu ati “Va aho ndi Databuja, kuko ndi umunyabyaha!” [9]Kuko ubwe yari yumiwe n’abari kumwe na we bose babonye izo fi bafashe, [10]na Yakobo na Yohana bene Zebedayo bari bafatanije na Simoni na bo birabatangaza. Yesu abwira Simoni ati “Witinya, uhereye none uzajya uroba abantu.” [11]Bamaze kugeza amato yabo ku nkombe, basiga byose baramukurikira.

Mbere yo guhamagarwa, Andereya yari yarumvise inyigirho za Yohana Umubatiza, ndetse yari umwigishwa wa Yohana umubatiza. (Yohana 1:35, 40) Yohana Umubatiza ubwe ni we wabonye Yesu, abwira Andereya ati "Dore uwo mukwiye gukurikira". Uhereye ubwo, Andereya yahise ajya kuri Yesu areka Yohana Umubatiza kuko yiringiraga ko ashobora kuhabona inyigisho nshya.

Ukurikije ibivugwa muri Yohana 1:41, Andereya akimara kubona Yesu, yahise ajya kubwira umuvandimwe we Petero ati "Twabonye Messiya". Yohana 1:40-42 "Andereya mwene se wa Simoni Petero, yari umwe muri abo babiri bumvise Yohana bagakurikira Yesu. [41]Abanza kubona mwene se Simoni aramubwira ati “Twabonye Mesiya” (risobanurwa ngo: Kristo). [42]Amuzanira Yesu, na we aramwitegereza aramubwira ati “Uri Simoni mwene Yona, uzitwa Kefa.” (Risobanurwa ngo: ibuye)." Ibi ni byo bituma Andereya afatwa na benshi nk'umuvugabutumwa wa mbere wazanye umuntu kuri Yesu.

Uretse kuba yarazanye mwene se Petero kuri Yesu, Andereya ntakunze kuvugwa cyane mu mavanjili, gusa incuro nkeya avugwa, agaragara nibura incuro 2 azana abantu kuri Yesu: Nyuma yo kuzana Petero, Andereya yongera kugaragara azana umuhungu wari ufite imigati itanu n'ifi ebyiri, Yesu arabitubura ahaza abantu barenga 5,000. (Yohana 6:8). Andereya yongera kugaragara nanone avuganira kuri Yesu Abagiriki bifuzaga kureba Yesu (Yohana 12:20-22).

IBYO TWAMWIGIRAHO:

Izo ni zo nshuro Andereya agaragara mu mavanjili: Guhamagarwa, Kuzana abantu kuri Yesu. Andereya n'ubwo atavugwa cyane mu mavanjili, ariko kuri bicye avugwaho agaragara nk'umuntu utari ushishikajwe no kwigaragagaza cyane, ahubwo yari ashishikajwe no kuzana kuri Yesu abo yashoboraga kubwira bose.

AMAHEREZO YE:

Bibiliya ntivuga iby'amaherezo ya Andereya. Amateka yo hanze ya Bibiriya avuga ko nyuma y'aho Yesu asubiriye mu Ijuru, Andereya yaba yarakomeje kuvuga ubutumwa bwiza mu bice byitwa Scythes, (ariho umuntu yagenekereza ko ari Uburusiya bw'ubu), nyuma aza kurangiriza ivugabutumwa rye mu Bugiriki, aho yaba yarishwe abambwe ku musararaba ahitwa Patras, ngo yaba yaramaze ku musaraba iminsi 2 ahorogoma akomeza no kubwiriza ubutumwa bwiza ababaga baje kumushungera.

Iby'aba bakozi b'Imana batubanjirije bijye bitwigisha.

Imana Ibahe umugisha.

Answered: SPECIAL: Sobanukirwa na buri wese mu ntumwa za Yesu: PETERO

Sun, 22 Dec 2024 12:26:17 +0000

Petero ntiyavutse yitwa Petero. Iri ni izina yahawe na Yesu akimara kumuhamagara, ariko ababyeyi be bamwise Simoni.

1) KAVUKIRE
Simoni-Petero yavutse ku mubyeyi witwa Yona. (Yona ni kimwe na Yonasi, hari n'abavuga ko ari kimwe na Yohana). Mu ntumwa za Yesu, Petero yavukanaga n'indi ntumwa yitwaga Andereya, bombi bakaba bari bene Yona, bakaba baravukiye ahitwaga i Betsayida (Yohana 1:44), umujyi muto mu majyaruguru y'ikiyaga cya Tiberiyade, mu ntara ya Galilaya. Petero na Andereya mwene se bakuze ari abarobyi.

2) GUHAMAGARWA
Petero na Andereya mwene se bari abarobyi, Yesu akaba yarabahamagaye barakoraga umwuga w'uburobyi, bakaba bari batuye icyo gihe i Kaperinawumu (Mariko 1:21, 29). Icyo gihe Petero yabanaga na Andereya mwene se, na nyirabukwe. (Kuko Petero yari afite umugore (Mariko 1:30, 1 Abakorinto 9:5). Ibyanditswe byera bigaragaza ko Petero yaje kuri Yesu atumiwe na Andereya mwene se. Byagenze gutya: Yohana 1:40-42 "Andereya mwene se wa Simoni Petero, yari umwe muri abo babiri bumvise Yohana bagakurikira Yesu. [41]Abanza kubona mwene se Simoni aramubwira ati “Twabonye Mesiya” (risobanurwa ngo: Kristo). [42]Amuzanira Yesu, na we aramwitegereza aramubwira ati “Uri Simoni mwene Yona, uzitwa Kefa.” (Risobanurwa ngo: ibuye)." Nk'uko bigaragara muri ibi byanditswe, Yesu ubwe ni we wahinduriye Petero izina. Amuvana kuri Simoni yahawe n'ababebyeyi, amwita Petero. Abaseseseguzi b'ibisobanuro by'amazina bavuga ko "Simoni" bisobanura urubingo, "Petero" bigasobanura ibuye. Ibi na byo byari ubuhanuzi bukomeye ku muhamagaro wa Petero, kuko iyo witegereje kamere ya petero nk'uko tugiye kuyibona hasi, yari yoroshye nk'urubingo, ariko amaze kuzura Mwuka Wera yarakomeye nk'ibuye. Ibi rwose ni rya Jambo Imana yivugiye iti: Yesaya 42:3 "Urubingo rusadutse ntazaruvuna kandi n’urumuri rucumba ntazaruzimya, ahubwo azazana gukiranuka by’ukuri."

3) IMIBANIRE YE NA YESU N'ABANDI BIGISHWA MBERE YO KUZA KWA MWUKA WERA

Mbere yo kuzura Mwuka Wera, Petero agaragaza kamere nk'iy'abandi Bakristo bose bahuye na yesu ariko bakaba batarageze ku musaraba, bakaba bataruzuye Umwuka Wera ngo bahinduke rwose, bapfe kuri kamere babe ibyaremwe bishya. Muri group y'intumwa 12, Petero agaragara nk'uwashakaga gufata iya mbere buri gihe. Yarahubukaga cyane, yihutiraga gusubiza mbere y'abandi, ndetse yiyemeza ibyo atazashobora. Ingero ni nyinshi:

- Igihe Yesu yari mu kivunge cy'abantu bamubyiga, hari umugore wamukoze ku nshundura z'ikanzu, Yesu arabaza ati "Ninde unkozeho?". Abandi bose barahakana, uretse Petero, yahise abaza Yesu ati "Ni gute wabaza ugukozeho kandi ubona abantu bose bakubyiga? (Luka 8:45)

- Igihe Yesu yakarabyaga abigishwa be ibirenge, yakarabije abandi bose, ageze kuri Petero ashaka kwanga. Yesu arahatiriza, Petero ati "rero niba ri uko bimeze, ntabwo unyoza ibirenge gusa ahubwo ndakuramo imyenda unyuhagire! (Yohana 13:6-9)

- Petero yari yarumvise kenshi Yesu avuga ko azagambanirwa akicwa: Byateye Petero kujya agendana inkota ku itako, kuko yari yarimeje kuzarwanirira Yesu ntiyicwe, muri kwa kwiyemeza ahubutse yari yaramusezeranije ko uretse no kumurwanaho, ahubwo no muri gereza bazajyanamo, ndetse no mu rupfu! (Luka 22:31-33)

- Ibi Petero yongeye kubishimangira, abwira Yesu ko azamupfira! Yesu ni we waje aje gupfira Petero, ariko Petero we yari yiyimeje gupfira Yesu! (Yohana 13:36-38)

- Ahari gusezeranya Yesu ko azamurwanaho, ni byo byateye Petero guca ugutwi k'umuntu muri Getsemane mu bari baje gufata Yesu. Abahanga bavuga ko Petero yahushije, icyo yashakaga si ugutwi ahubwo ni ijosi! Ibi bigaragaza ukuntu Petero yari yiteguye kurwana intambara y'umubiri kurusha iy'Umwuka! (Yohana 18:10-11)

- Ikigaragaza ko Petero yiyemezaga ibyo atazashobora, ni ukuntu yahakanye agatsemba ko atazi Yesu, abwo Yesu yari ageze mu rubanza! (Matayo 26:74-75) (Ubundi abantu benshi bahamya ko icyaha Petero yakoze cyo kwihakana Yesu cyari cyibi kurusha icya Yuda wagambaniye Yesu. Itandukaniro gusa ni uko Petero akimara gucumura yarize akihana, Yuda we aho kwihana akiyahura)

- Petero urankunda? Petero yihakanye Yesu incuro 3. Byari ngombwa ko yatura izindi ncuro 3 ko akunda Yesu. Gusa Petero yababajwe no kuba Yesu amubaza izi ncuro 3 zose niba amukunda, ni cyo cyatumwe ku ncuro ya gatatu abwira yesu ati "Mwami, uzi byose, urabizi ko ngukunda!" (Yohana 21:15-17)

- Igihe Yesu yabazaga abigishwa abe ati "Abantu banyita nde"? Abandi bigishwa baracecetse, uretse Petero nk'uko byari bisanzwe, gusa kuri iyi ncuro yasubije neza, ku buryo igisubizo yatanze cyanatangaje Yesu aramubwira ati "Icyo gisubizo si icyawe, ahubwo ni ihishurirwa ugize rivuye mu Ijuru" (Matayo 16:15-17)

4) PETERO NYUMA YO KUZURA UMWUKA WERA

Ubwo Yesu yari hafi gusubira mu Ijuru, yasabye abigishwa be kutava i Yerusalemu kugeza igihe bazahererwa umufasha. Ni ko babigenje: Ku munsi wa 10 uhereye igihe Yesu yasubiriye mu Ijuru, ubwo ni kumsi wa 50 uhereye igihe yazukiye, habayeho Pentekote ya mbere, Umwuka Wera amanukira abigishwa ba Yesu. Mu bakiriye Umwuka Wera na Petero yari abarimo. Uhereye ako kanya, Petero yagaragaje impinduka atari yarigeze agira, uwahoze ari umunyabwoba ahinduka umunyembaraga, uwahoze atazi kuvuga ashira amanga, uwahoze ahubuka atangira kugendana n'ubwenge bwa Mwuka Wera: Ingero ni nyinshi:

- Ubundi basenganaga ubwoba bari mu cyumba cyo hejuru, ariko bakimara kwakira Mwuka Wera, Petero yakubise inzugi arasohoko, avuga ashize amanga ku buryo abababonye bavugaga ko basinze. Petero yahise akora igiterane cya mbere, arababwira ati "wa Yesu mwishe ni we ukoze ibi mureba", uwo munsi hakizwa abantu 3,000! (Ibyakozwe n'intumwa 2:40)

- ku muryango w'urusengero, Petero abwira ikirema ati "Ifeza n'izahabu nta byo dufite, ariko ibyo dufite turabiguha: Mu izina rya Yesu haguruka..." (Ibyakozwe n'intumwa 3:6-7)

- Ananiya n'umugore we Safira bashatse kubeshya Petero barabizira (Ubanza baribwiraga ko ari Petero wa cyera) (Ibyakozwe n'intumwa 5:3)

- Petero yazuye n'uwapfuye: Yazuye Tabita (Dorcas): (Ibyakozwe 9:36-41)

- Herode yishe intumwa zimwe biramukundira, ashaka no kwiyongeza Petero! Herode yarabizize, Bibiliya ivuga ko yapfuye amarabira, ako kanya agahita ajoga inyo! (Ibyakozwe 12)

Yewe, uretse ko igitabo cy'ibyakozwe n'intumwa cyiswe gityo, ariko n'uwari kucyita "Ibyakoze na Petero na Pawulo" ntiyari kuba yibeshye, kuko ibice 12 byose by'iki gitabo bivuga ibyakozwe na Petero, ibindi bice 16 bikavuga "Ibyakozwe na Pawulo".

Nyumwa yo kuzura Umwuka Wera, Petero yanditse inzandiko ebyiri ziri muri Bibiliya (1 Petero na 2 Petero)

4) AMAHEREZO YA PETERO

Bibiliya ntitinda ku iherezo no ku rupfu rwa buri wese mu ntumwa za Yesu. Ibizwi byinshi tubikomora mu bitabo by'amateka yo hanze ya Bibiliya. Ahantu honyine Bibiliya ikomoza ku maherezo ya Petero, ni ubuhanuzi Yesu yigeze kumuha amubwira ati: (Yohana 21:18-19) "Ni ukuri, ni ukuri, ndakubwira yuko ukiri umusore wikenyezaga ukajya aho ushaka hose, ariko nusaza uzarambura amaboko undi agukenyeze, akujyane aho udashaka.” [19]Icyatumye avuga atyo ni ukwerekana urupfu azubahisha Imana. Amaze kuvuga atyo aramubwira ati “Nkurikira.”

Ikindi Bibiliya ihamya, ni uko Petero we yatumwe ku ntama zazimiya za Isirayeli, abo icyo gihe bitaka "Abakebwe", mu gihe Pawulo we ahanini yakoreye umurimo mu banyamahanga b'abapagani. Amateka avuga ko Yesu amaze gusubira mu Ijuru (Ubwo hari ahagana mu mwaka wa 33), Petero yakomeje kuvuga ubutumwa bwiza azenguruka amahanga arimo n'amajyaruguru ya Africa, agera no muri za Espagne no mu bwongereza n'ibindi bihugu bikikije hafi aho.

Ahagana mu mwaka wa 64, i Roma mu Butaliyani habaye itotezwa rikomeye ry'Abakristo, ryakorwaga n'umutegeka w'i Roma witwaga Nero. Muri uwo mwaka kandi Petero na we yari i Roma. Amateka yo hanze ya Bibiliya avuga ko Petero ngo yashatse guhunga iryo totezwa, abasha no gusohoka i Roma, ageze hanze y'umurwa ngo yaba yarahuye na Yesu yakataje yerekeje i Roma, ngo Yesu aramubaza ati "Petero, urongeye kandi?" Ngo Petero yaba yarabajije Yesu mu kiratini mu nteruro yamekanye cyane ati "QUO VADIS DOMINE"? (Bisobanuye ngo "Urajya he Mwami?") Ngo Yesu yaramusubije ati "Nudasubira i Roma ngo ubabazwe kimwe n'ubwoko bwanjye buri yo, njyewe ndajyayo njye kubambwa ku ncuro ya 2"! Ngo Petero yakozwe ku mutima, ahita asubira i Roma aho yasanze bamutegereje, bahita bamufata kuko bari bamubuze, ngo bafashe umwanzuro wo kumubamba ku musaraba akaba ariho apfira. Cyokoze Petero ngo yarababwiye ati "Sinkwiriye gupfira ku musaraba kimwe n'Umwami wanjye, cyokoze mumbambe muncuritse". Bahise bamubamba ku musaraba acuritse, ngo niho yaba yaraguye.

5) ICYO TWIGIRA KURI PETERO

Petero ni urugero rwiza ko bishoboka guhinduka rwose. Bibiliya iratubwira iti:

"Kandi ntimwishushanye n’ab’iki gihe, ahubwo muhinduke rwose mugize imitima mishya, kugira ngo mumenye neza ibyo Imana ishaka, ari byo byiza bishimwa kandi bitunganye rwose." (Abaroma 12:2)

Ubuzima bwa Petero butwereka ko bishoboka rwose guhinduka mushya dufashijwe na Mwuka Wera.

Murakoze cyane, twigire kumenya no guhinduka dufashijwe na Mwuka Wera.