Bibiriya irasubiza - Recent questions and answers in Inyigisho kuri Bibiriya

Answered: Kuki byabaye ngombwa ko Yesu acira hasi agatoba akondo, akagakirisha impumyi imwe?

Thu, 20 Nov 2025 17:01:23 +0000

Yohana 9:6-7 "Amaze kuvuga atyo acira amacandwe hasi, ayatobesha akondo akamusīga ku maso, 7aramubwira ati “Genda wiyuhagire mu kidendezi cy'i Silowamu”, (hasobanurwa ngo “Yaratumwe”). Nuko aragenda ariyuhagira, agaruka ahumutse.

-------

Gusobanukirwa iki kibazo neza, bisaba kumenya uko mu gihe cya Yesu abafite ubumuga bafatwaga muri Israel.

Uretse no mu gihe cya Yesu, abafite ubumuga muri Israel bahabwaga akato gakomeye guhera mu isezerano rya cyera. Muri Bibiliya ubwaho, abafite ubumuga ubwo aribwo bwose ntibari bemerewe gukora imirimo y'ubutambyi mu ihema ry'ibonaniro. Ubumuga n'iyo bwaba buto gute, bwafatwaga nk'inenge yabuzaga ubufite gukora umurimo w'ubutambyi. Ibi ntabwo Imana yapfuye kubikora gutyo nk'aho yaba yari igamije kubashyira mu kato, cyane cyane ko nta ruhare babaga barabigizemo, ahubwo cyari igishushanyo cy'uburyo Imana Yera yifuza ko natwe tuyegera nk'abera. Hari ibyanditswe byinshi bigaragaza uko abafite ubumuga bafatwaga:

Umurimo w'ubutambyi wagombaga gukorwa gusa n'Abalewi. (Abakomoka kuri Lewi). Ariko no mu muryango wa Lewi, uwabaga wemerewe gukora uyu murimo ni umuntu urengeje imyaka 20 kugeza kuri 50, kandi akaba adafite inenge n'imwe cyangwa ubumuga ubwo aribwo bwose ku mubiri. Iri ryari itegeko rikomeye ku buryo undi muntu wihangiraga kubyishyiramo yagombaga kwicwa. Kubara 1:51 "Kandi uko ubwo buturo buhagurutse, Abalewi abe ari bo bajya babushingura, kandi uko bugiye kubambwa, Abalewi abe ari bo babushinga. Utari uwo muri bo wigizwa hafi no kubyishyiramo yicwe."

Itegeko ryari risobanutse neza ko Umulewi wese ufite inenge atagombaga gukora umurimo w'umutambyi: Abalewi 21:21 "Ntihakagire umuntu wo mu rubyaro rwa Aroni umutambyi ufite inenge, wigira hafi ngo atambe ibitambo bitambirwa Uwiteka bigakongorwa n'umuriro. Kuko afite inenge, ntakigire hafi ngo atambe ibyokurya by'Imana ye."

Ibyafatwaga nk'inenge zabuzaga umuntu gukora umurimo w'ubutambyi na byo Imana yarabisobanuye: Abalewi 21:16-20 "Uwiteka abwira Mose ati 17“Bwira Aroni uti ‘Umuntu wese wo mu rubyaro rwawe mu bihe byabo byose uzagira inenge, ntakigire hafi ngo atambe ibyokurya by'Imana ye. 18Umuntu wese ufite inenge ntakigire hafi: impumyi cyangwa uremaye ukuguru, cyangwa ubutaraye izuru, cyangwa ufite urugingo ruruta urundi nka rwo, 19cyangwa uvunitse ikirenge cyangwa ikiganza, 20cyangwa ufite inyonjo cyangwa igikuri, cyangwa ufite inenge ku jisho, cyangwa urwaye ubuheri cyangwa ibikoko, cyangwa umenetse ibinyita bito."

Imana ntiyapfuye gutanga aya mabwiriza gutyo gusa; byari bifite impamvu: Kugirango hatagira icyo mu byera cyangirika. Birumvikana, kuko hari ibyago byinshi ko impumyi yagira icyo yangiza mu murimo w'ubutambyi kurusha umuntu ureba neza. Gusa, abafite ubumuga bo mu batambyi babaga bemerewe kurya ku byera kimwe n'abandi batambyi: Abalewi 21:22-23 "Ajye arya ku byokurya by'Imana ye, ku byera cyane no ku byera. 23Ariko ntakigire hafi ya wa mwenda ukingiriza Ahera cyane, ntakegere igicaniro kuko afite inenge, kugira ngo atagira Ahera hanjye yonona, kuko ndi Uwiteka uheza.’ ”

N'ubwo bimeze bityo,Imana ntiyigeze itanga itegeko ryo guhohotera abafite ubumuga, ahubwo yashyizeho amabwiriza yo kubarengera. Nk'urugero: Abalewi 19:14 "Ntukavume igipfamatwi, ntugashyire impumyi imbere ikiyitega, ahubwo ujye utinya Imana yawe. Ndi Uwiteka."

Ikibazo rero, ari na cyo kituganisha ku gisubizo, ni uko uko imyaka yagiye ishira igaha iyindi, Abisirayeli batangiye gutandukira, bakitwaza ibyanditswe bakabisobanura nabi, kugeza aho abafite ubumuga batangiye guhabwa akato bakanasuzugurwa bikomeye. Kugeza ubwo Yesu yazaga mu isi, yasanze muri Isirayeli abafite ubumuga bafatwaga nk'abantu bavumwe, bagasuzugurwa kandi bagahabwa akato bikomeye.

Icyo gihe, iyo wahuraga n'umuntu ufite ubumuga mu nzira, waciraga hasi kugirango umwereke ko yavumwe. Byari nko kumujomba iyindi nkota. YESU ahuye n'impumyi, na we yaciriye hasi nk'abandi, ariko ntabwo yaciriye hasi kugirango amuvume, ahubwo yagirango amukize! Yesu yakoresheje imivumo yari ituriho, ayishyiraho kugirango adukize, kugeza ubwo we ubwe ahinduka nk'ikivume mu maso y'abantu kugirango twe duhabwe umugisha. Abagalatiya 3:13 "Kristo yaducunguriye kugira ngo dukizwe umuvumo w'amategeko, ahindutse ikivume ku bwacu (kuko byanditswe ngo “Havumwe umuntu wese umanitswe ku giti”),"

Uko ni nako Imana yacu yabigenje ubwo yafataga imivumo ya Balamu ikayinduramo imigisha ku Bisirayeli. (Kubara 23-24). Nehemiya 13:2 "kuko batasanganije Abisirayeli imitsima n'amazi, ahubwo bakabaguririra kuri Balāmu ngo abavume, ariko Imana yacu ihindura umuvumo kuba umugisha."

Icyo ni cyo gisubizo cy'ukuri: Yesu yaciriye hasi kugirango ahindure ubusa umuvumo abantu bavumaga abari bafite ubumuga, akoresha icyo gikorwa bari basanzwe bakoresha mu kuvuma kugirango atange umugisha, kimwe n'uko yagiye ku musaraba agahinduka ikivume kugirango adukureho umuvumo w'amategeko.

Yesu wacu nashimwe cyane, ntacyo twabona twamwitura.

Ev. Innocent Munyaneza

Answered: Menya n'ibi N0 1: Uko YESU yiyeretse Aburahamu mu isezerano rya cyera, Aburahamu ntamumenye

Sun, 13 Jul 2025 18:26:55 +0000

Imwe mu nkingi za mwamba mu byo twizera mu Matorero y'abavutse ubwa kabiri bayoborwa n'Umwuka Wera, ni uko Yesu ari Imana kandi yahozeho, nta tangiriro yagize kandi nta n'iherezo azagira. (Niba wifuza kumenya ibyo twizera-shingiro [DOCTRIN] wakanda hano.

Kuba yarahozeho, bituma Yesu yari ahari no mu isezerano rya cyera, gusa icyo gihe ntiyiyerekanaga mu buryo nk'ubwo yiyerekanyemo mu isezerano rishya, ahubwo mu isezerano rya cyera yiyerekanaga mu buryo buhishe, ku buryo abo biyerekaga icyo gihe ntibamenyaga uwo barimo kureba, akenshi bakamwitiranya na Marayika kuko nta kundi bari kubisobanura.

Mu bo yiyeretse bakamubona n'amaso ariko ntibasobanukirwe, harimo Yosuwa, Aburahamu, Nebukadinezari n'abandi tuzagenda turebera hamwe.

Uyu munsi turareba uko yiyeretse Aburahamu, birasaba kubaga inyuguti tugakora ubusesenguzi bwimbitse ariko bushingiye ku Ijambo ry'Imana gusa, nta marangamutima nta n'ibindi bitabo twifashisha uretse Bibiliya.

Mbere na mbere, Yesu ubwe ahamya mu buryo butajijinganywaho ko Aburahamu atarabaho, yari ariho. Yohana 8:56 "Yesu arababwira ati “Ni ukuri, ni ukuri, ndababwira yuko Aburahamu ataravuka, ndiho.”

Iyi mvugo Yesu yakoresheje ati "NDIHO", na yo ubwayo ikeneye kutarenzwa ingohe, kuko ihura neza neza n'imvugo Imana yakoresheje ubwo yibwiraga Mose, aho yabivuze muri aya magambo: Kuva 3:14 "Imana isubiza Mose iti “NDI UWO NDI WE.” Kandi iti “Abe ari ko uzabwira Abisirayeli uti ‘NDIHO yabantumyeho.’ ”

==> Mu buryo butajijinganjywaho, izi mvugo zisobanuye ibintu 2 by'ingenzi:

1) Ubwo Imana yavuganaga na Mose, yiyise NDIHO, na Yesu ubwo yavugana n'Abisirayeli, yiyise NDIHO: Bisobanuye ko Imana na Yesu ari umwe, ko kandi Yesu yahozeho.

2) Bisobanuye ko Aburahamu atarabaho, Yesu yari ariho

NONE SE YESU YIYERETSE ABURAHAMU RYARI? HEHE?

Nyuma yo kwemeranywa ko Aburahamu atabaho Yesu yari ariho, hari ibyanditswe tugiye gusuzumira hamwe biri budufashe:

Mbere na mbere, Yesu ubwe yivugiye ko Aburahamu yifuje kureba umunsi we, (Umunsi wa Yesu), ko kandi yawubonye akanezerwa. Ntabwo Aburahamu yabonye Yesu mu kwizera, nta nubwo yari afite ibyiringiro byo kuzamubona, ahubwo yaramubonye, amaze kumubona aranezerwa. Ibi Yesu abivuga atya: Yohana 8:56 "Aburahamu sekuruza wanyu yifujije cyane kureba umunsi wanjye, kandi awubonye aranezerwa.”

None se bahuye ryari? Hehe? Turebe ibi byanditswe:

Itangiriro 18:1-3 "Uwiteka abonekera Aburahamu kuri bya biti byitwa imyeloni bya Mamure. Yari yicaye mu muryango w’ihema rye ku manywa y’ihangu, [2]yubura amaso abona abagabo batatu bahagaze imbere ye, ababonye ava mu muryango w’ihema arirukanka arabasanganira, yikubita hasi [3]aravuga ati “Databuja, niba nkugiriyeho umugisha, ndakwinginze we kunyura ku mugaragu wawe."

Ibi byanditswe bigaragaramo Yesu mu buryo butajijinganywaho:

1) Icya mbere, Bibiliya iravuga iti "Uwiteka abonekera Aburahamu", ariko Aburahamu abona abagabo batatu. Mbere na mbere, ntidutunguwe no kuba Yesu yakwitwa Uwiteka cyangwa Uhoraho, kuko ahandi muri Bibiliya yagiye yitwa atyo: Yesaya 9:5 "Nuko umwana yatuvukiye duhawe umwana w’umuhungu, ubutware buzaba ku bitugu bye. Azitwa Igitangaza, umujyanama, Imana ikomeye, Data wa twese Uhoraho, Umwami w’amahoro."

2) Icya kabiri, n'ubwo Aburahamu yabonaga abagabo batatu imbere ye, mu kuvugisha ntiyavugishije bose uko ari batatu, yabonyemo umwe aba ari we abwira: Itangiriro 18:3 "aravuga ati “Databuja, niba nkugiriyeho umugisha, ndakwinginze we kunyura ku mugaragu wawe. I==> None se ko Aburahamu yari yagenderewe n'abagabo batatu, kuki yakuyemo umwe muri bo akaba ari we abwira, byongeye kandi, akamubwira amagambo ubusanzwe agenewe Yesu nka "Databuja, umugaragu wawe..." ? Mu cyongereza uwo murongo ugira uti: "He said, “If I have found favor in your eyes, my Lord, do not pass your servant by."

Aya magambo yo kuramya Imana nka "My Lord, you servant..." nta na rimwe yahabwaga Marayika, ndetse iyo hagiraga ushaka kuyubahisha Marayika, Marayika yarabihakanaga. Ibyahishuwe 22:8-9 "Jyewe Yohana numvise ibyo kandi ndabireba. Maze kubyumva no kubireba nikubitira hasi imbere y’ibirenge bya marayika wabinyeretse, kugira ngo muramye. [9]Ariko arambwira ati “Reka! Ndi imbata mugenzi wawe kandi ndi mugenzi wa bene So b’abahanuzi, n’uw’abitondera amagambo y’iki gitabo. Imana abe ari yo uramya.”

==> Nta yindi mpamvu yatumaga Abamarayika banga ko babaramya: Ni uko imvugo ya Aburahamu nk'iriya twabonye yo kuramya no guha icyubahiro, nta wundi uyikwiriye uretse Yesu: Ibyahishuwe 5:12 "Bavuga ijwi rirenga bati “Umwana w’Intama watambwe ni we ukwiriye guhabwa ubutware, n’ubutunzi n’ubwenge n’imbaraga, no guhimbazwa n’icyubahiro n’ishimwe!”

==> Uretse mu isezerano rishya aho Yesu yigaragarije abantu yambaye umubiri nk'uwabantu, no mu isezerano rya cyera Yesu yagiye agaragaramo kenshi, gusa abamubonaga icyo gihe ntibasobanukirwaga uwo barimo kubona.

==> Kuba Yesu yivugira ko Aburahamu yahoze yifuza kubona umunsi wa Yesu, akongeraho ko yawubonye akishima, nta mpamvu nimwe ihari yatuma tujijinganya ko Aburahamu atawubonye.

UMWANZURO

Ni byo rwose, iyo ushyize hamwe ibyo Yesu yivugiye muri Yohana igice cya 8; ukabihuza n'ibyabaye mu Itangiriro igice cya 18, ukabihuza n'ibindi byanditswe, duhamya ko Aburahamu yabonye Yesu, gusa icyo gihe Yesu yari atarambara umubiri nk'uwo yari afite mu isezerano rishya, byatumaga bamwe batamenya neza uwo bavugana uwo ari we, gusa icyo babonaga ni uko yabaga atandukanye na Bamarayika bandi.

Murakoze, Uwiteka atugirire neza.

Answered: Ese iyi bibiliya umuntu yayidownloadinga?

Wed, 16 Apr 2025 20:42:33 +0000

Yego rwose. Muri iki kinyejana cy'ikoranabuhanga, ushobora kudownloadinga Bibiliya versions hafi ya zose, no mu ndimi hafi ya zose. Waba ukoresha mudasobwa, telefoni ikoresha Android cyangwa ikoresha ios, wabasha kudownloadinga ku buntu Bibiliya.

Answered: Ese koko Yefuta yaba yaratambye umukobwa we?

Mon, 24 Mar 2025 21:02:50 +0000

Ese koko Yefuta yatanze umwana we ho igitambo cyoswa

(NOTE: Igitambo cyoswa = Igitambo cyicwa, kigakinjwa kikamena amaraso, kigashyirwa ku gicaniro kigatwikwa kigakongorwa n'umuriro)

===

Hari ibibazo bigera ku 10 abasesenguzi ba Bibiriya, abavugabutumwa n'abasomyi batarumvikanaho kuva kera kugeza ubu:

Bitatu biza ku isonga ni ibi bikurikira:

1) Umwami Sawuli yigeze kwiyoberanya ajya kuraguza. Umuhanuzi Samuel yari yarapfuye. umushitsikazi amuzamurira Samuel avugana na Sawuli: Ese birashoboka? Ese Umupfumu yabasha kuzamura umukozi w'Imana nka Samuel akamuvana mu bapfuye akamugarura mu isi y'abazima?

2) Yesu yavuze ko azamara mu mva iminsi 3 n'amajoro 3. Bikunze kuvugwa bikanigishwa ko yapfuye ari kuwa 5 ku mugoroba, akazuka ku cyumweru mu rukerera. Bibaye ariko biri, yaba yaramaze mu mva umunsi 1 n'amajoro 2: Ibi bihuzwa bite?

3) Yefuta yahize umuhigo wo gutamba ikizasohoka mbere nk'igitambo cyoswa (holocaust). Hasohoka umukobwa we. Iyo usomye ubutumwa Yefuta yoherereje umwami w'Abamoni, (Abac. 11), Yefuta agaragara nk'uzi amategeko, kandi mu mategeko cyaraziraga kikaziririzwa gutamba abantu nk'ibitambo byoswa. Ese koko Yefuta yatambye umukobwa we nk'igitambo cyoswa?

....

Iki kibazo cya Yefuta cyakuruye impaka kuva kera kugeza ubu. Gusa abenshi bavuga ko Yefuta atigeze atamba umukobwa we, kandi iyo urebye ubusobanuro batanga usanga bifite ishingiro. Tubisuzume

1) Bagendeye ku muhigo yahize ubwawo

Dore uko uwo muhigo uvuga muri Bibiriya Yera dukoresha:

Abac 11:30-31 [30]Nuko Yefuta ahiga Uwiteka umuhigo ati “Nungabiza Abamoni [31]ngatabaruka amahoro mvuye kubatsinda, ikizabanza gusohoka imbere y'umuryango w'inzu yanjye kunsanganira, kizaba icy'Uwiteka. Nanjye nzagitangaho igitambo cyoswa.”

Reka dushyire umurongo wa 31 mu zindi ndimi, hanyuma witegereze akajambo nashyize natsindagiye ( bold)

(LOUIS SECOND) "quiconque sortira des portes de ma maison au-devant de moi, à mon heureux retour de chez les fils d'Ammon, sera consacré à l'Eternel, et je l'offrirai en holocauste."

/KING JAMES 2000/

"Then it shall be, that whatsoever comes forth of the doors of my house to meet me, when I return in peace from the children of Ammon, shall surely be the LORD'S, and I will offer it up for a burnt offering.

-------

Isezerano rya kera ryanditswe mu giheburayo. Ngewe nta giheburayo nzi, ariko abasesenguzi bakizi bahamya ako kajambo natsindagiye "et" mu gifaransa na "and" mu cyongereza, ngo muri Bibiriya y'igiheburayo uko kanditse gashobora gusobanura et cyangwa ou (Ubwo mu cyongereza ni and cyangwa or.)

Ni ibisanzwe ko abasesenguzi bitabaza Bibiriya y'igiheburayo mu isezerano rya kera, cyangwa iy'ikigereki mu isezerano rishya. Ibyo bibaye ari ukuri, mu mwanya wa et hakajyamo ou, mu mwanya wa and hakajyamo or, uyu muhigo wa Yefuta waba waravugaga utya:

LOUIS SECOND) "quiconque sortira des portes de ma maison au-devant de moi, à mon heureux retour de chez les fils d'Ammon, sera consacré à l'Eternel, ou je l'offrirai en holocauste."

/KING JAMES 2000/ "Then it shall be, that whatsoever comes forth of the doors of my house to meet me, when I return in peace from the children of Ammon, shall surely be the LORD'S, or I will offer it up for a burnt offering."

Bibaye ariko biri, Yefuta yaba yarahize umuhigo umuha amahitamo: Igisohoka mbere nikiba umuntu, nzagiha Uwiteka. Nikiba itungo, nzaritangaho igitambo cyoswa.

-----

Ikiyongeraho, dore ijambo umukobwa wa Yefuta yavuze amaze kumenya ko se yamutaze:

Abac 11:37 "Nyuma uwo mukobwa abwira se ati “Unyemerere icyo ngusaba: ube undetse amezi abiri ngende manukane mu misozi na bagenzi banjye, ndirire ubukumi bwanjye.”

Uyu mukobwa ntiyasabye kuririra urupfu rwe, yasabye kuririra ubukumi bwe! (Yaba Yari abizi ko guhabwa Uwiteka bisobanuye ko atagombaga gushaka,!

2) Kureba byimbitse niba koko Yefuta yaba yaratambye umwana we ho igitambo cyoswa

Mu ngingo 7, turebere hamwe niba koko Yefuta yaba yaratambye umukobwa we

1) Imico ya Yefuta na kamere ye

Ku ikubitiro, Bibiliya igaragaza Yefuta nk'umugabo w'intwari kandi w'umunyambaraga, ijambo rikoreshwa ku bandi bacamanza bakoze ibihambaye nka ba Gideyoni. Abacamanza 11:1 "Nuko Yefuta w’Umugileyadi yari umunyambaraga w’intwari, kandi yari umwana wa maraya, kandi Gileyadi ni we bamubyaranye." Iki gice cya 11 cyose kigaragaza Yefuta nk'umugabo ugira amakenga n'ubwenge bwinshi; Akimara guhamagarwa, ntiyashyuhijwe no kwitwa umutware, ahubwo yarabanje aritonda afata umwanya we, yihutira gufata umwanya we no gusobanukirwa impamvu z'Abayuda bene wabo. Igihe byari bibaye ngombwa ko ingabo ze zirwana n'Abamoni, Yefuta yabanje imbere imishyikirano, yagiye mu ntambara aruko iby'imishyikirano binaniranye. (Abazamanza 11:12-28)

2) Yefuta yari azi amategeko ya Mose

Abantu bamwe bakunze kuvuga ko Yefuta atari azi amategeko ya Mose bitaga "Torah". Ibi ni ukwibeshya, kuko iyo usomye amateka Yefuta yarondoreye Abamoni mu gice cya 11 cy'Abacamanza, usanga Yefuta yari azi neza amategeko bagenderagaho bitaga "Torah". (Ibitabo bitanu bya mbere muri Bibiliya)

3) Muri Isirayeli, cyaraziraga kikaziririzwa gutamba umuntu ho igitambo cyoswa

Nk'uko tubibonye mu ngingo ya 2, Yefuta yagaragaje ko yari azi Ijambo ry'Imana bagenderagaho. Ibi ni ukuri, kandi mu gihugu cya israel cyose, n'iyo Yefuta abyirengagiza, mu gihugu hose ntihari kubura umuntu nibura umwe waba uzi icyo amategeko avuga, cyane ko mu myaka 6 Yefuta yabayoboyemo, bari bari mu bubyutse bugaragara. Abalewi 18:21 “Ntugatange uwo mu rubyaro rwawe ngo umutambire Moleki, kandi ntugasuzuguze izina ry’Imana yawe. Ndi Uwiteka."

Gutegeka kwa kabiri 12:31 "Ntuzagirire Uwiteka Imana yawe nka bo, kuko ikintu cyose Uwiteka yita ikizira akacyanga urunuka bagikorera imana zabo, ndetse n’abahungu babo n’abakobwa babo babosereze imana zabo."

4) Umwuka w'Uwiteka wari kuri Yefuta

Neza neza umurongo umwe mbere y'uko Yefuta ahiga umuhigo, Bibiliya ivuga ko "Umwuka w'Uwiteka waje kuri Yefuta". Ntabwo byumvikana ukuntu "Umwuka w'Uwiteka" waza kuri Yefuta, ako kanya agahita ahiga umuhigo utandukanye n'Ijambo ry'Imana. Nta na rimwe Umwuka w'Uwiteka (cyangwa "Umwuka Wera) ntashobora kutubwira ikintu gitandukanye n'Ijambo ry'Imana. Abacamanza 11:29-30 [29]Umwuka w’Uwiteka aza kuri Yefuta, anyura i Galeyadi n’i Manase ajya i Misipa y’i Galeyadi, avayo afata mu Bamoni. [30]Nuko Yefuta ahiga Uwiteka umuhigo ati “Nungabiza Abamoni, [...]

5) Igisobanuro cy'ijambo "IGITAMBO"

Ni byo ko Yefuta yakoresheje ijambo "Igitambo cyoswa mu muhigo we". Ubusanzwe "Igitambo cyoswa" (Holocauste) cyagombaga gupfa, kigatwikwa ku gicaniro. Ariko ntabwo igihe cyose "Kuba igitambo cyoswa" bisobanura gupfa ku mu biri, bishobora no gusobanura "Kwitanga wese, ukiha Uwiteka burundu". Ibi na Pawulo abivuga atya: Abaroma 12:1 "Nuko bene Data, ndabinginga ku bw’imbabazi z’Imana ngo mutange imibiri yanyu, ibe ibitambo bizima byera bishimwa n’Imana, ari ko kuyikorera kwanyu gukwiriye." Muri ubu busobanuro, biragaragara ko binashoboka kuba "igitambo kizima", muri ubwo buryo, kuba igitambo kizima bisobanuye "Kwiha Imana ukayiyegurira burundu". Na Yefuta rero, birashoboka cyane ko yaba yarakoze umuhigo wo "gutanga umukobwa we akamwegurira Uwiteka burundu", kimwe n'uko Hana yakoze umuhigo wo kwegurira Samweli Uwiteka. 1 Samuel 1:10-11 "Ariko Hana yasenganaga Uwiteka agahinda, arira cyane. [11]Ahiga umuhigo aravuga ati “Nyagasani Nyiringabo, nureba umubabaro w’umuja wawe ukanyibuka, ntunyibagirwe ukampa umwana w’umuhungu, nzamutura Uwiteka abe uwe iminsi yose yo kubaho kwe, kandi icyuma cyogosha ntikizamugera ku mutwe.”

6) Ishyirwa mu bikorwa ry'umuhigo wa Yefuta

Hagati yo guhiga umuhigo no kuwuhigura haciyemo amezi abiri. Muri ibi bihe, Abisirayeli bari mu bubyutse, ahubwo iyo umucamanza yamaraga gupfa, ni bwo basubiraga mu buhenebere. Muri aya mezi abiri, kabone n'iyo Yefuta yaba atari azi ijambo ry'Imana rimubuza gutamba abantu ho igitambo cyoswa, ntihari kubura nibura umuntu umwe umuburira. Ikiyongeye kuri ibi, umukobwa wa Yefuta akimara kumenya umuhigo wa se, yavuze aya magambo y'ingenzi: Abacamanza 11:37 "Nyuma uwo mukobwa abwira se ati “Unyemerere icyo ngusaba: ube undetse amezi abiri ngende manukane mu misozi na bagenzi banjye, ndirire ubukumi bwanjye.”

Itegereze neza: Umukobwa wa Yefuta ntiyigeze asaba "Kujya kuririra urupfu rwe!" OYA. Yasabye kujya kuririra "UBUKUMI BWE". Yari abizi neza ko navayo atazapfa atanzweho igitambo cyoswa, ahubwo yari abizi ko nagaruka "azegurirwa Uwiteka". (Iyo wegurirwaga Uwiteka uri umukobwa, wagumaga uri isugi ugakorera umurimo w'Imana ku muryango w'urusengero).

7) Uko Yefuta afatwa ahandi muri Bibiliya

Ahandi muri Bibiliya, Nta na hamwe Ijambo ry'Imana ryaba rigaya Yefuta ku bw'iki gikorwa, ahubwo aho Yefuta avugwa aba avugwa ibigwi, ndetse Bibiliya inamushyira mu ntwari zo kwizera, ikamushyira ku rutonde rw' Abakoze ibyo gukiranuka! Byaba bitangaje Bibiliya iramutse ishyize Yefuta mu rutonde rw'abakoze ibyo gukiranuka mu gihe yaba ahubwo yarakoze amahano Imana yanga urunuka! Abaheburayo 11:32-33 "Mbese mvuge kindi ki? Igihe cyandenga mvuze ibya Gideyoni n’ibya Baraki, n’ibya Samusoni n’ibya Yefuta, n’ibya Dawidi n’ibya Samweli, n’iby’abahanuzi" [34]baheshejwe no kwizera gutsinda abami, no gukora ibyo gukiranuka no guhabwa ibyasezeranijwe, no kuziba iminwa y’intare.

UMWANZURO:

Impamvu nyamukuru itumye tuvuga izo ngingo zose, si ukugaragaza Yefuta nk'umuntu w'igitangaza utagira ikibi cyamurangwaho kuko uwo muntu ntabaho. Bibiliya itwereka idaca ku ruhande ko n'intwari z'ukwizera na zo zageraga aho zigera mu bihe by'intege nke, umuntu rukumbi utarigeze agira ikibi cyamurangwaho ni Yesu wenyine. Icyo tugendereye ni ukwerekana ko, ukurikije Ijambo ry'Imana, Yefuta ntiyigeze yica umukobwa we ngo amutambe ku gicaniro n'igitambo cyoswa, ahubw yatanze umukobwa we amwegurira Uwiteka ngo abe uwe ubuzima bwe bwose.

Ariko rero, hari abazakomeza kubona Yefuta nk'umuntu wahize umuhigo ahubutse. N'iyo byaba bimeze bityo, ntibyabuza inkuru ye kuba yuzuyemo ubuntu, urukundo n'ineza y'Imana, n'amasomo menshi yaduherekeza muri uru rugendo.

Murakoze cyane, Uwiteka akomeze atugirire neza

Answered: SPECIAL: Sobanukirwa na buri wese mu ntumwa za Yesu: YUDA MWENE YAKOBO

Sun, 23 Mar 2025 10:34:37 +0000

Mu ntumwa za Yesu habagamo ba Yuda babiri: Yuda Isikariyota wagambaniye Yesu, na Yuda mwene Yakobo. Uyu tugiye kuvugaho ni YUDA MWENE YAKOBO.

Uyu Yudada mwene Yakobo avugwa mu rutonde rw'intumwa za Yesu, akavugagwa kenshi nka "Yuda mwene Yakobo", ariko ahandi akavugwa nka "Tadayo". (Luka 6:13, 16 "Ijoro rikeye ahamagara abigishwa be, atoranyamo cumi na babiri abita intumwa: [...] [16] na Yuda mwene Yakobo, na Yuda Isikariyota wahindutse umugambanyi. ), ariko abanditsi b'amavanjiri Mariko na Matayo bakamuvuga nka "Tadayo" (Mariko 3:18 "na Andereya na Filipo, na Barutolomayo na Matayo, na Toma na Yakobo mwene Alufayo, na Tadayo na Simoni Zeloti,".

(Matayo 10:2-3 "Amazina y’intumwa cumi n’ebyiri ni aya: uwa mbere ni Simoni witwaga Petero na Andereya mwene se, na Yakobo mwene Zebedayo na Yohana mwene se, [3]na Filipo na Barutolomayo, na Toma na Matayo umukoresha w’ikoro, na Yakobo mwene Alufayo, na Tadayo"

Ibi tubivuze kugirango aho muzajya mubona "Yuda mwene Yakobo" cyangwa "Tadayo" mujye mumenya ko ari umuntu umwe.

Muri Bibiliya, Uyu "Yuda" yumvikana avuga incuro imwe rukumbi: Ahangaha yabazaga Yesu ikibazo: Yohana 14:22 "Yuda utari Isikariyota aramubaza ati “Databuja, bibaye bite ko ugiye kutwiyereka ntiwiyereke ab’isi?” Iki kibazo ubwacyo cyonyine, kigaragaza ko iyi ntumwa yari itegereje Mesiya w'umurwanyi uzabohora Abayuda ingoyi y'Abaroma! Yifuzaga ko Yesu atakwiyereka intumwa ze gusa, ahubwo yari akwiye kumanuka akajya no kwiyereka abanzi babo nk'umuntu w'igihangange!

Nta yandi makuru Bibiliya itanga kuri uyu Yuda mwene Yakobo. Amateka yo hanze ya bibiliya avuga ko uyu Yuda mwene Yakobo yaba yarishwe abambwe ku musaraba ahitwaga Persia icyo gihe, ubu ni muri Irani.

Imana idufashe kugira icyo twagira ku batubanjirije

Answered: SPECIAL: Sobanukirwa na buri wese mu ntumwa za Yesu: SIMONI ZELOTE

Sun, 23 Mar 2025 09:26:22 +0000

Mu ntumwa za Yesu habagamo ba Simoni babiri: Hari Simoni Petero (Twaramubonye), hakaba na Simoni Zelote.

Nta byinshi Bibiliya ivuga kuri Simozi Zelote, imuvuga gusa iyo ivuga urutonde rw'intumwa za Yesu. Nta kindi kizwi muri Bibiliya yigeze avuga cyangwa akora.

Mu ndimi z'amahanga, (Muri version zimwe na zimwe), iyo abanditsi b'ubutumwa bwiza bavuga uyu Simoni Zelote, Matayo na Mariko bakoresha iyi mvugo: "Simon the Cananaean" ( Mu gifaransa: "Simon le Cananite", cyangwa "Simon le Cananéen"). Luka niwe ukoresha igihe cyose "Simon the Zealot".

Aya magambo yose asobanura kimwe nuko ari mu ndimi zitandukanye: Matayo na Mariko bakoresha iri zina mu Giheburayo (Cananaean), naho Luka akarikoresha mu Kigereki (Zealot). Byaba mu Giheburayo cyangwa mu Kigereki, iri zina rikaba risobanura "umuntu ufite ishyaka ry'ikintu runaka", mu ndimi z'amahanga ni "Zele"

Nta kindi Bibiliya ivuga kuri uyu Simoni Zelote, gusa hanze ya Bibiliya amateka avuga ko ubwo Yakobo yari amaze kwicishwa inkota na Herode (Ibyakozwe n'inkomwa 12), ngo Simoni Zelote yaba yaramusimbuye ku buyobozi bw'Itorero ry'i Yerusalemu. Nyuma yaho, ngo yaba yarakomereje ivugabutumwa muri Egiputa, ngo ashobora no kuba yarageze mu Bwongereza.

Amateka yo hanze ya Bibiliya avuga ko Simoni Zelote yaba yarishwe azira ubutumwa bwiza, ngo yaba yarabambwe ku musaraba, muri Persia y'icyo gihe (Ubu ni muri Irani y'ubu).

Imana idufashe kugira icyo twigira kuri aba batubanjirije.

Answered: Ni uruhe rurimi Imana yumva neza? Natunganya nte "communication" hagati yanjye n'Imana?

Thu, 13 Mar 2025 20:04:53 +0000

Communication hagati y'umuntu n'Imana; Kumenya niba Imana inyumva: Iki ni ikibazo abantu benshi bibaza, gusenga turasenga, ariko se umuntu yamenya neza ate niba communication hagati ye n'Imana imeze neza?

N'ubwo gusenga ari byiza, ndetse Bibiliya ntivuga ko ari byiza gusa, ahubwo ni n'itegeko rya Mwuka wera, ntabwo umurokore agomba kwitwaza ko asenga cyane ngo yirengagize andi mahame y'Imana. Gusenga ni byo, kandi tugomba no gusenga ubudasiba, ni byo bitwegereza ubusabane hagati yacu n'Imana, ariko si byo byonyine. 1 Abatesalonike 5:17 "Musenge ubudasiba".

Mbere na mbere, tubanze tuvuge ibintu bitanu bikurikira:

1) Imana ntikeneye ururimi runaka ngo ibashe kumva umuntu mu rurimi rumwe kurusha urundi! Igishinwa, Ikinyarwanda, Icyongereza n'izindi, Imana si byo ikeneye ngo habeho communication hagati yayo n'umuntu.

2) Umuntu ataravuga, Imana iba yarangije kumenya ikimurimo: Yohana 2:24-25 "ariko Yesu ntiyabiringira kuko yari azi abantu bose. [25]Ntiyagombaga kubwirwa iby’abantu, kuko ubwe yari azi ibibarimo."

3) Umuntu atarasenga ngo agire icyo asaba, Imana iba izi icyo akeneye na mbere y'uko agisaba. Matayo 6:8 "Nuko ntimugase na bo, kuko So azi ibyo mukennye mutaramusaba."

4) Imana ntinezezwa na gato n'abantu bayivuga ku munwa gusa, cyangwa bakayubaha kuko babitegetswe cyangwa babyigishijwe gusa, ariko imitima yabo ikaba kure yayo. Yesaya 29:13 "Umwami aravuga ati “Kuko aba bantu banyegera bakanyubahisha akanwa kabo n’iminwa yabo, ariko imitima yabo bakayinshyira kure, no kubaha banyubaha akaba ari itegeko ry’abantu bigishijwe,"

5) Ibyo Imana ikeneye ngo itwumve vuba, biri mu byo dukora kurusha ibyo tuvuga. URURIMI IMANA YUMVA CYANE KANDI IKENEYE NGO YUMVE VUBA, NI IBIKORWA BYACU KURUSHA AMAGAMBO YACU. Ibyo bigaraga mu byanditswe byinshi bidakeneye ubusobanuro burebure:

- Yesaya 58:5-9 "Ugira ngo kwiyiriza ubuza nshima kumeze gutyo? Mbese ni umunsi umuntu yibabarizamo akubika umutwe nk’umuberanya akisasira ibigunira, akaryama mu ivu? Ibyo ni byo wita kwiyiriza ubusa, n’umunsi Uwiteka yishimira? [6]“Ahubwo kwiyiriza ubusa nshima ni uko mwajya mubohora abantu ingoyi z’urugomo, mugahambura imigozi y’uburetwa mukarenganura abarengana, kandi mugaca iby’agahato byose. [7]Kandi ukarekura ugatanga ibyokurya byawe ukagaburira abashonji, ukazana abakene bāmeneshejwe ukabashyira mu nzu yawe, wabona uwambaye ubusa ukamwambika, ntiwirengagize bene wanyu. [8]“Maze rero umucyo wawe uzaherako utambike nk’umuseke, ubukire bwawe buzatoha vuba, gukiranuka kwawe kuzakujya imbere, kandi icyubahiro cy’Uwiteka kizaba kigushoreye. [9]Maze nutabaza Uwiteka azagutabara, nutaka azavuga ati ‘Ndi hano.’ “Niwikuramo agahato no gutunga urutoki no kuvuga nabi, [10]ukihotorera umushonji ugahaza umunyamubabaro, umucyo wawe uzaherako uvire mu mwijima, kandi urwijiji rwawe ruzatamuruka habe amanywa y’ihangu. [11]Uwiteka azajya akuyobora, azahaza ubugingo bwawe mu bihe by’amapfa, azakomeza amagufwa yawe. Uzamera nk’urutoki rwuhirwa, kandi uzaba nk’isōko y’amazi idakama. (Ibi byanditswe biratugira inama y'icyo twakora kugirango Imana itwumve, ntabwo bitugira inama y'ibyo twavuga).

- Imana ubwayo yivugira igituma yanga kumva: Yesaya 59:1-2 "Dore ukuboko k’Uwiteka ntikwaheze ngo ananirwe gukiza, n’ugutwi kwe ntikwapfuye ngo ananirwe kumva. [2]Ahubwo gukiranirwa kwanyu ni ko kwabatandukanije n’Imana yanyu, n’ibyaha byanyu ni byo biyitera kubima amaso ikanga no kumva."

===

- Imana ubwayo ivuga ko hari igihe dushobora kuyitakambira ikatwihorera, nk'igihe twakwanga guhindurwa n'imuburo yayo: Imig 1:24-2 [24]Narabahamagaye muraninira, abaramburiye ukuboko ntihagira ubyitaho. [25]Ahubwo mwahinyuye inama zanjye zose, no kubacyaha kwanjye ntimubyitaho. [26]Nuko nanjye rero nzabakina ku mubyimba mwagize ibyago, nzabaseka icyo mwatinyaga kibagezeho. [27]Igihe muzatungurwa n'ubwoba nk'umugaru,Ibyago byanyu bikaza nka serwakira,Igihe umubabaro n'uburibwe bizabageraho. [28]“Ni bwo bazantakambira nkabihorera, bazanshakana umwete ntibazambona.

===========/

Guhera mu isezerano rya cyera, abantu b'Imana bajyaga bishuka, bakifuza gukorera Imana uburyarya nk'uko babukorera abantu, bakaza imbere yayo bigize abantu bakurikiza amategeko yo kugaragara nk'abakiranuka imbere y'abantu, ariko bene aba, Imana yababuriye idaca ku ruhande ko itazabumva:

Yesaya 1:13-15 [13]Ntimukongere kuntura amaturo atagira umumaro, imibavu ni ikizira kuri jye, imboneko z'amezi n'amasabato no guteranya amateraniro ndabirambiwe, ibyaha bivanze no guterana kwera bikurweho. [14]Imboneko z'amezi n'iminsi mikuru byanyu mwategetswe umutima wanjye urabyanga, birananiye ndushye kubyihanganira. [15]Nimutega ibiganza nzabima amaso, ndetse nimusenga amashengesho menshi sinzayumva, ibiganza byanyu byuzuye amaraso.

==> Muri macye, abasenga bagomba kumenya ko Imana yacu ari Imana igendera ku mahame, ntigendera ku marangamutima nk'abantu. Rimwe muri ayo mahame, ni uko Imana ikeneye ubugingo bwacu mbere na mbere. Ntabwo Yesu yagiye ku musaraba kugirango dutware amamodoka meza dutunge n'amafaranga menshi, yawugiyeho kugirango tubone ubugingo mbere na mbere, ibisigaye byose ni inyongera.

==> Ni byo rwose nta wahakana ko gukora mu buryo tumaze kuvuga haruguru, bisaba ubushobozi. Nta wahakana ko bivuna kujya ku ruhimbi kuvuga ubutumwa bwiza kandi wasize abana bashonje, cyangwa babirukanye mu ishuri, cyangwa ukaba wasize bakwirukanye mu nzu kubera kutayishyura.... Nta n'uwakwirengagiza ko biryoha gukorera Imana ibintu byose bimeze neza, mu mufuka, mu rugo n'ahandi. Ariko rero nanone, buri wese akwiye kuzirikana ko "Nta mwizera utarahawe ikintu cyafasha abandi", kandi icyo gukora ngo ugirire umuntu umumaro, si ko gisaba amafaranga buri gihe cyose. Buri wese akwiriye kuzirikana ko nk'uko Yesu yabyivugiye, "Uwahawe ducye ntadukoreshe uko Imana ibimusaba, biragoye ko Imana yamuha byinshi" (Matayo 25:14-30)

==> Imana ubwayo iratugira inama:

Yesaya1:16-17 [16]“Nimwiyuhagire mwiboneze, mukureho ibyaha byo mu mirimo yanyu bive imbere yanjye, mureke gukora nabi. [17]Mwige gukora neza, mushake imanza zitabera, murenganure abarengana, mucire impfubyi urubanza, muburanire abapfakazi.

Murakoze, Uwiteka akomeze atugirire neza.

Answered: SPECIAL: Sobanukirwa na buri wese mu ntumwa za Yesu: Yakobo mwene Alufayo

Sun, 09 Mar 2025 09:40:07 +0000

Mu ntumwa za Yesu habagamo ba Yakobo babiri: Yakobo Mwene Zebedayo (Uyu Yakobo yavaga indime na Yohana), hakaba n'undi Yakobo yari mwene Alufayo.

Kugirango Bibiliya ibatandukanye neza mu buryo budateje urujijo, akenshi iyo ivuze Yakobo yongeraho "Yakobo mwene Runaka".... Cyangwa "Yakobo umuvandimwe wa.....". Muri Bibiliya hamwe na hamwe, Uyu Yakobo tuvuga hano mwene Alufayo akunze no kwitwa "Yakobo muto". Mariko 15:40 "Hari n’abagore bari bahagaze kure bareba, muri bo harimo Mariya Magadalena, na Mariya nyina wa Yakobo muto na Yosefu, na Salome." Ntibizwi neza impamvu yo kumwita "Muto", niba ari ibikorwa bye bitangana n'ibya Yakobo mwene Zebedayo, niba ari igihagararo.... ntibizwi neza. Gusa uyu murongo tuvuze haruguru ugaragaza ko nyina w'uyu Yakobo yitwaka Mariya.

Uyu yakobo mwene Alufayo nta byinshi avugwaho muri Bibiliya. Nta yandi makuru Bibiliya itanga kuri we, nta kintu Bibiliya ivuga yigeze avuga, nta n'icyo ivuga yigeze akora.

Yapfuye ate?

Hanze ya Bibiliya, amateka avuga ko Yakobo mwene Alufayo yajyanywe ku gasongero k'inzu ndende, baramuboha, baramusunika aramanuka yikubita hasi, mu gihe agihorogoma bamusanga hasi bamwicisha amabuye.

Imana idufashe kwigira kuri aba batubanjirije.

Answered: SPECIAL: Sobanukirwa na buri wese mu ntumwa za Yesu: Barutolomayo

Mon, 03 Mar 2025 11:32:14 +0000

Barutolomayo avugwa incuro 4 gusa muri Bibiliya, ndetse muri izi ncuro zose aba avugwa mu rutonde rw'intumwa za Yesu gusa.

Nta yandi makuru Bibiliya itanga kuri Barutolomayo, nta kintu Bibiliya ivuga yigeze avuga, nta n'icyo ivuga yigeze akora.

Hanze ya Bibiliya, amateka avuga ko nyuma ya Yesu Barutolomayo yaba yarakomeje umurimo wo kuvuga ubutumwa bwiza mu Buhinde, abukomereza ahitwa Arubanopolisi muri Armenie y'ubu ari na ho yaba yariciwe azira ubutumwa bwiza.

Amateka avuga ko Barutolelomayo ari umwe mu bantu bishwe urw'agashinyaguro bazira ubutumwa bwiza, kuko ngo yaba yarakuweho uruhu rw'umubiri we, ngo amara iminsi 3 asamba. Yewe, wa mugani wa Bibiliya "n'isi ntiyari ikwiye ko bayibamo!". Ariko igitangaza kurushaho, ni uko abo bose batarahabwa ibyasezeranijwe, ahubwo baracyadutegereje ngo tuzabiherwe rimwe! Imana yacu ishimwe.

Abaheburayo 11:38-40 [38]Yemwe, n'isi ntiyari ikwiriye ko bayibamo! Bazereraga mu mashyamba no mu bihanamanga, no mu mavumo no mu masenga. [39]Abo bose nubwo bamaze guhamywa neza ku bwo kwizera kwabo, nyamara ntibahabwa ibyasezeranijwe [40]kuko Imana yatugambiriye ikirushaho kuba cyiza, kugira ngo abo badatunganywa rwose tutari kumwe.

Imana idufashe kwigira kuri aba batubanjirije.

Murakoze, Uwiteka akomeze atugirire neza

Answered: SPECIAL: Sobanukirwa na buri wese mu ntumwa za Yesu: FILIPO

Sat, 01 Mar 2025 10:01:32 +0000

Filipo yari umwe mu ntumwa 12 za Yesu, Bibiliya ikaba itamuvugaho byinshi kuko na we ubwe nta byinshi avuga. Mu butumwa bwiza bwa Matayo na Luka, Bibiliya ivuga iby'umuntu umwe Yesu yabwiye ati "Nkurikira", uwo muntu aramusubiza ati "Reka mbanze njye guhamba Data". (Luka 9:59 & Matayo 8:21). N'ubwo Bibiliya itavuga uwo muntu uwo ari we, abasesenguzi bamwe bagiye bavuga ko uwo muntu yaba yari Filipo, cyane cyane bagendeye ku mico ya Filipo nk'uko tugiye kubibona hasi, bakanabihuza n'umurongo umwe utangwa na Yohana 1:43). (Byumvikane neza ko ibyo bintu bitavugwa muri Bibiliya, abasoma ibi bajye babikoresha bigengesereye).

Mu banditsi b'amavanjili uko ari 4, Yohana ni we ugerageza kugira bicye avuga kuri Filipo, abandi banditsi bavuga Filipo iyo bamuvuga mu rutonde rw'intumwa za Yesu gusa.) Filipo yakomokaga i Betsayida mu ntara ya Galilaya, aha ninaho hakomokaga Petero na Mwene se Andereya. (Yohana 1:43-44)

Ahantu hose Filipo avugwa muri Bibiliya, agaragara nk'umuntu wahoraga ahangayikishijwe no kubona ibyiza byashyika no ku bandi: Urugero rwihuse: Akimara guhamagarwa, umurongo ukurikiye umugaragaza ajya kureba Natanayeli akamugezaho inkuru nziza, ibi bihindura Filipo undi Muvugabutumwa wazanye umuntu kuri Yesu, nyuma ya Andereya wazanye Petero kuri Yesu. Yohana 1:43-49 "Bukeye bwaho Yesu ashaka kujya i Galilaya. Abona Filipo aramubwira ati “Nkurikira.” [44]Filipo uwo yari uw’i Betsayida, umudugudu w’iwabo wa Andereya na Petero. [45]Filipo abona Natanayeli aramubwira ati “Uwo Mose yanditse mu mategeko, n’abahanuzi bakamwandika twamubonye. Ni Yesu mwene Yosefu w’i Nazareti.” [46]Natanayeli aramubaza ati “Mbese i Nazareti hari icyiza cyahaturuka?” Filipo aramusubiza ati “Ngwino urebe.” [47]Yesu abona Natanayeli aza aho ari amuvugaho ati “Dore Umwisirayeli nyakuri, udafite uburiganya.” [48]Natanayeli aramubaza ati “Wamenyeye he?” Yesu aramusubiza ati “Filipo ataraguhamagara, ubwo wari munsi y’umutini nakubonye.” [49]Natanayeli aramusubiza ati “Rabi, uri Umwana w’Imana koko. Ni wowe Mwami w’Abisirayeli.”

Filipo yongera kugaragara aza kuvuganira Abagiriki kuri Yesu: Yohana 12:20-22 "Hariho Abagiriki mu baje gusenga mu minsi mikuru, [21]basanga Filipo w’i Betsayida y’i Galilaya, baramwinginga bati “Mutware, turashaka kureba Yesu.” [22]Filipo araza abibwira Andereya, Andereya na Filipo na bo baraza babibwira Yesu."

Filipo yari intumwa yahoraga yibaza uko ibyiza byagera ku bandi, kandi akabigaragaza mu magambo asobanutse adaciye ku ruhande, ndetse na Yesu ubwe yari abizi neza ku buryo iyo yabaga akeneye amakuru adaciye ku ruhande yayabazaga Filipo. Ubwo Yesu yifuzaga kugaburira abantu barenga 5,000; yabajije Filipo aho bakura imigati yo kubagaburira. Yohana 5:5-7 "Yesu yubura amaso, abonye abantu benshi baza aho ari abaza Filipo ati “Turagura hehe ibyokurya ngo aba babone ibyo barya?” [6]Icyatumye amubaza atyo yagira ngo amugerageze, ubwe yari azi icyo ari bukore. [7]Filipo aramusubiza ati “Imitsima yagurwa idenariyo magana abiri ntiyabakwira, nubwo umuntu yaryaho gato.”

Uyu muco wo kubaza ibibazo bitomoye, wongera kugaragara muri Yohana 14:7-9 "Iyaba mwaramenye, muba mwaramenye na Data. Uhereye none muramuzi kandi mwamurebye.” [8]Filipo aramubwira ati “Databuja, twereke Data wa twese biraba bihagije.” [9]Yesu aramubaza ati “Nabanye namwe iminsi ingana ityo, kandi ntiwari wamenya, Filipo? Umbonye aba abonye Data. Ni iki gitumye uvuga uti ‘Twereke Data wa twese’?"

Aho Filipo avugwa bwa nyuma muri Bibiliya, ni aho avugwa mu rutonde rw'intumwa 11 zari zigihari nyumwa y'uko Yesu asubiye mu Ijuru (Ibyakozwe n'Intumwa 1:13) . Nyuma yaho, Filipo ntiyongera kuvugwa, ibindi bizwi kuri we biva mu bitabo bisanzwe byo hanze ya Bibiliya.

Amateka yo hanze ya Bibiliya avuga ko nyuma ya Yesu, Filipo yaba yarakomeje umurimo w'ivugabutumwa ahitwa Phrygia (Ni muri Turukiya y'ubu). Aha muri Turukiya ni naho yaba yariciwe ahowe ubutumwa bwiza ahitwa Hierapolis

Imana idufashe kugirango twigire kuri aba batubanjirije

Answered: SPECIAL: Sobanukirwa na buri wese mu ntumwa za Yesu: YUDA ISCARIOT

Sun, 16 Feb 2025 10:38:12 +0000

Mu ntumwa 12 za Yesu, habagamo ba Yuda babiri. Kugirango babatandukanye, Umwe bibiliya ivuga ko yari Mwene Yakobo, undi (Ari nawe tugiye kuvugaho hano) Bibiliya ikavuga irindi zina rye: Iscariota.

Yuda Iscariota yari muntu ki?

Yuda Iscariota Bibiliya igaragaza ko yari mwene Simoni. (Yohana 6:71, 13:26), Akaba yarakomokaga ahitwa "Keriyoti" mu ntara ya Yudaya mu majyepfo ya Israel. Uyu Yuda ni we wenyine mu ntumwa za Yesu wakomokaga mu ntara ya Yudaya, abandi bose bakomokaga i Galilaya.

Yuda Iscariota yamenyekanye cyane kubera ubugambanyi bwe, ku isi yose yabaye ikimenyabose ku buryo n'uyu munsi mu ndimi zose iyo bavuze "ngo umuntu yabereye undi Yuda", baba bashaka kuvuga ko yamuhemukiye, yamugambaniye....

Ikindi gikunze gukurura impaka kuri Yuda Iscariota, ni ibikunze kuvugwa ko ngo nubwo yagambaniye Yesu, ngo nta mahitamo yari afite kuko yari yararemewe kuzaba igikoresho cyo gutanga yesu kugirango umugambi wo kuducungura ugerweho. Ngo bityo rero, ngo yaba yari igikoresho kitari gifite amahitamo nk'abandi. Ngo yari yararemewe kuzarimbuka byanze bikunze, Ibyo na byo turabigarukaho. Mbere yo kugaruka kuri iki kibazo, tubanze turebe ibyo Bibiliya ivuga kuri Yuda, biraza kudufasha gusuzuma icyo kibazo cy'ingorabahizi.

Ubutumwa bwiza bwa Yohana, bugaragaza Yuda nk'Umujura: Yohana 12:4-6 [4]Nuko Yuda Isikariyota, umwe mu bigishwa be wendaga kumugambanira aravuga ati [5]“Ni iki gitumye aya mavuta atagurwa idenariyo magana atatu ngo bazifashishe abakene?” [6]Icyatumye avuga atyo si ukubabarira abakene, ahubwo ni uko yari umujura kandi ari we wari ufite umufuka w’impiya, akiba ibyo babikagamo." Bidashidikanywaho, Yuda agaragazwa nk'uwari asanzwe n'ubundi ari umujura, kuko yibaga amafaranga yashyirwaga mu gafuka k'intumwa kuko ni we wakabikaga.

Uretse na Yohana ugaragaza ko Yuda yari asanzwe ari umujura, na Matayo agaragaza ko Yuda ubwe ari we wagiye kubwira abanzi ba yesu ko nibamuha ibiguzi azabayobora akabereka aho Yesu ari kugirango babashe kumufata. Matayo 26:14-16 "Hanyuma umwe muri abo cumi na babiri witwaga Yuda Isikariyota, asanga abatambyi bakuru 15 arababaza ati “Mwampa iki nkamubagenzereza?” Bamugerera ibice by'ifeza mirongo itatu, 16aherako ashaka uburyo yamubagenzereza."

Ubwo Yesu yatangiraga umurimo, Yuda yiboneye n'amaso ye ubuzima n'ibikorwa bya Yesu igihe cy'imyaka irenga gato kuri itatu: Yiboneye Yesu azura abapfuye, yamwiboneye ahumura impumyi, akiza indwara.... ibitangaza byose Yesu yakoze Yuda yarabyiboneraga, kandi yaniyumviye Yesu ahamya ko ari we Messiya. Yuda yiboneye Abayuda bashaka kwica Yesu kenshi ariko Yesu akabaca mu myanya y'intoki mu buryo butumvikana uburyo yabacika. Ibi byose Yuda yabishyize hamwe, nk'umuntu wakundaga amafaranga cyane, aravuga ati "aya mafaranga ndayarya kandi ntibari bumushobore, nk'ibisanzwe". Yuda yatunguwe cyane no kubona Yesu, kuri iyi ncuro, atabacika nk'ibisanzwe, ndetse ntanirwaneho, ahubwo bakamuta muri yombi nk'abandi bantu bose. Ibi byatunguye Yuda ananirwa kubyakira, ndetse Bibiriya ivuga ko ya mafaranga bari bamuhaye yayasubije ba nyirayo, gusa banga kuyakira ayajugunya mu rusengero.

Ese Yuda yari afite amahitamo? Cyangwa yari yararemewe kuzagambanira Yesu ku buryo nta mahitamo yari afite? Ese koko yari yararemewe kurimbuka?

Iki ni ikibazo gikomeye kandi kitigeze kivugwaho rumwe. Abahamya ko Yuda yari yararemewe kurimbuka ku buryo nta mahitamo yari afite, babishingira ahanini kuri iri jambo ryavuzwe na Yesu ubwe: Yohana 17:12 ' Nkiri kumwe na bo, nabarindiraga mu izina ryawe wampaye. Narabarinze, muri bo nta muntu wabuze ngo arimbuke, keretse umwana wo kurimbuka ngo ibyanditswe bisohore. Yohana 17:12 "Nkiri kumwe na bo, nabarindiraga mu izina ryawe wampaye. Narabarinze, muri bo nta muntu wabuze ngo arimbuke, keretse umwana wo kurimbuka ngo ibyanditswe bisohore.". Abatemera ko Yuda yaremewe kurimbuka, na bo babishingira ku byanditswe byinshi bigaragaza ko nta muntu n'umwe waremewe kurimbuka, ahubwo buri wese akoresha amahitamo ye yo kumvira cuangwa gusuzugura Imana, ndetse bakagaragaza ko Yuda atavukanye satani muri we, ahubwo Bibiliya igaragaza neza igihe satani yamwinjiriyemo: Igihe Yuda yafataga umwanzuro wo kujya gusaba amafaranga kugirango abashe kugambanira Yesu, icyo ni cyo gihe satani yamwinjiriyemo, naho ubundi mbere yaho, yari umuntu nk'abandi. Luka 22:1-6 "Nuko iminsi mikuru y'imitsima idasembuwe yitwa Pasika, yendaga gusohora. 2Abatambyi bakuru n'abanditsi bashaka uko bamwica, kuko batinyaga rubanda.3Satani yinjira muri Yuda witwaga Isikariyota, yari mu mubare w'abo cumi na babiri. 4Aragenda avugana n'abatambyi bakuru n'abatware b'abasirikare, uko azamubagenzereza. 5Baranezerwa basezerana kumuha ifeza. 6Aremera maze ashaka uburyo yamubagenzereza, rubanda rudahari."

Ubusanzwe, imikorere ya satani n'abadayimoni irazwi: Ni byo ko umuntu wese avukana kamere ibogamira ku cyaha, ariko nanone satani (cyangwa dayimoni) ntashobora kwinjira mu muntu ku ngufu, ahubwo igihe cyose ategereza ko umuntu afungura umuryango runaka bakabona ubwinjira bakamwarikomo. (Ibyitwa mu ndimi z'amahanga "Possession").

Iyo witegereje neza imibereho ya Yuda, usanga atararemwe nka robot cyangwa telecommande, ahubwo usanga mbere y'uko yinjirwamo na satani, yari umuntu nk'abandi wari ufite amahitamo. Ingero zirahari:

- Kimwe n;abandi Bayuda, Yuda yari ategereje Messiya w'igihangange mw'isi nk'uko twabivuze haruguru. Ubwo Yesu yagaragarizaga abantu ko ubwami bwe atari ubw'iyi si, benshi mu bigishwa be bahisemo kumureka bisubirira mu byabo kuko bumva ga Yesu ntacyo azabagezaho. Yohana 6:66-67 "Benshi mu bigishwa be bahera ubwo basubira inyuma, barorera kugendana na we. 67Yesu abaza abigishwa be cumi na babiri ati “Kandi namwe murashaka kugenda?”. Abahisemo kwigendera, babikoze kubw'amahitamo yabo, n'abahisemo gusigara babihisemo kubw'amahitamo yabo. Yuda yari mu bahisemo kugumana na Yesu, bigaragaza ko kugeza hano yari agifite amahitamo nk'abandi. Yuda yakomeje kwibwira ko ko hari ubutunzi bukomeye azakura Yesu amaherezo, ahitamo kwihangana akaguma mu ntumwa 12 atekereza ko Yesu ashobora kuzahindura imyumvire agakora ibyo abenshi bari bamutegerejeho byo kwemera akaba Umwami w'Abayuda akoresheje imbaraga, bityo abigishwe be bakaboneraho na bo kuba abantu bakomeye.

Bidatinze, ubuzima bwa Yuda bwaje guhindukira i Betaniya: Ahangaha Yesu yasutsweho amavuta na Mariya, Yuda ababazwa cyane no kubona amavuta nk'ayo y'agaciro amenwa hasi. Aha ni ho irari rye ryamurushije imbaraga, bavuye ahongaho ahitira ku batambyi bakuru, abasaba ko bamuha ibiguzi akabarangira aho Yesu ari kugirango bamufate. Ahongaho rwose yari yarangije gufungura imiryango tayari, ahinduka ibiryo byoroshye bya satani. satani amwinjiramo nk'uko twabibonye hejuru. (Luka 22:3).

Yuda yari yarangije kwiyemeza, kugeza ubwo bitumvikana ukuntu kuri uwo mugoroba, yicaranye na Yesu ku meza basangira ifunguro rya nyuma, kandi abizi neza ko yibitseho ibiguzi by'ubugambayi! Umutima we wari warangije kuba akahebwe tayali!

Ibi byanditswe byose, bituma tubasha guhamya ko Yuda ataremewe kurimbuka, ahubwo Yahisemo kwishyira mu ruhande rwa satani yohejwe no gukunda amafaranga, bituma arimbuka. Gusa ibi bizamura ikindi kibazo:

Ese Yesu ajya gutoranya Yuda yari abizi neza ko azamugambanira? Niba yari abizi, kuki yamutoranije mu ntumwa ze?

Mu byo twizera mu matorero y'abavutse ubwa kabiri bayoborwa na Mwuka Wera. (Doctrine), harimo ihame ry'uko Yesu ari Imana. Ntabwo ari Imana ubu gusa, ahubwo n'igihe yari mu isi mu mubiri yari Imana 100%, akaba n'umuntu 100%. (Ushobora gukanda hano ukareba ibyo twizera _ Doctrine). Yesu akiri mu isi, Bibiliya ihamya ko yari azi ibiri mu bantu atarinze kubibwirwa. Yohana 2:24-25 , 24ariko Yesu ntiyabiringira kuko yari azi abantu bose. 25Ntiyagombaga kubwirwa iby'abantu, kuko ubwe yari azi ibibarimo. YEGO rwose nta gushidikanya, ubwo Yesu yatoranyaga Yuda yari azi neza ko azamugambanira. None se niba yari abizi kuki yamutoranije? Iki kibazo kwibazwaho cyane, ariko igisubizo cyacyo kiri bugufi kandi kiroroshye: Kuba Imana izi ko ikintu kibi kiri bube, ntibisobanuye ko ari yo yateye ko ikintu kibi kiba. Ingero ni nyinshi.

Ingero: Imana yari izi neza ko Dawidi azakora icyaha cy'ubusambanyi, ariko ntabwo bisobanuye ko ari yo yamuteye gukora icyo cyaha. Ntibibaho ko Imana yakoshya umuntu gukora icyaha, ibi rwose ni ibyanditwe byera: Yakobo 1:13 "Umuntu niyoshywa gukora ibyaha ye kuvuga ati “Imana ni yo inyoheje”, kuko bidashoboka ko Imana yoshywa n'ibibi, cyangwa ngo na yo igire uwo ibyohesha.".

N'uyu munsi ni ko bikimeze: Iyo umuntu ari mu nzira zo gukora icyaha, Imana iba yabimenye mbere ko uwo muntu afite irari ryo gukora icyaha. iyo uwo muntu akijijwe, Umwuka wera agerageza kumwongorera no kumugira inama ngo areke gukora icyo cyaha; iyo adakijijwe, umutima-nama we uramubwira. Gusa kuko Imana yacu idatwaza igitugu, iyo uwo muntu yamaramaje gukora icyaha aragikora bigakunda, gusa kuba Imana yari ibizi ko ari bugikore ntibisobanuye ko ari yo yamuteye kugikora; oya rwose. Na Yuda ni ko byamugendekeye: Imana yari ibizi ko azagambana, ariko ntibisobanuye ko ari yo yamuteye kugambana. Ibi rwose bikwiriye gusobanuka kandi bigatandukanywa n'ibintu abantu bamwe bakunze kwita "Predestination", ni ukuvuga ngo ibintu biba ku bantu, bakitwaza ngo "ubwo nyine ni ko Imana yabishatse, ngo ibyo byaranditswe kuva kera ntaho nari kubicikira...." OYA si byo. Imana yari ibizi ko bizabaho, ariko ntibisobanuye ko ari yo yabishyizeho, ntabwo Imana ishobora gutambika icyaha imbere y'umuntu, OYA rwose, Bibiliya itubwira neza uko umuntu akora icyaha: Yakobo 1:13-16 "muntu niyoshywa gukora ibyaha ye kuvuga ati “Imana ni yo inyoheje”, kuko bidashoboka ko Imana yoshywa n’ibibi, cyangwa ngo na yo igire uwo ibyohesha. [14]Ahubwo umuntu wese yoshywa iyo akuruwe n’ibyo ararikiye bimushukashuka. [15]Nuko iryo rari riratwita rikabyara ibyaha, ibyaha na byo bimaze gukura bikabyara urupfu. [16]Ntimukayobe bene Data bakundwa."

Ngirango birasobanutse rwose, Bibiliya ntica ku ruhande: Ntibishoboka ko Imana ubwayo yaba yaroheje Yuda gukora icyaha ngo ibyahanuwe bikunde bisohore: NTIBISHOBOKA. Niba Yuda yari umuntu nk'abandi, ntibishoboka ko yaba yararemewe kuribuka. Ibyamubayeho Imana yari ibizi mbere, ni yo mpamvu Yesu yamwise "UMWANA WO KURIMBUKA", ariko kuba Imana yari ibizi ntisobanuye ko ari yo yabiteye. Uretse na Yuda Iscariot, hari n'abandi bana BO KURIMBUKA BENSHI: Abo ni babandi amazina yabo atanditse mu gitabo cy'ubugingo, kandi kuba batanditsemo si uko Imana yanze kubandikamo kandi bo babishaka, ahubwo ni uko bo ubwabo banze kwandikisha amazina yabo kandi ari ubuntu. Yuda yari afite amahitamo kimwe n'abandi bose. Aho guhitamo kwiyahura iyo ahitamo kwihana no gusaba imbabazi, aba yarababariwe. Abahanga benshi bahamya ko icyaha Petero yakoze (Kwihakana Yesu) cyari kibi kurusha icya Yuda, gusa Petero we yarihannye arababarirwa, Yuda ahitamo kwiyahura aho kwihana. Muri macye, kurimbuka kwa Yuda byashyirwa kuri satani na Yuda ubwe, ntibyabazwa Imana.

Murakoze, Imana ibahe umugisha

Answered: SPECIAL: Sobanukirwa na buri wese mu ntumwa za Yesu: TOMASI

Thu, 06 Feb 2025 17:43:52 +0000

Tomasi yari umwe mu ntumwa 12 za Yesu, Ubutumwa bwiza bwa Yohana bukaba bunagaragaza ko uyu Tomasi yanitwaga Didumo. (Yohana 11:16; 20:24; 21:2). Kimwe n'izindi ntumwa, Tomasi yari Umunyagalelaya.

Tomasi ntavugwaho byinshi muri Bibiliya, gusa bikeya avugwaho agaragara nk'umugabo utarapfaga kwemera atabonye, akaba yari mwene ba bantu bitega ibibi gusa (Pessimistic), ariko ku rundi ruhande agaragara nk'umuntu wari uzi gufata imyanzuro ihamye no kwiyemeza.

Nk'urugero, ubwo Yesu yari abwiye abigishwa be ko Lazaro atapfuye, ndetse akabamenyesha ko agiye mu rugo kwa Lazaro, Tomasi yahise abwira abandi bigishwa ati: "Natwe tugende dupfane na we". (Yohana 11:14-16 "Yesu ni ko kuberurira ati “Lazaro yarapfuye. [15]Nanjye nezerewe ku bwanyu kuko ntari mpari, kugira ngo noneho mwizere. Nimuze tujye aho ari.” [16]Toma witwaga Didumo abwira abigishwa bagenzi be ati “Natwe tugende dupfane na we.”

==> Kuba Tomasi yaravugaga ati "Tugende dupfane na we", bamwe bavuga ko Tomasi yavugaga ngo bagende bapfane na Lazaro, ariko hari n'abavuga ko Tomasi yabwiraga izindi ntumwa ati "Tugende dupfane na Yesu". Muri macye, Tomasi yaba yari yarangije kwakira ko Yesu najya kwa Lazaro, abanzi be bari bumwicireyo! Ariko basi akavuga ati "Kumwica ko bari bumwice, so dupfe kujyana na we na twe dupfane na we!"

==> Ahandi, Tomasi agaragara nk'umuntu utarapfaga gusobanukirwa n'inyigisho zijimije za Yesu, ariko kandi ntiyemere kugendana ipfunwe ahubwo akabaza: Yohana14:3-5 "Kandi ubwo ngiye kubategurira ahanyu, nzagaruka mbajyane iwanjye, ngo aho ndi namwe muzabeyo. [4]Kandi aho njya, inzira murayizi.” [5]Toma aramubwira ati “Databuja, ntituzi aho ujya, inzira twayibwirwa n’iki?”

==>Ariko cyane cyane, Tomasi azwi nk'Umwemeragato", kuko ntiyajyaga apfa kwemera ibyo atiboneye n'amaso ye. Ibi ahanini yabigaragaje ubwo bamubwiraga ko Yesu yazutse, na we ati "Nintamwibonera sindi bubyemere!" Yohana 20:24-25 "Ariko Toma umwe muri abo cumi na babiri witwaga Didumo, ntiyari kumwe na bo ubwo Yesu yazaga. [25]Ni cyo cyatumye abandi bigishwa bamubwira bati “Tubonye Umwami!” Na we arabasubiza ati “Nintabona inkovu z’imbereri mu biganza bye ngo nzishyiremo urutoki rwanjye, sinshyire n’ikiganza cyanjye mu rubavu rwe sinzemera.”

Gusa Yesu mu bugwaneza bwe, ntiyigeze aciraho iteka Tomasi kubera kutizera kwe, ahubwo byabaye ngombwa ko agaruka kwiyereka intumwa ze na Tomasi noneho ahari, aha rwose Tomasi yahise yizera, ndetse yatura ijambo rikomeye rinagize inkingi y'ukwizera kwacu: Yesu ni Umwami kandi ni Imana. Yego yabaye uwa nyumwa mu kwizera ko Yesu yazutse, ariko yabaye uwa mbere mu kwatura ibyo tugomba kwatura uyu munsi kugirango dukizwe! Yohana 20:27-29 "Maze abwira Toma ati “Zana hano urutoki rwawe urebe ibiganza byanjye, kandi uzane n’ikiganza cyawe ugishyire mu rubavu rwanjye, kandi we kuba utizera ahubwo ube uwizeye.” [28]Toma aramusubiza ati “Mwami wanjye! Kandi Mana yanjye!” [29]Yesu aramubwira ati “Wijejwe n’uko umbonye, hahirwa abizeye batambonye.”

==> Abahanga mu gusesengura amazina, bavuga ko izina rya kabiri rya Tomasi ari ryo "Didumo" ngo risobanura mu cyongereza "Twin" cyangwa "Jumeau" mu gifaransa. Si uko Tomasi yagiraga impanga ye bavaga indimwe, ahubwo ngo muri we hari harimo abantu babibiri batandukanye: Umwizera utizera! Ibi ni ibintu bibiri ubusanzwe bihabanye bitakagombye kuba mu muntu umwe, ariko biratangaje kuko n'uyu munsi mu Itorero rya Kristo harimo Abizera benshi batizera. Imana itubabarire kandi idufashe, kuko ntibishoboka ko twayinezeza tudafite kwizera. Abaheburayo 11:6 "Ariko utizera ntibishoboka ko ayinezeza, kuko uwegera Imana akwiriye kwizera yuko iriho, ikagororera abayishaka.

Bibiliya ntitinda ku mateka ya Tomasi nyuma ya Yesu, gusa amateka yo hanze ya Bibiliya avuga ko nyuma ya Yesu, Tomasi yaba yarakomeje umurimo w'ivugabutumwa cyane cyane mu bice byiganjemo Ubuhinde bw'ubu, ari naho yiciwe ahowe ubutumwa bwiza.

Imana yacu idufashe kwigira kuri aba batubanjirije. AMEN

Answered: SPECIAL: Sobanukirwa na buri wese mu ntumwa za Yesu: MATAYO

Sun, 02 Feb 2025 10:02:28 +0000

NOTE: Iri zina "Matayo" rijya rinandikwa mu buryo butandukanye muri za versions za Bibiliya zitandukanye. Ubusanzwe rikomoka ku izina ry'ikigereki "Matthaios" rikaba risobanura "Impano ya JHVH". Muri za versions zitandukanye iri zina ryagiye ryandikwa bitandukanye, hari aho usanga bandika "Matthias, cyangwa Mattathias".

Matayo yari intumwa ya Yesu, akaba n'umwe muri babiri banditse amavanjili kandi bari n'intumwa za Yesu, we na Yohana mwene Zebedayo kuko Luka na Mariko bo ntibari mu ntumwa za Yesu. Matayo yakomoka i Galilaya, akaba yarahamagawe akorera akazi i Kaperinawumu. Matayo we ubwe, mu ivanjili yanditse, avuga ko mbere yo gukamagarwa na Yesu yari asanzwe ari umwakirizi w'imisoro (Umukoresha w'ikoro). Matayo 9:9 "Yesu avayo, akigenda abona umuntu witwaga Matayo yicaye aho yakoresherezaga ikoro, aramubwira ati “Nkurikira.” Arahaguruka, aramukurikira.. Abandi banditsi b'amavanjili Mariko na Luka, bo banagaragaza ko uyu Matayo yanitwaga "LEVI" (Mariko 2:14, Luka 5:29). Mariko we anongeraho ko uyu Levi yari mwene Alufayo. Mariko 2:14 "Nuko akigenda abona Lewi mwene Alufayo yicaye aho yakoresherezaga ikoro, aramubwira ati “Nkurikira.”

Nk'uko Bibiliya ibigaragaza, Matayo yari yibereye ku kazi ke ko kwakira imisoro ubwo Yesu yamuhamagaraga. Matayo yahise asiga byose nta kindi yitayeho, ahita akurikira Yesu, n'ubwo aka kazi ubusanzwe kari akazi kubashywe, byongeyeho ko Matayo yagakoreraga i Kaperinawumu, umujyi wari wubashywe icyo gihe kuko wari ku nkombe z'ikiyaga cy'i Galilaya, ahahuriraga ubucuruzi bwaturukaga mu mijyi ikomeye n'ibihugu bikomeye.

Muri icyo gihe, abasoresha ntibakundwaga na benewabo b'Abayuda, kuko abakoraga aka kazi byabasabaga kenshi guhura n'Abaroma basuzugurwaga kandi bakanenwa n'Abayuda. Imbere y'Abayuda, Abaroma bagaragara n'abanduye, ku buryo n'ababakoreraga akazi na bo bafatwa nk'abanduye kabone n'ubwo baba Abayuda, gusa icyo ntikijya gihagarika Yesu, n'iyo abandi bakubona nk'uwanduye We si ko akubona, ntarobanura ku butoni. mu mahanga yose ukora ibyo gukiranuka iramwemera. (Ibyakozwe n'Intumwa 10:34-35 Petero aterura amagambo ati “Ni ukuri menye yuko Imana itarobanura ku butoni, [35]ahubwo mu mahanga yose uyubaha agakora ibyo gukiranuka iramwemera.

Matayo amaze guhamagarwa, yatumiye Yesu amujyana iwe, amutekeshereza ibyokurya barasangira, yari yanatumiye abandi basoresha bagenze be benshi, icyo gikorwa cyatumye Abafarisayo bitotomba, bibaza impamvu Yesu asangira n'abanyabyaha. Aha ni ho Yesu yabasubirije ati "Abazima si bo bakwiriye umuvuzi, keretse abarwayi". (Luka 5:27-32)

Nyuma y'uyu munsi mukuru yateguriye Yesu agihamagarwa, Matayo ntiyongera kuvugwa, avugwa gusa mu yandi mavanjili mu mazina y'intumwa, ariko mu mavanjili yose uko ari ane nta handi hagaragara Matayo agira icyo avuga cyangwa agira icyo akora.

Mu ntumwa zose 12, Matayo ni we wenyine ugaragazwa n'ibyanditswe byera nk'umukozi wa Leta y'icyo gihe. (Leta y'Abaroma).

UMWIHARIKO: Igitabo cya Matayo, kigaragaza mu buryo budasubirwaho ukuntu Umwuka yahumekaga ibyanditswe byera dusoma uyu munsi: Ntabwo yaguhagararaga hejuru ngo akwereke aho ushyira akadomo n'akitso, ahubwo yaguhaga igitekerezo-rusange by'ibyo wandika, ubundi ukandika muri style yawe. Gihamya: Mu banditsi b'amavanili uko ari 4, Matayo ni we wenyine uvuga ko Yuda yishyuwe ibice by'ifeza 30 kugirango agambanire Yesu. Abandi banditsi vavuga ko Yuda yahawe ibiguzi, ariko ntibavuge umubare wabyo. Ariko Matayo, (nk'umuntu wari usanzwe ukora mu mafaraga), ntiyari kureka kuvuga umubare w'ibi biguzi! Ni kimwe n'uko Luka (N'ubwo atari mu ntumwa za Yesu) ni we wenyine uvuga ko igihe Yesu yari muri Getsemane abasirikare bakaza kumufata, Petero yaciye umuntu ugutwi, Yesu ahita agusubizaho. Luka ni we wenyine uvuga ko Yesu yahise agusubizaho. Abandi banditsi b'Amavanjili bavuga ko Petero yaciye umuntu ugutwi bakarekera aho, ibindi ntibabyitayeho, ariko kuko Luka yari umuganga, ntiyari kureka kwandika aka kantu kajyanye n'ubuvuzi!

Bibiliya ntivuga iby'amaherezo ya Matayo, gusa ibitabo by'amateka hanze ya Bibiliya bivuga ko nyuma ya Yesu, Matayo yaba yarakomeje umurimo w'ivugabutumwa mu bice bitandukanye, ngo yaba yarageze i Burayi muri za Espagne no muri Africa muri za Ethiopia, aha binavugwa ko ari ho yaba yariciwe azira ubutumwa bwiza.

Imana ikomeze idufashe kwigira kuri aba batubanjirije

Answered: SPECIAL: Sobanukirwa na buri wese mu ntumwa za Yesu: YAKOBO mwene Zebedayo

Thu, 30 Jan 2025 18:30:54 +0000

Muri Bibiliya Yera, Isezerano rishya, dusangamo abantu nibura bane bitwaga izina YAKOBO. Iri ni izina ryitwagwa n'abantu benshi mu gihe cya Yesu, gusa Yakobo tugiye kuvuga hano ni mwene Zebedayo, akaba yaravaga inda imwe na Yohana Intumwa.

Mu ntumwa za Yesu dusangamo ba Yakobo babiri. Hari uyu Yakobo mwene Zebedayo, hakaba n'undi Yakobo mwene Alufayo. Kugirango babashe kubatandukanya, abasesenguzi benshi bita Yakobo mwene Zebedayo "Yakobo Mukuru", naho Yakobo mwene Alufayo bakamwita "Yakobo Muto"

Bibiliya ntitinda ku mateka asanzwe y'Intumwa Yakobo, bikeya imuvugaho yerekana ko yari Mwene Zebedayo na nyina witwaga Salome. Bakomokaga i Galilaya, ubwo yahamagarwa bakaba bari batuye i Kaperinawumu. Bibiliya igaragaza ko Zebedayo yakoraga umwuga w'uburobyi afatanije n'abahungu be Yakobo na Yohana, ndetse bakaba bari bafite n'abandi bakozi. (Mariko 1:20 "Uwo mwanya arabahamagara, basiga se Zebedayo mu bwato hamwe n’abakozi be, baramukurikira." Ibi bigaragaza ko umuryango wa Yakobo utari ukennye. Ntabwo bizwi neza uwari mukuru ari inde hagati ya Yohana na Yakobo, ariko kubera ko akenshi Yakobo ari we uvugwa mbere, birashoboka ko yaba ari we wari mukuru

Salome (Nyina wa Yakobo na Yohana), avugwa mu bagore bakurikiraga Yesu bakamukorera (Matayo 27:66 ; Luka 8:8). Uyu mugore Salome yari umugore w'ishyaka, dore ko ari muri bacyeya bajyanye na yesu kugera i Gologota ku musaraba, ndetse nta n'uwakwirengagiza uburyo yigeze kwisabira Yesu ko nagera mu bwami bwe, ngo azashyire abahungu be (Yohana na Yakobo) umwe iburyo bwe undi i bumoso (Matayo 20:20-28). Icyo gihe Yesu yaramusubije ati "Ntimuzi icyo musaba". Abasesenguzi benshi bahamya ko Yesu yavuze atyo, kuko Salome yari asabiye umwana umwe kuzicara ibumoso, mu gihe mu mvugo y'Ijuru ibumoso hazajya abarimbuka, iburyo hakajya ab'ubugingo buhoraho. Gusa Imana ijya idufasha kugorora amasengesho yacu. kuko burya mu by'ukuri ntituzi uko dukwiriye gusenga bya nyabyo wa mugani w'Intumwa za Yesu.

BOWANERIGE: ABANA B'INKUBA:

Aba bene Zebedayo, Yohana na Yakobo, na bo ubwabo bigaragara nk'abari bafite ishyaka ritwika kimwe n'irya nyina: Igihe kimwe Yesu yari avuye i Galilaya yerekeje i Yerusalemu, asaba icumbi i Samariya ariko ab'i Samariya bararimwima. Yakobo na Yohana kubyakira byArabagoye, basaba Yesu ko yabemerera bagategeka umuriro ngo uve mu Ijuru urimbure ab'i Samariya. Birumvikana ko Yesu atabibemereye, kuko impuwe ze n'imbabazi ze birenze kure imyumvire ya bene Zebedayo! Dore uko Bibiliya ibivuga: Luka 9:51-55 "Nuko iminsi ye yo kuzamurwa mu ijuru yenda gusohora, agambirira kujya i Yerusalemu abikomeje cyane. [52]Atuma integuza imbere ye, ziragenda zijya mu kirorero cy’Abasamariya kumuteguriza. [53]Ariko ntibamwakira kuko yari yerekeye i Yerusalemu. [54]Abigishwa be, Yakobo na Yohana, babibonye baramubaza bati “Databuja, urashaka ko dutegeka umuriro ngo uve mu ijuru, ubarimbure nk’uko Eliya yabikoze?” [55]Ariko arahindukira arabacyaha ati “Ntimuzi umwuka ubarimo uwo ari wo, kuko Umwana w’umuntu ataje kurimbura abantu, ahubwo yaje kubakiza.”

Ni ngombwa cyane gutandukanya uyu Yakobo mwene Zebedayo na Yakobo wavaga inda imwe na Yesu, uyu muvandimwe wa yesu akaba ari na we wanditse urwandiko rwa Yakobo tubona muri Bibiliya, ariko uyu Yakobo mwene Zebedayo we nta gitabo kizwi yaba yaranditse muri Bibiliya. Ndetse uretse no kwandika igitabo icyo aricyo cyose, uyu Yakobo ntakunze kugaragarara agira icyo avuga muri Bibiliya wenyine, mu ncuro zose yagiye agaragara agira icyo avuga, avugirwa icyarimwe na mwene se Yohana.

URUPFU RWA YAKOBO

Mu ntumwa 12 za Yesu, Bibiliya ivuga impfu z'intumwa ebyiri gusa: Yuda na Yakobo mwene Zebedayo. Mu gitabo cy'ibyakozwe n'intumwa, Bibiliya ivuga itya ibyerekeye urupfu rwa Yakobo mwene Zebedayo: Ibyakozwe 12:1-2 "Nuko muri icyo gihe Umwami Herode afatira abo mu Itorero bamwe kubagirira nabi. [2]Yicisha Yakobo inkota, mwene se wa Yohana."

Nta rujijo ruhari, Yakobo mwene se wa Yohana yapfuye yicishijwe inkota ku itegeko rya Herode. Bivugwa ko hari ahagana mu myaka ya 42-44 nyuma ya Yesu, ndetse uyu Yohana ni uwa mbere mu bishwe bahowe ubutumwa bwiza.

Imana idufashe kwigira ku mibereho y'aba batubanjirije.

Imana ibahe umugisha

Answered: SPECIAL: Sobanukirwa na buri wese mu ntumwa za Yesu: YOHANA

Tue, 28 Jan 2025 17:53:41 +0000

Muri Bibiliya Yera hagaragaramo ba Yohana batandukanye bagera kuri batanu, uyu Yohana tugiye kuvuga hano ni intumwa ya Yesu, akaba yaravukanaga n'indi ntumwa ya Yesu yitwaga Yakobo.

Bibiliya ntitinda ku mateka asanzwe y'Intumwa Yohana, bikeya imuvugaho yerekana ko yari Mwene Zebedayo na nyina witwaga Salome. Bakomokaga i Galilaya, ubwo yahamagarwa bakaba bari batuye i Kaperinawumu. Bibiliya igaragaza ko Zebedayo yakoraga umwuga w'uburobyi afatanije n'abahungu be Yohana na yakobo, ndetse bakaba bari bafite n'abandi bakozi. (Mariko 1:20 "Uwo mwanya arabahamagara, basiga se Zebedayo mu bwato hamwe n’abakozi be, baramukurikira." Ibi bigaragaza ko umuryango wa Yohana utari ukennye. Ntabwo bizwi neza uwari mukuru ari inde hagati ya Yohana na Yakobo, ariko kubera ko akenshi Yakobo ari we uvugwa mbere, birashoboka ko yaba ari we wari mukuru

Salome (Nyina wa Yohana), avugwa mu bagore bakurikiraga Yesu bakamukorera (Matayo 27:66 ; Luka 8:8). Salome nyina wa Yohana yari umugore w'ishyaka, dore ko ari muri bacyeya bajyanye na yesu kugera i Gologota ku musaraba, ndetse nta n'uwakwirengagiza uburyo yigeze kwisabira Yesu ko nagera mu bwami bwe, ngo azashyire abahungu be (Yohana na yakobo) umwe iburyo bwe undi i bumoso (Matayo 20:20-28). Icyo gihe Yesu yaramusubije ati "Ntimuzi icyo musaba". Abasesenguzi benshi bahamya ko Yesu yavuze atyo, kuko Salome yari asabiye umwana umwe kuzicara ibumoso, mu gihe mu mvugo y'Ijuru ibumoso hazajya abarimbuka, iburyo hakajya ab'ubugingo buhoraho. Gusa Imana ijya idufasha kugorora amasengesho yacu. kuko burya mu by'ukuri ntituzi uko dukwiriye gusenga bya nyabyo wa mugani w'Intumwa za Yesu.

BOWANERIGE: ABANA B'INKUBA:

UMWIGISHWA YESU YAKUNDAGA

Ubusanzwe, Yesu yagiraga abandi bigishwa 70 (Luka 10:1). Muri aba, yatoranyijemo n'abandi 12 yise "Intumwa" (Luka 6:13). Muri aba 12, yagiragamo abandi batatu yakundaga kujyana mu bihe by'umwihariko. Abo ni Yohana na Yakobo na Petero. Ndetse no muri aba batatu, yagiragamo umwe yakundaga cyane, uwo nta wundi ni Yohana. Ni byo: Ubutumwa bwiza bwa Yohana buvuga nibura incuro 5 iby'uyu mwigishwa Yesu yakundaga. (Yohana 13:23; 19:26; 20:2; 21:7; 21:20-25). Ubusanzwe, Yohana ntakunze kugaragara agira icyo avuga mu mavanjili. kuri iki atandukanye cyane na Petero ugaragara avuga cyane, mu gihe Yohana we muri bibiliya yose agaragara avuga incuro nkeya cyane (Aho avuga wenyine), nk'urugero, aho yavugaga ati: Luka 9:49-50 "Yohana aramusubiza ati “Databuja, twabonye umuntu wirukana abadayimoni mu izina ryawe turamubuza kuko atadukurikira.” [50]Yesu aramubwira ati “Ntimumubuze kuko utari umwanzi wanyu aba ari mu ruhande rwanyu.” Ahandi aho Yohana avuga, avugirwa icyarimwe na mwene se Yakobo cyangwa na nyina Salome. Nubwo Yohana atavuga cyane muri Bibiliya, yari afite icyamurangaga gitandukanye n'iby'izindi ntumwa: Iyo Yesu yabaga yicaranye n'intumwa ze, Yohana yabaga aryamye mu gituza cya Yesu! Uyu ni umutima w'urukundo no kuramya, ibintu Imana yishimira cyane. (Yohana 13:23, 25)

YOHANA, MU GIHE ABANDI BIGISHWA BATATANYE

Mu bihe bikomeye, ubwo Yesu yafatwaga, agacirwa urubanza, akabambwa ku musaraba, izindi ntumwa zose zakijije amagara yazo, ziratatana buri wese aca ukwe nk'uko byari byarahanuwe. Matayo 26:31 Maze Yesu arababwira ati “Mwebwe mwese iri joro ibyanjye birabahemuza, kuko byanditswe ngo ‘Nzakubita umwungeri, umukumbi w’intama usandare.’ Mu ntumwa zose za Yesu, Yohana ni we wenyine wabashije kugendana na Yesu kugera i Gologota ku musaraba. Abandi bose ntawe uzi aho bari baherereye. Aha ku musaraba, ni ho Yesu yahereye Yohana inshingano zo kwita kuri nyina Mariya, ubwo yamubwiragati "Nguyu nyoko". (Yohana 19:27). Bibiliya ivuga ko uhereye uwo mwanya, "Yohana yahise ajyana Mariya iwe" [ajya kumwitaho]. [Twivugire gusa dutambuka ko n'ubwo Yohana yajyanye Mariya iwe, nta na hamwe Bibiliya ivuga ko abigishwa bigeze bambaza Mariya cyangwa ngo bamusabe kubavuganira kuri Yesu]

YOHANA NYUMA YA YESU

Yesu amaze gusubira mu Ijuru, igitabo cy'ibyakozwe n'intumwa kigaragaza cyane cyane Petero na Pawulo ku murimo. Gusa, Yohana na we agenda agaragara ari kumwe na Petero:

- Yohana yari kumwe na Petero ubwo bakirizaga ikirema ku muryango w'urusengero (Ibyakozwe 3)

- Yohana yari kumwe na Petero ubwo bafatwaga bagafungwa (Ibyakozwe 4)

- Izindi ncuro nyinshi, Yohana agenda agaragarana na petero mu gitabo cy'ibyakozwe n'intumwa.

AMAHEREZO YA YOHANA

Kimwe n'izindi ntumwa, Bibiliya ntitinda ku buryo intumwa zapfuye. Gusa bicye ivuga, ivuga ko Yakobo mwene se wa Yohana yicishijwe inkota na Herode. (Ibyakozwe 12). Ubusanzwe, Yesu yari yarahanuriye Yohana ko "azagumaho kugeza ubwo azazira (Yohana 21:22). Ubu buhanuzi, ababwumvise babusobanuye nabi ko Yohana ngo atazapfa, (Yohana 21:23) ariko si cyo Yesu yashakaga kuvuga. Nyuma y'urupfu rwa Yakobo, (Ubwo hari ahagana mu mwaka wa 44 nyuma ya Yesu), na nyuma y'itotezwa rikomeye ry'abizera ryabaye mu kinyejana cya mbere, amateka yo hanze ya Bibiliya avuga ko Yohana yaba yarerekeje muri Efeso aho yakomeje gukora umuriko w'ivugabutumwa kugeza mu busaza bwe, ku myaka ikabakaba 100. Itotezwa ntiryarangiriye aho: Bibiliya ivuga ko Yohana yajugunywe ku kirwa cya Patmos azira ubutumwa bwiza. Abamujugunyeho bibwiraga ko ari bupfireyo, ariko yagezeyo Ijuru rirakinguka, abona Yesu mu cyubahiro cye cyose, ndetse ni yo yandikiye igitabo cy'IBYAHISHUWE. Iri ni isomo rikomeye: Abantu bashobora kukujugunya bazi ko ibyawe birangiye, ariko bikaba aribwo bitangiye! AMEN.

Twarangiza tuvuga ko uyu Yohana ari we wanditse ibitabo bikurikira muri Bibiliya:

- Ubutumwa bwiza uko bwanditswe na Yohana

- Urwandio rwa 1 rwa Yohana

- Urwandiko rwa 2 rwa Yohana

- Urwandiko rwa 3 rwa Yohana

- Ibyahishuwe

NGUWO YOHANA, UMWIGISHWA YESU YAKUNDAGA CYANE. Imana idufashe, kugirango ubuzima bw'aba batubanjirije bubere inyigisho zo gutunganya imibereho yacu. AMEN.

Answered: SPECIAL: Sobanukirwa na buri wese mu ntumwa za Yesu: ANDEREYA

Thu, 23 Jan 2025 18:18:30 +0000

Andereya ni umwe mu ntumwa 12 za Yesu. Yavaga inda imwe na Petero, bombi bakaba bari bene Yona, bakaba barakomokaga i Betsayida hafi y'ikiyaga cya Genezareti, ariko ubwo Yesu yabahamagaraga bari batuye i Kaperinawumu aho bari batunzwe n'umwuga w'uburobyi mu kiyaga cya Genezareti.

Iyo witegereje neza uko Luka avuga mu gice cya 5 umurongo wa 9, usanga bishoboka cyane ko Andereye na Petero bafatanyaga uyu mwuga n'abandi bavandimwe babiri na bo baje kuba intumwa za Yesu. Abo ni Yakobo na Yohana bene Zebedayo. Luka abivuga atya: Luka 5:8-10 Simoni Petero ngo abibone atyo yikubita imbere ya Yesu ati “Va aho ndi Databuja, kuko ndi umunyabyaha!” [9]Kuko ubwe yari yumiwe n’abari kumwe na we bose babonye izo fi bafashe, [10]na Yakobo na Yohana bene Zebedayo bari bafatanije na Simoni na bo birabatangaza. Yesu abwira Simoni ati “Witinya, uhereye none uzajya uroba abantu.” [11]Bamaze kugeza amato yabo ku nkombe, basiga byose baramukurikira.

Mbere yo guhamagarwa, Andereya yari yarumvise inyigirho za Yohana Umubatiza, ndetse yari umwigishwa wa Yohana umubatiza. (Yohana 1:35, 40) Yohana Umubatiza ubwe ni we wabonye Yesu, abwira Andereya ati "Dore uwo mukwiye gukurikira". Uhereye ubwo, Andereya yahise ajya kuri Yesu areka Yohana Umubatiza kuko yiringiraga ko ashobora kuhabona inyigisho nshya.

Ukurikije ibivugwa muri Yohana 1:41, Andereya akimara kubona Yesu, yahise ajya kubwira umuvandimwe we Petero ati "Twabonye Messiya". Yohana 1:40-42 "Andereya mwene se wa Simoni Petero, yari umwe muri abo babiri bumvise Yohana bagakurikira Yesu. [41]Abanza kubona mwene se Simoni aramubwira ati “Twabonye Mesiya” (risobanurwa ngo: Kristo). [42]Amuzanira Yesu, na we aramwitegereza aramubwira ati “Uri Simoni mwene Yona, uzitwa Kefa.” (Risobanurwa ngo: ibuye)." Ibi ni byo bituma Andereya afatwa na benshi nk'umuvugabutumwa wa mbere wazanye umuntu kuri Yesu.

Uretse kuba yarazanye mwene se Petero kuri Yesu, Andereya ntakunze kuvugwa cyane mu mavanjili, gusa incuro nkeya avugwa, agaragara nibura incuro 2 azana abantu kuri Yesu: Nyuma yo kuzana Petero, Andereya yongera kugaragara azana umuhungu wari ufite imigati itanu n'ifi ebyiri, Yesu arabitubura ahaza abantu barenga 5,000. (Yohana 6:8). Andereya yongera kugaragara nanone avuganira kuri Yesu Abagiriki bifuzaga kureba Yesu (Yohana 12:20-22).

IBYO TWAMWIGIRAHO:

Izo ni zo nshuro Andereya agaragara mu mavanjili: Guhamagarwa, Kuzana abantu kuri Yesu. Andereya n'ubwo atavugwa cyane mu mavanjili, ariko kuri bicye avugwaho agaragara nk'umuntu utari ushishikajwe no kwigaragagaza cyane, ahubwo yari ashishikajwe no kuzana kuri Yesu abo yashoboraga kubwira bose.

AMAHEREZO YE:

Bibiliya ntivuga iby'amaherezo ya Andereya. Amateka yo hanze ya Bibiriya avuga ko nyuma y'aho Yesu asubiriye mu Ijuru, Andereya yaba yarakomeje kuvuga ubutumwa bwiza mu bice byitwa Scythes, (ariho umuntu yagenekereza ko ari Uburusiya bw'ubu), nyuma aza kurangiriza ivugabutumwa rye mu Bugiriki, aho yaba yarishwe abambwe ku musararaba ahitwa Patras, ngo yaba yaramaze ku musaraba iminsi 2 ahorogoma akomeza no kubwiriza ubutumwa bwiza ababaga baje kumushungera.

Iby'aba bakozi b'Imana batubanjirije bijye bitwigisha.

Imana Ibahe umugisha.

Answered: SPECIAL: Sobanukirwa na buri wese mu ntumwa za Yesu: PETERO

Sun, 22 Dec 2024 12:26:17 +0000

Petero ntiyavutse yitwa Petero. Iri ni izina yahawe na Yesu akimara kumuhamagara, ariko ababyeyi be bamwise Simoni.

1) KAVUKIRE
Simoni-Petero yavutse ku mubyeyi witwa Yona. (Yona ni kimwe na Yonasi, hari n'abavuga ko ari kimwe na Yohana). Mu ntumwa za Yesu, Petero yavukanaga n'indi ntumwa yitwaga Andereya, bombi bakaba bari bene Yona, bakaba baravukiye ahitwaga i Betsayida (Yohana 1:44), umujyi muto mu majyaruguru y'ikiyaga cya Tiberiyade, mu ntara ya Galilaya. Petero na Andereya mwene se bakuze ari abarobyi.

2) GUHAMAGARWA
Petero na Andereya mwene se bari abarobyi, Yesu akaba yarabahamagaye barakoraga umwuga w'uburobyi, bakaba bari batuye icyo gihe i Kaperinawumu (Mariko 1:21, 29). Icyo gihe Petero yabanaga na Andereya mwene se, na nyirabukwe. (Kuko Petero yari afite umugore (Mariko 1:30, 1 Abakorinto 9:5). Ibyanditswe byera bigaragaza ko Petero yaje kuri Yesu atumiwe na Andereya mwene se. Byagenze gutya: Yohana 1:40-42 "Andereya mwene se wa Simoni Petero, yari umwe muri abo babiri bumvise Yohana bagakurikira Yesu. [41]Abanza kubona mwene se Simoni aramubwira ati “Twabonye Mesiya” (risobanurwa ngo: Kristo). [42]Amuzanira Yesu, na we aramwitegereza aramubwira ati “Uri Simoni mwene Yona, uzitwa Kefa.” (Risobanurwa ngo: ibuye)." Nk'uko bigaragara muri ibi byanditswe, Yesu ubwe ni we wahinduriye Petero izina. Amuvana kuri Simoni yahawe n'ababebyeyi, amwita Petero. Abaseseseguzi b'ibisobanuro by'amazina bavuga ko "Simoni" bisobanura urubingo, "Petero" bigasobanura ibuye. Ibi na byo byari ubuhanuzi bukomeye ku muhamagaro wa Petero, kuko iyo witegereje kamere ya petero nk'uko tugiye kuyibona hasi, yari yoroshye nk'urubingo, ariko amaze kuzura Mwuka Wera yarakomeye nk'ibuye. Ibi rwose ni rya Jambo Imana yivugiye iti: Yesaya 42:3 "Urubingo rusadutse ntazaruvuna kandi n’urumuri rucumba ntazaruzimya, ahubwo azazana gukiranuka by’ukuri."

3) IMIBANIRE YE NA YESU N'ABANDI BIGISHWA MBERE YO KUZA KWA MWUKA WERA

Mbere yo kuzura Mwuka Wera, Petero agaragaza kamere nk'iy'abandi Bakristo bose bahuye na yesu ariko bakaba batarageze ku musaraba, bakaba bataruzuye Umwuka Wera ngo bahinduke rwose, bapfe kuri kamere babe ibyaremwe bishya. Muri group y'intumwa 12, Petero agaragara nk'uwashakaga gufata iya mbere buri gihe. Yarahubukaga cyane, yihutiraga gusubiza mbere y'abandi, ndetse yiyemeza ibyo atazashobora. Ingero ni nyinshi:

- Igihe Yesu yari mu kivunge cy'abantu bamubyiga, hari umugore wamukoze ku nshundura z'ikanzu, Yesu arabaza ati "Ninde unkozeho?". Abandi bose barahakana, uretse Petero, yahise abaza Yesu ati "Ni gute wabaza ugukozeho kandi ubona abantu bose bakubyiga? (Luka 8:45)

- Igihe Yesu yakarabyaga abigishwa be ibirenge, yakarabije abandi bose, ageze kuri Petero ashaka kwanga. Yesu arahatiriza, Petero ati "rero niba ri uko bimeze, ntabwo unyoza ibirenge gusa ahubwo ndakuramo imyenda unyuhagire! (Yohana 13:6-9)

- Petero yari yarumvise kenshi Yesu avuga ko azagambanirwa akicwa: Byateye Petero kujya agendana inkota ku itako, kuko yari yarimeje kuzarwanirira Yesu ntiyicwe, muri kwa kwiyemeza ahubutse yari yaramusezeranije ko uretse no kumurwanaho, ahubwo no muri gereza bazajyanamo, ndetse no mu rupfu! (Luka 22:31-33)

- Ibi Petero yongeye kubishimangira, abwira Yesu ko azamupfira! Yesu ni we waje aje gupfira Petero, ariko Petero we yari yiyimeje gupfira Yesu! (Yohana 13:36-38)

- Ahari gusezeranya Yesu ko azamurwanaho, ni byo byateye Petero guca ugutwi k'umuntu muri Getsemane mu bari baje gufata Yesu. Abahanga bavuga ko Petero yahushije, icyo yashakaga si ugutwi ahubwo ni ijosi! Ibi bigaragaza ukuntu Petero yari yiteguye kurwana intambara y'umubiri kurusha iy'Umwuka! (Yohana 18:10-11)

- Ikigaragaza ko Petero yiyemezaga ibyo atazashobora, ni ukuntu yahakanye agatsemba ko atazi Yesu, abwo Yesu yari ageze mu rubanza! (Matayo 26:74-75) (Ubundi abantu benshi bahamya ko icyaha Petero yakoze cyo kwihakana Yesu cyari cyibi kurusha icya Yuda wagambaniye Yesu. Itandukaniro gusa ni uko Petero akimara gucumura yarize akihana, Yuda we aho kwihana akiyahura)

- Petero urankunda? Petero yihakanye Yesu incuro 3. Byari ngombwa ko yatura izindi ncuro 3 ko akunda Yesu. Gusa Petero yababajwe no kuba Yesu amubaza izi ncuro 3 zose niba amukunda, ni cyo cyatumwe ku ncuro ya gatatu abwira yesu ati "Mwami, uzi byose, urabizi ko ngukunda!" (Yohana 21:15-17)

- Igihe Yesu yabazaga abigishwa abe ati "Abantu banyita nde"? Abandi bigishwa baracecetse, uretse Petero nk'uko byari bisanzwe, gusa kuri iyi ncuro yasubije neza, ku buryo igisubizo yatanze cyanatangaje Yesu aramubwira ati "Icyo gisubizo si icyawe, ahubwo ni ihishurirwa ugize rivuye mu Ijuru" (Matayo 16:15-17)

4) PETERO NYUMA YO KUZURA UMWUKA WERA

Ubwo Yesu yari hafi gusubira mu Ijuru, yasabye abigishwa be kutava i Yerusalemu kugeza igihe bazahererwa umufasha. Ni ko babigenje: Ku munsi wa 10 uhereye igihe Yesu yasubiriye mu Ijuru, ubwo ni kumsi wa 50 uhereye igihe yazukiye, habayeho Pentekote ya mbere, Umwuka Wera amanukira abigishwa ba Yesu. Mu bakiriye Umwuka Wera na Petero yari abarimo. Uhereye ako kanya, Petero yagaragaje impinduka atari yarigeze agira, uwahoze ari umunyabwoba ahinduka umunyembaraga, uwahoze atazi kuvuga ashira amanga, uwahoze ahubuka atangira kugendana n'ubwenge bwa Mwuka Wera: Ingero ni nyinshi:

- Ubundi basenganaga ubwoba bari mu cyumba cyo hejuru, ariko bakimara kwakira Mwuka Wera, Petero yakubise inzugi arasohoko, avuga ashize amanga ku buryo abababonye bavugaga ko basinze. Petero yahise akora igiterane cya mbere, arababwira ati "wa Yesu mwishe ni we ukoze ibi mureba", uwo munsi hakizwa abantu 3,000! (Ibyakozwe n'intumwa 2:40)

- ku muryango w'urusengero, Petero abwira ikirema ati "Ifeza n'izahabu nta byo dufite, ariko ibyo dufite turabiguha: Mu izina rya Yesu haguruka..." (Ibyakozwe n'intumwa 3:6-7)

- Ananiya n'umugore we Safira bashatse kubeshya Petero barabizira (Ubanza baribwiraga ko ari Petero wa cyera) (Ibyakozwe n'intumwa 5:3)

- Petero yazuye n'uwapfuye: Yazuye Tabita (Dorcas): (Ibyakozwe 9:36-41)

- Herode yishe intumwa zimwe biramukundira, ashaka no kwiyongeza Petero! Herode yarabizize, Bibiliya ivuga ko yapfuye amarabira, ako kanya agahita ajoga inyo! (Ibyakozwe 12)

Yewe, uretse ko igitabo cy'ibyakozwe n'intumwa cyiswe gityo, ariko n'uwari kucyita "Ibyakoze na Petero na Pawulo" ntiyari kuba yibeshye, kuko ibice 12 byose by'iki gitabo bivuga ibyakozwe na Petero, ibindi bice 16 bikavuga "Ibyakozwe na Pawulo".

Nyumwa yo kuzura Umwuka Wera, Petero yanditse inzandiko ebyiri ziri muri Bibiliya (1 Petero na 2 Petero)

4) AMAHEREZO YA PETERO

Bibiliya ntitinda ku iherezo no ku rupfu rwa buri wese mu ntumwa za Yesu. Ibizwi byinshi tubikomora mu bitabo by'amateka yo hanze ya Bibiliya. Ahantu honyine Bibiliya ikomoza ku maherezo ya Petero, ni ubuhanuzi Yesu yigeze kumuha amubwira ati: (Yohana 21:18-19) "Ni ukuri, ni ukuri, ndakubwira yuko ukiri umusore wikenyezaga ukajya aho ushaka hose, ariko nusaza uzarambura amaboko undi agukenyeze, akujyane aho udashaka.” [19]Icyatumye avuga atyo ni ukwerekana urupfu azubahisha Imana. Amaze kuvuga atyo aramubwira ati “Nkurikira.”

Ikindi Bibiliya ihamya, ni uko Petero we yatumwe ku ntama zazimiya za Isirayeli, abo icyo gihe bitaka "Abakebwe", mu gihe Pawulo we ahanini yakoreye umurimo mu banyamahanga b'abapagani. Amateka avuga ko Yesu amaze gusubira mu Ijuru (Ubwo hari ahagana mu mwaka wa 33), Petero yakomeje kuvuga ubutumwa bwiza azenguruka amahanga arimo n'amajyaruguru ya Africa, agera no muri za Espagne no mu bwongereza n'ibindi bihugu bikikije hafi aho.

Ahagana mu mwaka wa 64, i Roma mu Butaliyani habaye itotezwa rikomeye ry'Abakristo, ryakorwaga n'umutegeka w'i Roma witwaga Nero. Muri uwo mwaka kandi Petero na we yari i Roma. Amateka yo hanze ya Bibiliya avuga ko Petero ngo yashatse guhunga iryo totezwa, abasha no gusohoka i Roma, ageze hanze y'umurwa ngo yaba yarahuye na Yesu yakataje yerekeje i Roma, ngo Yesu aramubaza ati "Petero, urongeye kandi?" Ngo Petero yaba yarabajije Yesu mu kiratini mu nteruro yamekanye cyane ati "QUO VADIS DOMINE"? (Bisobanuye ngo "Urajya he Mwami?") Ngo Yesu yaramusubije ati "Nudasubira i Roma ngo ubabazwe kimwe n'ubwoko bwanjye buri yo, njyewe ndajyayo njye kubambwa ku ncuro ya 2"! Ngo Petero yakozwe ku mutima, ahita asubira i Roma aho yasanze bamutegereje, bahita bamufata kuko bari bamubuze, ngo bafashe umwanzuro wo kumubamba ku musaraba akaba ariho apfira. Cyokoze Petero ngo yarababwiye ati "Sinkwiriye gupfira ku musaraba kimwe n'Umwami wanjye, cyokoze mumbambe muncuritse". Bahise bamubamba ku musaraba acuritse, ngo niho yaba yaraguye.

5) ICYO TWIGIRA KURI PETERO

Petero ni urugero rwiza ko bishoboka guhinduka rwose. Bibiliya iratubwira iti:

"Kandi ntimwishushanye n’ab’iki gihe, ahubwo muhinduke rwose mugize imitima mishya, kugira ngo mumenye neza ibyo Imana ishaka, ari byo byiza bishimwa kandi bitunganye rwose." (Abaroma 12:2)

Ubuzima bwa Petero butwereka ko bishoboka rwose guhinduka mushya dufashijwe na Mwuka Wera.

Murakoze cyane, twigire kumenya no guhinduka dufashijwe na Mwuka Wera.

Answered: SPECIAL: Sobanukirwa na buri wese mu ntumwa za Yesu

Sun, 22 Dec 2024 12:09:23 +0000

Muri iyi serie twise SPECIAL, turabagezaho amateka n'ibyaranze buri wese mu ntumwa za Yesu.

Igihe kimwe, bitewe n'impamvu ze, Yesu yigeze gutuma 70 kugirango bajye bamubanziriza aho yabaga yenda kujya.

Luka 10:1-2 "Hanyuma y’ibyo Umwami Yesu atoranya abandi mirongo irindwi, atuma babiri babiri ngo bamubanzirize, bajye mu midugudu yose n’aho yendaga kujya hose. [2]Arababwira ati “Ibisarurwa ni byinshi ariko abasaruzi ni bake, nuko mwinginge nyir’ibisarurwa ngo yohereze abasaruzi mu bisarurwa bye."

Aba 70, na bo bagendanaga imbaraga z'Imana n'ibitangaza, ndetse na bo ubwabo byarabatangaje.

Luka 10:17, 19 Nuko abo mirongo irindwi bagaruka bishima bati “Databuja, abadayimoni na bo baratwumvira mu izina ryawe.” [19]Dore mbahaye ubutware bwo kujya mukandagira inzoka na sikorupiyo, n’imbaraga z’Umwanzi zose, kandi nta kintu kizagira icyo kibatwara rwose.

Nubwo bimeze bityo, Yesu yitonirije abandi 12 bo kubana na we iminsi yose.

Luka 6:13: "Ijoro rikeye ahamagara abigishwa be, atoranyamo cumi na babiri abita intumwa:"

Izi ntumwa 12 ni zo tugiye kurebera hamwe amateka ya buri wese muri zo, kuko ntizari zihuje amateka, imimerere n'imico. Ndetse igitangaje, zimwe muri izi ntumwa zanditse n'ibitabo bimwe na bimwe biri muri Bibiliya, kandi n'ubwo bahumekerwaga n'Umwuka Wera, buri wese yandikanye umudendezo we ku buryo n'imitere ye yagiraga uruhare cyane mu myandikire ye: INGERO:

1) Matayo yahamagawe yari asanzwe ari umusoresha. Nk'umuntu wakoraga mu by'amafaranga, ni we wenyine uvuga ko Yuda yahawe ibiceri 30 kugirango agambanire Yesu. Abandi bose bavuga ko Yuda yahawe ibiceri ntibavuge umubare wabyo, ariko Matayo, nk'umuntu wari usanzwe ukora mu mafaranga, ntiyashoboraga kwibagirwa iyo detail ijyanye n'umubare w'amafaranga!

2) Luka yahamagawe yari asanzwe ari umuganga. Nk'umuntu wakoraga mu buvuzi, ni we wenyine uvuga ko Yesu yasubijeho ugutwi k'umugaragu kwari guciwe na Petero igihe bazaga kumufata muri Getsemane. Abandi bose bavuga ko Petero yaciye umuntu ugutwi bakarekera aho, ariko Luka, nk'umuntu wari usanzwe ukora mu buvuzi, ntiyashoboraga kwibagirwa iyo detail ijyanye n'uko Yesu yahise agusubizaho adakoresheje ubuvuzi ubwo aribyo bwose!

Ibyo bigaragaza ko buri wese yari afite ubwisanzure bwe, ntabwo bakoreshwaga nka Robot!

Reka turebe amateka ya buri wese mu ntumwa 12: (Kanda kuri buri wese urebe ibirambuye kuri we)

1) Petero. (Kanda hano urebe byinshi kuri we)

2) Andereya. (Kanda hano urebe byinshi kuri we)

3) Yakobo. (Kanda hano urebe byinshi kuri we)

4) Yohana. (Kanda hano urebe byinshi kuri we)

5) Filipo. (Kanda hano urebe byinshi kuri we)

6) Barutolomayo (Kanda hano urebe byinshi kuri we)

7) Matayo. (Kanda hano urebe byinshi kuri we)

8) Toma. (Kanda hano urebe byinshi kuri we)

9) Yakobo mwene Alufayo. (Kanda hano urebe byinshi kuri we)

10) Simoni Zelote. (Kanda hano urebe byinshi kuri we)

11) Yuda mwene Yakobo. (Kanda hano urebe byinshi kuri we)

12) Yuda isikariyota. (Kanda hano urebe byinshi)

=======================

Hari ibintu by'ingenzi wamenya kuri izi ntumwa 12 kugirango hatabaho kuzitiranya:

1) Benshi baritiranwaga amazina: Hari harimo ba Simoni babiri, hakabamo ba Yakobo babiri, hakanabamo na ba Yuda babiri.

2) Hari harimo abavandimwe bane: Petero yavaga indimwe na Andereya bakaba bari bene Yona. Yohana yavaga indimwe na Yokobo bakaba bari bene Zebedayo.

3) Uretse Yohana wapfuye urupfu rusanzwe ashaje, na Yuda Iscariot wiyahuye, izindi ntumwa zose 10 zishwe urw'agashinyaguro zizira ubutumwa bwiza.

4) Muri 12, 11 bose bakomokaga i Galilaya. Yuda Iscariota ni we wenyine wakomokaga i Buyuda

5) Muri 12, bose bari abantu basanzwe: Nta numwe wari usanzwe ari mu bintu by'Imana ibyo aribyo byose

6) Muri 12, Yesu yatoranijemo 3 akajya abana na bo mu bihe by'umwihariko. (Petero, Yohana na Yakobo)

7) Muri 12, Yohana mwene Zebedayo ni we wanditse ibitabo byinshi muri Bibiliya. (5)

Answered: Muri 1Timoteo 2 ko havuga ko abagore bakwiye kuganduka bakongera ngo ntibakigishe ubwo byaba bivuze iki ?

Mon, 18 Nov 2024 03:19:48 +0000

Iki ni ikibazo cyiza kandi cyagiye gikurura impaka guhera cyera kugeza ubu.

Impamvu kitumvikanwaho na benshi, ni uko guhera cyera muri Bibiliya abagore bafatwaga nk'abaturage baza kumwanya wa kabiri nyuma y'abagabo. Bityo rero, bamwe batekereza ko ibyo bitigeze bihinduka, abandi bakavuga ko byahindutse ku buryo ubu umugore ashobora guhamagarwa no gukorera Imana kimwe n'umugabo.

Bibiliya ibivugaho iki?:

Birasaba ko dushyira ku ruhande imyizerere y'amadini n'ibibazo bya politique z'ibihugu bitandukanye, tukareba icyo Bibiliya ibivugaho ntaho tubogamiye. Reka dufate urugero kugirango byumvikane neza:

Buriya amabara yose mubona, akomoka ku mabara 3 y'ibanze: Umutuku , Umuhondo , Ubururu. . Buri rindi bara ryose wabona hose, rikomoka mu kuvanga aya marara atatu, ukayavanga ku rugero runaka. Aya mabara uko ari atatu aratandukanye, ariko nta wavuga ngo ibara runaka ni ingenzi kurusha irindi. Buri rimwe ryose ririhariye, kandi riramutse ribuze hari amabara tutabona. Iyo ukeneye ibara runaka, bigusaba gufata %yumutuku, ukayivanga na %y'ubururu, na % y'umuhondo. Urugero: Iyo ukeneye icyatsi kibisi, bigusaba kuvanga ubururu n'umuhondo.

No mu murimo w'Imana ni ko bimeze ukurikije Bibiliya: Umugabo n'umugore baratandukanye cyane, buri wese afite uruhare rwe, ndetse hagize uburamo, hari ibyo tutabasha kubona mu murimo w'Imana. Mu murimo runaka, usanga hakenewe imbaraga z'abagabo kurusha iz'abagore. Mu murimo wundi runaka, ugasanga hakenewe imbaraga z'abagore cyane kurusha iz'abagabo.

Iyaba ibintu byose byari umutuku, ubururu cyangwa bikaba umuhondo, ntitwabasha kunezererwa uruvange rw'amabara tubona impande zacu. Ni ko binameze mu murimo w'Imana: Itorero riramutse rigizwe n'abagabo gusa cyangwa abagore gusa, hari byinshi tutabasha kubona mu murimo w'Imana, icyangombwa ni uko buri wese ahagarara mu ruhare rwe neza, no kuzuzanya uko bikwiriye.

Muri Bibiliya, abagore bagaragara henshi mu murimo, n'ubwo atari cyane nk'abagabo, ariko ntawavuga ngo aba ni ingenzi cyangwa bariya si ingenzi. (Ni nka rwa rugero rw'amabara twatanze haruguru).

Guhera mu isezerano rya cyera, tubonamo abagore mu mirimo itandukanye:

- Abahanuzikazi: Nka Miriyamu na Hulda

- Abacamanza: Deborah

- Abaririmbyi: Miriyamu

- .....

Dusubize amaso inyuma turebe uruhare rw'abagore muri Bibiliya duhereye kera.

1) Abagore na bo babaga mu minsi mikuru ya giheburayo kimwe n'abagabo (Kuva 12)

2) Imana yahaga agaciro ubuzima bw'abagabo ku kigero kimwe n'abagore: Kuva 21:28,31,32 “Inka niyica umugabo cyangwa umugore agapfa, iyo nka ntikabure kwicishwa amabuye kandi ntikaribwe, ariko nyirayo ntazagibweho n’urubanza. [31]Naho yaba umuhungu w’umuntu cyangwa umukobwa we iyo nka yishe, bimubere uko iryo tegeko ritegetse. [32]Inka niyica umugurano w’umugabo cyangwa w’umugore, nyirayo azahe shebuja w’uwo shekeli z’ifeza mirongo itatu, bicishe iyo nka amabuye.

3) Abagore bashoboraga guhiga umuhigo wo kuba umunaziri kimwe n'abagabo: Kubara 6:2 “Bwira Abisirayeli uti ‘Umugabo cyangwa umugore niyirobanurisha mu bandi guhiga umuhigo wo kuba Umunaziri, ngo yiyereze Uwiteka,

4) Abagore bashoboraga kugera ku Mana no kuvugana na yo kimwe n'abagabo: Abacamanza 13:3 Marayika w’Uwiteka yiyereka uwo mugore aramubwira ati “Dore uri ingumba ntiwigeze kubyara, ariko uzasama inda ubyare umwana w’umuhungu.

5) Abagore bakoreraga Imana kimwe n'abagabo: - Mu gihe cya Nehemiya, havugwa korari yari igiwe n'abagabo n'abagore: Nehemiya 7:67 udashyizeho abagaragu babo n’abaja babo. Umubare wabo bari ibihumbi birindwi na magana atatu na mirongo itatu na barindwi, kandi bari kumwe n’abaririmbyi b’abagabo n’abagore magana abiri na mirongo ine na batanu.

- Mu gihe bari mu butayu, mu ihema ry'ibonaniro hagaragaramo abagore bakoreraga umurimo ku muryango w'ihema ry'ibonaniro: Kuva 38:8 Kandi acura igikarabiro mu miringa, n’igitereko cyacyo agicura mu miringa, abicura mu miringa y’indorerwamo z’abagore bateraniraga gukorera ku muryango w’ihema ry’ibonaniro.

==>>Biragaragara ko guhera cyera, abagore bari mu murimo w'Imana mu nshingano zigendanye n'uko Imana Yo Mugenga wa byose yabigennye. Gusa, abagore ntibagararaga mu nshingano zindi nko kuba abami, abatambyi... n'izindi. Ibyo ni ko Imana yabigennye, abagabo bagiraga inshingano zabo, n'abagore bakagira izabo.

Tugaruke ku kibazo cyacu: None se niba bimeze bityo, kuki abagore babujiwe kwigisha muri 1 Timoteyo 2:12 ? Icyo cyanditswe kigira kiti "kuko nanga ko umugore yigisha cyangwa ngo ategeke umugabo, ahubwo agire ituza"

Icya mbere dukwiriye kumenya, ni uko Iyo Umwuka Wera atanga impano, ntabwo arobanura: abagabo bashobora guhabwa impano, n'abagore bashobora kuzihabwa kimwe. N'ubwo muri 1 Timoteyo 2:12 Pawulo avuga ko yanga ko umugore yigisha, ahandi mu isezerano rishya tubonamo abagore barimo bigisha: Urugero: Umuyuda witwaga Apolo twese turamuzi. Ariko yari azi bicye muri Bibibiliya, ibindi yabyigishijwe n'umugore witwaga Priscilla afatanije n'umugabo we. Bibiriya ibivuga itya: Ibyakozwe n'Intumwa 18:24-26 "Hariho Umuyuda witwaga Apolo wavukiye mu Alekizanderiya, bukeye agera muri Efeso. Yari umuntu w’intyoza w’umunyabwenge, kandi akaba n’umuhanga mu byanditswe. [25]Uwo yari yarigishijwe Inzira y’Umwami Yesu, yagiraga umwete mwinshi mu mutima, avuga ibya Yesu kandi abyigisha neza, ariko yari azi umubatizo wa Yohana gusa. [26]Atangira kuvugira mu masinagogi ashize amanga, maze Purisikila na Akwila bamwumvise bamujyana iwabo, bamusobanurira Inzira y’Imana kugira ngo arusheho kuyimenya neza."

None se byahuzwa bite niba hamwe Pawulo abwira Timoteyo ko yanga ko abagore bigisha, ahandi hakagaragara abagore barimo kwigisha? Ubundi mu gusobanukirwa neza Bibiliya, hari ibibazo buri musomyi wese agomba kwibaza kuri buri cyanditswe: Haravuga nde? Arabwira nde? Ryari? Hehe? Kubera iki?. Mu byukuri, buri murongo wose wo muri Bibiliya siko ukureba, kuko hari imirongo yarebaga abayandikiwe gusa bitewe n'impamvu runaka. Reka dufate ingero nkeya:

- Muri Bibiliya yera, hagaragaramo nibura incuro 16 Pawulo yabwiraga abo yandikiraga ati "Muntahirize runaka...". Urugero 1: 2 Timoteyo 4:19 "Untahirize Purisikila na Akwila, n’abo kwa Onesiforo" . " None se uragirango wafata iki cyanditwe ukakigira icyawe? Wakurahe Purisikila ngo umutashye? Iki cyari icyanditswe cyarebaga Timoteyo gusa, muri icyo gihe.

Urugero 2: 2 Timoteyo 4:13 Nuza uzazane umwitero nasize i Tirowa kwa Karupo n’ibitabo, ariko cyane cyane uzazane iby’impu." None se uragirango wafata iki cyanditwe ukakigira icyawe? Iki cyarebaga Timoteyo gusa, muri icyo gihe. Icyo cyatumarira ni ukutwereka uko Pawulo yari amerewe icyo gihe: Uru rwandiko yarwanditse ari muri gereza, ahantu hakonje cyane, yari akeneye kwifubika

Kuki Pawulo yabwiye Timoteyo ko yanga ko abagore bigisha? Nk'uko tubibonye hejuru, hari ibyanditswe byari bibereyeho gukemura ikibazo runaka cyari cyiriho icyo gihe ahantu runaka, mu gihe runaka. Turabizi neza (Tubibwiwe na Bibiliya), ko ubwo Pawulo yandikiraga Timoteyo urwandiko rwa mbere, Timoteyo yabaga muri Efeso aho yari yarasizwe na pawulo kugirango atunganye Itorero ryaho. (1 Timoteyo 1:3 Ugume muri Efeso nk’uko nakwinginze ubwo najyaga i Makedoniya, kugira ngo wihanangirize bamwe kutigisha ukundi,) Icyo gihe, Efeso wari umujyi wari warinjiriwe n'abantu basengaga ibigirwamana (Cyanecyane ikigirwamana cyitwaga diane), n'abandi biyitaga abakomeye mu mitekerereze (Philosophes) byatumaga hagendwa n'abanyamahanga cyane. Pawulo yahamaze imyaka 3, yari ahazi neza, azi n'ingorane z'Itorero ryaho. Icyo gihe, itorero ryaho ryari ryaracitsemo ibice, cyane cyane bishingiye kuri bamwe bavugaga ko abagore badakwiye kwigisha, abandi bavuga ko bashobora kwigisha nta kibazo. Pawulo yasanze uburyo bwiza bwo gukemura ayo makimbirane ari uko abagore bareka kwigisha, ariko aya mabwiriza yarebaga Itorero rya Efeso gusa.

Si ubwa mbere bigaragara muri Bibiliya aho Pawulo yakoraga ikintu hamwe, ntagikore ahandi, bitewe n'impamvu zitandukanye: Urundi rugero: Ubwo Pawulo yatangiraga gukorana na Timoteyo, yaramukebye (Ibyakozwe 16:3), ariko ahamagaye Tito ngo bakorane, ntiyamukeba (Galatiya 2:3). Ibyo byaterwaga n'impamvu ze zitandukanye, ntibivuze ko Bibiliya yivuguruje: Ihame rihari ni uko gukebwa cyangwa kudakebwa nta cyo bimaze, icya ngombwa ni ukuba icyaremwe gishya (Galatiya 6:15).

Muri macye, abagore na bo bashobora guhamagarwa gukora umurimo w'Imana uwo ari wo wose kimwe n'abagabo, icya ngombwa ni uko buri wese ahagarara mu nshingano ze uko bikwiriye. N'iyo umugore yahamagarwa, ntibikuraho ibindi byanditswe bimusaba kuganduka. N'umugabo na we ntbimuha uburenganzira bwo kwishyira hejuru no kugira uwo akandamiza.

Murakoze, Uwiteka abahe umugisha

kuberiki bakunda kuvuga israel gusa kandi Imana twese idukunda?

Sun, 13 Oct 2024 05:43:04 +0000

Answered: Nifuza kwiga ikigiriki nigiheburayo umuntu yabyigirahe ko batubwira ko bifasha kukwiga bibiliya

Sat, 28 Sep 2024 14:11:38 +0000

Hari amasomo y'ibanze ushobora guhabwa hano, gusa ni ay'ibanze gusa, ku rurimi rw'ikigereki n'igiheburayo rukoreshwa muri Bibiliya. Atangirwa ubuntu.

Byumvikane ko ari iby'ibanze kuri izi ndimi. Uramutse ushaka kwiga byimbitse, wagana ibigo byigisha indimi biri hirya no hino mu mugi wa Kigali.

Ushaka amasomo y'iby'ibanze, wakanda hano ukareba ibijyanye n'amasomo yose duha ababyifuza ku buntu.

God Bless you.

Answered: Ese byashoboka ko uburyo Imana yabanaga nabantu mw’isezerano rya kera ariko yabana natwe mw’isezerano rishya?

Thu, 02 Nov 2023 10:52:29 +0000

Iki ni ikibazo cyiza kandi abantu bakunze kwibaza cyane, ahanini kwibaza iki kibazo tubiterwa no kureba mu isezerano rya cyera tugasanga uko Imana yigaragajemo bitandukanye cyane n'uko yigaragaza mu isezerano rishya turimo.

Uwabajije iki kibazo yatanze urugero rwo muri 2 Samuel 12:14, aho Imana yahanishije Dawidi gupfusha umwana kandi icyaha cy'ubusambanyi cyari cyakozwe na Dawidi. Uru ni rumwe mu ngero nyinshi kuko mu isezerano rya cyera tubona Imana yiyereka abantu cyane, tubona Imana ivugisha abahanuzi n'ijwi ryumvikana mu matwi y'umubiri, ariko kandi tunabona Imana ihaniraho abanyabyaha nko muri urwo rugero rwa Dawidi n'ahandi henshi, bigatera bamwe gutekereza ko mu Isezerano rya cyera Imana yego yiyerekaga abantu cyane, ariko kandi ngo yari n' Imana y'uburakari n'umujinya mwinshi mu gihe mu isezerano rishya yiyerekana nk'Imana y'urukundo n'impuhwe nyinshi.

Ukuri guhari ni uko Imana yo mu isezerano rya cyera ari na yo Mana yo mu isezerano rishya, ndetse rimwe mu mahame ya kamere y'Imana ni uko Imana idahinduka. Ibyo Bibiriya ibihamya muri aya magambo: Malaki 3:6 “Kuko jyewe Uwiteka ntabwo mpinduka, ni cyo gituma abahungu ba Yakobo mutamarwaho." ndetse Bibiriya inabishimangira muri aya magambo: Yakobo 6:12 Gutanga kose kwiza n’impano yose itunganye rwose ni byo biva mu ijuru, bimanuka bituruka kuri Se w’imicyo udahinduka, cyangwa ngo agire n’igicucu cyo guhinduka.

None se ko Imana idahinduka, kandi bikaba bigaragara ko uko yakoraga mu isezerano rya cyera atariko ikora mu isezerano rishya? Iki kibazo gisobanuka neza iyo umuntu abanje gusobanukirwa impamvu Imana yaduhaye Bibiriya: Impamvu nyamukuru ni ukugirango itugaragarize umugambi wayo ku muntu. Kumenyesha umugambi w'Imana ku muntu byasabye Imana kubikora mu buryo umuntu abasha kubisobanukirwa. Iyo Imana ibikora mu buryo bw'Ubumana, ntacyo twari kumenya, kimwe n'uko iyo Yesu atwiyereka mu bwiza bwe bwose, nta n'uwari kumureba mu maso. Ibyo rero byasabye Imana kutwigisha buhoro buhoro mu buryo bwa kimuntu: Aho yashakaga kutwigisha urukundo yerekanye urukundo, aho yashatse kutwigisha impuhwe yatweretse impuhwe, aho yashatse kutwereka ko ishobora guhana icyaha yaragihannye.

Haba nu isezerano rya cyera cyangwa irishya, tubona Imana yuzuye urukundo n'imbabazi. Tubona Imana yifuza ko abo yaremye bayigarukira ikabaha ubugingo buhoraho mu munezero. Tubona Imana ikora ibishoboka byose ngo itwigishe: Mu isezerano rya cyera yakoresheje abahanuzi cyane, bigera mu isezerano rishya aho yaduhanye Umwana wayo w'ikinege ngo umwizera atarimbuka. (Yohana 3:16)

Dusubize igisubizo mu buryo butomoye: YEGO RWOSE BIRASHOBOKA KO IMANA YABANA NATWE NK'UKO YABANAGA N'ABANTU MU ISEZERANO RYA CYERA. Ntihinduka, habe n'igicucu cyo guhinduka. Icyo idusaba ni ukuyizera no kuyumvira. Dusabwa kuyemerera igakorera muri twe. Cyera yaravugaga n'ubu iravuga, yarakoraga n'ubu irakora, yarakundaga n'ubu irakunda, yifurizaga ibyiza abana bayo n'ubu irabibifuriza, ariko kandi, tugomba no kuzirikana ko ubutabera bwayo no gukiranuka kwayo byemeje ko icyaha kigomba guhanwa mu buryo bumwe cyangwa ubundi. Inzira yonyine yo gukira ingaruka z'icyaha, ni ukwizera inzira Imana yadushyiriyeho. iyicishije mu gitambo cy'Umwana wayo watwitangiye kugirango ahinduke impongano y'ibyaha byacu. 1 Yohana 4:10 "Muri iki ni mo urukundo ruri: si uko twebwe twakunze Imana ahubwo ni uko Imana ari yo yadukunze, igatuma Umwana wayo kuba impongano y’ibyaha byacu."

Murakoze, uwiteka abagirire neza

Answered: ISOMO N0 6: Amakimbirane hagati ya Israel n'Abarabu: Inkomoko, amateka, ingaruka n'iherezo ryayo (IGICE CYA 2)

Sun, 15 Oct 2023 21:21:07 +0000

NOTE: Iki ni igice cya kabiri. Ni byiza kubanza ugasoma igice cya mbere, wakanda hano

7) KUZA KW'IDINI RYA ISLAM N'URUHARE RWARYO MU MAKIMBIRANE NA ISRAEL

Muri iri sezerano rishya turimo, ntitwabura kuvuga ikintu cyabaye mu mwaka wa 610 nyuma ya Yesu, na cyo kikaba cyarabaye intwaro ikomeye y'abarwanya Isirayeli: Muri uwo mwaka wa 610, Muhammad yashinze idini ya isilamu, iri dini ryatangiriye muri Arabiya Sawudite, rigenda rikura vuba kandi rigira imizi ikomeye mu bihugu by'abarabu cyane. Abasengera muri iri dini, bavuga ko Muhammad ajya kujya mu Ijuru yashinguye ibirenge bye i Yerusalemu, ndetse n'ubu tuvugana, aho ngo yaba yarahagurukiye ajya mu ijuru ari kumwe na Marayika Djibril, ubu hubatswe umusigiti witwa "Dome of the Rock", ibi bikaba bituma Abisilamu bafata uyu murwa wa Yerusalemu nk'umurwa wera ukwiriye kuba uwabo, ariko cyane cyane, uyu musigiti ufatwa na Islam nk'ahantu ha kabiri hatagatifu kuri bo, nyuma ya Maka aho Muhammad yavukiye.

Kuba Abasilamu bafata Yerusalemu nk'umurwa mutagatifu kuri bo, n'Abaheburayo bagafata yerusalemu nk'umurwa wera kuri bo, ni impamvu ya mbere itera amakimbirane ahoraho muri aka gace.

8) ISRAEL + PALESTINE + ABARABU + ISLAM MU KINYEJANA CYA 20 N'ICYA 21 TURIMO

Mu kinyejana cya 20 kugeza hagati yacyo, (ubwo ni mu myaka 1900 - 1945), Abayahudi bari baratataniye hirya no hino ku isi, ubutaka bwitwa ubwabo bwabaga mu mpapuroro gusa, nta gihugu cyitwa Israel cyabagaho, aho Israel iri ubu hategekwaga n'ubwami bwitwaga "Empire Ottoman". Muri iyo myaka, ahitwa Israel ubu habagamo abayuda bacye cyane, abandi bari baratataniye hirya no hino ku isi.

Uku gutatana kw'abayahudi ku isi yose, na byo ubwabyo byari inkurikizi n'umuburo Imana yari yarabahaye cyera cyane ibivugiye mu kanwa ka Mose, mu myaka irenga 3,500 mbere. Bibiriya ibivuga muri aya magambo: Gutegeka kwa kabiri 28:15,25,62 "Ariko nutumvira Uwiteka Imana yawe, ngo witondere amategeko yayo y’uburyo bwose ngutegeka uyu munsi, iyi mivumo yose izakuzaho, ikugereho. [25]Uwiteka azatuma uneshwa n’ababisha bawe bagushyire imbere, uzaca mu nzira imwe ubasanganiye ubahunge uciye mu nzira ndwi, uzateraganwa mu bihugu by’abami bo mu isi bose. [62]Muzasigara muri bake, nubwo mwari muhwanije ubwinshi n’inyenyeri zo ku ijuru, kuko uzaba utumviye Uwiteka Imana yawe. [64]Kandi Uwiteka azabatataniriza mu mahanga yose, uhereye ku mpera y’isi ukageza ku yindi mpera yayo, kandi uzakorererayo izindi mana utigeze kumenya, na ba sekuruza banyu batigeze kumenya, z’ibiti n’amabuye.

Ariko rero, ku bw'umutima w'impuhwe n'imbabazi z'Imana yacu, Imana yanahanuye nanone ko amaherezo, ahagana mu minsi ya nyuma, izongera ikusanye abayuda bazaba barasigaye ibagarure mu gihugu cyabo. Yeremiya 23:7-8 [...] [8]ahubwo bati ‘Ndahiye Uwiteka uhoraho wazamuye urubyaro rw’inzu ya Isirayeli, akaruzana aruvanye mu gihugu cy’ikasikazi, no mu bihugu byose aho nari narabatatanyirije.’ Na bo bazatura mu gihugu cyabo bwite.”

- Mu myaka ya za 1930-1945, Abayahudi bakorewe itotezwa rikomeye hirya no hino ku isi, ariko by'umwihariko mu budage ku ngoma ya Adolphe Hitler bakorewe genocide iteye ubwoba, aho Hitler yishe abayahudi barenga miriyoni 6.

- Mu mwaka wa 1947, umuryango w'abibumbye (UN) wafashe umwanzuro wo gushakira ubutaka Abayahudi bari basigaye, ndetse abenshi bari baratataniye hirya no hino ku isi batangira gutaha ku bwinshi. Birumvikana ko ubutaka bwa Israel bwari butuwe n'abarabu cyane cyane, umwanzuro wa UN wategetse ko 55% by'ubwo butaka buhabwa abayahudi, 45% bugahabwa Palestine ituwe n'abarabu, 80% muri bo bari Abayisilamu. (Icyo gihe ubwo butaka bwose bwari mu bukoloni bw'Abongereza)

- Muri uwo mwanzuro wa UN muri 1947, Umujyi wa Yerusalemu wagizwe umujyi ujyengwa n'umuryango-mpuzamahanga, ntiwitwe umurwa w'abayahudi cyangwa uw'Abarabu bo muri Palestine.

- Tariki 14/05/1948, Abayahudi basohoye itangazo ritunguranye, rivuga ko hashinzwe igihugu cyitwa Israel kandi gifite umurwa mukuru Yerusalemu. Iyi ni itariki y'amateka, kuko ku ncuro ya mbere mu mateka y'isi hari hagiyeho igihugu cy'abayahudi bwite cyitwa Israel.

- Israel ikimara gushingwa, ibihugu by'abarabu biyikikije byahise byishyira hamwe bishora intambara bitera Israel. Mu buryo bwatunguye benshi, Israel yihagazeho, itsinda iyo ntambara ndetse ifata n'ubundi butaka ibukuye ku bihugu byayiteye. Nyuma y'imishyikirano, Israel yasubije ubutaka bw'abandi, ndetse yemera ko Yerusalemu igabanywamo kabiri, hakaba igice cy'Abayuda n'igice cy'Abarabu biganjemo Abayisilamu. (Iki gice cy'Abarabu ni cyo kiswe "Jerusalem-est")

- Mu mwaka wa 1967, Israel yatangije intambara izwi cyane ku izina rya "Guerre de 6 jours" , ni intambara Israel yarwanyijemo ibihugu by'Abarabu biyikikije icyarimwe, iyitsinda mu minsi 6 gusa, ndetse Israel yisubiza ku ngufu umujyi wa Yerusalemu wose.

- Muri 1973, ibihugu by'abarabu bikikije Israel byongeye kwishyira hamwe biterera icyarimwe Israel biyitunguye mu giye Israel yari irangariye mu munsi mukuru bagira witwa "Kippour", gusa kimwe n'izindi ntambara zose, Israel yatsinze iyi ntambara byihuse ndetse yongera kwiyegurira uduce tumwe na tumwe twa Palestine.

- Kuva 1973 kugeza ubu muri 2023, imyaka 50 irashize, muri aka karere k'uburasirazuba bwo hagati ntihigeze haba agahenge. Hagiye habaho amakimbirane n'intambara zitandukanye, hagiye habaho intambara z'urudace.... zose uwazandika yakwandika igitabo. Zose muri rusange zishyamiranyije ibice bibiri: Ku ruhande rumwe, Abarabu biganje mu idini ya Islam batemera ko habaho igihugu cyitwa Israel, ku rundi ruhande, Abayahudi bemeza ko buriya butaka babuhawe n'Imana, na Yerusalem ikaba ari umurwa wera badashobora kurekuru n'iyo byagenda bite.

9) ISRAEL NA PALESTINE KURI UBU:

==> Kuri ubu, Palestine si igihugu cyemewe, ahubwo ni ubutaka Abanyapalestine bahawe na UN bukaba buyobowe n'ishyaka ryitwa OLP (Organisation pour la Liberation de la Palestine). Palestine iciyemo ibice bibiri: igice kinini kizwi nka Cisjordanie (West bank), hakaba n'akandi gace kitwa Gaza kadafatanye na Cisjordanie.

Aka gace ka Gaza gasa nk'akiyomoye kuri Cisjordanie kuko kayobowe n'umutwe w'iterabwoba witwa Hamas, iyi hamas ikaba ari yo ihora ishoza amakimbirane kuri Israel guhera cyera. Iyi Gaza kandi si nshya, kuko no muri Bibiriya irazwi mu isezerrano rya cyera, aha ni hahandi Samusoni yanoborewemo amaso, ninaho yapfiriye (Abacamanza 16:21). Ibi bya Samusoni byabaye hashize imyaka irenga 3,200; ariko na n'ubu murumva ko rukigeretse: Aya makimbirane si ay'ubu!

==> Kuri ubu Israel yo ni igihugu cyemewe muri UN. gusa umurwa mukuru wacyo ntuvugwaho rumwe: Israel yemeza ko capital yayo ari Yerusalemu, ibindi bihugu byinshi byo bikemeza ko ari Tel Aviv, ku buryo na za ambassades nyinshi ziba hano Tel Aviv. Israel ni yo igenzura Yerusalemu yose, gusa biciye mu mishyikirano itandukanye, Abisilamu bagiye bagenerwa ahantu hatandukanye ho gusengera no gutura muri Yerusalemu, ku buryo nk'ahantu hahoze urusengero rwa Salomon ubu hari imisigiti ibiri.

Aha hantu hubatse imisigiti y'Abisilamu na ho ni ikibazo hagati muri Isirayeli: Ni hahandi hitwaga Moriya mu isezerano rya cyera aho Abraham yari agiye gutambira Isaka. (Itangiriro 22:2). Ni naho kandi Salomon yari yarubatse urusengero rwiza cyane rwaje gusenywa na Nebukadinezari. (2 Ingoma 3:1). (Wakanda hano ugasoma amateka arambuye y'insengero zagiye zubakwa hano n'uburyo amaherezo iyi misigiti izasenywa hakubakwa urundi rusengero)

10) AMAHEREZO NI AYAHE?

Ubu tuvugana muri 2025, Abitwa Abayahudi (Juifs) abenshi muri bo si Abakristo, abenshi nta n'ubwo bemera Yesu nk'Umwami n'Umukiza w'isi. Israel ituwe n'abaturage bagera kuri miriyoni 10 (2025), muri bo abakristo ni 2% gusa, mu gihe igice kini kigizwe n'abari mu idini ryitwa Judaism ritizera Yesu nk'umwami n'umukiza (80%)! Abandi 14% ni abisilamu.

Uku kutizera Yesu kw'Abayahudi si uko ari ibigande, ahubwo Bibiriya ivuga idaca ku ruhande ko "Imana yabanangiye imitima kugirango twebwe abanyamahanga tubone uko dukizwa, ariko amaherezo Abisirayeli bose bzakizwa bizere Yesu. (Abaroma 11:25-26)

Ibyinshi birambuye ku byerekeranye n'amaherezo y'izi ntambara z'urudaca, mushobora kubisanga mu cyiciro cy'ibibazo byerekeranye n'ibihe by'imperuka, wakanda hano ukabireba.

Murakoze, Uwiteka abishimire

Answered: ISOMO N0 6: Amakimbirane hagati ya Israel n'Abarabu: Inkomoko, amateka, ingaruka n'iherezo ryayo (IGICE CYA 1)

Sat, 14 Oct 2023 20:51:19 +0000

Ubu nandika iyi article, tariki 16 Kamena 2025, Israel iri mu ntambara esheshatu icyarimwe:

- Isirayeli na Hamas muri Gaza

- Isirayeli na Hezbollah muri Libani

- Isirayeli na OLP muri Cisjordanie

- Isirayeli na Houtis muri Yemen

- Isirayeli na Iran

- Isirayeli na Siriya

Izi ntambara si iza mbere, si iza kabiri, si iza gatatu, si n'iza nyuma muri aka gace gahoramo amakimbirane atarangira.

Dutangirire ku makimbirane hagati ya Isirayeli na Palestine kuko aka gace ni ko ntandaro y'umuriro muri aka gace. Palestine ubwayo si igihugu cyemewe muri UN. Abaturage bacyo ahanini ni abarabu bo mu idini ya Islam, ariko hatuyemo na bacye bo mu idini ya Judaism n'abakristo bacye cyane. Ubutaka bwa Palestine ni buto, bufite ubuso bwa 6,020 km², (Ugereranije ni nk'intara imwe y'u Rwanda, u Rwanda rurayiruta inshuro hafi 5). Ubutaka bwa Palestine bugabanijemo ibice bibiri bidafatanye: Ubutaka bunini buzwi ku izina rya Cisjordanie (Hari n'abahita West bank), hakaba n'agace ka Gaza, utu duce twombi tugize Palestine ariko hagati yatwo haciyemo Israel. Iyi karita yatuma bisobanuka neza:

Ubu butaka bwa Palestine na Israel nta Petrol ibubarizwamo nk'ibindi bihugu by'abarabu, nta mabuye y'agaciro, nta bukungu busamaje.... nyamara aka gace ni aka mbere ku isi mu kugira amakimbirane n'intambara by'urudaca, ku buryo abanyamateka babara intambara zirenga 5,000 zahabaye mu gihe cy'imyaka 6,000! AYA MAKIMBIRANE ATERWA N'IKI? AKOMOKA HE? Ni byo tugiye kureba.

1) INTANDARO

Gusobanukirwa neza iby'amakimbirane ahora mu burasirazuba bwo hagati bisaba gusubira inyuma mu mateka y'isi imyaka igera ku bihumbi 4. (Nituzajya tuvuga aka gace k'Uburasirazuba bwo hagati = Ibihugu by'abarabu nka za Arabiya Sawudite, Iran, Irak, Liban, Jordanie, Misiri + Israel)

Mu myaka igera ku bihumbi 2 mbere ya Yesu, byose byatangiranye n'ijambo Imana ubwayo yasabye umugabo w'imyaka 75 wari wituriye ahitwa muri URI y'Abakaludaya, kuri ubu aho hantu ni muri Iraq y'ubu. Uwo nta wundi ni Abraham, Imana yaramusanze iramubwira iti: (Itangiriro 12:1-3 Uwiteka ategeka Aburamu ati “Va mu gihugu cyanyu, usige umuryango wanyu n’inzu ya so, ujye mu gihugu nzakwereka. [2]Nzaguhindura ubwoko bukomeye, nzaguha umugisha, nzogeza izina ryawe, uzabe umugisha. [3]Kandi nzaha umugisha abakwifuriza umugisha, kandi uzakuvuma nzamuvuma, kandi muri wowe ni mo imiryango yose yo mu isi izaherwa umugisha.”. Nguko uko Aburahamu yavuye muri Iraki, akimukira ahitwaka i Kanani icyo gihe, (Kanani ni yo Israel y'iki gihe), kandi Imana yari yamuhaye isezerano ko icyo gihugu ikimuhaye we n'urubyaro rwe.

2. AMASHYANGA ABIRI MUNDA YA ABURAHAMU

Ubwo Aburahamu yahamagarwa kwimukira i Kanani, yari afie imyaka 75 kandi nta mwana yagiraga, n'umugore we Sara yari ashaje afite imyaka 65 icyo gihe. N'ubwo Imana yari yarasezeranije Abraham ko Sarah azabyara umwana w'isezerano n'ubwo yari ashaje, Sara ntiyabashije gutegereza, byatumye asaba Abraham gucyura umuja wabo witwaga Hagayi. Abrahamu yarabyemeye, acyura hagayi ndetse babyarana umwana bamwita Ishimayeli. Ariko Imana yo ntiyabonaga Ishimayeli nk'aho ariwe uzakomokwaho n'urubyaro rw'isezerano. Byatumye ifungura inda ya Sara, ku myaka 90 abyara Isaka.

Ishimayeli na Isaka ni abavandimwe, bombi ni abana ba Abraham, ariko ni nabo ntandaro y'amakimbirane adashira hagati ya Israel n'abarabu.

3) ITANDUKANA RYA MBERE RY'ABANA BA ABURAHAMU

Uko abana ba Aburahamu bakuraga, ni ko ubwumvikane hagati yabo bwatangiye kuba bucye, kugeza ubwo Imana yasabye Aburahamu gusezerera hagari n'umuhungu we, kuko umwana w'inshoreke (Ishimayeli) atari kuzaraganwa n'umwana w'isezerano (Isaka). Ibyo Bibiriya ibivuga muri aya magambo: Itangiriro 21:8-14 "Umwana arakura aracuka, ku munsi Isaka yacukiyeho Aburahamu ararika abantu benshi arabagaburira. [9]Sara abona umuhungu wa Hagari Umunyegiputakazi, uwo yabyaranye na Aburahamu, abaseka. [10]Ni cyo cyatumye abwira Aburahamu ati “Senda uyu muja n’umuhungu we, kuko umuhungu w’uyu muja atazaraganwa n’umuhungu wanjye Isaka.” [11]Ibyo by’uwo muhungu we bitera Aburahamu agahinda kenshi. [12]Imana ibwira Aburahamu iti “We kugirira uwo muhungu agahinda n’umuja wawe, ibyo Sara akubwira byose umwumvire, kuko kuri Isaka ari ho urubyaro ruzakwitirirwa. [13]Kandi umuhungu w’uwo muja na we nzamuhindura ubwoko, kuko ari urubyaro rwawe.” [14]Aburahamu azinduka kare kare, yenda umutsima n’imvumba y’uruhu irimo amazi, abiha Hagari abishyira ku rutugu rwe, amuha n’uwo mwana aramusenda, avayo azerera mu butayu bw’i Berisheba.

4) UBUHANUZI BUKOMEYE KURI ISHIMAYELI.

N'ubwo Ishimayeli yatandukanye na Isaka, nta wakwirengiza ko Ishimayeli na we afite amaraso ya Aburahamu mu mubiri we, ndetse na we yahawe isezerano n'Imana ryo kuzaba ubwoko bukomeye. Ariko rero, hari ubuhanuzi bukomeye Imana yahaye Ishimayeli, n'ubwo bumaze imyaka irenga 4,000 ariko na n'ubu buracyagaragara mu maso ya buri wese: Itangiriro 16:11-12 Marayika w’Uwiteka arongera aramubwira ati “Dore, uratwite uzabyara umuhungu, uzamwite Ishimayeli, kuko Uwiteka yumvise kubabazwa kwawe. [12]Hagati y’abantu azamera nk’imparage, azagira undi muntu wese umubisha we, n’abandi bose bazamugira umubisha wabo, azatura imbere ya bene se bose.”

Ubu buhanuzi bwari bukomeye kandi buhetse ibintu 3 by'ingenzi:

1. Azagira undi muntu wese umubisha we (umwanzi), n'abandi bose bazamugira umubisha wabo: Birazwi ko Abarabu bakomoka kuri Ishimayeli, bityo n'idini ya Isilamu ni imbuto y'urubyaro rwa Ishimayeli. Iyo witegereje uko idini ya Isilamu ibona abatayirimo, ukanareba uko abatari abayisilamu babona idini ya isilamu, ubona utajijinganya ko ubu buhanuzi bwasohoye.

2. Azatura imbere ya bene se bose: Ubu buhanuzi na bwo bwarasohoye neza neza, ariko gusohora kwabwo na byo bifite ingaruka ku makimbirane tubona ubungubu: Imana yavuze cyera cyane ko abakomoka kuri Ishimayeli (Abarabu) bazaturana n'abazakomoka kuri Isaka (Abayuda). Iyo witegereje ikarita twashyize hejuru, ubona ukuntu Isirayeli ikikijwe impande zose n'Abarabu: Irak, Iran, Siriya, Liban, Jordanie, Egypte. Uku guturana kwa hafi, ni byo byakomeje gutuma habaho amakimbirane ya hato na hato guhera cyera.

5) INTAMBARA ZA MBERE HAGATI Y'ABAHEBURAYO N'ABABAKIKIJE

Aburahamu akiriho, Imana yamuhanuriye ko urubyaro rwe ruzajya mu gihugu cy'amahanga rukamarayo imyaka 400. Bwarasohoye, abaheburayo baje kujya muri Egiputa, bamarayo iyo myaka yose, irangiye Imana irahabakura bayobowe na Mose, bafata urugendo rusubira mu gihugu cy'isezerano (Kanani = Israel y'ubu). Imyaka 400 ni myinshi: igihugu cyabo Kanani cyari cyaratuwe n'abandi batandukanye, kandi abenshi muri bo bafatwaga nk'abanyamahanga ariko bari abavandimwe babo bakomo kuri Ishimayeli, abenshi muri bo bari: Abafilisitiya, Abamaleki, Abamoni n' Abamori. Aba bose, Imana yabwiye Abaheburayo bavaga muri Egiputa ko bazinjira i Kanani barwana, nta mishyikirano, bagafata igihugu cyabo ku ngufu. Ni ko byagenze, abaheburayo binjiye i Kanani mu ntambara z'urudaca bashyigikiwe n'Uwiteka. Ndetse n'aho bamariye gufata igihugu bahawe n'Imana (Kanani), abanzi babo ntibagiye kure, bari babakikije, bigatuma hahora gushotorana bya hato na hato.

Abaheburayo bakigera i kanani, bahise binjira mu bihe by'abacamanza byamaze imyaka igera kuri 300. Byonyine muri iki gitabo, Bibiriya ihavuga intambara n'amakimbirane bidahagarara hagati y'Abaheburayo n'abaturanyi babo. Babonaga agahenge k'igihe gito, intambara zigakomeza, mu gihe cy'imyaka 300!

Na nyuma y'Abacamanza, Isirayeli yabayeho indi myaka igera mu 1,000; muri iyo myaka yose Bibiriya igaragaza Abaheburayo mu ntambara z'urudaca, ariko cyane cyane noneho Abaheburayo bagiye bajya mu bubata bw'ubwami bukomeye (Empires), iz'ingenzi zivugwa ni enye: Babuloni, Abamedi n'Abaperesi, Abageri n'Abaroma. Ubwo Yesu yazaga mu isi yasanze Abisirayeli bari mu bubata bw'Abaroma, ndetse yasubiye mu Ijuru bakiburimo.

6) ISIRAYELI N'ABARABU MU ISEZERANO RISHYA

Muri Bibiriya, isezerano rya cyera ritanga amakuru menshi ku ntambara z'abaheburayo, ariko isezerano rishya ntiritanga amateka y'intambara zabo. Ibihari tubikura mu bitabo by'amateka asanzwe, cyane cyane ko n'ubu turacyari mu isezerano rishya, bityo rero amateka aracyakomeza kwandikwa, kandi kubw'iterambere rigezweho, amakuru y'ibibera muri Israel ntiturindira kuzayasoma mu bitabo nka cyera, ibyinshi ubu tubibona birimo kuba LIVE.

..... Birakomeza.... KANDA HANO UKOMEZE KU GICE CYA 2

Answered: Ese koko habaho amajuru atandukanye: Ijuru rya mbere, irya kabiri n'irya gatatu?

Wed, 27 Sep 2023 18:14:45 +0000

Mbere yo gusubiza iki kibazo, mutwemerere tubanze tugire icyanditswe kimwe dusoma: 2 Abakorinto 12:2 "Nzi umuntu wo muri Kristo wazamuwe akajyanwa mu ijuru rya gatatu, ubu hashize imyaka cumi n’ine (niba yari mu mubiri simbizi, cyangwa niba atari mu mubiri na byo simbizi bizi Imana)."

Pawulo ntabwo avuga uyu muntu wazamuwe akajyanwa mu Ijuru rya gatatu, ariko abasesenguzi bose bahamya ko uyu muntu ari Pawulo ubwe. Ibyo ari byo byose, uyu muntu yaba Pawulo cyangwa undi, ikigaragara ni uko uyu muntu yajyanywe mu Ijuru rya gatatu. Bisobanuye ko Ijuru rya gatatu ribaho, kuko uyu si umugani. Ahubwo wenda umuntu yakwibaza ati "Ijuru rya gatatu ni iki cyangwa ni hehe? Imirongo ikurikira uwo dusomye hejuru urabigaragaza: 2 Abakorinto 12:3-4 "Kandi nzi yuko uwo muntu (niba yari ari mu mubiri, cyangwa niba yari atari mu mubiri, simbizi bizi Imana), [4]yazamuwe akajyanwa muri Paradiso akumva ibitavugwa, ibyo umuntu adakwiriye kuvuga." Ibi rwose birasobanutse: Pawuli ati "uwo muntu yazamuwe mu Ijuru rya gatatu", hepfo gato ati "yarazamuwe ajyanwa muri Paradizo". Bisobanuye ko Ijuru rya gatatu = Paradizo

1) Ijuru rya gatatu = Paradizo, (Cyangwa ubututo bw'Imana n'abamarayika) .

Ubwo tubonye rero mu buryo budashidikanywaho ko hari Ijuru rya gatatu, ubwo n'irya kabiri n'irya mbere rirahari. Dukomeze turebe ibyanditswe

2) Ijuru rya kabiri: Mu gihe tumaze kubona ko hari ubuturo bw'Imana n'Abamarayika, hari icyanditswe kindi kigaragaza ko hari n'ubuturo bw'imyuka mibi; Pawulo nanone afite icyo abivugaho: Abefeso 6:2 "Kuko tudakirana n’abafite amaraso n’umubiri, ahubwo dukirana n’abatware n’abafite ubushobozi n’abategeka iyi si y’umwijima, n’imyuka mibi y’ahantu ho mu ijuru." Pawulo ati "imyuka mibi y'ahantu ho mu ijuru". Birumvikana ko iri juru rivugwa atari rya rindi twabonye rya gatatu. Hari icyanditswe cyatumenyesha iri juru iryo ari ryo: Daniel 10:12-13 "Aherako arambwira ati “Witinya Daniyeli, kuko uhereye ku munsi watangiriyeho gushishikarira gusobanukirwa no kwicisha bugufi imbere y’Imana yawe, amagambo yawe yarumviswe kandi ni yo anzanye. [13]Ariko umutware w’ibwami bw’u Buperesi amara iminsi makumyabiri n’umwe ambuza. Nyuma Mikayeli, umwe wo mu batware bakomeye aza kuntabara, ntinda mu bami b’u Buperesi."

Icyi cyanditswe cyarasobanuwe bihagije: Daniel yarasenze, agitangira gusenga Marayika ava muri rya Juru rya 3 twabonye amuzanira ibisubizo. Ageze muri rya juru rindi tubonye mu Befeso 6:2 ; afatirwayo n'imyuka mibi, byabaye ngombwa ko Marayika w'intambara (Mikayeli) atabara, ashakira Marayika wari uzanye ibisubizo inzira abona kubishyikiriza Daniel ku isi. Birumvikana ko ijuru rya kabiri riri hagati y'ijuru rya gatatu n'isi. Ijuru rya kabiri = Ubuturo bwa satani n'abadayimoni

3) Ijuru rya mbere: Ijuru rya mbere ni iki kirere turebesha amaso, isanzure, space.

Hari n'abavuga ko iby'Ijuru rya 3, 2, 1 biri symbolic kurusha uko byaba biriho koko. Gusa Pawulo arabisobanuro ko aho yajyanywe ari mu Ijuru rya 3. Nta mpamvu dufite yo gutekereza ko ibyo ari "igitekerezo gusa". Igisigaye rero mutwemerere dukureho urujijo: Ibi byose tuvuze ni iby'iki gihe gusa, Ijuru tuzajyamo ku iherezo rya byose ni rimwe rukumbi, kandi ubwiza bwaryo burenze ibitekerezo by'umuntu ku buryo Bibiriya ibivuga itya: 1 Abakorinto 2:9 "Ariko nk’uko byanditswe ngo “Ibyo ijisho ritigeze kureba, N’ibyo ugutwi kutigeze kumva, Ibitigeze kwinjira mu mutima w’umuntu, Ibyo byose Imana yabyiteguriye abayikunda.”

Uwiteka abagirire neza

Answered: Daniel yari hehe igihe bagenzi be bajugunywaga mu itanura ryaka umuriro?

Wed, 27 Sep 2023 10:43:07 +0000

Bibiriya Yera, igitabo cya Daniel, igice cya 3, havugwa inkuru y'abasore batatu: Saduraka na Meshaki na Abedinego. Aba basore ubusanzwe baziye igihe kimwe na Daniyeli i Babuloni bavanywe iwabo i Yerusalemu ubwo Nebukadinezari yahasenyaga. Baziye kimwe, bose uko ari 4 bazanwa ibwami icyarimwe, bashyirwa munsi y'umuntu umwe wari ushinzwe kubigisha imico mishya y'i Babuloni, bashyirwa mu nzu imwe, bakarira hamwe, bakigishirizwa hamwe, ibyo byose igice cya mbere cya Daniel kirabivuga.

Mu gice cya 3, havugwa inkuru y'igishushanyo Nebukadinezari yakoze, ategeka abantu bose kukiramya, ariko ba basore batatu b'inshuti za Daniel banga kukiramya, kugeza aho bajugunywe mu itanura ryaka umuriro bazizwa ko banze kukiramya. Muri iyi nkuru bavugwa ari batatu bonyine, bigatuma havuka ikibazo gikurikira: "Daniel yari he? Kuki atavugwa muri iyi nkuru?"

Mwibuke ko iki gitabo cyanditswe na Daniel ubwe. Kuba atavuga aho yari ari, ni uko yasanze atari ngombwa. Nk'uko dukunze kubivuga, Bibiriya ntiyandikiwe kutumara amatsiko, yandikiwe kutwereka umugambi w'Imana ku muntu. Ariko rero n'ubwo Bibiriya idasubiza iki kibazo, dushobora gukoresha ibyanditswe tukagerageza kumenya impamvu Daniel atari kumwe na bagenzi be.

Hari impamvu eshatu zishoboka, tugiye kuzirebera hamwe, hanyuma tugende dukuramo ibidashoboka, (Elimination), turasigarana kimwe gishoboka kurusha ibindi:

1) Ku bw'inshingano nyinshi n'umwanya yari afite ugereranywa na "Premier Ministre", Daniel ashobora kuba atari i Babuloni.

2) Ku bw'umwanya w'icyubahiro Daniel yari afite, Umwami Nebukadinezari ashobora kuba yaramukoreye irengayobora (Exception) ntamusabe kuramya iki gishushanyo.

3) Daniel yaba yaremeye kuramya igishushanyo kubera ubwoba bwo gutinya umuriro ugurumana.

Mureke dukuremo ibidashoboka kimwe kimwe: Icya 3 cyo kuvuga ko Daniel yaba yaremeye kuramya igishushanyo kubera ubwoba rwose ntigishoboka. Ibi tubihera ku mwanzuro ukomeye wo "Kutiyanduza" Daniel yari yarafashe ku ikubitiro uvugwa mu ntangiriro z'igitabo cye: Daniel 1:8 "Maze Daniyeli agambirira mu mutima we kutaziyandurisha ibyokurya by’umwami cyangwa vino yanywaga, ari cyo cyatumye yinginga uwo mutware w’inkone kugira ngo atiyanduza." Ikiyongera kuri ibi, Mu gice cya 6 tubona Daniel ajugunywa mu rwobo rw'intare azira ko bamubujije gusenga Imana ye agasanga atashobora kubaho adasenga, akiyemeza gusenga nk'ibisanzwe yirengagije ko arimo gushyira ubuzima bwe mu kaga. Uyu mugabo rero wari wariyemeje "Kutiyanduza", uyu mugabo wemeye kujugunywa mu rwobo rw'intare aho gusenga indi Imana itari Imana ye, ntabwo yari kugira ubwoba ngo yunamire igishushanyo cya Nebukadinezari. OYA ntibishoboka.

Icya 2 cyo kuvuga ko Daniel yaba yarakorewe "exception" ntasabwe kuramya igishushanyo, na cyo ntigishoboka kuko itegeko rya Nebukadinezari ryari risobanutse: Ryarebaga bose. Daniel 3:3 "Nuko Umwami Nebukadinezari atuma abantu bo guteranya abatware b’intebe n’ibisonga byabo, n’abanyamategeko n’abacamanza, n’abanyabigega n’abajyanama, n’abirutsi n’abatware bose bo mu bihugu byaho ngo baze kweza icyo gishushanyo Umwami Nebukadinezari yari yahagaritse."

Igisigaye gishoboka ni icya 1: Ku bw'inshingano nyinshi yari afite zivugwa muri Bibirya n'umwanya wo hejuru yari afite, Daniel ashobora kuba atari i Babuloni ubwo aba basore bajugunywaga mu muriro. By'ukuri ubwo Daniel yari amaze gusobanurira Nebukadinezari inzozi zari zananiye abandi banyabwenge bose, Nebukadinezari yamuzamuye mu mwanya wa mbere muri aya magambo: Daniel 2:48 "Nuko umwami aherako akuza Daniyeli, amugororera ingororano nyinshi zikomeye. Amuha gutwara igihugu cyose cy’i Babuloni, no kuba umutware mukuru w’abanyabwenge bose b’i Babuloni." Ubwami bwa Babylone bwari bunini, bwari bufite ibirometero kare birenga 500,000. Iryo jambo dusomye rivuga ko Daniel yahawe gutwara igihugu cyose, akabifatanya no kuba umutware mukuru w'abanyabwenge bose b'i Babuloni. Ni inshingano zitoroshye, byanga bikunda byamusabaga gukora ingendo nyinshi. Birashoboka cyane rero ko igihe aba basore bajugunywaga mu itanura ry'umuriro, Daniel ashobora kuba yari mu ngendo z'akazi hanze ya Babuloni.

Bikwiye gusobanuka ko aba basore batatu batari bahuje urwego na Daniel. Ni cyo gituma n'umuntu yakongera kwibaza aho aba basore bari bari igihe Daniel yajugunywaga mu rwobo rw'intare? Igisubizo ni uko batari bahuje urwego, Daniel yagiriwe ishyari rituma ashakwaho impamvu yo kumugirira nabi, iri shyari ntiryareba aba basore.

Murakoze, uwiteka abagirire neza

Answered: ISOMO RYA 3: Sawuli yagiye gushikisha ngo avugane na Samuel wari warapfuye. Umushitsikazi amuzamurira Samuel baravugana, aranamuhanurira. Ibi bishoboka bite?

Sun, 08 Apr 2018 15:53:00 +0000

Abasesenguzi ba Bibiriya bakoze urutonde rw'ibibazo bitavuzweho rumwe mu mateka ya Bibiriya, iki kibazo cyaje mu bibazo 5 bya mbere byakuruye impaka z'urudaca kugeza n'ubu.

Iki kibazo kizwi cyane mu cyongereza ku izina rya "En-dor mystery", Abafaransa bo bakibatije "Paradoxe d'En-dor". Endori ni hahantu hari hatuye umushitsikazi Sawuli yagiye gushaka ngo amuzamurire Umuhanuzi Samuel bavugane. Ibyabereye hano Endori nanubu ntibiravugwaho rumwe 100%, ariko abasesenguzi ba Bibiriya biyemeje gukemura izi impaka bakoresheje uburyo natwe dusanzwe dukoresha hano: AMAHAME Y'IMANA. Iyo utekereje ko amahame y'Imana adahinduka mu gihe no mu isanzure, bigufasha kurebera ikibazo gikomeye mu nguni yindi, ugafata ihame ukarigenderaho mu ndorerwamo y'ijambo ry'Imana, ugashaka ubusobanuro bw'ikibazo n'igisubizo cyacyo.

Reka turebe incamake y'ikibazo dufite hano n'ingorane gikurura:

Umwami wa mbere wa Isirayeli ari we Sawuli, yimitswe n'Umuhanuzi Samuel. Ubwo Sawuli yari akiri ku ngoma, Samuel, yasutse andi mavuta ku musore witwa Dawidi Imana yari yitoranyirije kuko Sawuli yari yatangiye kugaragaza umutima wo kutumvira Imana. Kuva icyo gihe, Sawuli nta mahoro yongeye kugira, ishyari yari afitiye Dawidi ryabaye ryinshi ritangira kumutera stress no guhangwaho n'imyuka mibi. mu buryo bw'umwuka Sawuli yagiye hasi bikabije, kugeza aho Imana ifatiye umwanzuro wo kumwihorera no kutongera kumuvugisha. Byageze aho sawuli yica abatambyi b'uwiteka bose, abakekaho gufasha Dawidi yitaga umwanzi we. Umuhanuzi Samuel yaje kwitaba Imana, asiga Sawuli mu kangaratete karushijeho: Nta muhanuzi wo kumugira inama, Nta mutambyi wo kumwingingira.... Ku iherezo ry'imyaka 40 yamaze ku ngoma, haje kuba ikibazo ari nacyo cyakuruye uru rudaca rw'ibyabereye Endori. Abafilisitiya bateraniye gutera Isirayeli, Sawuli na we ateranya ingabo ngo barwane. Mbere y'uko izi ngabo zisakirana, Sawuli yongeye kugerageza kuvugana n'Imana ngo imugire inama, ariko Imana iraruca irarumira nk'uko yari yarabifatiye umwanzuro. Sawuli rero na we afata umwanzuro w'urukozasoni: akiri mu mwuka muzima, yari yaraciye mu gihugu abashitsi n'abapfumu bose nk'uko itegeko ry'Imana ryabimutegekaga; ariko ati icyampa hakaba harasigaye umushiti nibura umwe nkajya kumureba, akanzamurira Samuel tukongera tukavugana! Abaja be bamubwiye ko kuri Endori hari umushitsikazi wacitse ku icumu, atazuyaje ahita yiyoberanya, afata urugendo rwo kujyayo gushikisha.

Ibyabereye Endori ni amayobera; Iyo usomye muri bibiriya ibyahabereye, uhura n'ingorane zikurikira:

1) Umushitsikazi yemeza ko yazamuye Samuel, ndetse Samuel avugana na Sawuli. (1 Samuel 28:11-16). Ikibazo cya mbere: Ese Umushitsi afite imbaraga zo kugarura ku isi umuhanuzi w'Imana nka Samuel?

2) Abasesenguzi bamwe bemeza ko uwazamutse atari Samuel ahubwo ari Idayimoni. Ikibazo cya kabiri: Niba koko ari idayimoni yazamutse ikavuga, yahanuye ko umunsi ukurikiyeho Sawuli n'abahungu be bazapfa bagasanga Samuel (1 Samuel 28:19) kandi byarasohoye. Ni gute iyi dayimoni yahanura ibiri byo?

3) Endori, Sawuli ntiyigeze abona Samuel imbona-nkubone, ariko yaramwumvaga. Ni yo mpamvu yabazaga umugore w'umushitsikazi ibibazo nka "Ubonye iki?", "Arasa ate?". (1 Samuel 28:13-14). N'ubwo Sawuli atabonaga Samuel n'amaso, ariko ijwi rye yararyumvaga kandi yari arizi, ndetse barabazanije bakanasubizanya. Ibi byo bisobanurwa gute?

REKA NONEHO TWINJIRE MU KIBAZO NYIR'IZINA.

Hari ibintu bitatu byadufasha cyane gusobanukirwa n'iki kibazo:

ICYAMBERE: Imana ntiyakoresha ikizira ngo ituyobore

Nk'uko twabivuze haruguru, tugomba kwifashisha ijambo ry'Imana nk'urumuri, tukareba ibyabereye Endori bitavuguruza ijambo ry'Imana akaba aribyo dufata nk'ukuri. Ihame rya mbere riri budufashe hano. ni iri: IMANA NTISHOBORA KWIVUGURUZA.

- Zaburi 15:4 "...abatinya Uwiteka arabubaha. Icyo yarahiriye naho cyamugirira nabi ntiyivuguruza. "

- Zaburi 132:11 "Uwiteka yarahiye Dawidi indahiro y'ukuri, Ntazivuguruza ati...."

Icya mbere: Iyo Imana yavuze ko ikintu ari icyaha, ntishobora gukoresha icyo kintu ngo igucire inzira. iryo ni ihame buri wese akwiriye kumenya.

- Yakobo 1:13 "Umuntu niyoshywa gukora ibyaha ye kuvuga ati "Imana ni yo inyoheje", kuko bidashoboka ko Imana yoshywa n'ibibi, cyangwa ngo na yo igire uwo ibyohesha."

Reka noneho turebe icyo Imana ivuga ku byerekeranye no kuragura no kuraguza, gushika no gushikisha dukurikije amategeko bari bafite mu gihe cya Sawuli (Isezerano rya kera).

- Abalewi 20:27 "Umushitsi cyangwa umushitsikazi, n'umupfumu cyangwa umupfumukazi ntibakabure kwicwa, babicishe amabuye. Urubanza rw'amaraso ye ni we ruzahama."

- Abalewi 19: 31 "Ntimugahindukirire abashitsi cyangwa abapfumu, ntimukabashikishe, ntimukabaraguze ngo mubiyandurishe. Ndi Uwiteka Imana yanyu."

- Abalewi 20:6 "Kandi umuntu uhindukirira abashitsi n'abapfumu, ngo asambanishe kubashikisha no kubaraguza, nzahoza igitsure cyanjye kuri uwo muntu, mukure ku bwoko bwe."

Mu Gutegeka kwa 2 18:9-13, Bibiriya itanga urutonde ry'ibikorwa by'umwijima Uwiteka yanga urunuka, bikaba ikizira ku bana bayo. Iyo uwiteka yavuze ko ibi abyanga urunuka, ntashobora na rimwe kubikoresha nk'inzira yo kuyobora umuntu, kumwigisha, kumugira inama n'ibindi. OYA RWOSE. IRI NI IHAME RIDAKUKA MU GIHE NO MU ISANZURE. By'umwihariko, ibi byanditswe bigaragaza mu buryo budashidikanywaho ko ibyabereye Endori nta kiganza cy'Imana kibirimo.

ICYA KABIRI: Sawuli, Umuryango ufunguriwe abadayimoni

Ni byiza cyane kwitegereza imimerere ya Sawuli muri iki gihe. Sawuli yari amaze igihe kinini yitandukanije n'Imana, mu buryo bw'umwuka yari hasi ku buryo buteye inkeke.

- Sawuli yaterwaga n'amadayimoni kenshi, akayakizwa n'uko Dawidi amucurangiye.

- Dawidi wamukizaga amadayimoni, yabonye ubuzima bwe buri mu kaga ku bwa Sawuli wagerageje kumwica inshuro zirenga 5, ahitamo guhunga. Sawuli asigara mu kaga karushijeho.

- Sawuli yicishije abatambyi b'Uwiteka bose, abahora gukekwaho gufasha Dawidi.

- Umuhanuzi samuel yarapfuye, asiga Sawuli nta muhanuzi wo kumugira inama.

Mu buryo bw'umwuka Sawuli yari mu kaga gakomeye. Ubuzima bwe bwari umuryango ufunguriwe abadayimoni b'ubwoko bwose: Nta muhanuzi, nta mutambyi, Imana yamukuyeho amaboko ntimuvugisha, haba mu buhanuzi ubwo aribwo bwose, haba Uburyo bwari bumenyerewe bw'utubuye twa Umimu na Tumimu, nta yerekwa nta nzozi...... Kuva aho Samuel yapfiriye kugeza igihe yagiye gushikisha haciyemo imyaka igera kuri 5. iyi myaka yamubereye ubwigunge n'ubwihebe bukabije, kugeza aho yemera kwambara ubucocero ngo yiyoberanye, ajya gushaka umugore wagombaga kuba yarishwe ku bw'itegeko rye. Umwami wiyemeje kwambara ubucocero ngo batamumenya kubwo guca ku isezerano, kwishyira mu maboko y'umushitsikazi... uwavuga ko yari mubiganza bya Satani ntiyaba abeshye.

ICYA GATATU: Satani, ashobora kwihindura icyo ashatse

Kuva mu bwana bwacu, twigishijwe kenshi kureba Satani nk'ikiremwa kibi, gisa nabi, cy'ibihembe...., ariko nyamara siko Bibiriya imutubwira. Kuva mu itangiriro igice cya 3, Satani agaragara nk'uvuga atuje, wiyerekana neza agamije kwemeza. Uburyo akora buramenyerewe: Kwiyoberanya, kuvanga ukuri n'ikinyoma, kugoreka ijambo ry'ukuri, kwiyerekana nka Marayika w'urumuri. Abakorinto ba kabiri 11:14 "Kandi ibyo si igitangaza, kuko na Satani ubwe yihindura nka marayika w'umucyo.". Ibyo umushitsikazi yabonye bibaye ari Satani wiyoberanyije, ntibyaba ari igitangaza. N'ijwi Sawuli yumvise ribaye ari irya Dayimoni, na byo ntibyaba ari igitangaza. Ariko reka dukomeze turebe.

Ibi bintu uko ari bitatu tumaze kureba, biraduha ishusho ya mbere y'ibyabereye Endori: Imana, ntishobora gukoresha icyaha ngo ituyobore, Satani afite ububasha bwo kwihinduranya uko ashatse, Sawuli na we yari umuryango ukinguye n'ibiryo byoroshye kuri Satani n'Abadayimoni.

IBIBAZO N'IBISUBIZO BYABYO

1) Ese umushitsi afite ububasha buhagije bwazamura mu bapfuye Umuhanuzi w'Imana? Igisubizo cyihuse ni OYA. Uretse n'Umuhanuzi w'Imana, nta n'undi muntu wapfuye Umushitsi ashobora kugarura ngo avugane n'abakiri ku isi y'abazima. Ibyo Yesu ubwe yivugiye muri Luka 16:1-31, nta wavuye mu mubiri ushobora kugaruka ku isi, nta n'uri ku isi ushobora kujya aho abavuye mu mubiri bari adapfuye.

2) Imana yari yarafashe umwanzuro wo kutongera kuvugisha Sawuli, Ese uyu mushitsikazi yari kuyivana ku izima? Igisubizo cyihuse ni OYA. 1 Samuel 28:6 hagira hati: "Sawuli aherako agisha Uwiteka inama, Uwiteka ntiyagira icyo amusubiza haba mu nzozi, haba na Urimu, haba n'abahanuzi." Nk'uko twabibonye, Imana yihoreye Sawuli kandi Sawuli yakoresheje uburyo bukiranuka, ntawo Imana yari kumusubiza Sawuli akoresheje uburyo burimo icyaha, uburyo Imana yanga urunuka.

3) Umushitsikazi yabonye Umusaza witeye igishura azamuka avuye ikuzimu. Ese uyu ni Samuel koko? Igisubizo cyihuse ni OYA. Nk'uko twabibonye, Umushitsikazi ntashobora kuzamura Samuel. None se uyu yabonye ni inde? Witegereje neza, Uyu mugore yatanze ibisubizo bibiri inshuro ebyiri. Umurongo wa 13, uyu mugore yabanje kuvuga ati: "Mbonye imana izamuka iva ikuzimu." Hari ikintu uyu mugore yari abonye, aravuga ati mbonye imana... (imana na i ntoya). Nta gushidikanya, yari abonye umwuka runaka wambaye ishusho runaka. (Esprit). Icyo yabonaga, Sawuli we ntiyakibonaga. Ni cyo cyateye Sawuli gusobanuza ati "Arasa ate?" Kuri iki kibazo niho uyu mugore yongeye ati "Ni umusaza uzamutse, kandi yiteye igishura." Ibi bisubizo 2 biteye amakenga. Ubwa mbere ati mbonye "imana". kuko yari neza icyo Sawuli yifuza kumva, yamubwiye nyine igihuye n'icyo yifuza kumva. ubwa kabiri ati ni "umusaza witeye igishura"

4) Ni iyihe gihamya yindi ko uwazamutse ava ikuzimu atari Samuel ahubwo ari idayimoni?

Muri Bibiriya yose, igihe cyose hari ikintu kivuye ku Mana kigaragara nk'ikivuye hejuru kimanuka hasi. N'igihe cyose hari ikivuye kwa Satani kigaragazwa nk'ikivuye ku isi cyamgwa ikuzimu. Abagalatiya 1:8;

INYIGISHO N0 1: UBUSOBANURO BW'UBUHANUZI BWA DANIEL IGICE CYA 9:25

Sat, 19 Nov 2016 12:49:02 +0000

Daniel 9:25 Nuko ubimenye ubyitegereze, yuko uhereye igihe bazategekera kubaka i Yerusalemu bayisana kugeza kuri Mesiya Umutware, hazabaho ibyumweru birindwi, maze habeho ibindi byumweru mirongo itandatu na bibiri,.......

Daniel yahanuraga iki?