Bibiriya irasubiza - Recent questions and answers in Ibibazo byerekeye ibihe by'imperuka

Answered: Ingoma y'imyaka 1000 ni iki?

Sat, 11 Apr 2026 15:09:57 +0000

Iki kibazo cyarasubijwe n'ubundi, mwakanda kuri iyi link mukabona igisubizo kirambuye:

Kanda hano

Answered: Checklist y'ibimenyetso by'imperuka

Thu, 10 Oct 2024 22:17:08 +0000

CHECK LIST Y'IBIMENYETSO BY'IBIHE BY'IMPERUKA, IBYASOHOYE N'IBITARASOHORA

-------------------------

NOTE: Ahari aka kamenyetso ✅ bisobanuye ko icyo kimenyetso cyasohoye

1) IBYAVUZWE NA YESU UBWE ( Matayo 24, Mariko 13, Luka 21)

*1)* Hazaza benshi biyita izina rya Kristo ✅

*2)* Muzumva iby'intambara, impuha z'intambara n'imidugararo.✅

*3)* Ishyanga rizatera irindi shyanga, n'ubwami buzatera ubundi bwami ✅

*4)* Hazabaho inzara ✅

*5)* Hazabaho ibyorezo by'indwara ✅

*6)* Hazabaho imitingito y'isi n'ibindi biza ✅

*7)* Abizera Yesu bazagambanirwa ngo bababazwe, ndetse bazicwa, bazangwa n'amahanga yose babahora izina rye ✅

*8)* Benshi bazasubira inyuma, bazagambanirana bangane ✅

*9)* Abahanuzi benshi b'ibinyoma bazaduka bayobye benshi ku bw'ibimenyetso n'ibitangaza ✅

*10)* Ubugome buzagwira ✅

*11)* Urukundo rwa benshi ruzakonja ✅

*12)* Hazabaho ibitera ubwoba n'ibimenyetso bikomeye biva mu ijuru ✅

*13)* Umuvandimwe azagambanira mwene se ngo yicwe, na se w'umwana azamugambanira, abana bazagomera ababyeyi babicishe. ✅

*14)* Ubutumwa bwiza bw'ubwami buzigishwa mu isi yose, ngo bube ubuhamya bwo guhamiriza amahanga yose. ✅

------

2) *HARI N'IBINDI BYAVUZWE N'ABAHANUZI

- Ubwenge buzagwira (Daniel 12:4) ✅

- Bamwe bazagwa bave mu byizerwa, bīte ku myuka iyobya n'inyigisho z'abadayimoni (Pawulo, 1 Tim 4:1)✅

- Abantu bazaba bikunda, bakunda impiya, birarīra, bibona, batukana, batumvira ababyeyi babo, indashima, batari abera, badakunda n'ababo, batūzura, babeshyerana, batirinda, bagira urugomo, badakunda ibyiza, bagambana, ibyigenge, bikakaza, bakunda ibibanezeza aho gukunda Imana, bafite ishusho yo kwera ariko bahakana imbaraga zako. (Pawulo, 2 Tim 3:1-5)✅

- Abantu babi n'abiyita uko batari bazarushaho kuba babi, bayobya bakayobywa.(Pawulo, 2 Tim 3:13) ✅

- Bamwe ntibazihanganira inyigisho nzima, ahubwo kuko amatwi yabo azaba abarya yifuza kumva ibibanezeza, bazigwiriza abigisha bahuje n'irari ryabo, kandi baziziba amatwi ngo batumva ukuri, bazayoba bakurikize imigani y'ibinyoma. (Pawulo, 2 Tim 4:3)✅

--------

==> Nk'uko bigaragara, 100% byose byarasohoye. Igihe icyo aricyo cyose Yesu ashobora gutwara Itorero.

Baravuga ngo Niko byahoze (2 Pet 3:4 [4]babaza bati “Isezerano ryo kuza kwe riri he? Ko uhereye aho ba sogokuruza basinziririye, byose bihora uko byahoze, uhereye ku kuremwa kw'isi.”)

Ikibazo ni iki: *Ese Abakristo turabibona?*

Yesu yaratuburiye ati:

[32]“Murebere ku mutini ni wo cyitegererezo: ishami ryawo, iyo ritoshye ibibabi bikamera, mumenya yuko igihe cy'impeshyi kiri bugufi.

[33]Nuko namwe nimubona ibyo byose, muzamenye yuko ari hafi, ndetse ageze ku rugi. ( Matayo 24:32-33)

_Umunsi umwe, vuba bitari kera, tuzirirwa mu isi twe kuyiraramo, cyangwa tuyiraremo twe kuyirirwamo_

Ibyahishuwe 22:20: "Uhamya ibyo aravuga ati “Yee, ndaza vuba.”Amen, ngwino Mwami Yesu."

Blesssings

Answered: Maitreya ni inde? Ese Maitreya ni we Antikristo?

Fri, 27 Oct 2023 10:13:45 +0000

Ijambo "Maitreya" (Cyangwa Metereya) ubwaryo ntaho rigaragara mu byanditswe byera, ndetse n'aho ryaturutse ntihazwi neza. Gusa ikizwi ni uko rikoreshwa cyane mu myemerere ya Buddhism, ariko nta cyanditswe na kimwe umuntu yaheraho ahuza Maitreya na antikristo.

Inyigisho zibijyanye na Maitreya zadutse mu myaka ya za 1800, ariko uko zakwiraga ni uko na zo ubwazo zitagiye zisobanurwa kimwe, bamwe bavuga ko Maitreya ari Buddha wundi uzaza, abandi bakavuga ko ari kristo wundi uzaza. Hari igice cy'abayisilamu kivuga ko Muhammed ari we wari Maitreya, mu gihe abo mu idini y'Ababahayi nabo bavuga ko Maitreya wabo ari we muhanuzi mukuru wabo Baha’u’llah'. Abo bombi icyo bahuriraho ni uko Maitreya yarangije kuza mu isi, mu gihe hari utundi duce two tuvuga ko Maitreya azaza mu bihe biri imbere.

Uko byamera kose, ibivugwa kuri Maitreya byose ntibishingiye ku myizerere mizima ya Gipentekote, ahubwo bishingiye ku bitekerezo n'imigani byagiye byigarurira imitima y'abatari bacye kugeza n'aho babifata nk'ukuri. Icyangombwa si ugushaka gucengera ibitavugwa muri Bibiriya, ahubwo icyangombwa ni uko buri wese yacunga neza akamenya niba ahagaze neza mu gakiza, kuko ariko konyine gatanga umutekano w'ubugingo buhoraho bubonerwa muri Yesu Kristo.

Ikindi kibazo cyagufasha: Antikristo ninde?" Kanda hano ubone igisubizo

Uwiteka abagirire neza

Answered: Bibiriya ivuga iki ku iherezo ry'uyu mubumbe dutuye?

Wed, 04 Oct 2023 09:11:27 +0000

Icyanditswe kivuga ku iherezo ry'iyi si dutuye mu buryo butajijinganywaho kigaragara muri 2 Petero 3:10 "Ariko umunsi w’Umwami wacu uzaza nk’umujura, ubwo ijuru rizavaho hakaba n’umuriri ukomeye, maze iby’ishingiro, ibyo byose biremeshwa bikayengeshwa no gushya cyane, isi n’imirimo iyirimo bigashirīra." Iyo ni yo ndunduro y'ibyo mubona, bizaba bishoje amateka ya muntu hano mu isi ndetse n'uyu mubumbe dutuye.

Ibyo Imana yaremye tubona mu gitabo cy'itangiriro igice cya mbere byose bizarangira bityo. Ibyo dusomye hejuru bizaba nyuma y'imyaka 1,000 ya paradizo hano mu isi, imyaka izwi nk"ikinyagihumbi" (Ushobora gukana hano ugasoma ibyerekeye ingoma ya kristo y'imyaka 1,000). Nyuma y'iyi myaka 1,000, satani azarekurwa akanya gato, ariko acirweho iteka ajugunywe mu muriro w'iteka ryose. Gusandaza isi yose icyarimwe ntiwakumva ubukana n'urusaku byaba bifite, ibyo ni byo Bibiriya yita "Umuriri ukomeye" Muri versions z'icyongereza zimwe zikoresha ijambo "thunderous crash", izindi zigakoresha "loud noise"....

Muri make ntibyoroshye kubona ijambo ryasobanura neza isandara ry'uyu mubumbe wose ndetse n'isanzure ryose! Uko kuyenga kw isanzure Petero yakubonye nk'uguteye ubwoba, ni yo mpamvu akurikizaho umurongo wa 11 avuga ati "Nuko ubwo ibyo byose bizayenga bityo, yemwe uko dukwiriye kuba abantu bera, kandi twubaha Imana mu ngeso zacu"

Abizera bagomba kumenya kandi bakizera ibyanditswe, amaherezo y'uyu mubumbe dutuye arasobanutse mu buryo butarimo urujijo. Mu gitabo cy'ibyahishuwe igice cya 21, Bibiriya ivuga ko Imana izarema Ijuru rishya n'isi nshya, aho ni ho abizera bazaba ubuziraherezo mu munezero utavugwa, aho ni ho Bibiriya ivuga iti 1 ABAKORINTO 2:9 "Ariko nk’uko byanditswe ngo “Ibyo ijisho ritigeze kureba, N’ibyo ugutwi kutigeze kumva, Ibitigeze kwinjira mu mutima w’umuntu, Ibyo byose Imana yabyiteguriye abayikunda.”

Uwiteka abagirire neza.

Answered: Ese Bibiriya ivuga ko mu bihe bya nyuma hazabaho Guverinoma imwe n'ifaranga rimwe?

Sat, 23 Sep 2023 10:12:16 +0000

Mu by'ukuri ntaho Bibiriya ikoresha iryo jambo "Guverinoma imwe, Leta imwe, igihugu kimwe, ifaranga rimwe.....", ariko ibyanditswe byinshi bigaragaza ko mu bihe bya nyuma, hazabaho system imwe izemerera antikristo gukora yisanzuye ku isi yose adafite imipaka y'ibihugu nk'uko tuyizi ubu.

Igihe Umuhanuzi Daniel yari mu iyerekwa ry'ibyerekeye ibihe bya nyuma, dore bimwe mu byo yabonye: Daniel 7:20-21 "Kandi nifuza kumenya iby’amahembe cumi yari ku mutwe wayo, n’iby’irindi hembe ryameze atatu asanzwe akarandurwa imbere yaryo, ari ryo rya hembe ryari rifite amaso n’akanwa kavuga ibikomeye, ryarushaga ayandi gukomera. [21]Maze mbona iryo hembe rirwanya abera ryenda kubanesha". Iri hishurirwa rya Daniel rigaragaza ko ubwo Itorero rizamara kuzamurwa, antikristo azabasha guhindura imitere y'ubuyobozi bwari busanzweho mu isi, ku buryo azaba afite imbaraga n'ubutware bimuhesha ijambo ku rwego rw'isi. Yohana na we mu byahishuwe arabyemeza aho avuga iby'iyi nyamaswa (Antikristo) ati: "Ihabwa kurwanya abera no kubanesha, ihabwa no gutwara imiryango yose n’amoko yose, n’indimi zose n’amahanga yose..." (Ibyahishuwe 13:7) Ibi byanditswe byombi biragaragaza ko ubwo Antikristo azahishurwa (Ubu arakora mu buryo bw'amayoberane), azahabwa na Satani ubutware buhagije ku rwego rw'isi. N'ubwo Bibiriya idakoresha iryo jambo "Guverinoma imwe", bigaragara rwose ko Antikristo azaba ari umuyobozi wa system imwe ku rwego rw'isi. Ntibyoroshye gutekereza uko bizagenda n'inzira bizanyuramo kugirango isi yose yishyire munsi y'umuyobozi umwe, ariko muzirikane ko ku isi hazaba habaye n'ubundi ibintu bidasanzwe: Ibihumbi by'abantu ku isi yose bazaba babuze mu buryo bw'amayobera: Bamwe mu Baperezida bazaba batakiri ku isi, abafasha ba bamwe mu baperezida bazaba babuze, abana bose bazaba babuze ku isi, indege nyinshi zizaba zahanutse mu kirere kuko abapilote bazo bazaba babuze, Ubwoba bwinshi buzaba bwatashye imitima y'ibikomerezwa, amatelevisions n'amaradio yose ku isi azaba atangaza ibyabaye bidafitiwe ubusobanuro bwa science, ..... Ibi byose bizashyira isi yose mu mayobera ku buryo antikristo azahaguruka nk'ubafitiye igisubizo, azaba yahawe imbaraga na satani kandi ashyigikiwe n'umuhanuzi w'ibinyoma.

Antikristo akimara guhirwa no kugenzura isi yose, amayira azaba amufunguriwe: Azaba abasha kugenzura byose, cyane cyane ubucuruzi, aha hakaba ariho haturuka igitekerezo cy'uko hazashyirwaho ifaranga rimwe. Aho ni ho hazahyirwaho "ikimenyetso" kuri buri wese wifuza kugira icyo ahaha, utazaba afite icyo kimenyetso (mu kiganza cy'iburyo cyangwa mu ruhanga) ntazabasha kugira icyo agura. Umurongo wa 16 (Ibyahishuwe 13:16) ugaragaza ko ibyo bizaba bireba bose: Aboroheje, abakomeye, abakire, abakene, abayobozi n'abayoborwa... uwo murongo uragira uti: "Itera bose aboroheje n’abakomeye, n’abatunzi n’abakene, n’ab’umudendezo n’ab’imbata, gushyirwaho ikimenyetso ku kiganza cy’iburyo cyangwa mu ruhanga..." (Aha nanone ni ho havugwa uruhare rw'ikoranabuhanga ririmo gukwirakwira ku isi yose, ni nko gutegurira amayira antikristo kugirango ibyo bizamushobokere).

Ibyo byose tumaze kuvuga, bigaragaza mu buryo butajiinganywaho ko ubwo Itorero rizamara gukurwa muri iyi si (rapture), antikristo azahita ahishurwa, kandi azaba afite ubutware ku isi yose no ku bantu bose, n'ubwo tutabyita guverinoma imwe, ikigaragara ni uko bizaba ari System imwe iyobowe na antikristo.

Tubibutse ko ibi byose bizaba Itorero rya Yesu ritakibarizwa kuri iyi si. Abakristo bazasigara nyuma yo kujyanwa kw'itorero bazahigwa na antikristo by'umwihariko ku isi yose, azabakorera iyicarubozo rikomeye abahatira kumusenga, icyakoze abazihanganira iryo totezwa (nubwo bitoroshye) kugeza bapfuye bazakizwa.

Murakoze cyane Imana ibahe umugisha.

Ibindi bibazo byerekeranye n'iki byagufasha:

- Antikristo ni muntu ki? Kanda hano ubone igisubizo

- Kuzamurwa kw'Itorero ni iki? Kanda hano ubone igisubizo

- Namenya nte ntashidikanya ko Yesu naza kujyana Itorero ntazasigara? Kanda hano ubone igisubizo

Murakoze, uwiteka abagirire neza kandi adufashe guhora twiteguye.

Answered: Hari ubundi buzima bukurikira ubu?

Fri, 22 Sep 2023 21:23:05 +0000

Iki kibazo kirasa n'ikindi cyasubijwe ushobora gukanda hano ukareba igisubizo

Answered: Ese hari ubundi buzima bukurikira ubu turimo? Kuburyo tuzaba tubasha kuganira nabo twahoze tuganira hano mwisi?

Fri, 22 Sep 2023 21:20:40 +0000

Ubuzima nyuma y'ubuzima, cyangwa ubuzima nyuma y'urupfu: Iki ni ikibazo cyiza, kandi si ubu cyibazwa gusa, guhera cyera abatubanjirije na bo baracyibazaga guhera cyera. Urugero ni Yobu na we yarabyibazaga aho agira ati: Umuntu napfa azongera abeho? [...] (Yobu 14;14).

Icyo kibazo kigendana n'ibindi bigishamikiyeho: Ese hari ubundi buzima nyuma y'urupfu? Bigendekera bite umuntu iyo apfuye? Ajya he? Ese abapfa bose bajya ahantu hamwe? Ese paradizo ibaho? Umuriro se n'Ijuru bibaho?.... n'ibindi bibazo nk'ibi tugiye kugerageza kubisubiza dukoresheje ibyanditswe byera.

Mu buryo budasubirwaho kandi butajijinganywaho, Bibiriya ihamya ko nyuma y'urupfu rw'uyu mubiri hari ubundi buzima. Ubusanzwe umuntu agizwe n'ibice bitatu: Umubiri, umwuka n'ubugingo. Iyo umuntu ariho, ibi bice biba biri kumwe kandi ntibitandukana. Iyo apfuye biratandukana: Umubiri usubira mu gitaka aho waturutse, umwuka ugasubira ku Mana aho waturutse, n'ubugingo bwe bukarekera aho kubaho. Ibyo bigaragara mu mirongo myinshi, reka dufatemo imwe muri yo.

- Zaburi 146:3-4 "Ntimukiringire abakomeye, Cyangwa umwana w’umuntu wese, Utabonerwamo agakiza. [4]Umwuka we umuvamo agasubira mu butaka bwe, Uwo munsi imigambi ye igashira."

- Umubwiriza 12:7 "n’umukungugu ugasubira mu butaka uko wahoze, n’umwuka ugasubira ku Mana yawutanze."

Kuba nyuma y'ubu buzima hari ubundi buzima, ntibisobanuye ko abantu bose bajya mu ijuru iyo bapfuye. Aho umuntu azajya nyuma yo gupfa ni we ubwe uhategura igihe akiri muri ubu buzima: Ibi biratugeza ku kindi kibazo:

Iyo umuntu apfuye ajya he?

Iki ni ikibazo cyagiye gikurura impaka guhera cyera kugeza n'ubu. Habaho ibice bitatu by'ingenzi by'abantu batabisobanura kimwe:

1) Bamwe bavuga ko iyo umuntu apfuye, uwo ari we wese, yaba umukiranutsi cyangwa umunyabyaha, ngo arekera aho kubaho, akamera nk'umuntu usinziriye, akaguma atyo kuzageza igihe cy'umuzuko ubwo azacirwa urubanza akoherezwa aho azaba ubuziraherezo.

2) Abandi bavuga ko umuntu agipfa, ahita acirwa urubanza agahita yoherezwa aho akwiriye, mu ijuru cyangwa mu muriro.

3) Abandi bavuga ko umuntu agipfa, umubiri we ujya mu gitaka, ariko umwuka we n'ubugingo bwe bukajya ahantu h'agateganyo, abakiranutsi bakajya ukwabo n'abanyabyaha ukwabo, bagategereza umunsi wa nyuma w'urubanza aho buri wese azoherezwa aho akwiriye kuzaba ubuziraherezo.

BIBIRIYA IBIVUGAHO IKI? Iyo umuntu apfuye ajya he?

- Iyo umuntu apfuye yarizeye Yesu, ajya aho Yesu ubwe yivugiye ubwo yavuganaga n'igisambo bari babambanywe i Gorigota: Luka 23:42-43 Nuko abwira Yesu ati “Mwami, uzanyibuke ubwo uzazira mu bwami bwawe.” [43]Aramusubiza ati “Ndakubwira ukuri, yuko uyu munsi turi bubane muri Paradiso.” Nta gushidikanya: Uyu si umugani si n'igishushanyo: Yesu yabwiraga igisambo cyari kimaze kumwizera ko nikimara kuva mu mubiri, kiri bwerekeze muri paradizo.

Pawulo na we avuga ko yigeze kwemererwa kunaga ijisho muri paradizo, ndetse yongeraho ko yumvise ibihavigirwa adashobora kuvuga. 2 Abakorinto 12:3-5 Nzi umuntu wo muri Kristo wazamuwe akajyanwa mu ijuru rya gatatu, ubu hashize imyaka cumi n’ine (niba yari mu mubiri simbizi, cyangwa niba atari mu mubiri na byo simbizi bizi Imana). [3]Kandi nzi yuko uwo muntu (niba yari ari mu mubiri, cyangwa niba yari atari mu mubiri, simbizi bizi Imana), [4]yazamuwe akajyanwa muri Paradiso akumva ibitavugwa, ibyo umuntu adakwiriye kuvuga. Uretse ko hari n'ibindi byanditswe, ibi tubonye byonyine biragaragaza ko Paradizo iriho.

Ariko rero, paradizo si ryo Juru tuzabamo ubuziraherezo. Ikindi kandi, abantu bose si ko bajya muri paradizo iyo bapfuye: Muri paradizo hajyamo abizeye Imana bagakora ibyo ishima, abandi iyo bapfuye na bo bafite ahabo bajya bakahababarizwa mu gihe bategereje urubanza. Ibi na byo Yesu yaranyivugiye: Luka 16:22-23 “Bukeye umukene arapfa, abamarayika bamujyana mu gituza cya Aburahamu, n’umutunzi na we arapfa arahambwa. [23]Ageze ikuzimu arababazwa cyane, yubuye amaso areba Aburahamu ari kure na Lazaro ari mu gituza cye." Ibi na byo biragaragaza ko hari ahantu habiri hatandukanye hajya abantu babiri hatandukanye iyo bapfuye.

==> Ni byo rwose nta gushidikanya: Dushingiye kuri Bibiliya, duhamya ko muri iyi ngoma y'isezerano rishya, iyo umukiranuti apfuye, umubiri we ushyirwa mu gitaka, ariko umwuka we ukajyanwa muri Paradizo, aho bamwe bita "Mu gituza cya Aburahamu". Ibibera muri Paradizo n'ibivugirwayo nta detail Bibiliya ibivugaho, gusa ikizwi ni uko ari ahantu heza abera basogongezwa ku byo bazabona mu Ijuru nyir'izina. Abanyabyaha na bo, umubiri wabo ushyirwa mu gitaka, umwuka wabo ntujya muri Paradizo, ahubwo na wo ushyirwa aho basogongezwa ibyo bazabona mu muriro utazima

Ibi biratugeza ku kindi kibazo: Ese mu Ijuru tuzabasha kumenyana n'abacu?

Muri Bibiriya, ibyanditswe byinshi bigaragaza ko mu Ijuru tuzabasha kumenya abo twamenye hano mu isi. Guhera mu isezerano rya cyera, abasogokuruza bacu bizeraga ko nibagera mu Ijuru bazabasha kumenya ababo babatanzeyo. Ibi bigaragara mu byanditswe byinshi. INGERO NI NYINSI zibigaragaza:

1) Dawidi n'umwana we: Ubwo Dawidi yari apfushije umwana we, yagize ati "nzajya aho ari" 1 Samuel 12:23 "Ariko none amaze gupfa, ndiyiririza iki ubusa? Mbese nabasha kumugarura? Nzajya aho ari ariko we ntabwo azagaruka aho ndi.” (None se Dawidi ya kwizera kuzasangayo umwana we, niba atabasha kumumenya?

2) Aburahamu, Isaka na Yakobo (Ibi byo ni Yesu ubivuga): Matayo 8:11 "Ndababwira yuko benshi bazaturuka iburasirazuba n’iburengerazuba, bakicarana na Aburahamu na Isaka na Yakobo mu bwami bwo mu ijuru" (None se Yesu yatwizeza ko tuzicarana na Aburahamu mu Ijuru, mu gihe twaba tutazamenya ko ari we Aburahamu?)

3) Mose na Eliya: Matayo 17:3 "Maze Mose na Eliya barababonekera bavugana na we." (Ibi byabaye mu isezerano rishya, Mose na Eliya bari barapfuye cyera mu isezerano rya cyera, ariko nyuma y'imyaka ibihumbi bagaragaye bavugana na Yesu: Hari icyo bigaragaza: Icya mbere, kuba abari aho barabamenye, bigaragaza ko n'ubwo umuntu yazaba yambaye umubiri mushya tuzambikwa, kumumenya birashoboka. icya kabiri, kuba baragaragaye bavugana na yesu, bigaragaza ko ko na nyuma y'ubu buzima bishoboka kuzabasha kuvugana n'ababuvuyemo.

Ingero ni nyinshi ntitwazirangiza, gusa umwanzuro w'ukuri uturuka muri Bibiriya: YEGO nta gushidikanya, nyuma y'ubu buzima hari ubundi buzima, kandi nyuma yabwo nitugera mu Ijuru tuzabasha kumenya abacu bazaba bariyo.

Murakoze, Imana ibahe umugisha

Answered: Ese mu bihe by'imperuka urusengero rw'i Yerusalemu (Urusengero rwa Salomon) ruzongera rwubakwe?

Tue, 19 Sep 2023 11:29:04 +0000

Amateka y'urusengero rw'i Yerusalemu agaragaza ko habayeho insengero 2: hari urusengero rwa mbere rwubatswe na Salomon (Temple de Salomon) rwaje gusenywa n'umwami w'i Babulone Nebukadinezari ahagana mu mwaka wa 587 mbere ya Yesu. Rwaje kongera kugenda rusanwa, Yesu yasanze bafite urusengero rwa kabiri, na rwo rwaje gusenywa mu mwaka wa 70 nyuma ya Yesu rusenywe n'Abaroma. Kuva icyo gihe kugeza ubu, aho rwari ruri hari imisigiti ibiri igize agace kitwa "Esplanade des mosquees." Aka ni agace kahariwe Abayisilamu, Abayuda batari Abayisilamu bo bemerewe gusa kugera ku rukuta rumwe rukumbi rwitwa "urukuta rw'amaganya" (Mur des lamentations).

Izi nsengero zombi tuvuga nta wigeze azifotora kuko amafoto yari atarabaho, icyakoze ukurikije description itangwa muri Bibiriya abahanga bagerageje kuzishushanya.

1. Urusengero rwa Salomon (Temple de Salomon). (Rwasenywe ahagana mu mwaka wa 587 mbere ya Yesu)

2. Igishushanyo cy'urusengero rwa kabiri (Rwatangiye kubakwa ubwo Abisirayeli bari bavuye mu bunyage mu gihe cya ba Ezira na Nehemiya). Rwagiye rusanwa kenshi, ariko Yesu aza yasanze rwarasanwe cyane na Herode, ku buryo rwari rwari rwarahawe izina rya "Temple d'Herode"). Rwasenywe n'abaroma mu mwaka wa 70 nyuma ya Yesu.

Kubaka urusengero aho rwahoze, bizasaba gusenya umusigiti, kandi gusenya umusigiti, ni ukubyutsa iyindi ntambara itoroshye hagati ya Isirayeli, Palestine, Abarabu n'Abayisilamu bandi muri rusange. Dore ifoto igaragaza ahahoze ziriya nsengero 2 za mbere. (Iyi ni ifoto si igishushanyo. Ubi ni uko hameze)

Kuva uru rusengero rwa kabiri rwasenywa mu mwaka wa 70, imyaka imaze kurenga 1950 Isirayeli yarananiwe kubaka urusengero rwa 3, kuko aho rwahoze ubu hari imisigiti nk'uko mubibonye hejuru. Ahantu honyine Abisirayeli bashobora kugera nta mpungenge muri ako gace, ni ahagana inyuma y'iyo misigiti yombi ahazwi nko ku "urukuta rw'amaganya". Dore uko hagaragara ufatiye ifoto inyuma y'iyi misigiti: (Hakurya y'urukuta rw'amaganya haragaraga wa musigiti twabonye hejuru witwa "Dome du rocher")

IKIBAZO: Ese urusengero ruzongera rwubakwe? Mu bihe by'imperuka, Bibiriya ivuga ibintu bimwe na bimwe bigomba kuzabera mu rusengero i Yerusalemu:

- 2 Abatesalonike 2:3-4 "Ntihakagire umuntu uboshya uburyo bwose, kuko uwo munsi utazaza kurya kwimūra Imana kutabanje kubaho, kandi urya munyabugome atarahishurwa ari we mwana wo kurimbuka. Ni umubisha wishyira hejuru y’icyitwa imana cyose cyangwa igisengwa, kugira ngo yicare mu rusengero rw’Imana yiyerekane ko ari Imana".

- Matayo 24:15 “Ariko ubwo muzabona ikizira kirimbura cyahanuwe n’umuhanuzi Daniyeli gihagaze Ahera, (ubisoma abyitondere) [...],

Ibyo byanditswe tuvuze haruguru byerekeranye n'ibihe bya nyuma, Itorero rizaba ryaragiye, ubwo Antikristo we ubwe azinjira mu rusengero i Yerusalemu (Temple), ategeke Abisirayeli kumusenga. Ibyo ni byo Yesu yavugaga ati "Ubwo muzabona ikizira cy'umurimbuzi gihagaze ahera....". Kuko ibyo bigomba kuzabera mu rusengero i Yerusalemu, bisobanuye ko urusengero rugomba kuzongera rukubakwa byanze bikunze.

Gusa hari ikibazo cy'ingorabahizi: Ahakubatswe uru rusengero, ni mu gace kitwa "Esplanade des Mosquées, ubu tuvugana hari inyubako ebyiri zikomeye ku Bayisilamu: Hari umusigiti witwa "Dome du rocher" hakaba n'undi witwa "Al Aqsa".; Abayisilamu bahakomeyeho bikomeye kuko bahafata nk'ahantu ha gatatu hatagatifu kuri bo, nyuma ya Maka na Madina. Abayisilamu bavuga ko ahangaha ariho Muhamedi yashinguye ibirenge azamurwa mu Ijuru.Reba iyi foto igaragaza uko hateye:

Iyo misigiti ureba hejuru iri neza neza ahahoze urusengero rwa Salomon, n'ahahoze urwarusimbuye rwasenywe muri 70 nyuma ya Yesu. Aho hari mur des lamentations ni rwo rukuta rukumbi rwasigaye ubwo urusengero rwasenywaga. Kuri urwo rukuta ni ho Abayuda n'abandi bahasura bemerewe kujya gusa, iyo hagize Umuyobozi wa Isirayeli ukandagiza ikirenge hariya hari imisigiti intambara irarota! Mu mwaka wa 2000, i Yerusalemu havutse intamba ikomeye bita "INTIFADA" (Intambara y'amabuye), yari ishyamiranije Abayisiramu barwanishaga amabuye, n'ingabo za Isirayeli zarwanishaga imbunda. Iyi ntambara yamaze imyaka 6 kuko yarangiye muri 2006. INTANDARO Y'IYI NTAMBARA: Ministre w'intebe wari uriho iki gihe, Ariel Sharon yasuye aka gace karimo iyi misigiti!! Aha niho havukira ikibazo cy'ingorabahizi: Aha hantu ni hagati muri Yerusalemu, Yerusalemu ni Umurwa mukuru w'igihugu kigenga cya Isirayeli: Niba Minisitiri w'intebe wa Israel ahakandagiza ikirenge hakavuka intambara y'imyaka 6, bizaca mu zihe nzira ngo uyu musigiti uhave hajye Urusengero? Igisubizo cy'iki kibazo abasesenguzi bakibona muri DANIEL 9:27 "Uwo mutware [antikristo] azasezerana na benshi isezerano rikomeye, rimare icyumweru kimwe. Nikigera hagati azabuzanya ibitambo n’amaturo, umurimbuzi azaza ku ibaba ry’ibizira, maze kugeza ku mperuka yategetswe uburakari buzasandazwa kuri uwo murimbuzi.”

Itorero rikimara kugenda, antikristo azahita agirana na Isirayeli amasezerano y'amahoro y'imyaka 7. Mu myaka 3.5 ya mbere, mu gihe isi izaba iri mu kaga k'imibabaro ikomeye itewe na antikristo, Isirayeli yo izaba ifite agahenge, aka gahenge niko kazatuma babasha kubaka urusengero rwa 3 aho rwahoze. Nyuma y'iyi myaka 3.5, nk'uko Daniel abivuga, Antikristo azica ya masezerano, ahindukirane Abisirayeli, yinjire muri rwa rusengero rumaze kuzura avuge ko ariwe mana ko bagomba kumusenga. Icyo nicyo cya kizira cy'umurimbuzi kizaba gihagaze ahera Yesu yavugaga.

Muri make, YEGO, ni byo rwose. urusengro rwa 3 amaherezo ruzongera rwubakwe i Yerusalemu.

IBINDI BIBAZO WASOMA:

- Ikizira cy'umurimbuzi ni iki: Kanda hano urebe igisubizo

Murakoze cyane Imana ibahe umugisha

Answered: Ku munsi w'urubanza bizagendekera bite abantu batigeze bumva ubutumwa bwiza?

Sun, 17 Sep 2023 21:20:54 +0000

Iki ni ikibazo gikunze kwibazwa n'abantu benshi kikanakurura impaka zitandukanye. Reka tubanze tuvuge ko umuntu wese wabayeho, uriho n'uzabaho, cyera cyangwa ubu, uwumvise inkuru nziza n'utarayumvise, uwakijijwe n'utarakijijwe, buri muntu azaca imbere y'intebe y'urubanza imbere y'Imana.

Abaheburayo 9:27 hagira hati "Kandi nk’uko abantu bagenewe gupfa rimwe hanyuma yaho hakaza urubanza...

Ibyahishuwe 14:7-8 Nuko mbona marayika wundi aguruka aringanije ijuru, afite ubutumwa bwiza bw’iteka ryose ngo abubwire abari mu isi, bo mu mahanga yose n’imiryango yose, n’indimi zose n’amoko yose. [8]Avuga ijwi rirenga ati “Nimwubahe Imana muyihimbaze, kuko igihe cyo gucira abantu urubanza gisohoye, muramye Iyaremye ijuru n’isi n’inyanja n’amasōko.

1 Petero 1:17 "Kandi ubwo uwo mwambaza mumwita So, ari ucira umuntu wese urubanza rukwiriye ibyo yakoze ntarobanure ku butoni, mumare iminsi y’ubusuhuke bwanyu mutinya."

Kuba umuntu atarigeze kumvaho ijambo Yesu na rimwe, kuba atarigeze yumvaho ijambo Imana na rimwe mu buzima, ntibimukuraho urubanza, ntanubwo bimukingurira amarembo y'Ijuru ubwabyo. Iyaba ubwabyo byatangaga Ijuru, twahita dufunga microphone twirirwa tubwiririzaho, n'uru rubuga twarufunga, tugakora uko dushoboye ku buryo ntawumva inkuru nziza na gato, ubwo nibwo twaba tubahaye amahirwe menshi kurusha kubabwira.

Ariko siko bimeze: Dore umurongo w'ingenzi abantu dukwiriye gusobanukirwa: Abaroma 2:12: "Abakoze ibyaha bose batazi amategeko bazarimbuka badahowe amategeko, kandi abakoze ibyaha bose bazi amategeko bazacirwa ho iteka ry’amategeko." Ngirango bitangiye gusobanuka: Abakoze ibyaha batazi amategeko, kurimbuka ko bazarimbuka, ariko ntabwo bazaba bahowe amategeko (Kuko batari bayazi). None se bazaba bahowe iki kandi nta wababwiye icyo gukora? aho naho reka tubaze Bibiriya iradusubiza: Abaroma 2:14-16 "Abapagani badafite amategeko y’Imana, iyo bakoze iby’amategeko ku bwabo baba bihindukiye amategeko nubwo batayafite, bakagaragaza ko umurimo utegetswe n’amategeko wanditswe mu mitima yabo, ugahamywa n’imitima ihana ibabwiriza, igafatanya n’ibitekerezo byabo kubarega cyangwa se kubaregura. Kandi ni na byo Imana izatanga ho umugabo ku munsi izacirira abantu ho iteka muri Yesu Kristo ku byahishwe byabo, nk’uko ubutumwa bwiza nahawe buri."

Birimo gusobanuka: Burya n'abatarumva ubutumwa bwiza, muri bo imbere bifitemo ubushobozi Imana yabashyizemo bwo gusobanukirwa ikiza n'ikibi! N'iyo umuntu yaba atarumva ubutumwa bwiza, Imana yamuhaye ububasha bwo kumenya guhitamo ikiza n'ikibi. Ibingibi hari ingero zibigaragaraza nshaka kubaha:

- Itegeko ry'Imana ryavugaga ngo "Ntukice", ryaje nyuma cyane ku gihe cya Mose. Nyamara cyera cyane mbere yaho, igihe isi yari igituwe n'abantu 4 gusa, Kayini yishe Abeli, arangije arahunga. Noneho reka nkubaze: Ko nta tegeko ryabagaho ryavugaga ngo Ntukice, Kayini yahunze kubera iki? Biragaragara, N'ubwo nta muntu wari warigeze abwira Kayini ati "Ntukice", muri we yari yifitemo ububassha bwo gusobanukirwa ko kwica ari icyaha, ni cyo cyatumye ahita ahunga ubwo yari amaze kwica Abeli.

- Uru rugero rwa kabiri rurareba Abanyarwanda. Abamisiyoneri bambere b'Abagatolika bageze mu Rwanda mu 1900, ni nacyo gihe batangiye kwigisha abanyarwanda amategeko ashingiye kuri Bibiriya. Ni cyo gihe batangiye kubabwira ngo hari itegeko rivuga ngo "ntuzasambane". Nyamara guhera cyera cyane abazungu batarazana Bibiriya mu Rwanda, mu binyejana byinshi mbere yaho, mu Rwanda iyo umukobwa yatwaraga inda adafite umugabo baramwoheraga (Kumujugunya mu mazi), bamuhoye kuba yarasambanye. None se ko nta muntu wari warababwirije ubutumwa bwiza ngo ababwire ko gusambana ari icyaha, ni iki cyatumaga bahana uwasambanye? Ni uko muri bo bari bifitemo ubushobozi bahawe n'Imana bwo kumenya gutandukanya ikiza n'ikibi. "Kandi ni na byo Imana izatanga ho umugabo ku munsi izacirira abantu ho iteka muri Yesu Kristo ku byahishwe byabo, nk’uko ubutumwa bwiza nahawe buri." (Abaroma 2:16)

Ngirango byumvikanye. Kuba utarigeze wumva na rimwe inkuru nziza y'agakiza, ntibizakubera urwitazo ku munsi w'urubanza. Ntibizakubera "Laissez-passer" cyangwa "Boarding pass" ku marembo y'Ijuru. OYA rwose. Gusa nanone bikwiriye gusobanuka ko Imana itazakubaza ngo "Kuki utigeze wizera Yesu" kandi utaramwumvise na rimwe. Ntizanakubaza impamvu utakurikije amategeko ya Mose kandi utarabayeho mu bihe by'amategeko. Aho na ho Bibiriya ifite icyo ibivugaho:

- Abakoze ibyaha batazi amategeko, bazacirwaho iteka ry' imitima ihana ibabwiriza (Iki ni cyo dukunze kwita _Umutima-nama (Conscience)" (Abaroma 2:14-15) (Iki cyiciro kibarizwamo ababayeho kuva kuri Adamu na Eva kugeza kuri Mose, + Abandi bose batigeze bumvaho na rimwe ubutumwa bwiza)

- Abakoze ibyaha bazi amategeko, bazacirwaho "iteka ry'amategeko" (Abaroma 2:12) (Iki cyiciro kibarizwamo ababayeho kuva kuri Mose kugeza kuri Yohana Umubatiza)

- Abakoze ibyaha baramenye inkuru nziza y'agakiza, bazacirwaho iteka bazira kuba baranze kwizera Yesu no kumwakira nk'Umwami n'Umukiza. (Yohana 3:17-19 Kuko Imana itatumye Umwana wayo mu isi gucira abari mu isi ho iteka, ahubwo yabikoreye kugira ngo abari mu isi bakizwe na we. [18]Umwizera ntacirwaho iteka, utamwizera amaze kuricirwaho kuko atizeye izina ry’Umwana w’Imana w’ikinege. [19]Uko gucirwaho iteka ni uku: ni uko umucyo waje mu isi, abantu bagakunda umwijima kuwurutisha umucyo babitewe n’uko ibyo bakora ari bibi, ) (Iki cyiciro kibarizwamo abo guhera kuri Yohana Umubatiza bamenye inkuru nziza y'agakiza kabonerwa muri Yesu Kristo kuzageza igihe Yesu azagarukira.

Mu buryo budashidikanywaho, Bibiriya igaragaza ko Imana yihishuriye abantu bose, bityo bakaba bose bayizi babikesha ubwenge yabahaye. (Abaroma 1:19-20 kuko bigaragara ko bazi Imana, Imana ikaba ari yo ubwayo yabahishuriye ubwo bwenge, [20]kuko ibitaboneka byayo ari byo bubasha bwayo buhoraho n’ubumana bwayo, bigaragara neza uhereye ku kuremwa kw’isi, bigaragazwa n’ibyo yaremye kugira ngo batagira icyo kwireguza,)

Ahubwo ikibazo kiri ku kuba imitima y'abantu yahindutse "Ibirimarima" icura umwijima bahitamo kutayubaha. Bibiriya igira iti: Abaroma 1:21-22 "kuko ubwo bamenye Imana batayubahirije nk’Imana, habe no kuyishima, ahubwo bahinduka abibwira ibitagira umumaro, maze imitima yabo y’ibirimarima icura umwijima. Biyise abanyabwenge bahinduka abapfu" Ikibazo si uko batamenye Imana, ahubwo ni uko bahisemo kutayishaka. Yarabigaragarije mu mitima yabo no mu bibakikije biri mu isanzure, ariko bahisemo kuyirengagiza.

Tubonye mu buryo butajijinganywaho ko kuba utarabwirijwe inkuru nziza y'agakiza bitazaba urwitwazo ku munsi w'urubanza. Twebwe abaviriwe n'umucyo duhamagarirwa kugira umwete wo kubwiriza ubutumwa bwiza bw'agakiza kabonerwa muri Yesu, kugirango abo bose bibwiraga ibitari byo tubahubuze mu ngoyi za Sati tubageze mu mucyo w'Itangaza w'Agakiza k'Ubuntu.

Niba wifuza kwakira Yesu Kristo nk'Umwami n'Umukiza w'ubugingo bwawe, watumenyesha kuri iyi numero 0788534679 (Munyaneza Innocent)

Imana Ibahe umugisha.

Answered: Abahamya babiri bavugwa mu byahishuwe ni bande?

Sat, 16 Sep 2023 10:53:58 +0000

Ikibazo cy'aba bahamya babiri ntikigeze cyumvikanwaho kuva kera kugeza ubu. Ibyo aribyo byose hari abantu batatu bahurizwaho n'abasesenguzi ba Bibiriya, aba bahamya ni babiri muri abo batatu bahurizwaho na bose. Aba bahamya babiri bavugwa mu Byahishuwe igice cya 11 hafi ya cyose "Abahamya banjye babiri nzabaha guhanura, bahanure iminsi igihumbi na magana abiri na mirongo itandatu bambaye ibigunira....[...] Kandi nibarangiza guhamya kwabo, inyamaswa izazamuka ivuye ikuzimu irwane na bo, ibaneshe ibīce....[...]Iyo minsi itatu n’igice ishize, umwuka w’ubugingo uva ku Mana winjira muri bo baherako barahaguruka, ubwoba bwinshi butera ababibonye. Bumva ijwi rirenga rivugira mu ijuru ribabwira riti “Nimuzamuke muze hano.” Nuko bazamukira mu gicu bajya mu ijuru abanzi babo babireba."

Gusobanukirwa neza iby'aba bahamya n'icyo bazaba baje gukora muri Isirayeli, byaba byiza kuvuga mu ncamake urukurikirane rw'ibihe by'ingenzi by'imperuka:

- Igihe icyo aricyo cyose, Yesu azaza gutwara Itorero. (Niba wifuza kumenya ibijyanye no kuzamurwa kw'Itorero, kanda hano)

- Itorero rikimara kugenda, antikristo azahita ahishurwa atangire gukora ku mugaragaro. ubwo ni bwo hazahita haba ibivugwa muri Daniel 9:27 " Uwo mutware [Antikristo] azasezerana na benshi isezerano rikomeye, rimare icyumweru kimwe [Imyaka 7]. Nikigera hagati [imyaka 3.5] azabuzanya ibitambo n’amaturo, umurimbuzi azaza ku ibaba ry’ibizira, maze kugeza ku mperuka yategetswe uburakari buzasandazwa kuri uwo murimbuzi.”

Hazahita hatangira ibihe by'umubabaro bizanwa na antikristo ku isi yose (tribulation). Icyakora, Antikristo azahita agirana amasezerano y'amahoro y'imyaka 7 na Isirayeli nk'uko ibyanditswe twabonye hejuru bibivuga. Mu gihe isi izaba irimo kubabara muri tribulation mu myaka 3.5 ya mbere, isirayeli yo izaba ifite agahenge kubera amasezerano izaba yagiranye na Antikristo. (Muri iyo myaka 3.5 y'agahenge, Isirayeli izaboneraho kongera kubaka urusengero rwa Salomon aho rwahoze ubu hari umusigiti. (Muzirikane ko ibi byose bizaba ku isi Itorero ritakiri mu isi.)

Nyuma y'imyaka 3.5, antikristo azica isezerano yagiranye na isirayeli. Azahita yinjira mu rusengero rw'i Yerusalemu yicare ahera cyane, avuge ko ari we Mana, ategeke abisirayeli kumusenga. Aho ni ho Yesu yahanuraga ati "Ariko ubwo muzabona ikizira kirimbura cyahanuwe n’umuhanuzi Daniyeli gihagaze Ahera (ubisoma abyitondere) (Matayo 24:15). Yesu aravuga ibyahanuwe n'umuhanuzi Daniel. Dore Daniel na we uko yari yarabihanuye: "Uhereye igihe igitambo gihoraho kizakurirwaho bagashyiraho ikizira cy’umurimbuzi, hazacaho iminsi igihumbi na magana abiri na mirongo urwenda." (Daniel 12:11) Ikizira cy'umurimbuzi Yesu na Daniel bavugaga ni icyo: Ni antikristo uzinjira mu rusengero i Yerusalemu, ajye ahera cyane ahasanzwe hatambirwa ibitambo, avuge ko ariwe Mana ategeke abisirayeli kumusenga). Abisirayeli bazaba bari mu kaga: antikristo arabategeka kumusenga. Aha rero ni ho Imana izahita yohereza abahamya babiri. Bazaba baje muri misiyo yo gufasha Abisirayeli kudasenga antikristo. Ivugabutumwa ahandi hose rizaba ryarahagaze, ariko hano ho agakiza kazaba kagishoboka, Muri israel ni ho honyine bizaba bigishoboka kwizera Yesu ugakiwa, agakiza kazaba kasubiye iyo katurutse nk'uko Bibiriya ibivuga. Ubundi kuba Abisirayeli ubu batizera Yesu si kubwabo: Banangiwe imitima kugirango agakiza kajye mu banyamahanga. Dore uko Bibiriya ibivuga: "Bene Data kugira ngo mutabona uko mwirata ndashaka ko mumenya iby’iri banga: Abisirayeli bamwe banangiwe imitima ariko si bose, kugeza ubwo abanyamahanga bazinjira mu Itorero bakagera ku mubare ushyitse". (Abaroma 11:25) Birasobanutse, abanyamahanga nibamara kwinjira, agakiza kazasubira aho katurutse, muri Israel.

Reka tugaruke noneho kuri aba bahamya babiri:Nk'uko twatangiye tubivuga, hari ibice bibiri bitajya byumvikana kuri aba bahamya babiri: Igice cya mbere kivuga ko aba bahamya ari Mose na Eliya. Igice cya kabiri kivuga ko aba bahamya ari Enoki na Eliya.

- Abavuga ko aba bahamya ari Mose na Eliya, babihera ku bitangaza aba bagaba bombi nubundi bakoraga bakiri ku isi mbere, ibi bitangaza bisa n'ibyo bazakora bagarutse muri Isirayeli nk'uko bigaraga muri kiriya gice cya 11 cyo mu byahishuwe: Umuriro, gukinga ijuru ngo imvura itagwa, guhindura amazi amaraso, guteza isi ibyago byose uko bashatse. (Ibi n'ubundi nibyo byaranze aba bagabo bombi bakiri mu isi)

- Abavuga ko ari Enoki na Eliya, babihera ahanini ku kuba aba bagabo bombi aribo bihariye kuba batarigeze bapfa, bavanywe mu isi badapfuye, kandi Bibiriya ivuga ko buri muntu yagenewe gupfa rimwe. Ibivuga muri aya magambo: "Kandi nk’uko abantu bagenewe gupfa rimwe hanyuma yaho hakaza urubanza, (Abaheburayo 9:27) (Ubundi umugeni wa Kristo ni we wenyine ufite umwihariko wo kutazaca mu rupfu, abo Yesu azasanga bakiri mu mubiri ntibazapfa bazahindurwa).

Ibi byiciro byombi uko ari bibiri, buri cyose iyo urebye ubona gifite ubusobanuro bufatika. Ntabwo hano turi buce urubanza ngo ninde ufite ukuri, ariko muri rusange abasesenguzi benshi bavuga ko aba bahamya babiri ari Enoki na Eliya, kandi natwe niko tubyizera. Kubera ko batabarirwa mu mugeni wa Kristo, kandi uretse umugeni wa kristo abandi bose bagoma guca mu rupfu, aba bagabo bagomba kugaruka ku isi na bo bagapfaho. Bibiriya ivuga ko nyuma y'umurimo wabo w'imyaka 3.5 antikristo azabica, bakazuka nyuma y'iminsi 3 bagahita bazamurwa mu ijuru.

Ibyo aribyo byose, iyo Imana iza gusanga bifite icyo bitwongerera kumenya abo aribo iba yarabidusobanuriye mu buryo budasubirwaho. Icyo si ikibazo gifite icyo kitugabanyiriza cyangwa kitwongerera ku kwizera kwacu.

Turabashimiye Imana ibahe umugisha.

Answered: Ubukwe bw'Umwana w'intama ni iki?

Sat, 16 Sep 2023 10:08:28 +0000

Ibyerekeye ubukwe bw'Umwana w'Intama bivugwa mu Byahishuwe 19:7-9 "Tunezerwe twishime, tuyihimbaze, kuko ubukwe bw’Umwana w’Intama busohoye umugeni we akaba yiteguye, kandi ahawe kwambara umwenda w’igitare mwiza, urabagirana utanduye.” (Uwo mwenda w’igitare mwiza ni wo mirimo yo gukiranuka y’abera.) Arambwira ati “Andika uti ‘Hahirwa abatorewe ubukwe bw’Umwana w’Intama.’ ” Kandi ati “Ayo ni amagambo y’ukuri kw’Imana.”

Kugirango iki kibazo gisobanuke neza birasaba ko tubanza gusobanura uko imihango y'ubukwe yagendaga mu Bisirayeli igihe Yohana yandikaga ibyahishuwe. Ubukwe bwabo bwabagaho mu byiciro bitatu. Reka turebe ibyo byiciro tunifashije ibyanditswe dusanga muri Bibiriya:

1) icyiciro cya 1: Amasezerano hagati y'ababyeyi b'umuhungu n'ab'umukobwa, ababyeyi b'umuhungu cyangwa umuhungu ubwe bagatanga inkwano ku babyeyi b'umukobwa. Iki cyiciro ni cyo Mariya na Yosefu bari barimo igihe Marayika yabonekeraga Mariya akamubwira ko agiye gusama kandi atabonaye n'umugabo. Matayo 1:18 "Kuvuka kwa Yesu Kristo kwagenze gutya. Nyina Mariya yari yarasabwe na Yosefu, ariko yari ataramurongora, babona afite inda y’Umwuka Wera."

2) icyiciro cya 2: Nka nyuma y'umwaka habayeho gusaba, umusore yafataga abasore bagenzi be, bagafata urugendo nijoro, bitwaje amatara amurika, bakerekeza iwabo w'umukobwa. Umukobwa yabaga abizi, na we agafata abakobwa bagenzi be, bagafata amatara na bo, bakajya gusanganira umuhungu mu nzira, bagahita berekeza iwabo w'umuhungu. Uyu muco ni wo Yesu yahereyeho avuga umugani w'abakobwa 10 bagiye gusanganira umukwe, Matayo 25:1-13 “Icyo gihe ubwami bwo mu ijuru buzagereranywa n’abakobwa cumi bajyanye amatabaza yabo, bajya gusanganira umukwe....

3) Igice cya 3: Ubukwe nyirizina, bwaberaga ku muhungu, bukaba mu birori byashoboraga kumara iminsi myinshi. Iki ni cyo cyari cyabaye umunsi Yesu ataha ubukwe i Kana akahakorera igitangaza cye cya mbere. Yohana 2:1-2 "Ku munsi wa gatatu hacyujijwe ubukwe i Kana y’i Galilaya, kandi na nyina wa Yesu yari ahari. Yesu bamutorana n’abigishwa be ngo batahe ubwo bukwe."

Iyi shusho y'imihango y'ubukwe nk'uko yari iri mu gihe cya Yesu, yifashishwa n'Imana mu gusobanura ubundi bukwe nk'uko bikurikira:

Umukwe = Yesu

Umugeni = Itorero:

Inkwano = Amaraso ya Yesu

Iby'ubukwe bw'Umwana w'Intama Yohana yeretswe, ni ibyo mu cyiciro cya gatatu tubonye hejuru, bigakurikirana gutya:

- Ikiciro cya mbere cyo kwemeranywa kibaho iyo umuntu yizeye Yesu nk'Umwami n'Umukiza, akizera igiciro cy'amaraso yesu yatanze ku musaraba ariyo nkwano, bagahora maso bafite amatara n'amavuta bategereje umukwe ko aza igihe icyo aricyo cyose.

- Ikiciro cya kabiri kizabaho igihe Yesu (Umukwe) azaza gutwara Itorero (Umugeni), arijyane kwa Se. (Niba wifuza kumenya byinshi ku bijyanye no kuzamurwa kw'Itorero, kanda hano)

- Ikiciro cya gatatu ari na cyo tuvuga hano, ni Ubukwe bw'Umwana w'Intama. Ibi ni ibirori bizamara imyaka 7, bizaba hagati yo kuzamurwa kw'Itorero no kugarukana n'Itorero. Muri iyi myaka 7, mu gihe umugeni (Itorero) n'umukwe (Yesu) bazaba banezerewe ahantu heza Yesu arimo gutegura, mu isi ho ibintu bizaba birimo gucika, antikristo azaba arimo kubabaza isi bikomeye (Tribulation). Nyuma y'iyi myaka 7 y'ibirori by'ubukwe bw'Umwana w'Intama, Yesu azagarukana ku isi n'itorero yime ingoma y'imyaka 1,000. (Niba wifuza kumenya byinshi ku ngoma ya Yesu y'imyaka 1,000 wakanda hano)

Nk'uko Yohana abivuga, "Hahirwa abatorewe ubukwe bw’Umwana w’Intama.’ ” Kandi ati “Ayo ni amagambo y’ukuri kw’Imana.”

Niba wifuza kwizera Yesu no kumwakira nk'Umwami n'Umukiza w'ubugingo bwawe, nawe ukinjira mu muryango mugari w'abageni ba Kristo, waduhamagara kuri 0788534679

Murakoze, Imana ibahe umugisha.

Answered: Intambara ya Harmagedoni ni iki?

Sat, 16 Sep 2023 09:07:48 +0000

CYITONDERWA: Turabizi kandi turabizirikana ko abanyamadini basobanura mu buryo butandukanye ibijyanye n’ibihe by’imperuka. Icyo tugamije si ugukurura impaka z'amadini, ahubwo ni ugusaba Umwuka Wera ngo arusheho kudusobanurira, ariko tukanatanga ibyo dufite kandi twizera ko ari ukuri dushingiye ku ijambo ry’Imana.

Intambara ya Harmagedoni ni byo iravugwa cyane, yagiye inasobanurwa kwinshi kuko na yo iri mu bintu bitegerejwe cyane birebana n'iminsi y'imperuka. Icyanditswe kivugwamo iby'intambara ya armagedoni kiri mu byahishuwe 16:13,14,16 kigira kiti: "Nuko mbona mu kanwa ka cya kiyoka no mu kanwa ka ya nyamaswa, no mu kanwa ka wa muhanuzi w’ibinyoma, havamwo imyuka itatu mibi isa n’ibikeri, kuko ari yo myuka y’abadayimoni, ikora ibitangaza igasanga abami bo mu isi yose, ngo ibahururize kujya mu ntambara yo ku munsi ukomeye w’Imana Ishoborabyose. Ibateraniriza ahantu mu Ruheburayo hitwa Harimagedoni. (Ninaho honyine havugwa ibya Harimagedoni nta handi muri Bibiriya)

Ubusanzwe, ijambo "Armageddon" rituruka mu giheburayo "Har-magedone" rikaba risobanura "Umusozi wa Megido". Ahantu hitwa i Megido nyirizina si umusozi, ahubwo ni ikibaya kinini giherereye muri Isirayeli ku birometero bikabakaba 100 mu majyaruguru ya Yerusalemu. Ku bantu bazi iby'intambara, iki kibaya kiri ahantu hari strategic cyane ku muntu wifuza gutera bikomeye umugi wa Yerusalemu. Ni kinini bihagije ku buryo gishobora kwakira abantu babarirwa mu mamiriyoni, ndetse mu mateka ya Isirayeli n'ubusanzwe iki kibaya cyabereyemo intambara zikaze zigera kuri 200 kuva kera, izizwi cyane zivugwa muri Bibiriya twavuga nk'izi zikurikira:

1) Intambara ikomeye Baraki yatsindiyemo Sisera igihe Debora yari umucamanza muri Isirayeli, (Abacamanza ibice bya 4 na 5),

2) Intambara ikomeye Gideyoni yatsindiyemo Amamidiyani (Abacamanza igice cya 7)

3) Mu ntambara ikomeye yabereye muri iki kibaya ni ho umwami Sawuli n'abahungu be bapfiriye umunsi umwe.

Ariko rero cyane cyane, aha hantu hategerejwe intambara ya karundura mu bihe by'imperuka, ikaba ariyo ntambara ya nyuma mu mateka y'isi, ikazabera muri iki kibaya cya Megido, ikazaba iyobowe na Antikristo ubwe n'umuhanuzi w'ibinyoma bashaka gusenya yerusalemu. Dore muri make uko ibihe bya nyuma bizakurikirana kugeza ku ntambara ya Harmagedoni:

1) Igihe kimwe kitazwi, Yesu azatwara Itorero rye arikure mu isi. (Niba wifuza kumenya byinshi ku bijyanye no kuzamurwa kw'Itorero,Wakanda hano)

2) Itorero rikimara kugenda, Antikristo azahita ahishurwa atangire gukora ku mugaragaro, azababaza isi afatanije n'umuhanuzi w'ikinyoma ighe cy'imyaka irindwi. Iki gihe kizwi nk'igihe cy'imibabaro itarigeze kubaho kuva isi yaremwa (Tribulation, great tribulation. wibuke ko iki gihe Itorero rizaba ritari mu isi) (Niba wifuza kumenya byinshi kuri antikristo, wakanda hano

3) Ku itangiriro ry'iyi myaka 7 y'imibabaro, antikristo azakorana isezerano ry'amahoro ry'imyaka 7 n'igihugu cya Isirayeli. Nk'uko umuhanuzi Daniel abivuga, iyi myaka nigera hagati antikristo azica iri sezerano yagiranye na Isirayeli (Daniyeli 9:27) ayihindukane.

4) Nyuma y'imyaka 7, antikristo ni cyo gihe azifuza gusenya burundu umurwa wa Yerusalemu. Azakusanya ingabo nyinsi cyane azikusanyirize mu kibaya cya Megido. (Muzirikane ibi byose bizaba Itorero rya Kristo ritakiri hano mu isi). Iyi ni yo ntambara ya Harimagedoni. [Umubare w'izi ngabo zizateranirizwa muri iki kibaya ni munini cane, ku buryo Bibiriya - ibyahishuwe 9:16 - ivuga uyu mubare ku kigereranyo cy'uduhumbagiza 200 (Miriyoni 200)]

5) Ku munota wa nyuma ubwo izi ngabo za antikristo zizaba ziteguye gukora ku mbarutso ngo zihindure umuyonga Israel, ni cyo gihe Kristo azahita agarukana n'Itorero aje kwima ingoma y'imyaka 1000! (Niba ushaka kumenya byinshi ku ngoma ya Kristo y'imyaka 1000, kanda hano)

6) Kristo aza bwa mbere, yaje yicishije bugufi cyane. Naza gutwara Itorero, ntazakandagiza ikirenge ku isi, azahagarara mu kirere tumusanganireyo. Ariko kuri iyi nshuro, azaza mu buryo bugaragarira buri wese. (Niba wifuza kumenya itandukaniro hagati yo kuzamurwa kw'Itorero no kugaruka kwa Yesu wakanda hano.) Kuri iyi nshuro, ni bwo rya jambo rizasohora ngo "Dore arazana n’ibicu kandi amaso yose azamureba, ndetse n’abamucumise na bo bazamureba, kandi amoko yose yo mu isi azamuborogera. Na none, Amen. (Ibyahishuwe 1:7)

7) Muri iyi ntambara ya Harimagedoni, Kristo agitunguka mu kirere ntabwo azajya mu mitsi na antikristo. Icyubahiro cya Kristo ubwacyo n'umwuka uturuka mu mazuru ye ni byo bizahita binesha antikristo n'ingabo ze. Ibizaba kuri antikristo n'ingabo ze byavuzwe n'umuhanuzi Zekariya muri aya magambo: "Iki ni cyo cyago Uwiteka azateza amahanga yose yarwanije i Yerusalemu: bazashira bahagaze, amaso yabo azashirira mu bihene kandi indimi zabo zizaborera mu kanwa. (Zekariya 14:12)

Ng'ibyo iby'intambara ya Harimagedoni n'iherezo ryayo.Yesu akimara gutsinda iyi ntambara ya Harimagedoni azashinga ibirenge ku musozi wa Elayono, ubwo ni bwo ingoma ye y'imyaka 1000 izaba itangiye. Umuhanuze Zekariya bivuga muri aya magambo: Uwo munsi azashinga ibirenge bye ku musozi wa Elayono, werekeye i Yerusalemu iburasirazuba. Uwo musozi wa Elayono uzasadukamo kabiri uhereye iburasirazuba ugeze iburengerazuba. Uzacikamo igikombe kinini cyane, igice cy’umusozi kimwe kizashinguka kijye ikasikazi, ikindi kizajya ikusi. (Zekariya 14:4)

Murakoze Imana ibahe umugisha.

Answered: Ese Yesu naza gutwara Itorero rye, (Rapture), birashoboka ko Umukristo yasigara kandi yaramwakiriye nk'Umwami n'Umukiza?

Fri, 15 Sep 2023 20:43:41 +0000

Igihe kitazwi, mu ibanga rikomeye no mu buryo butunguranye, Yesu azaza gutwara Itorero rye arikuye muri iyi si. Ibi bizwi mu ndimi z'amahanga nka rapture / Enlevement de l'Eglise. (Ushobora gukanda hano ukareba ikibazo kigira kiti: "Kuzamurwa kw'Itorero ni iki?)

Abakristo benshi mu bizera ko Rapture izabaho umunsi umwe, bakunze kubanaho ubwoba bibaza niba biteguye kuzazamurwa Yesu naramuka aje kutwara Itorero bakiriho. Byongeyeho ko hari n'inyigisho zagiye zibaho zivuga ko bihagije kuba warakijijwe, ibindi ubwo ukaba ufite garanti 100% yo kuzajya mu ijuru utitataye ku buzima wabayeho nyuma yo gukizwa. Ese Umukristo wakiriye Yesu nk'Umwani n'Umukiza ashobora gusigara Yesu naza gutwara Itorero? Reka turebe iki kibazo twifashishije ijambo ry'Imana,

Muri Bibiriya hari Ijambo ryamenyekanye cyane nk'umugani w'abakobwa 10 (Matayo, igice cya 25 cyose) Reka turebe icyo aba bakobwa bari bahuriyeho:

- Bose uko ari 10 ni abakobwa (Itorero - Umugeni)

- Bose uko ari 10 bagiye gusanganira umukwe (Yesu)

- Bose uko ari 10 bari bafite amatabaza (Urumuri = Ijambo ry'Imana)

- Umukwe atinze kuza, bose barahunikiye barasinzira.

Noneho icyo bari batandukaniyeho: Icyo aba bakobwa bari batandukaniyeho kigaragara mu mirongo ibiri:Matayo 25:2-4 "Ariko muri abo cumi, abatanu bari abapfu, abandi batanu bari abanyabwenge. Abapfu bajyanye amatabaza yabo ntibajyana n’amavuta, ariko abanyabwenge bo bajyana amavuta mu mperezo zabo hamwe n’amatabaza yabo.

Mu bakobwa 10 bari bategereje umukwe, batanu bajyanywe n'umukwe, abandi batanu barasigara. Bose ni abageni, bose bari bafite ijambo, bose bari bategereje umukwe, ariko hari ikintu kimwe cyakoze itandukaniro: Amavuta. Batanu bari bafite amavuta ahagije, abandi ntayo. Amavuta ni Umwuka Wera. Itandukaniro kuri aba bakobwa ni ukubaho kwa Mwuka Wera.

Yesu arangije umurimo we hano mu isi, yaratubwiye ati: (Yohana 16:7-8) “Ariko ndababwira ukuri yuko ikizagira icyo kibamarira ari uko ngenda, kuko nintagenda Umufasha atazaza aho muri, ariko ningenda nzamuboherereza. Ubwo azaza azatsinda ab’isi, abemeze iby’icyaha n’ibyo gukiranuka n’iby’amateka". Itegereze neza Uyu murongo wa 8 cyane cyane: Ubwo azaza, azatsinda ab'isi, abemeze iby'icyaha n'ibyo gukiranuka n'iby'amateka". Umwuka Wera twamuhawe kugirango atunganye umugeni wa Kristo, naza kumujyana azasange yiteguye. Ijambo ry'Imana ritubwira ko "Abayoborwa n'Umwuka ari bo bana b'Imana" Abaroma 8:14). Iyo umuntu yakiriye Yesu nk'Umwami n'Umukiza w'ubugingo bwe, ahabwa Mwuka Wera kugirango abane na we, amuyobore kandi amugire inama. Buri gihe cyose Umukristo akoze icyaha, byanze bikunze yumva ijwi muri we rimushinja ko yakoze icyaha kandi rimuhamagarira kwihana no gusaba Imana imbabazi vuba bishoboka. Igihe Umukristo akoze icyaha ntiyumve umutima umushinja kiba ari ikibazo gikomeye. Iyo bimeze bityo akora icyaha akiyongeza, n'ejo akongera, akabihindura ubuzima busanzwe. Icyo gihe rwose haba hari 'akabendera k'umutuku' mu buzima bwe, ubugingo bwe buba buri mu kaga, aba ameze nka ba bakobwa 5 batari bafite 'amavuta' igihe Umukwe yazaga.

Kuba waravuze isengesho ryo kwakira Yesu ntibiguha garanti 100% ko Yesu naza kujyana Itorero nawe uzagenda. Kuba kandi wakora icyaha na byo ntibigukuraho amahirwe yo kuzamukana n'Itorero, igikora itandukaniro ni "amavuta". Iyo amavuta ahari uba mu buzima bwuzuye ubusabane buhoraho n'Imana, igihe hari ikizinga cyaje mu mibereho yawe, Umwuka Wera ahita akongorera ukitunganya, uba witeguye uri tayari igihe cyose.

Abizera bakiriye Yesu bakamwizera bagomba guhora bazirikana iki cyanditswe: (Abaheburayo 10:26-27) "Niba dukora ibyaha nkana tumaze kumenya ukuri, ntihaba hagisigaye igitambo cy’ibyaha, keretse gutegerezanya ubwoba gucirwa ho iteka, no gutegereza umuriro w’inkazi uzarya abanzi b’Imana. Icyo cyanditswe kirasobanutse singombwa kugisobanura cyane, kiraburira abantu bakomeza gukora ibyaha babigambiriye kandi baramaze kumenya ukuri: None se ntimubona ko mwene aba bantu, n'ubwo bamenye ukuri, nubwo bizeye Yesu, nibakomeza kwiberaho mu buzima bw'ibyaha nkana, Ntihaba hasigaye igitambo cy'ibyaha kuri bo, keretse gutegereza gucirwaho iteka.

Turangiza, turabwira abantu bo mu byiciro bibiri:

1) Abatarizera Yesu ikintu cyonyine cyabaha ikizere cyo kuzazamukana n'Itorero ni ugukizwa, nyuma yo gukizwa bagacomekwa mu busabane bwa Mwuka Wera Ukorera mu Itorero rya Kristo. Niba Wifuza gukizwa, kwizera no kwakira Yesu nk'Umwami n'Umukiza w'Ubugingo bwawe, watuvugisha kuri Numero 0788534679

2) Abizera bo mu Itorero rya Kristo, bagomba gukora ibishoboka byose bakaguma mu busabane buhoraho na Mwuka Wera (Amavuta), kandi bakitondera kumva no gusobanukirwa ibyanditswe byera.

Murakoze, Imana ibahe umugisha

Answered: Uyu munsi i Kigali mu itorero rimwe hagaragaye ibendera ry'abatinganyi: Ese aho si cya "kizira cy'umurimbuzi" cyavuzwe?

Fri, 15 Sep 2023 17:54:32 +0000

"Ibendera ry'abatinganyi ku ruhimbi !", mu Itorero rimwe ry'Umwuka hano i Kigali mu murwa ryaciye igikuba!"

Umukristo wabonye aya mahano mu rusengero rw'umwuka hano i Kigali yihutiye kubariza iki kibazo kuri babibiriya.org , natwe twihutiye kumusubiza kubera uburemere bwacyo. Mbere yo gusubiza iki kibazo, twabanje gukurikirana ngo tubanze kumenya niba aya makuru ari ukuri, twasanze ari impamo, bikaba byabereye muri ADEPR hano i Kigali kuri uyu wa gatanu tariki 15/09/2023. Twe ntabwo turi abanyamakuru, ariko abifuza amakuru arambuye bakanda hano bakayasoma mu binyamakuru.

Uwabajije iki kibazo yabajije ati "Ese iki si cya kizira cy'umurimbuzi cyahanuwe kikaba cyahagaze ahera?" Igisubizo kivuga birambuye ku kizira cy'umurimbuzi cyarasubijwe hano, tukaba tubagira inama yo gukanda hano mugasoma birambuye ibyerekeranye n'ikizira cy'umurimbuzi. Ariko muri macye, iki ntabwo ari cyo kizira cy'umurimbuzi cyahanuwe, ariko ibi byabaye ni bimwe bigaragaza umuteguro w'umwuka wa antikristo mu isi.

Turi mu bihe bya nyuma rwose ibyo nta kujijinganya, ndetse umwuka wa antikristo urakora mu buryo bw'uburyarya no mu buryo bw'amayoberane mu buryo bugaragarira buri wese. Ibyo byose ni ibitegurira amayira antikristo nyirizina, gusa turifuza guhumuriza Abizera bakiriho: ntabwo antikristo nyirizina azatangira gukora ku mugaragaro Itorero rya Yesu rikiri mu isi. igihe cyose mu isi hakirimo "UBUZA ANTIKRISTO GUKORA", ntabwo antikristo ashobora gukora ku mugaragaro. Ushobora gukanda hano ugasoma birambuye ikibazo kigira kiti "UBUZA ANTIKRISTO GUKORA KU MUGARAGARO NINDE?

Abasenga nimube maso, ibihe Itorero rya Kristo ririmo gucamo ntibyoroshye. Ryarinjiriwe mu buryo bukomeye, kugeza n'aho ibendera ry'abatinganyi rizamurwa ku ruhimbi rw'Itorero ry'Umwuka? Kandi n'aho bigaragariye amateraniro agakomeza nk'aho nta cyabaye? Mu kinyejana cya mbere, Pawulo yajyaga ababazwa bikomeye n'ibintu by'indengakamere byabereye mu matorero yabaga yaratangije, ndetse akagaya n'abizera batababazwa na byo. URUGERO: 1 Abakorinto 5:1-2 "Inkuru yamamaye hose yuko muri mwe habonetse ubusambanyi, ndetse bw’uburyo butaboneka no mu bapagani, umuntu kwenda muka se. [2]Namwe murihimbaza aho kubabara, kandi ari byo byari bibakwiriye ngo uwakoze icyo cyaha akurwe muri mwe..."

Ibi byabaye ni integuza, nta Mukristo ukwiriye kwihimbaza kuko bitaraba mu Itorero asengeramo, ahubwo bikwiriye kubabaza buri muntu wese wavutse ubwa kabiri, agafungura amaso akareba aho isi igeze, akanamenya uburyo Itorero ryinjiriwe bikomeye.

Murakoze, Imana ibahe umugisha

Answered: Ubuza antikristo gukora ku mugaragaro uvugwa mu Batesaronike ba 2:6 ni inde?

Fri, 15 Sep 2023 17:34:12 +0000

2 Abatesalonike 2:5-7 Bibiriya igira iti: "Ntimwibuka yuko nababwiye ibyo nkiri kumwe namwe? [6]Kandi none muzi yuko ikimubuza ari ukugira ngo azahishurwe mu gihe cye, [7]kuko amayoberane y’ubugome n’ubu atangiye gukora, ariko ntazahishurwa keretse uyabuza ubu akuweho"

Ubu tuvugana, antikristo arakora, ariko akora mu buryo bw'umwuka, mu buryo bw'amayoberane, mu buryo bwihishe, kuko adashobora gukora ku mugaragaro igihe cyose umubuza agihari. Ubu ibyo tubona si antikristo ukora ahubwo ni umwuka wa antikristo. None se uyu ninde ubuza Antkristo gukora ku mugaragaro? Turabizi ko Antikristo azaba yuzuye imbaraga za Satani zo gukora ibimenyetso n'ibitangaza afatanije n'umuhanuzi w'ibinyoma. (Ushobora gukanda hano ukareba ikibazo kigira kiti "Antikristo ninde? / ni iki?). Uko byagenda kose, kubasha kubuza antikristo gukora ku mugaragaro birasaba imbaraga n'ububasha biruta ibya antikristo. Pawulo yandikira Abatesalonike ntiyasobanuye bitomoye ubuza antikristo gukora ku mugaragro uwo ariwe. Byatumye abantu benshi basobanura mu buryo butandukanye, bamwe bakavuga ko umubuza ari Marayika Mikayeli, abandi ngo ni abavugbutumwa, abandi ngo ni abisirayeli, abandi bati ni Umwuka Wera, abandi bati ni Itorero. Muri ibi byose, icyo abasesenguzi bahurizaho ni iki: Ubuza Antikristo gukora ku mugaragaro ni Umwuka Wera ukorera mu itorero rya Yesu.

Iyo witegereje umurongo wa 6 n'uwa 7 hariya twasomye (2 Abatesalonike 2), usanga Bibiriya ivuga ubuza Antikristo mu buryo bubiri: Ku murongo wa 6 iravuga iti "Ikimubuza", ku murongo ukurikiyeho ikavuga iti "Umubuza"; Biragaragara ko umubuza ahuje kuba ikintu n'umuntu (A thing and a person). No mu ndimi z'amahanga birasobanutse: "2 Tessalonicians 2:6-7 'And now you know what is holding him back, so that he may be revealed at the proper time. [7For the secret power of lawlessness is already at work; but the one who now holds it back will continue to do so till he is taken out of the way."

Byongeye kandi, nk'uko twabivuze, kubuza antikristo gukora ku mugaragaro bisaba ububasha butari ubw'umuntu. Ni yo mpamvu mu buryo butajijinganywaho, ubuza antikristo gukora ku mugaragaro ni Umwuka Wera ukorera mu itorero rya Kristo. Igihe kimwe kristo azatwara Itorero arikure mu isi (Rapture). (Ushobora gukanda hano ukareba ikibazo kigira kiti "Kuzamurwa kw'itorero ni iki?"). Itorero nirimara kugenda, Umwuka Wera ntazongera gukora uko akora ubu. Uhere icyo gihe, antikristo azaba yugururiwe amayira, azatangira akore ku mugaragaro, azahishurwa mu buryo bufatika, atangire akore hahite hatangira igihe cy'imibabara ikomeye (tribulation). Icyo gihe abazaba basigaye ku isi bazamenya ko Umwuka Wera n'Itorero aribo babuzaga antikristo gukora ku mugaragaro. Antikristo azisanzura ababaze isi igihe cy'imyaka 7 y'umubabaro ukomeye. Nyuma y'iyo myaka 7, Yesu azagarukana n'Itorero ku isi, yicishe antikristo umwuka uva mu kanwa nk'uko umurongo wa 8 ubivuga: "Ni bwo wa mugome azahishurwa, uwo Umwami Yesu azicisha umwuka uva mu kanwa ke, akamutsembesha kuboneka k’ukuza kwe."

Naho ubundi ubu ibyo tubona mu isi bibi, ubuhenebebere bwo mu minsi y'imperuka, byose ni ibyo Bibiriya yita "kuramukwa". Imibabaro nyayo ntiraza, ibiriho ni amarenga, ni amayeri, ni nk'igerageza.

Ubu nandika ibi, kuri iyi tariki ya 15/09/2023, hari saga y'ikibazo cyabaye mu Itorero rimwe hano i Kigali, ahagaragaye ibendera ry'abatinganyi ku ruhimbi. Hari uwambajije ati "buriya si cya kizira cy'umurimbuzi cyahagaze ahera? Reka da, ibyo byose ni ibimenyetso byo kuramukwa. Ni umwuka wa antikristo uri mu igerageza ngo urebe niba itorero rya kristo riri maso, ibibi ntibiraza kuko Umwuka Wera aracyakora n'abahanuzi b'ukuri baracyahari, ariko si ko bizahora, igihe kimwe isi izamenya yari kumwe n'abahanuzi. Ezekiyeli 2:5 "Na bo nubwo bazumva naho batakumva (kuko ari inzu y’abagome), ariko rero bazamenya ko umuhanuzi yari abarimo."

Murakoze, Imana ibahe umugisha

Answered: Umubare 666 usobanuye iki?

Thu, 14 Sep 2023 22:15:35 +0000

ICYITONDERWA: Turabizi kandi turabizirikana ko abanyamadini basobanura mu buryo butandukanye ibijyanye n’ibihe by’imperuka. Icyo tugamije si ugukurura impaka, ahubwo ni ugusaba Umwuka Wera ngo arusheho kudusobanurira, ariko tukanatanga ibyo dufite kandi twizera ko ari ukuri dushingiye ku ijambo ry’Imana.

Umubare 666 ni kimwe mu bintu byavugishije abantu benshi mu byerekeranye na Bibiriya n'ubusobanuzi bwayo. Waranditswe, warigishijwe, warasobanuwe, wateye abantu ubwoba... kugeza ubwo winjiye mu mibare, atari ubu gusa, guhera kera. Uyu mubare uvugwa mu Byahishuwe 13:18 "Aha ni ho ubwenge buri: ufite ubwenge abare umubare w’iyo nyamaswa kuko ari umubare w’umuntu, kandi umubare we ni magana atandatu na mirongo itandatu n’itandatu." Muri iki gice ntihavugwa umubare 666 gusa, hanavugwamo ibindi bintu bibiri bikomeye: havugwamo inyamaswa ebyiri, izi nyamaswa zikaba zishushanya Antikristo n'Umuhanuzi w'ikinyoma. Iyo witegereje neza usanga hari ikimenyetso antikristo azashyira ku bantu kugirango babashe kugura mu masoko, hakaba n'umubare uranga antikriso ariwo 666. Ibyo bigaragara muri iyi mirongo ibiri:

Ibyahishuwe 13:16-17 "itera bose aboroheje n’abakomeye, n’abatunzi n’abakene, n’ab’umudendezo n’ab’imbata, gushyirwaho ikimenyetso ku kiganza cy’iburyo cyangwa mu ruhanga, kugira ngo hatagira umuntu wemererwa kugura cyangwa gutunda, keretse afite icyo kimenyetso cyangwa izina rya ya nyamaswa, cyangwa umubare w’izina ryayo." Ibi byanditswe bigaragaza ko umubare 666 utandukanye n'ikimenyetso kizashyirwa mu ruhanga rw'abantu kugirango babashe guhaha. Ukuri guhari, ni uko ubusobanuro bw'umubare 666 ari iyobera, kandi uwanditse iki gitabo na we ni uko yabishakaga ko biba iyobera, kuko yaravuze ati "ufite ubwenge abare umubare w’iyo nyamaswa kuko ari umubare w’umuntu." Kuba Yohana yaravuze ati "ufite ubwenge abare umubare w'iyo nyamaswa "byatumye abantu bishora mu mibare itandukanye yo kubara 666, bagakoresha uburyo buzwi cyane ku izina rya "Gematria:" Uko bikorwa, ufata ijambo, buri nyuguti igize iryo jambo ukayiha umubare bihura, warangiza ugateranya iyo mibare ukareba igisubizo bitanga.

URUGERO: Ukoresheje alphabet dukoresha, A=1, B=2, C=3 ......Abantu rero bakoresheje gematria, bagiye babona amazina ahura neza na 666, ayamenyekanye cyane harimo nka Caesar Nero, Mikhail Gorbachev, Ronald Wilson Reagan, n'ayandi mazina menshi ya ba PAPA bagiye babaho mu mateka y'i Roma. Ukuri guhari kuri gematria, ni uko uyikoresheje ushobora kubona ibihumbi by'amazina y'abantu bihura na 666, rero si uburyo bwizewe bwo guhamya umubare 666. Ntabwo dushaka kwinjira muri iyi mibare cyane, tunisegure ntabwo dushaka kwibasira idini iryo ariryo ryose, ariko reka tubahe urugero rumwe rukunze gutindwaho na benshi: Hari ijambo riri mu kilatini rifatwa nka "moto", cyangwa "slogan" y'abapapa muri kiriziya Gatolika i Roma, (Ibi ni ukuri si inkuru), iryo jambo rivugwa mu kilatini "Vicarius Filii Dei" (Mu gifaransa ni "Vicaire du Fils de Dieu", mu cyongereza ni "Representative of the Son of God" mu kinyarwanda ni "Umusimbura w'Umwana w'Imana"), dore ukoresheje gematria icyo bitanga:

Nk'uko twatangiye tubivuga, ntabwo iyo shusho iri hejuru igaragaza ibyafatwa nk'ukuri 100%. Oya rwose. Ubu namwe murimo gusoma iyi nkuru, mu bantu 1000 ubanza hataburamo umwe izina ryahura na 666 ukoresheje gematria!

Ubusesenguzi bukunze guhurizwaho na benshi ku byerekeye umubare 666 ni ubu: Muri Bibiriya umubare 7 ni umubare w'Imana. Umubare 6 ukaba umubare w'umuntu. Nk'uko twabibonye, 666 si umubare uzashyirwa ku bantu ahubwo ni ikimenyetso kiranga antikristo, bikaba bihamya bidasubirwaho ko antikristo azaba ari umuntu nk'uko Bibiriya ibihamya.

Tuzi neza ko Bibiriya itanditswe ngo itumare amatsiko kuri buri kantu kose kabaho, ikindi kandi, bibiriya ivuga ko "Ibihishwe ari iby'Imana, ibyahishuwe bikaba iby'abantu" (Gutegeka kwa kabiri 29:28: "Ibihishwe ni iby’Uwiteka Imana yacu, ariko ibyahishuwe ni ibyacu n’urubyaro rwacu iteka, kugira ngo twumvire amagambo yose y’aya mategeko"

Buri cyose Imana yasanze kidufitiye akamara yarakitubwiye mu buryo busobanutse, kuko na Bibiriya yongeraho iti "Ibihishwe by’Uwiteka bihishurirwe abamwubaha, Azabereke isezerano rye". (Zaburi 25:14) Ibirenze ibyo, Umwuka Wera akomeze atugenderere kandi adusobanurire.

Imana ibahe umugisha

Answered: Kuzamurwa kw'itorero ni iki? (Rapture / Enlevement de l'Eglise)

Wed, 13 Sep 2023 13:15:23 +0000

Kuzamurwa kw'Itorero (Mu cyongereza = Rapture / Mu gifaransa = Enlevement de l'Eglise) ni igikorwa kizabaho umunsi umwe, mu buryo butunguranye, Yesu agakura Itorero rye mu isi, akarizamukana mu kirere, akarihunza ibihe by'imibabaro ikomeye izaba igiye kuza iminsi. (Tribulation).

Kuzamurwa kw'Itorero bivugwa neza mu Batesaloniki ba mbere 4:13-18 aho Bibiriya igira iti: "Ariko bene Data, ntidushaka ko mutamenya iby’abasinziriye, mutababara nka ba bandi badafite ibyiringiro.[14]Ubwo twemeye yuko Yesu yapfuye akazuka, abe ari ko twizera yuko Imana izazanana na Yesu abasinziririye muri we.[15]Iki ni cyo tubabwira tukibwirijwe n’ijambo ry’Umwami wacu yuko twebwe abazaba bakiriho, basigaye kugeza ku kuza k’Umwami, tutazabanziriza na hato abasinziriye.[16]Kuko Umwami ubwe azaza amanutse ava mu ijuru aranguruye ijwi rirenga, hamwe n’ijwi rya marayika ukomeye n’impanda y’Imana, nuko abapfiriye muri Kristo ni bo bazabanza kuzuka, [17]maze natwe abazaba bakiriho basigaye duhereko tujyananwe na bo, tuzamuwe mu bicu gusanganirira Umwami mu kirere. [18]Nuko rero tuzabana n’Umwami iteka ryose."

Yesu naza gutwara Itorero, ntazakandagiza ikirenge ku isi. Azahagarara mu kirere, Marayika we avuze impanda, abapfiriye muri Yesu bahite bazukana umubiri mushya, abazaba bakiriho bamwizeye na bo bahite bahindurwa, bose bazamuke basanganire Yesu mu kirere. Bibiriya ikomeza ibisobanura muri aya magambo:1 Abakorinto 15:50-53 Nuko bene Data, icyo mvuga ni iki yuko abafite umubiri n’amaraso bisa batabasha kuragwa ubwami bw’Imana, kandi ibibora bitabasha kuragwa ibitabora.[51] Dore mbamenere ibanga: ntituzasinzira twese, ahubwo twese tuzahindurwa, [52] mu kanya gato, ndetse mu kanya nk’ako guhumbya, ubwo impanda y’imperuka izavuga. Impanda izavuga koko, abapfuye bazurwe ubutazongera kubora natwe duhindurwe, [53]kuko uyu mubiri ubora ukwiriye kuzambikwa kutabora, kandi uyu mubiri upfa ukwiriye kuzambikwa kudapfa."

Yesu naza gutwara Itorero bizakorwa mu buryo bw'ako kanya kandi bw'ibanga, ku buryo ari abazuka, ari abazaba bakiriho bazambikwa imibiri mishya, ari ukuzamuka, byose bizakorwa mu kanya nk'ako guhumbya, ku buryo abantu bazasigara bazajya kubona bakabona babuze abantu batabonye aho baciye. Dore uko Yesu ubwe yabisobanuye: Matayo 24:27 "Kuko nk’uko umurabyo urabiriza iburasirazuba ukabonekera aho rirengera, ni ko no kuza k’Umwana w’umuntu kuzaba."

Matayo 24:36 "Ariko uwo munsi n’icyo gihe nta wubizi, naho baba abamarayika bo mu ijuru cyangwa Umwana, keretse Data wenyine."

Matayo 24:40-42 "Icyo gihe abagabo babiri bazaba bari mu murima, umwe azajyanwa undi asigare, abagore babiri bazaba basya ku rusyo, umwe azajyanwa undi asigare. Nuko mube maso kuko mutazi umunsi Umwami wanyu azazaho.

Ibijyanye no kuzamurwa kw'itorero, abo mu isezerano rya kera ntibari babizi, ni yo mpamvu Pawulo ajya kubivugaho avuga ati "Mbamenere ibanga..." Yesu ubwe yarivugiye ati "Ngiye kubategurira ahanyu, nimara kuhategura nzagaruka mbajyane iwanjye" (Yohana 14:3).

Abizera Yesu bakaba bamutegereje, bagomba guhora biteguye, ibimenyetso Yesu yaduhaye byose byamaze kuboneka, igihe icyo aricyo cyose ashobora gutwara Itorero.

ICYITONDERWA: Ni ngombwa cyane gutandukanya kuzamurwa kw'Itorero no kugaruka kwa Yesu. Kugirango ubisobanukirwe neza, wareba ikibazo kigira kiti: "Ni irihe tandukaniro hagati yo kuzamurwa kw'Itorero no kugaruka kwa Yesu? KANDA HANO UBONE IGISUBIZO

Imana ibahe umugisha

Answered: AntiKristo ni inde?

Tue, 05 Sep 2023 15:44:10 +0000

Abantu benshi bagiye bavuga kuri Antikristo, bamwe bakavuga basa n'abapfa gufora, abandi bakavuga ko babihishuriwe, abandi bakavuga nk'abahanura.... n'ibindi byinshi. Bamwe ntibatinya kuvuga abayobozi bazwi cyane ngo ni bo ba antikristo, abandi bakavuga ibyamamare mu mpande zitandukanye. Mu bavuzwe cyane ngo ni bo ba antikristo twavuga nka Vladimir Putin, Prince William, Mahmoud Ahmadinejad, Papa, Barack Obama..... n'abandi n'abandi.

None se mu byukuri, antikristo ni inde, kandi ni gute tuzamumenya?

Bibiriya ntivuga mu buryo bwahuranyije ngo antikristo ni uyu n'uyu cyangwa azaturuka he. Bamwe mu bigisha Bibiriya barihandagaza bakavuga ko antikristo azaturuka mu Bwami bw'Abaroma bagendeye ku bivugwa muri Daniel 7:24-25 n'Ibyahishuwe 17:7. Abandi bakavuga ko agomba kuzaba ari Umuyuda, kugirango azabashe kwinjira mu rusengero avuge ko ari we mesiya nk'uko bivugwa mu Batesaroniki ba 2. Ibi byose ntabwo byashingirwaho duhamya ngo antikristo ni inde, ngo azaba asa ate, ngo azaturuka he.....Ndetse ahubwo, tugendeye ku byanditswe byinshi turi buvuge hasi, bigaragara ko umunsi umwe antikristo azahishurwa, kandi icyo gihe azatungura benshi, mu buryo ashobora kuzaba ari umuntu benshi batari biteze.

Antikristo tuvuga, hari ubwo ubu tuvugana yaba yaravutse cyangwa ataravuka. Marting Luther King yahamyaga ko Papa (Pope) wari uriho igihe cye ngo yariwe Antikristo. Mu myaka ya 1940, benshi bahamyaga ko Hitler yari we antikristo. Mu binyejana byose hagiye habaho abantu bagiye bafatwa mu buryo bwo kwibeshya ko ari bo ba Antikristo.

Dushingiye ku byanditswe byera, hari ibyo dushobora guhamya kuri Antikristo:

1) Azaba ari umuntu: 2 Abatesaronike 2:4

2) N'ubu umwuka wa antikristo urakora, mu buryo bw'amayoberane, kuko ikimubuza gukora ku mugaragaro kiracyahari (Umwuka Wera n'Itorero) (2 Abatesaronike 2:7)

3) Igihe kimwe azahishurwa mu gihe cye (2 Abatesaronike 2:6)

4) Azaba ari umugome. Azaba afite imbaraga za Satani zo gukora ibimenyetso n'ibitangaza by'ibinyoma (2 Abatesaronike 2:9)

5) Igihe kimwe azahamya ko ari we Mana (2 Abatesaronike 2:4)

6) Iherezo rye ni ukurimbuka (2 Abatesaronike 2:3)

Ntitwarangiza tutavuze ko abizera Yesu bakwiye guhumurizwa, kuko Antikristo atazahishurwa ku mugaragaro itorero rikiri hano mu isi. Yesu namara gutwara itorero rye (rapture), Umwuka Wera na we azajyana n'Itorero, ubwo nibwo Antikristo azahita ahishurwa kandi atangire gukora ku mugaragaro, hazahita hanatangira ibihe by'imibabaro ikomeye (Tribulation) bizamara imyaka 7.

Imana ibahe umugisha.

Answered: Ni gute nanesha ubwoba mfitiye imperuka?

Tue, 05 Sep 2023 13:00:39 +0000

Akenshi, abantu bakunze kugira ubwoba iyo havuzwe ibyerekeranye n'imperuka. nyamara si uko byari bikwiye kugenda. Ku bizera Imana, gutekereza ku iherezo bibazanira umunezero n'ibyishimo, ku batizera hari impamvu ifatika yo kugira ubwoba.

Hari ibintu 2 by'ingenzi byafasha buri wese kugira umutekano igihe atekereza ku bihe by'imperuka: Icya mbere ni uko Imana ari Umugenga wa byose (Souvereign), kandi ifite ibihe byose mu kiganza cyayo. Icya 2 ni ukwibuka ko Bibiriya isobanura neza ibyerekeranye n'iminsi y'imperuka. Twizera ko Bibiriya ari ijambo ry'Imana, yanditswe kugirango Imana ihishurire umuntu ibiriho n'ibizaba. Tugomba kubyizera uko Bibiriya ibivuga, kuko Petero wa 2 igice cya 1:21 Bibiriya igira iti: "Kuko ari nta buhanuzi bwazanywe n'ubushake bw'umuntu, ahubwo abantu b'Imana bavugaga ibyavaga ku Mana bashorewe n'Umwuka Wera". Muri Bibiriya harimo ukuri kutajijinganywaho, kuko ubuhanuzi bwayo butameze nk'ubwa bamwe mu bagiye bahanura ibyerekeye imperuka ariko bikaza kugaragara ko ibyo bahanuye byari ibinyoma (Nka Nostradamus n'abandi); Igihe cyose Bibiriya yavuze ku byari bitaraba, byasohoye nk'uko yabivuze neza neza, nta na rimwe yigeze yibeshya.

Ibyo ukeneye kumenya niba wibaza uko wazarokoko iminsi y'imperuka bishingiye kuwibaza ibi bibazo:

1. Bibiriya ivuga iki ku byerekeye iminsi y'imperuka?

2. Nasobanukirwa nte ibyo Bibiriya ivuga ku byerekeye iminsi y'imperuka?

3. Ibyo Bibiriya ivuga ku byerekeye iminsi y'imperuka bifite izihe ngaruka ku buzima bwanjye bw'uyu munsi?

Ni ngombwa cyane gutekereza kuri ibi bibazo no kugerageza kubibonera ibisubizo bikwiriye. Igihe cyose utarabibonera ibisubizo, nta kabuza ko uzahora uhangayikishijwe no kumenya niba uzarokoka ibihe by'imperuka.

Ku byerekeranye n'iminsi y'imperuka, Bibiriya ivuga neza ko bimwe mu bitabo byo muri Bibiriya nka Daniel n'ibyahishuwe, ntibirimo gusa amateka y'ibyabaye, ahubwo harimo n'ubuhanuzi ku minsi y'imperuka. Mu ncamake, birazwi mu buryo butajijinganywaho ko umunsi umwe, utazwi, Yesu azaza gutware Itorero rye (Rapture). Nyuma y'aho, isi izahita itangira igihe cy'imibabaro ikomeye itewe na antikristo, icyo gihe kikazamara imyaka 7. Nyuma y'iyi myaka 7, Yesu azagarukana n'Itorero gutegeka mu isi, ari i Yerusalemu, mu ngoma izamara imyaka 1000 (Millenium).

Igihe kimwe, mu buryo butunguranye cyane, abantu bazabura abandi hano muri iyi si. Ibi bizwi nko "Kuzamurwa kw'Itorero". Iyi ntizaba ari imperuka, bizaba ari itangiriro ryayo. ubutumwa bwiza buravugwa, abantu barigishwa, bamwe barizera abandi bakinangira, ariko nta kizabibuza kuba, bizaba.

ESE IBYO BYOSE BIKWIRIYE KUGIRA IZIHE NGARUKA KU BUZIMA BWACU UYU MUNSI?

Hari Imyitwarire 3 ikwiriye kuturanga kugirango dutegure eho hazaza n'ibihe by'imperuka:

1. KUBAHA IMANA NO KUYUMVIRA: Yesu yabisubiyemo kenshi, yadusabye guhora twiteguye, ashobora kugaruka gutwara itorero igihe icyo aricyo cyose. Buri wese akwiriye gusuzuma imibereho ye, akareba niba ihuye n'umurongo Imana yifuza nk'uko tuwukura mu ijambo ryayo.

2. AGAKIZA: Imana yateganije inzira buri wese ubyifuza yacamo kugirango azarokoke iminsi y'imperuka. Iyo ni impano y'agakiza kabonerwa mu kwizera Yesu Kristo.

3. KWAMAMAZA INKURU NZIZA: Inkuru nziza buri wese yamenye akwiriye kutayigira ibanga. Menyesha benshi bashoboka ibyo wamenye, bibwire abandi kugirango na bo bazabashe kurokoka ibihe by'imperuka

Ibisigaye, ni ukwibuka ko hari umunsi buri wese azaca imbere y'intebe y'urubanza, "Kugirango buri muntu wese ahabwe ibikwiriye ibyo yakoze akiri mu mubir, ari ibyiza cyangwa ibibi". Ibyo Bibiriya yahanuye bigasohora, ni ikimenyetso ko ibitarasohora bizasohora umunsi umwe. Ku bizeye, Umunsi w'imperuka uzaba uw'ibyishimo n'umunezera, ku banze kwizera uzababera umunsi w'umujinya w'Imana.

Mu gusoza, Reka mvuge mu nteru imwe ngo:: "Niba wifuza kurokoka ibihe by'imperuka, suzuma niba warakiriya impano y'agakiza kabonerwa muri Yesu Kristo. Kuko Imana itatugeneye umujinya, ahubwo yatugeneye guheshwa agakiza n'Umwami wacu Yesu Kristo. 1 Abatesaloniki 5:9 ".

Answered: ISOMO RYA 2: INGOMA YA KRISTO Y'IMYAKA 1,000 (MILLENNIAL KINGDOM)

Tue, 05 Sep 2023 12:52:13 +0000

Ibibazo birebana n'ibihe by'imperuka bikunze kutavugwaho rumwe n'abasesenguzi ba Bibiriya. Ibyo ni kimwe n'igitabo cy'ibyahishuwe, usanga abantu benshi bagisobanura bitandukanye, abandi batinya kugisoma kuko bagisome ntibasobanukirwe, n'ibindi.

Ibyo aribyo byose, Bibiriya iduhamiriza ko ibihishwe ari iby'Imana, naho ibyahishuwe bikaba iby'abantu. (Gutegeka kwa kabiri 29:28). Ibi bivuze ko ibyo Imana yasanze ari ibyayo kandi ntacyo bidufasha kubimenya, yarabiduhishe, ariko ibyo yasanze bifite icyo bitumariye, yarabiduhishuriye, tugomba kubyiga, dufashijwe n'Umwuka Wera tukabisobanukirwa.

Tutiriwe tujya ku mpaka zivuka iyo abantu bavuga ku bihe by'imperuka, iki kibazo turagisubiza dukurikije ibyo Bibiriya Yera ihamya kandi natwe tukabyizera.

1) Ingoma y'imyaka 1,000 ni iki?

Ingoma y'imyaka 1,000 ni inyito ihabwa igihe cyingana n'imyaka igihumbi Yesu azamarana n'abera kuri iyi si dutuye, aganje nk'Umwami. Byumvikane neza ko iri atari ijuru, ibi bizabera hano muri iyi si dutuye. Mu yindi mvugo abandi babyita Paradizo, abandi bakabyita Millenium. Bamwe bagerageza gusobanura iyi myaka 1,000 y'ingoma ya Yesu ku isi nk'aho ishaka kuvuga igihe kirekire gusa, ngo si imyaka igihumbi nk'uko Bibiriya ibivuga. Ariko Bibiriya ibisubiramo inshuro 6 mu gitabo cy'ibyahishuwe 20:2-7, imyaka 1,000 ivugwa si igishushanyo cy'ikindi kintu, ahubwo ni imyaka 1,000 nyine. Iyo Imana iza kuba yarashatse kuvuga "igihe kirekire" iba yarabivuze gutyo, ntiyari kuvuga indeshyo y'igihe mu buryo budashidikanywaho kandi ibisubiramo inshuro 6 zose. Iyi ngoma y'imyaka 1,000 hari abayita "ikinyagihumbi", na byo ntacyo bitwaye.

Yesu aza bwa mbere kuducungura, yaje nk'Umwami wicisha bugufi, ndetse ntiyigeze agerageza kwigarurira ubwami bwari bufitwe n'undi mwami witwaga Kayizari. Ariko nagaruka bwa kabiri, Bibiriya itubwira ko azasubirana ingoma ya Dawidi aganze i Yerusalemu, kandi uhereye icyo gihe ingoma ye ntizahabwa undi, izaba iy'iteka ryose. (Luka 1:32). Ibi ntabwo ari mu buryo bw'umwuka, ni mu buryo bufatika bw'umubiri.

2) Bizaba bimeze bite muri iyi ngoma?

Bibiriya itubwira byinshi ku kuntu ingoma ya y'imyaka 1,000 izaba imeze:

- Kristo azima ingoma izamara imyaka 1,000 (Ibyahishuwe 20:4)

- Yerusalemu (muri Isirayeli) ni yo murwa mukuru w'iyi ngoma, Yesu niho azaba aganje (Zekariya 8:3)

- Satani n'abadayimoni be bazaba baboshye muri iyi myaka 1,000 yose, ntibazabasha gushuka cyangwa kugirira bani abazaba batuye muri iyi ngoma. (Ibyahishuwe 20:1-3) Kubera iyo mpamvu:

- Kizaba ari igihe cy'amahoro (Yesaya 32:17-18; Mika 4:2-4)

- Nta gukorwa n'isoni kundi (Yesaya 61:7)

- Kizaba igihe cy'ibyishimo n'umunezero mwinshi (Yesaya 61:10)

- Kizaba ari igihe cy'ihumure (Yesaya 40:1)

- Nta kwigishanya, buri wese azaba azi igikwiye (Yeremiya 31:33)

- Hazarangwa no kwera no gukiranuka gusa (Yesaya 35:8)

- Isi izakwira kumenya Imana (Yesaya 11:9)

- Inyamaswa z'inkazi zishashira ubukana bwazo, ntizizongera kuryana (Yesaya 11:6-9)

- Yesu azategekesha gukiranuka, kandi abera nabo bazamufasha batwaza imanza zitabera (Matayo 19:28; Yesaya 32:1)

Uretse ibi byanditswe tuvuze haruguru, hari n'ibindi byinshi bigaragaza ko iyi si dutuye umunsi umwe izahinduka Paradizo, Yesu ubwe akayituramo aganje i Yerusalemu, agafashwa n'Abera kuyobora imyaka 1,000. Byumvikane neza ko iyi Paradizo izamara imyaka 1,000, hari ababyitiranya ngo iyi si izahinduka paradizo burundu, oya siko biri. Nyuma y'imyaka 1,000 muri paradizo ku isi tuzajya mu ijuru, aho niho iwacu tuzaba burundu mu munezero w'ubuziraherezo. Isi izahita itwikwa ihinduke umuyonga, ishongeshwe no gushya cyane. (1 Petero 3:10)

3) Ni bande bazaba mu kinyagihumbi (Ingoma y'imyaka 1,000)?

Nyuma yo gusobanura ikinyagihumbi, turebere hamwe ikindi kibazo gikunze kwibazwa cyane kerekeye abantu bazaba muri iki kinyagihumbi. Nabyo ntibihurizwaho kimwe, turabisobanura turebeye mu ijambo ry'Imana

Mu kinyagihumbi hazabamo abantu bo mu matsinda abiri:

- Itorero rya Kristo, rigizwe n'abahinduriwe imibiri igihe cyo kuzamuka kw'Itorero rizwi nka rapture mu cyongereza cyangwa enlevement de l'Eglise mu gifaransa (glorified bodies) (1 Abatesaroniki 4:13-18; 1Abakorinto 15:21-23; 1Abakorinto 15L51-53).

- Abazaca mu mibabaro ikomeye (tribulation), bagizwe n'abazasigara nyuma yo kuzamurwa kw'Itorero, ariko bakihanganira imibabaro ikomeye kugeza itorero rigarukanye ku isi na Kristo, bakinjirana mu kinyagihumbi. Aba bazagumana imibiri yabo (eathly bodies) (Ibyahishuwe 20:4-6)

Yesu naza gutwara itorero, ntazakandagiza ikirenge ku isi nk'uko tubibwirwa na Bibibiriya, ndetse uku si ukugaruka kwe. Kugaruka kwa Yesu tugusanga mu Byahishuwe 19:11-16. Ni ibihe bibiri bitandukanye. Yesu azabanza atware itorero, haceho imyaka 7, agarukane na ryo ku isi. Muri iyi myaka irindwi isi izaba irimo guza mu kaga gakomeye (Tribulation), abazihangana kugeza Yesu agarukanye n'itorero bazinjirana mu kinyagihumbi n'imibiri yabo isanzwe, ntaho Bibibiriya ivuga ko imibiri yabo izahindurwa. Yesu nagarukana n'itorero kandi, hazabaho umuzuko w'Abera bo mu isezerano rya kera na bo bahabwe imibiri mishya nk'itorero, na bo binjire mu kinyagihumbi.

Mu kinyagihumbi, abazabamo bafite imibiri yahinduwe (Glorified bodies) ntibazashobora kurongora cyangwa kurongorwa, ntibazanabyara, ahubwo bazaba bameze nk'abamarayika. (Matayo 22:30). Abazaba bafite imibiri isanzwe bazabyara, ndetse abana bazavuka kuri bo hagati mu kinyagihumbi bazaba bafite inshingano zo kwizera Yesu kimwe n'abababanjirije. Aba ni bo Satani azagerageza gushuka no kwigarurira nyuma y'imyaka 1,000; kuko Bibiriya ivuga ko nyuma y'ikinyagihumbi Satani azabohorwa ave aho yari abohewe, yongere agerageze kubayobya, ndetse abateranirize mu ntambara ya nyuma izwi ku izina rya Harmagedoni. Iyi ni yo ntambara ya nyuma mu mateka ya muntu, kuko nyuma yo kuyitsindwa, Satani n'abamuyobotse bose bazajugunywa mu muriro utazima mu buryo bwa burundu, mu gihe babandi bari mu Kinyagihumbi bizeye by'ukuri bo bazahita bajyanwa mu ijuru mu buryo bwa burundu.

4) Nyuma y'ingoma ya kristo y'imyaka 1,000

Mu ijambo rimwe, nyuma y'ikinyagihumbi hari urubanza, IJURU n'UMURIRO.

1 Abakorinto 2:9 : Iby'ijisho ritigeze kureba, n'iby'ugutwi kutigeze kumva, ibitigeze kwinjira mu mutima w'umuntu, ibyo byose Imana yabyiteguriye abayikunda.

Imana ibahe umugisha.

Answered: Ese Yesu naza gutwa itorero, bizagendekera bite impinja n'abana bato?

Tue, 05 Sep 2023 12:47:20 +0000

Bibiriya ntabwo yerura ngo itomore uko bizagendekera impinja n'abana Yesu naza gutwara itorero. Ibi bitera Abakristo benshi guhangayika, bibaza uko bizagendekera abana babo Yesu natwara itorero rye, bakibaza niba abana bazasigara ku isi ngo bahangane n'ibihe by'imibabaro ikomeye (tribulation). Ese birashoboka? Oya, Ntabwo dutekereza ko Imana yakwemera ko impinja n'abana bababazwa muri tribulation.

Igihe Yesu yari akiri ku isi, yagaragaje mu buryo butomoye ko kugirango twinjire mu bwami bw'ijuru, bidusaba kugira umutima nk'uw'abana. (Luka 18:16) kubera iki? Kuko abana ari abaziranenge, Ntibaragira ubushobozi bwo gutandukanya icyaha n'ikitari icyaha, ntibaragira ubushobozi bwo guhitamo kwizera cyangwa kutizera. Yesu natwara itorero, abazasigara ni abazaba batamwiteguye, abanze kumwizera, abibera mu cyaha no mu gukiranirwa. Ibi byose abana nta ruhare babifitimo. ibi ni byo duheraho duhamya ko yesu natwara itorero, abana n'impinja na bo bazazamurwa.

Hari abavuga ko abana b'Abizera ari bo bonyine bazazamurwa. Ibi si ukuri. Kuko imbere y'Imana umwana ntabwo afatwa nk'umukiranutsi bitewe n'ukwizera kw'ababyeyi be. Umwana aho akomoka hose, haba ku Bizera cyangwa ku batizera, afatwa nk'imuziranenge imbere y'Imana.

Umwanzuro: Nubwo Bibiriya ntacyo ibivugaho mu buryo bwahuranyije, dufite ibyanditswe byinshi dushingiraho twemeza ko Yesu naza gutwara itorero, abana bose batarageza ku myaka yo kwihitiramo bazazamukana n'itorero.

Imana ibahe umugisha.

Answered: Imyaka 1,000 y'ingoma ya Kristo ni iki? (Millenium)

Tue, 05 Sep 2023 11:09:27 +0000

Tutiriwe tujya ku mpaka zivuka iyo abantu bavuga ku bihe by'imperuka, iki kibazo turagisubiza dukurikije ibyo Bibiriya Yera ihamya kandi natwe tukabyizera.

1) Ingoma y'imyaka 1,000 ni iki?

2) Bizaba bimeze bite muri iyi ngoma?

Bibiriya itubwira byinshi ku kuntu ingoma ya y'imyaka 1,000 izaba imeze:

- Kristo azima ingoma izamara imyaka 1,000 (Ibyahishuwe 20:4)

- Yerusalemu (muri Isirayeli) ni yo murwa mukuru w'iyi ngoma, Yesu niho azaba aganje (Zekariya 8:3)

- Satani n'abadayimoni be bazaba baboshye muri iyi myaka 1,000 yose, ntibazabasha gushuka cyangwa kugirira bani abazaba batuye muri iyi ngoma. (Ibyahishuwe 20:1-3) Kubera iyo mpamvu:

- Kizaba ari igihe cy'amahoro (Yesaya 32:17-18; Mika 4:2-4)

- Nta gukorwa n'isoni kundi (Yesaya 61:7)

- Kizaba igihe cy'ibyishimo n'umunezero mwinshi (Yesaya 61:10)

- Kizaba ari igihe cy'ihumure (Yesaya 40:1)

- Nta kwigishanya, buri wese azaba azi igikwiye (Yeremiya 31:33)

- Hazarangwa no kwera no gukiranuka gusa (Yesaya 35:8)

- Isi izakwira kumenya Imana (Yesaya 11:9)

- Inyamaswa z'inkazi zishashira ubukana bwazo, ntizizongera kuryana (Yesaya 11:6-9)

- Yesu azategekesha gukiranuka, kandi abera nabo bazamufasha batwaza imanza zitabera (Matayo 19:28; Yesaya 32:1)

3) Ni bande bazaba mu kinyagihumbi (Ingoma y'imyaka 1,000)?

Mu kinyagihumbi hazabamo abantu bo mu matsinda abiri:

4) Nyuma y'ingoma ya kristo y'imyaka 1,000

Mu ijambo rimwe, nyuma y'ikinyagihumbi hari urubanza, IJURU n'UMURIRO.

1 Abakorinto 2:9 : Iby'ijisho ritigeze kureba, n'iby'ugutwi kutigeze kumva, ibitigeze kwinjira mu mutima w'umuntu, ibyo byose Imana yabyiteguriye abayikunda.

Imana ibahe umugisha.

Answered: Ni irihe tandukaniro hagati yo Kuzamurwa kw'itorero no kugaruka kwa Yesu?

Tue, 20 Jun 2017 21:00:26 +0000

Kenshi na kenshi abantu bakunze kwitiranya kuzamurwa kw'itorero (Rapture) no kugaruka kwa Yesu (Second coming). Hamwe na hamwe muri Bibiriya, bikunze kugorana no gusaba ubucukumbuzi kumenya niba icyanditswe kivuga ku izamurwa ry'itorero cyangwa kugaruka kwa Yesu. Nyamara, ku muntu ushaka kumenya neza ubuhanuzi bwerekeye ibihe by'imperuka, ni ngombwa gutandukanya ibi bintu byombi kuko biratandukanye.

Kuzamurwa kw'itorero (Rapture), ni igihe Yesu azagaruka kujyana itorero arikuye mu isi. Iki gikorwa kizakorwa mu buryo butunguranye kandi bwihuse cyane, ku buryo Bibiriya ivuga nko ni mu kanya nk'ako guhumbya. yesu naza gutwara itorero ntazakoza ikirenge ku isi; Marayika azavuza impanda, abapfiriye muri Yesu bahite bazuka, abizera bazaba bakiriho bo bazahita bahindurwa badapfuye, bahite bazamukira icyarimwe gusanganira Yesu mu kirere. (1 Abatesaloniki 4:13-18 na 1 Abakorinto 15:50-54). Yesu azamarana n'itorero imyaka 7 ahantu yariteguriye, muri iyi myaka isi izaba iri mu kaga gakomeye gatewe na antikristo. nyuma y'iyi myaka 7, Yesu azagarukana ku isi n'Itorero gutsinda Antikristo no kwima ingoma y'imyaka 1000. Uku niko Kugaruka kwa Yesu.

Reka tugerageze gukora icyegeranyo cy'aho kuzamurwa kw'itorero bitandukaniye no kugaruka kwa Yesu.

Kuzamurwa kw'Itorero	Icyanditswe	Kugaruka kwa Yesu	Icyanditswe
Abizera bazazamuka gusanganira Yesu mu kirere bavuye mu isi	1 Abatesalonike 4:17	Abizera bazagarukana mu isi na Yesu	Ibyahishuwe 19:4
Itorero rizazamurwa mbere y'imibabaro ikomeye nko guhungishwa (Tribulation)	Ibyahishuwe 3:10	Yesu azagaruka nyuma y'imibabaro ikomeye (Tribulation)
Yesu naza gutwara itorero ntazakandagiza ikirenge ku isi	1 abatesalonike 4:13-18	Yesu nagaruka azakandagiza ikirenge ku musozi Siyoni	Zekariya 15:4
Itorero rizazamurwa mu kanya nk'ako guhumbya kandi mu ibanga rikomeye	1 Abakorinto 15:50-54	Kugaruka kwa Yesu, bose bazamubona	(Matayo 24:29-30)
Itorero rishobora kuzamurwa igihe icyo aricyo cyose, nta yindi nteguza	1 abatesalonike 4:13-18	Kugaruka kwa \yesu kuzabanzirizwa n'ibintu bimwe na bimwe	2 abatesalonike 2:4; Matayo 24:15-30

Uko bigaragara, Kuzamurwa kw'itorero no kugaruka kwa Yesu ni ibintu 2 bitandukanye. Hagati yabyo harimo imyaka 7. Ni ngombwa cyane kumenya itandukaniro ryabyo.

Imana ibahe umugisha.

ibindi bibazo wasoma kugirango urusheho gusobanukirwa:

- Antikristo ni inde? Kanda hano ubone igisubizo

- Ingoma ya Kristo y'imyaka 1000. Kanda hano wige

Answered: Ikizira cy'Umurimbuzi ni iki?

Mon, 19 Jun 2017 15:56:58 +0000

Bibiriya Yera, Matayo 24:15-16 hagira hati: "Ariko ubwo muzabona ikizira kirimbura cyahanuwe n'umuhanuzi Daniyeli gihagaze ahera (ubisoma abyitondere, icyo gihe abazaba abri i Yudaya bazahungire mu misozii...."

Daniyeli mu buhanuzi bwe, 12:11, yari yagize ati:"Uhereye igihe igitambo gihoraho kizakurirwaho bagashyiraho ikizira cy'umurimbuzi, hazacaho iminzi igihumbi na magana abiri na mirongo urwenda". ndetse na 9:27 yari yagize ati: "Uwo mutware azasezerana na benshi isezerano rikomeye, rimare icyumweru kimwe. Nikigera hagati, azabuzanya ibitambo n'amaturo, umurimbuzi azaza ku ibaba ry'ibizira, maze kugeza ku mperuka yategetswe uburakari buzasandazwa kuri uwo murimbuzi"

Ikizira cy'umurimbuzi cyagiye gisobanurwa kwinshi, ndetse mu mateka ya isirayeli hagiye habamo ibihe byafashwe nkaho ari ikizira cy'umurimbuzi. Urugero, mu mwaka wa 167 mbere ya Yesu, Umutegetsi w'Umugereki witwaga Antiochus Epiphane yafashe urusengero rw'i Yerusalemu, mu rusengero aho Abisirayeli batambiraga ibitambo byoswa ashyiraho igicaniro cy'ikigirwamana cye kitwaga Zeus, ndetse afata ingurube ayitambira kuri icyo gicaniro mu gihe ingurube yafatwaga nk'ikizira mu bisirayeli kuko ari inyamaswa ituza ukurikije amategeko bari bafite icyo gihe. Iki gikorwa abisirayeli bagifashe nk'ikizira cy'umurimbuzi cyageze ahera. Nyamara igihe Yesu yavugaga iki kizira cy'umurimbuzi muri Matayo 24:15, ibi tuvuze hejuru byari byararangije kuba, kandi Yesu yabivuze nk'ibigitegerejwe imbere. (Future).

Abasesenguzi ba Bibiriya hafi ya bose bemeza ko Yesu avuga ikizira cy'umurimbuzi, yari arimo kuvuga ibyo Antikristo azakora bishaka gusa n'ibyo Antiochus Epiphane yakoze. Ibi byemezwa n'uko ibyo Daniel yahanuye byerekeranye n'ikizira cy'umurimbuzi byose siko Antiochus Epiphane yabikoze. Nk'urugero rukomeye, Daniyeli yahanuye ko uwo mutware (Antikristo) azasezerana na Isirayeli isezerano ry'imyaka 7 (Icyumweeru mu buryo bwa gihanuzi), ariko iri sezerano nirigera hagati, ni ukuvuga nyuma y'imyaka 3,5, azica iri sezerano, akore ikizira gikomeye, we ubwe azinjira mu rusengero i Yerusalemu, avuge ko ari we Mana, kandi ategeke ko abantu bose bamusenga. Ubwo Pawulo yandikiraga Abatesalonike ku byerekeranye n'ibya Antikristo, igice cya 2:4 yagize ati "Ni umubisha wishyira hejuru y'ikitwa Imana cyose cyangwa igisengwa, kugirango yicare mu rusengero rw'Imana, yiyerekane ko ari Imana".

Ku muntu wese uzi uko antikristo azaba ameze n'ibyo azaba akora, ntawe ukwiye kujijinganya ko kugirango yinjire mu rusengero rw'Imana, yiyite Imana, kandi ategeke ko bamusenga, Imbere y'Imana Yera icyo ni ikizira gikomeye kuruta ibizira byose byigeze kubaho. Tubibutse ko ibi bizaba Itorero ritakiri mu isi, Yesu azaba yararizamuye. Abazaba bakiri mu isi mu bihe bikomeye (tribulation), nibabona iki kizira cy'umurimbuzi kigeze ahera, bazamenye ko hasigaye imyaka 3.5 (Daniel 12:11) kugirango Yesu agarukane n'Itorero kwima ingoma y'imyaka 1,000 aganje i Yerusalemu.

Muri make, kugirango birusheho gusobanuka, dore uko ibihe bizakurikirana kugeza ku kizira cy'umurimbuzi:

- Yesu azaza atware Itorero rye, abapfuye mamwizeye bazabanza kuzuka, abazaba bakiriho bazahita bahindurwa, bose bahite bazamurwa mu kirere gusanganira Yesu (1 Abatesalonike 4:15-17). Ibi bizakorwa mu kanya nk'ako guhumbya (1 abakorinto 15:52)

- Kuri ubu antikristo arakora, ariko akora mu buryo bw'amayoberane kuko umubuza gukora aracyahari. Itorero rikimara kugenda, antikristo azatangira gukora ku mugaragaro. (2 Abatesaloniki 2:7)

- Hazahita hatangira ibihe by'umubabaro (Tribulation) by'imyaka 7. Isi izahura n'akaga gakomeye, antikristo azahita akorana amasezerano y'amahoro y'imyaka 7 na Isirayeli. (Daniyeli 9:27). Mu gihe isi izaba iri mu kaga k'imibabaro itewe na antikristo, Isirayeli yo izaba ifite agahenge gatewe n'aya masezerano. Ako gahenge niko kazatuma Isirayeli yongera kubaka urusengero (Temple) i Yerusalemu. Nyuma y'imyaka 3.5 , antikristo azica aya masezerano, ahubwo yinjire mu rusengero ahera, ategeke ko bamusenga kuko ngo ari we Mana! Iki ni cyo kizira cy'umurimbuzi Yesu yavuze! Iki gikorwa kizaba gitangije ibihe by'akaga katigeze kubaho kazamara imyaka 3.5 nanone (Grande tribulation).

- Ibizakurikiraho tuzabibagezaho ku nyigisho zerekana umurongo w'uko ibihe by'imperuka bizakurikirana, kuva itorero rizamutse kugeza tugiye mu ijuru.

ICYITONDERWA: Turabizi kandi turabizirikana ko abanyamadini basobanura mu buryo butandukanye ibijyanye n'ibihe by'imperuka. Icyo tugamije si ugukurura impaka, ahubwo ni ugusaba Umwuka Wera ngo arusheho kudusobanurira, ariko tukanatanga ibyo dufite kandi twizera ko ari ukuri dushingiye ku ijambo ry'Imana.

Ikindi kibazo cyagufasha: Antikristo ni inde? Kanda hano ubone igisubizo.

Imana ibahe umugisha

Answered: "Ibihe by'abanyamahanga " ni iki?

Mon, 29 May 2017 21:00:07 +0000

Muri Luka 21:24 , Yesu avuga ku minsi ya nyuma, gusenywa kwa Yerusalemu no kugaruka kwe. Kuri uyu murongo Bibiriya igira iti: "Bamwe bazicwa n'inkota, abandi bajyanywe mu mahanga yose ari imbohe, kandi i Yerusalemu hazasiribangwa n'abanyamahanga, kugeza ubwo ibihe by'abanyamahanga bizashirira".

Kimwe n'icyanditswe kiri mu Baroma 11:25 "........Abisirayeli bamwe banangiwe imitima ariko si bose, kugeza ubwo abanyamahanga bazinjira mu itorero bakagera ku mubare ushyitse."

Mu cyongereza, Bibiriya ivuga "Time of Gentiles".

Abantu Bibiriya yita "Gentiles" cyangwa abanyamahanga, ni abandi bantu bose ukuyemo Abisirayeli mu buryo bw'amaraso. Ikongera ikita abanyamahanga abantu bose batarizera Yesu nk'Umwami n'Umukiza, cyangwa Abapagani.

Kuva ubwo Daniel yasobanuraga inzozi za Nebukadinezari, (Daniel 2:31-45). Daniel yeretswe uko ubwami 4 (empires) buzakurikirana kuva ku bwami bwa Babylonne bwari buyobowe na Nebukadinezari kugeza ku ngoma ya Yesu itazahanguka. Ubu n'ubu tuvugana, turi mu bihe by'abanyamahanga (Gentile domination).

Tugarutsee kuri Luka 21:24; turabona Yesu ubwe ahamya ko Yerusaremu izasiribangwa n'abanyamahanga kugeza ubwo ibihe by'abanyamahanga bizashirira. Uku gusiribangwa kwa Yerusalemu kwatangiye mu mwaka wa 588 mbere ya Yesu ubwo Umwami w'abami Nebukadinezari yasenyaga Yerusalemu, agasenya urusengero, kandi akajyana i Babuloni imbohe zari zirimo abasore nka Daniel na bagenzi be.

Abaroma 11:25 ho hatugaragariza impamvu yemeye ko habaho ibi bihe by'abanyamahanga: BYATUMYE INKURU NZIZA Y'AGAKIZA IGERA KU ISI YOSE. Ubwo Yesu yazaga mu isi, Abayuda bene wabo banze kumwemera kuko bari banangiwe imitima. Ku bw'iyo mpamvu, inkuru nziza y'agakiza yahise ihindukirira abanyamahanga bo barayakira. Uku kunangirwa imitima kw'Abisirayeli si ukw'igihugu cyose nk'imbumbe nk'uko Bibiriya ibivuga mu Abaroma 11:25, ahubwo ntibivanaho buri wese muri bo kwifatira umwanzuro wo kwizera, ariko Yerusalemu ubwayo ndetse na Isirayeli nk'igihugu byabaye binangiwe imitima kugirango batizera ko Yesu ari we Mesiya kugeza ubwo umugambi w'Imana wo kugeza ubutumwa bwiza ku isi yose uzaba wujujwe.

Ubundi buryo busobanurwamo "ibihe by'abanyamahanga", ni "ibihe by'Abapagani", cyangwa "Ibihe by'abatarizera Yesu nk'Umwami n'Umukiza". Mu gihe Abizeye Yesu bafatwa nk'urubyaro rwa Aburahamu mu buryo bw'umwuka, abataramwizera bo, cyangwa abapagani, bafatwa nk'abanyamahanga. Ubu turi mu bihe abapagani barimo kubwirwa inkuru nziza mu mpande zose z'isi. Ibi kugirango bishoboke, byasabye ko Imana ubwayo inangira umutima igice kimwe cy'Abisirayeli, ndetse inemera ko Yerusalemu, umurwa wayo ikunda cyane, isiribangwa n'abanyamahanga. Uku gusiribangwa n'abanyamahanga ngirango ntawakujyaho impaka:

Uyu munsi uwazura Salomon, akamujyana ahahoze urusengero rwe rwiza cyane akahasanga umusigiti w'Abayisilamu, akabona uburyo ki ikintu cyonyine kigaragaza ko hahoze urusengero ari urukuta uyu munsi rwitwa "Urukuta rw'amaganya", akamutembereza Yerusalemu yacitsemo ibice bibiri igice kimwe kitwa "Jerusalelem Est" n'ikindi kitwa "Jerusalem Ouest", akareba ukuntu Umurwa w'Imana (Yerusalem), wa murwa Imana ubwayo yivugiye iti "Yerusalemu ntinkwibagirwa, ukuboko kwanjye kw'iburyo kuzibagirwe gukora. Ururimi rwanjye rufatane n'urusenge rw'akanwa kanjye, Nintakwibuka, Nintakunda i Yerusalemu, Nkahahindura ibyishimo byanjye biruta ibindi. Zaburi 137:5-6", akareba uburyo muri Yerusalemu rwagati hari ibice abayuda batemerewe gukandagizamo ikirenge, Salomon ntiyajijinganya guhamya ko Yerusalemu irimo gusiribangwa nabanyamahanga.

Igihe gikwiriye, Imana izongera izure Isirayeli nk'igihugu kiyizera nk'Umukiza nk'uko byari bimeze na mbere, bazongera bayizere nka Messiya, icyo gihe "igihe cy'abanyamahanga kizaba kirangiye." (Abaroma 11:26). Agakiza kazongera gasubire mu Bayuda kuko ariyo katurutse (Yohana 4:22).

Imana ibahe umugisha.

IBINDI BIBAZO WASOMA kugirango urusheho gusobanukirwa:

- Ni iki nkeneye kumenya kugirango nzarokoke ibihe by'imperuka? Kanda hano urebe igisubizo

- Inyigisho: Ingoma ya Kristo y'imyaka 1000 (Ikinyagihumbi_Millenium). Kanda hano

Answered: Kurokoka ibihe by'imperuka: Ni iki nkeneye kumenya?

Sat, 27 May 2017 22:19:45 +0000

Akenshi, abantu bakunze kugira ubwoba iyo havuzwe ibyerekeranye n'imperuka. nyamara si uko byari bikwiye kugenda. Ku bizera Imana, gutekereza ku iherezo bibazanira umunezero n'ibyishimo, ku batizera hari impamvu ifatika yo kugira ubwoba.

Hari ibintu 2 by'ingenzi byafasha buri wese kugira umutekano igihe atekereza ku bihe by'imperuka: Icya mbere ni uko Imana ari Umugenga wa byose (Souvereign), kandi ifite ibihe byose mu kiganza cyayo. Icya 2 ni ukwibuka ko Bibiriya isobanura neza ibyerekeranye n'iminsi y'imperuka. Twizera ko Bibiriya ari ijambo ry'Imana, yanditswe kugirango Imana ihishurire umuntu ibiriho n'ibizaba. Tugomba kubyizera uko Bibiriya ibivuga, kuko Petero wa 2 igice cya 1:21 Bibiriya igira iti: "Kuko ari nta buhanuzi bwazanywe n'ubushake bw'umuntu, ahubwo abantu b'Imana bavugaga ibyavaga ku Mana bashorewe n'Umwuka Wera". Muri Bibiriya harimo ukuri kutajijinganywaho, kuko ubuhanuzi bwayo butameze nk'ubwa bamwe mu bagiye bahanura ibyerekeye imperuka ariko bikaza kugaragara ko ibyo bahanuye byari ibinyoma (Nka Nostradamus n'abandi); Igihe cyose Bibiriya yavuze ku byari bitaraba, byasohoye nk'uko yabivuze neza neza, nta na rimwe yigeze yibeshya.

Ibyo ukeneye kumenya niba wibaza uko wazarokoko iminsi y'imperuka bishingiye kuwibaza ibi bibazo:

1. Bibiriya ivuga iki ku byerekeye iminsi y'imperuka?
2. Nasobanukirwa nte ibyo Bibiriya ivuga ku byerekeye iminsi y'imperuka?
3. Ibyo Bibiriya ivuga ku byerekeye iminsi y'imperuka bifite izihe ngaruka ku buzima bwanjye bw'uyu munsi?

Ni ngombwa cyane gutekereza kuri ibi bibazo no kugerageza kubibonera ibisubizo bikwiriye. Igihe cyose utarabibonera ibisubizo, nta kabuza ko uzahora uhangayikishijwe no kumenya niba uzarokoka ibihe by'imperuka.

Ku byerekeranye n'iminsi y'imperuka, Bibiriya ivuga neza ko bimwe mu bitabo byo muri Bibiriya nka Daniel n'ibyahishuwe, ntibirimo gusa amateka y'ibyabaye, ahubwo harimo n'ubuhanuzi ku minsi y'imperuka. Mu ncamake, birazwi mu buryo butajijinganywaho ko umunsi umwe, utazwi, Yesu azaza gutware Itorero rye (Rapture). Nyuma y'aho, isi izahita itangira igihe cy'imibabaro ikomeye itewe na antikristo, icyo gihe kikazamara imyaka 7. Nyuma y'iyi myaka 7, Yesu azagarukana n'Itorero gutegeka mu isi, ari i Yerusalemu, mu ngoma izamara imyaka 1000 (Millenium).

Igihe kimwe, mu buryo butunguranye cyane, abantu bazabura abandi hano muri iyi si. Ibi bizwi nko "Kuzamurwa kw'Itorero". Iyi ntizaba ari imperuka, bizaba ari itangiriro ryayo. ubutumwa bwiza buravugwa, abantu barigishwa, bamwe barizera abandi bakinangira, ariko nta kizabibuza kuba, bizaba.

ESE IBYO BYOSE BIKWIRIYE KUGIRA IZIHE NGARUKA KU BUZIMA BWACU UYU MUNSI?

Hari Imyitwarire 3 ikwiriye kuturanga kugirango dutegure eho hazaza n'ibihe by'imperuka:

1. KUBAHA IMANA NO KUYUMVIRA: Yesu yabisubiyemo kenshi, yadusabye guhora twiteguye, ashobora kugaruka gutwara itorero igihe icyo aricyo cyose. Buri wese akwiriye gusuzuma imibereho ye, akareba niba ihuye n'umurongo Imana yifuza nk'uko tuwukura mu ijambo ryayo.

2. AGAKIZA: Imana yateganije inzira buri wese ubyifuza yacamo kugirango azarokoke iminsi y'imperuka. Iyo ni impano y'agakiza kabonerwa mu kwizera Yesu Kristo.

3. KWAMAMAZA INKURU NZIZA: Inkuru nziza buri wese yamenye akwiriye kutayigira ibanga. Menyesha benshi bashoboka ibyo wamenye, bibwire abandi kugirango na bo bazabashe kurokoka ibihe by'imperuka

Ibisigaye, ni ukwibuka ko hari umunsi buri wese azaca imbere y'intebe y'urubanza, "Kugirango buri muntu wese ahabwe ibikwiriye ibyo yakoze akiri mu mubir, ari ibyiza cyangwa ibibi". Ibyo Bibiriya yahanuye bigasohora, ni ikimenyetso ko ibitarasohora bizasohora umunsi umwe. Ku bizeye, Umunsi w'imperuka uzaba uw'ibyishimo n'umunezera, ku banze kwizera uzababera umunsi w'umujinya w'Imana.

Mu gusoza, Reka mvuge mu nteru imwe ngo:: "Niba wifuza kurokoka ibihe by'imperuka, suzuma niba warakiriya impano y'agakiza kabonerwa muri Yesu Kristo. Kuko Imana itatugeneye umujinya, ahubwo yatugeneye guheshwa agakiza n'Umwami wacu Yesu Kristo. 1 Abatesaloniki 5:9 ".

Ushobora kureba ibyerekeye ingoma y'imyaka 1,000 hano

Ibizaba mu bihe bya nyuma bizakurikirana bite? (Timeline)

Sun, 06 Nov 2016 21:44:31 +0000

Nyuma yo gushyirwaho ikimenyetso cy'inyamaswa, hari amahirwe uwagishyizweho azaba asigaranye?

Sun, 06 Nov 2016 21:28:51 +0000

Kuki imvugo ikoreshwa mu byahishuwe idasanzwe?

Sun, 06 Nov 2016 21:25:13 +0000

"Umunyabugome" ugoba guhishurwa uvugwa mu Batesaroniki ba 2:1-12 ni inde?

Sun, 06 Nov 2016 21:22:02 +0000

Ese Abisirayeli bose bazarokoka imperuka?

Sun, 06 Nov 2016 21:16:49 +0000

Ese itorero nirimara kugenda, Umwuka Wera azakomeze akore mu isi?

Sun, 06 Nov 2016 21:15:26 +0000

Ibyumweru 70 bya Daniel ni iki

Sun, 06 Nov 2016 21:13:38 +0000

Kuki bivugwa ko Eliya agomba kugaruka mbere y'imperuka (Malaki 4:5-6)

Sun, 06 Nov 2016 21:11:40 +0000

Ese mu by'ukuri twakwemeza ko kugaruka kwa Yesu kwegereje?

Sun, 06 Nov 2016 21:10:15 +0000

Ese Bibiriya ivuga ko gutera imbere kw'ikoranabuhanga (Technology) ari kimwe mu bimenyetso by'imperuka?

Sun, 06 Nov 2016 21:06:59 +0000

Ibyahishuwe igice cya 12 havugwa intambara mu ijuru: Ese ni igihe Satani yirukanwaga mu ijuru, cyangwa ni intambara y'imperuka?

Sun, 06 Nov 2016 21:01:44 +0000

Bishatse kuvuga iki kuvuka ko Yesu azaza nk'umujura?

Sun, 06 Nov 2016 20:59:16 +0000

Ese birashoboka kumenya igihe Yesu azagarukira?

Sun, 06 Nov 2016 20:58:03 +0000

Urubanza: Bizagenda bite?

Sun, 06 Nov 2016 20:57:03 +0000

Umuzuko uzaba ryari?

Sun, 06 Nov 2016 20:55:23 +0000

Nakora iki ngo nsobanukirwe igitabo cy'ibyahishuwe?

Sun, 06 Nov 2016 20:54:52 +0000

Igihe cy'imibabaro ya Yakobo ni iki?

Sun, 06 Nov 2016 20:52:26 +0000

Ese koko ababonye Isirayeli yongera kubaho nk'igihugu bazaba bakiriho igihe Yesu azagarukira?

Sun, 06 Nov 2016 20:51:37 +0000

Ibyahishuwe ni iki?

Sun, 06 Nov 2016 20:49:06 +0000

Abakuru 24 bavugwa mu byahishuwe ni bande?

Sun, 06 Nov 2016 20:47:00 +0000

Abantu 144,000 bavugwa mu byahishuwe ni bande?

Sun, 06 Nov 2016 20:45:57 +0000

Illuminati ni iki?

Sun, 06 Nov 2016 20:45:10 +0000

Ibihe by'imibabarao ikomeye ni iki (Great tribulation / Grande tribulation)?

Sun, 06 Nov 2016 20:44:35 +0000

Gogi na Magogi ni iki?

Sun, 06 Nov 2016 20:43:14 +0000